ᐂᓮᐊᓯᐅᑉ ᐊᒡᓚᖏᑦ 7 - ᐊᒡᓔᑦ ᐃᑦᔪᕐᖕᓁᑦᑐᑦ

ᐊᖓᔪᖅᑳᕐᔪᐊᕐᒧᑦ ᐂᕼᐊᓯᒧᑦ ᐅᖃᐅᓰᑦ

¹ ᐊᖓᔪᖅᑳᕐᔪᐊᖅ ᐂᕼᐊᔅ ᔪᑖᒥᐅᑉ ᐃᕐᓂᖓ, ᐅᓮᐊᐅᑉ ᐃᕐᖑᑕᖓ, ᐊᖓᔪᖅᑳᕐᔪᐊᖑᑎᓪᓗᒍ ᔫᑕᒻ, ᕆᔨᓐ ᐊᖓᔪᖅᑳᕐᔪᐊᖑᑎᓪᓗᒍ ᓯᕆᐊᒥ ᐲᑲᓗ ᕆᒪᓔᐊᐅᑉ ᐃᕐᓂᖓ ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓᑦ, ᐅᓇᑕᕆᐊᓚᐅᕐᐳᑦ ᔨᕉᓴᓕᒧᑦ, ᓵᓚᒋᔪᓐᓇᓚᐅᓐᖏᓛᓪᓕ.

² ᑍᕕᑎᐅᓪᓕ ᑭᖑᕚᖏᑦ ᑐᓴᕐᑎᑕᐅᒐᒥ, ᓯᕆᐊᒥᐅᑦ ᐅᓇᑕᕐᑐᒃᓴᖏᑦ ᐃᓴᕆᐊᓕᒥᐅᑦ ᓄᓇᖓᓐᓃᓕᕐᓂᖏᓐᓂᒃ ᑕᐱᖃᓕᕐᓂᖏᓐᓂᒡᓗ ᐃᕗᕅᒥᐅᑦ ᑭᖑᕚᖏᓐᓂᒃ, ᐆᒻᒪᑎᖓ ᐃᓄᖁᑎᓕᒫᖏᑕᓗ ᐆᒻᒪᑎᖏᑦ ᓴᔪᓕᕐᐳᑦ, ᓇᐹᕐᑐᑎᑐᑦ ᐊᓄᕆᒧᑦ ᐊᐅᓚᑎᑕᐅᔪᑎᑐᑦ.

³ ᑕᕝᕙ ᐊᑕᓂᖅ ᐂᓮᐊᓯᒧᑦ ᐅᖃᕐᐳᖅ, “ᐊᖓᔪᖅᑳᕐᔪᐊᖅ ᐂᕼᐊᔅ ᐅᐸᓚᐅᕈᒃ ᐃᕐᓃᑦ ᓯᐊ-ᔭᓲᑉ ᐱᖃᑎᒋᓗᒍ, ᑕᓯᐅᑉ ᖁᓪᓕᐅᑉ ᐊᖅᑯᑎᖓᓂ ᑕᑯᓂᐊᕐᐸᓯᒃ, ᑰᓕᐊᕆᓯᒪᔫᑉ ᐃᓱᐊᓂ ᐃᕐᕈᕐᑐᐃᕕᖕᒥᑦ ᑰᒃᑐᒥ.

⁴ ᐅᖃᐅᑎᓪᓗᒍᓗ, ‘ᐅᐸᓗᖎᕐᓯᒪᑦᓯᐊᕆᑦ, ᓂᐱᖃᖏᓪᓗᑎᑦ ᑲᑉᐱᐊᓱᖏᓪᓗᑎᒡᓗ, ᓴᐱᓕᕐᑍᓕᓗᑎᓪᓗ ᒪᕐᕈᐃᑦ ᑲᑉᐱᐊᓱᒃᑎᑦᓯᔪᑦ ᐱᑦᔪᑎᒋᓪᓗᒋᑦ ᐊᖓᔪᖅᑳᕐᔪᐊᑉ ᕆᔨᓂᐅᑉ ᓯᕆᐊᒥᐅᖑᖃᑎᖏᑕᓗ, ᐊᖓᔪᖅᑳᕐᔪᐊᕐᓗ ᕆᒪᓔᐊᐅᑉ ᐃᕐᓂᖓᑕ.

