ᐂᓮᐊᓯᐅᑉ ᐊᒡᓚᖏᑦ 65 - ᐊᒡᓔᑦ ᐃᑦᔪᕐᖕᓁᑦᑐᑦ

ᒎᑎᐅᑉ ᓱᒋᐊᕐᓯᓂᖓ ᓇᕐᕈᒋᔨᒥᓂᒃ

¹ “ᐊᐱᕐᓱᕐᑕᐅᔪᓐᓇᕐᐳᖓ ᐅᕙᓐᓂᒃ ᐊᐱᕐᓱᓚᐅᕐᓯᒪᖏᑦᑐᓄᑦ, ᓇᓂᔭᐅᔪᓐᓇᕐᓗᖓᓗ ᐅᕙᓐᓂᒃ ᕿᓂᖏᑦᑐᓄᑦ. ᐅᖃᓚᐅᕐᐳᖓ, ‘ᒫᓃᑉᐳᖓ, ᒫᓃᑉᐳᖓ.’ ᐃᓅᖃᑎᒌᒡᔪᐊᓄᑦ ᐊᑎᓐᓄᑦ ᑐᒃᓯᐊᓚᐅᕐᓯᒪᖏᑦᑐᓄᑦ.

² ᐅᓪᓗᓕᒫᖅ ᐃᓴᒻᒥᕗᖓ ᐃᓄᖕᓄᑦ ᐊᑭᕋᕐᑐᕐᑐᓄᑦ, ᐃᓅᓯᖃᕐᑐᓄᑦ ᐊᖅᑯᑎᒃᑯᑦ ᐱᐅᖏᑦᑐᒃᑯᑦ, ᐃᓱᒪᓕᐊᕆᓯᒪᔭᑐᐃᓐᓇᕐᒥᖕᓂᒃ ᒪᓕᒃᑐᓄᑦ;

³ ᓂᓐᖓᒃᓮᓂᕐᓂᒃ ᐅᖃᐅᓯᕾᓐᓇᕐᑐᓄᑦ ᐅᕙᓐᓄᑦ, ᑮᓇᓐᓄᑦ ᓂᓪᓕᐊᓪᓗᑎᒃ ᑍᒪᓐᖓᑦ, ᑐᖁᑦᓯᓪᓗᑎᒃ ᐆᒪᔪᓂᒃ ᑐᓂᕐᕈᓯᕐᐳᑦ ᐱᕈᕐᓯᕐᕕᖕᓂ, ᐳᔫᕐᑎᒐᕐᓂᒃ ᑎᐱᑦᓯᐊᕆᒃᑐᓂᒃ ᑐᓂᕐᕈᓯᕐᐳᑦ ᖁᐊᕐᑎᑕᒐᕐᓂ ᐅᔭᕋᓕᐊᕆᓯᒪᔪᓂ;

⁴ ᐃᓗᕕᖃᕐᕕᖕᓃᒋᐊᕐᑐᖃᑦᑕᕐᐳᑦ, ᐅᓐᓄᐊᒃᑯᑦ ᐱᒑᕐᓗᑎᒃ ᐃᓗᕕᕐᓃᑉᐳᑦ ᐃᔨᕐᓯᒪᕕᖕᒥᖕᓂ; ᓂᕆᓪᓗᑎᒃ ᑰᒃᑰᓯᕕᓂᕐᓂᒃ, ᖃᔪᓕᐅᕐᐸᒃᓗᑎᒃ ᓇᕐᕈᓇᕐᑐᓂᒃ ᐅᒃᑯᓯᖕᒥᖕᓂ;

⁵ ᐅᖃᕐᓗᑎᒡᓗ, ‘ᐃᓱᒤᓐᓇᕐᕆᑐᐃᓐᓇᕆᑦᓯ, ᐅᕙᓐᓄᑦ ᖃᒡᓕᓗᐊᕐᑍᓕᓗᓯ, ᐃᓕᑦᓯᓐᓄᑦ ᐃᑦᔪᕐᓁᓗᐊᕋᒪ.’ ᑍᒤᓕᐅᕐᑐᑦ ᐅᕙᓐᓂᒃ ᓂᓐᖓᒃᓮᕗᑦ ᑎᐱᓗᒃᑐᑎᑐᑦ, ᐅᓪᓗᓕᒫᖅ ᐃᑯᒪᔪᑎᑐᑦ ᑍᒤᑉᐳᑦ.

⁶ “ᑕᑯᒋᑦ, ᐊᒡᓚᒃᓯᒪᕗᑦ ᓵᓐᓂ; ᓂᐰᑐᐃᓐᓇᕐᓂᐊᓐᖏᓚᖓ ᐊᑭᓂᐊᕈᒫᕐᐳᖓ, ᐃᓛᒃ ᐊᑭᓂᐊᕐᓂᕋ ᓵᖏᓐᓄᑦ ᐱᑎᑦᓱᒫᕐᐸᕋ.

⁷ ᐊᔪᕐᑐᓕᓂᖏᑦ ᓯᕗᓕᕕᓂᖏᑕᓗ ᐊᔪᕐᑐᓕᓂᖏᑦ ᑲᑎᓪᓗᒋᑦ, ᐊᑕᓂᖅ ᐅᖃᕐᐳᖅ; ᑐᓂᕐᕈᓯᖃᑦᑕᓚᐅᕐᓂᖏᓐᓄᑦ ᐃᓯᕐᓗᐊᕐᓂᑎᑦᓯᓪᓗᑎᒃ ᖃᖅᑬᑦ ᖄᖏᓐᓂ, ᐱᖑᕐᓂᓗ ᓇᕐᕈᓇᕐᓯᑎᑦᓯᓪᓗᑎᒃ ᐅᕙᓐᓂᒃ, ᑍᒤᒻᒪᑦ ᓵᖓᓐᓄᐊᕐᓯᔪᒫᕐᐳᖓ ᐊᑭᓂᐊᕐᕕᐅᔪᒃᓴᐅᓂᖏᓐᓂᒃ ᐊᔪᕐᑐᓕᓂᕆᓯᒪᔭᖏᑦ ᒪᓕᒡᓗᒋᑦ.”

⁸ ᐃᒫᒃ ᐊᑕᓂᖅ ᐅᖃᕐᐳᖅ, “ᕔᓂ ᓴᖅᑭᒻᒪᑦ ᐸᐅᕐᖓᓂ ᑲᑎᓐᖓᔪᑦ ᖃᒐᕐᑕᐅᕕᖕᓂᑦ, ᐃᓄᐃᓪᓗ ᐅᖃᕐᐸᖕᒪᑕ