⁵ ᓯᕆᐊᓗ ᐃᕗᕅᒥᓗ ᕆᒪᓔᐊᐅᓪᓗ ᐃᕐᓂᖓ ᐅᖃᖃᑎᒌᒃᓯᒪᖕᒪᑕ ᑎᕐᓕᓈᕈᒪᓪᓗᓯ, ᐅᖃᕐᓗᑎᒃ,

⁶ “ᔫᑕ ᐅᓇᑕᕆᐊᓚᐅᕐᓚᕗᑦ, ᐃᓄᖏᓪᓗ ᓯᕘᕋᓵᕐᓗᒋᑦ, ᓵᓚᒋᓗᒋᑦ ᑕᐱᕐᑖᕆᓂᐊᕋᑦᑎᒍ, ᑕᐱᐅᓪᓗ ᐃᕐᓂᖓ ᐊᖓᔪᖅᑳᕐᔪᐊᓐᖑᕐᑎᓪᓗᒍ.”

⁷ “‘ᐊᑕᓂᕐᓕ ᒎᑎ ᐅᖃᕐᐳᖅ: “ᑕᒪᓐᓇ ᑲᔪᓯᓂᐊᓐᖏᓚᖅ, ᑍᒤᓐᓂᐊᕋᓂᓗ.

⁸ ᓯᕆᐊᒥᐅᑦ ᑕᒫᓯᑰᓯᒥᒃ ᓂᐊᖁᖃᕐᒪᑕ, ᑕᒫᓯᑰᓯᒥᐅᓪᓗ ᓂᐊᖁᖃᕐᓗᑎᒃ ᕆᔨᓐᒥᒃ. ᐃᕗᕅᒥᐅᓪᓗ ᐃᓅᖃᑎᒌᖕᓂᖓᑦ ᐊᓯᕈᕐᑕᐅᔪᒫᕐᐳᖅ ᐊᕐᕌᒍᑦ 65 ᓈᓚᐅᕐᑎᓐᓇᒋᑦ, ᐃᓄᖃᕈᓐᓃᕈᒫᕐᓗᓂᓗ.

⁹ ᐃᕗᕅᒥᐅᓪᓗ ᓂᐊᖁᕆᕚ ᓴᒥᐊᕆᐊ, ᓴᒥᐊᕆᐊᓪᓗ ᓂᐊᖁᕆᕚ ᕆᒪᓔᐊᐅᑉ ᐃᕐᓂᖓ. “‘“ᐅᒃᐱᕆᖏᒃᑯᑦᓯᐅᒃ ᑕᒪᓐᓇ, ᑕᕝᕙ ᑲᔪᓯᔪᓐᓇᕐᓂᐊᓐᖏᓚᓯ.”’”

ᐃᒫᓄᐃᓕᐅᑉ ᐃᓕᑕᕆᔭᐅᑦᔪᑎᒃᓴᖓ

¹⁰ ᐊᑕᓂᕐᓗ ᐅᖃᒃᑲᓐᓂᕆᕗᖅ ᐂᕼᐊᔅᒧᑦ,

¹¹ “ᐊᑕᓂᖅ ᒎᑏᑦ ᐅᖃᐅᑎᒍᒃ ᓇᓗᓁᒃᑯᑕᕐᒥᒃ ᑕᑯᑎᑕᐅᔪᒪᓗᑎᑦ ᑐᖁᖓᔪᑦ ᐃᓂᖓᓃᑦᑐᒥᒃ ᐅᕝᕙᓘᓐᓃᑦ ᕿᓚᖕᒥᓐᖔᕐᑐᒥᒃ.”

¹² ᐂᕼᐊᔅᓕ ᑭᐅᕗᖅ, “ᓇᓗᓁᒃᑯᑕᕐᒥᒃ ᑕᑯᔪᒪᖏᑦᑐᖓ ᐊᑕᓂᖅ ᐆᒃᑐᕈᒪᖏᓐᓇᒃᑯ.”

¹³ ᐂᓮᐊᓯᓕ ᐅᖃᓕᕐᐳᖅ, “ᓈᓚᒋᑦᓯ, ᑍᕕᑎᒧᑦ ᑭᖑᕚᖑᔪᓯ! ᐃᓅᖃᑎᑦᓯᓐᓄᑦ ᕿᓄᐃᓵᕈᑕᐅᔪᓐᓇᕋᓱᒋᓗᐊᕈᑦᓯ, ᒎᑎᐅᓪᓕ ᕿᓄᐃᓵᕈᑎᒌᓐᓇᕐᓂᐊᓐᖏᓛᓰ?

¹⁴ ᑍᒤᒻᒪᑦ, ᐊᑕᓂᐅᑉ ᓇᖕᒥᓂᖅ ᓇᓗᓁᒃᑯᑕᒃᓴᒥᒃ ᑐᓂᓯᕕᒋᔪᒫᕐᐹᓯ: ᑕᑯᒋᑦ, ᐊᕐᓇᖅ ᐃᓅᓱᒃᑐᖅ ᓄᑕᕋᒃᓴᕐᑖᕈᒫᕐᐳᖅ ᐃᕐᓂᕐᑖᕆᔭᓂᓗ ᐊᑦᓯᕈᒫᕐᐹ ᐃᒪᓐᔪᐃᓕᒥᒃ.

¹⁵ ᐃᒻᒧᖕᒥᒃ ᕼᐊᓂᒥᒡᓗ ᓂᕿᖃᕈᒫᕐᐳᖅ, ᓇᖕᒥᓂᕐᓱᕐᓗᓂ ᐊᑐᕆᐊᖃᕐᑕᒥᓂᒃ ᓂᕈᐊᕈᓐᓇᓕᕈᓂ ᐱᐅᖏᑦᑐᖅ ᓇᕐᕈᒋᔪᒫᕐᐹ ᐱᐅᔪᕐᓕ ᓂᕈᐊᖔᕐᓗᒍ.

¹⁶ ᓄᑲᑉᐱᐊᕐᓗ ᓇᖕᒥᓂᕐᓱᕐᓗᓂ ᐊᑐᕆᐊᖃᕐᑕᒥᓂᒃ ᓂᕈᐊᕈᓐᓇᓕᖅᑳᕐᑎᓐᓇᒍ ᐱᐅᖏᑦᑐᖅ ᓇᕐᕈᒋᓗᒍ ᐱᐅᔪᕐᓕ ᓂᕈᐊᖔᕐᓗᒍ, ᑍᒃᑯᐊᒃ ᐊᖓᔪᖅᑳᕐᔪᐊᒃ ᐃᓕᖕᓂᒃ ᓯᕘᕋᓵᕆᔫᒃ ᓄᓇᒋᔭᖏᒃ ᐃᓄᖃᕈᓐᓃᕈᒫᕐᐴᒃ.

¹⁷ “ᐊᑕᓂᖅ ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓᓂᒃ ᑎᑭᑎᑦᓯᓛᖕᒪᑦ ᐃᓕᖕᓄᑦ ᐃᓄᖁᑎᑦᓯᓐᓄᓪᓗ ᓯᕗᓕᕕᓂᑦᓯᓗ ᑭᖑᕚᖏᓐᓄᑦ ᑲᑉᐱᐊᓇᕐᑐᒥᒃ ᑍᒫᒃ ᑲᑉᐱᐊᓇᕐᑎᒋᔪᖃᓚᐅᕐᓯᒪᓐᖏᓚᖅ ᐃᕗᕅᒥᐅᑦ ᔫᑕᒥᑦ ᐊᕝᕗᑎᓚᐅᕐᓂᖓᑕ ᑭᖑᓂᖓᒍᑦ.

¹⁸ “ᑕᒪᓐᓇᓗ ᐅᓪᓗᖅ ᓇᓪᓕᐅᑎᒃᐸᑦ ᐊᑕᓂᖅ ᐅᕕᓐᖏᐊᕈᒫᕐᐳᖅ ᐄᑦᔨᑉᑎᒥᐅᑦ ᐊᓇᓐᖏᕐᑎᑐᑦ ᑎᑭᐅᑎᖁᓪᓗᒋᑦ ᑰᒑᓘᑉ ᓁᓕᐅᑉ ᐊᕙᓚᖓᓂᖏᓐᓂᑦ, ᐊᓯᕆᐊᒥᐅᓪᓗᑦᑕᐅᖅ ᑎᑭᐅᑎᖁᓪᓗᒋᑦ ᐃᒍᑦᓴᑎᑐᑦ ᐅᓄᕐᑎᒋᓗᑎᒃ ᓄᓇᒥᖕᓂᑦ.

¹⁹ ᖃᖅᑬᓪᓗ ᓇᕐᓴᓕᒫᖏᓐᓂ ᐃᓂᖃᓕᕈᒫᕐᐳᑦ, ᐃᓐᓈᕈᐃᓪᓗ ᕾᕈᓱᖏᓐᓂ, ᐅᕐᐱᒐᓕᒫᓪᓗ ᐃᓂᒋᓂᐊᕆᕔᑦ ᐃᕕᒡᔪᐊᓕᒫᓪᓗ.

²⁰ “ᐅᓪᓗᖅ ᑕᒪᓐᓇ ᓇᓪᓕᐅᑎᒃᐸᑦ ᐊᑕᓂᖅ ᕿᐅᕐᑍᔨᒃᓴᒥᒃ ᑰᒑᓘᑉ ᐊᑭᐊᓂᑦ ᑎᓕᓯᔪᒫᕐᐳᖅ ᐊᓯᕆᐊᒥᐅᑦ ᐊᖓᔪᖅᑳᕐᔪᐊᒻᒪᕆᖓᓐᓂᒃ, ᑖᑦᓱᒪᓗ ᐅᓐᖏᔭᕐᑕᐅᑎᑦᓱᒫᕐᐹᓯ ᕿᐅᕐᑕᕐᑕᐅᑎᓪᓗᓯᓗ, ᓂᐅᓯᓗ ᒥᖅᑯᐃᔭᕐᑕᐅᓗᑎᒃ.

²¹ “ᐅᓪᓗᒥᓗ ᑖᑦᓱᒪᓂ ᐊᖑᑦ ᐃᒻᒧᒃᓯᐅᒐᕐᒥᒃ ᐃᓅᓱᒃᑐᒥᒃ ᐊᑕᐅᓯᕐᒥᒃ ᐆᒪᑎᑦᓯᔪᒫᕐᐳᖅ ᓰᐲᖕᓂᒡᓗ ᒪᕐᕉᖕᓂᒃ;

²² ᐃᒻᒧᖃᓗᐊᕐᓂᖏᓐᓄᑦ ᐃᒻᒧᖁᑎᖃᓗᐊᒻᒪᕆᒍᒫᕐᐳᖅ, ᓂᕿᖃᕈᒫᕐᓗᓂᓗ ᓰᓯᓕᐊᕆᓯᒪᔪᒥᒃ, ᐊᒥᐊᒃᑯᑑᔪᓪᓗ ᓄᓇᒥᖕᓂ ᓂᕿᒃᓴᖃᕈᒫᕐᐳᑦ ᓰᓯᓕᐊᕆᓯᒪᔪᒥᒃ ᕼᐊᓂᒥᒡᓗ.

²³ “ᐅᓪᓗᒥᓗ ᑕᕝᕙᓂ ᐃᒤᑦᑐᖃᕈᒫᕐᐳᖅ, ᕔᓂᒃᓴᖃᕐᐸᓚᐅᕐᑐᒥ ᓇᐹᕐᑐᓂᒃ 1,000ᓂᒃ, ᑮᓇᐅᔭᓕᐅᕈᑕᐅᔪᓐᓇᕐᑐᓂᒃ ᓯᐅᓪᕕᕆᓂᒃ 1,000ᓂᒃ, ᐃᓂᖏᓐᓂ ᐱᕈᕐᑐᖃᓕᕈᒫᕐᐳᖅ ᐅᕐᐱᒐᕐᓂᒃ ᑲᑭᓪᓚᕐᓇᕐᑐᓕᖕᓂᒃ;

²⁴ ᐃᓄᐃᓪᓗ ᐱᑎᒃᓯᓖᑦ ᖃᕐᔪᖃᕐᑐᓪᓗ ᑕᒫᓃᓕᕈᒫᕐᐳᑦ, ᓄᓇ ᐅᕐᐱᒐᓕᐊᓘᓕᕈᒫᕐᒪᑦ ᑲᑭᓪᓚᕐᓇᕐᑐᓕᖕᓂᒃ ᓇᓂᑐᐃᓐᓇᖅ;

²⁵ ᐱᖑᐃᓪᓗ ᐱᕈᕐᓰᕕᓕᕆᑦᔪᑎᓄᑦ ᓴᓇᔭᐅᕙᓚᐅᕐᑐᑦ ᐅᕐᐱᒐᖃᓗᐊᕐᓂᖏᓐᓄᑦ ᑲᑭᓪᓚᕐᓇᕐᑐᓕᖕᓂᒃ ᐅᐸᒃᑕᐅᔭᕆᐊᒃᓴᖅ ᑲᑉᐱᐊᒋᔭᐅᓕᕈᒫᕐᐳᖅ; ᐃᒻᒧᒃᓯᐅᒐᕐᓄᑦ ᓰᐱᓄᓪᓗ ᓂᕆᓇᓱᐊᕐᕕᑐᐃᓐᓇᐅᓕᕐᓗᓂ.”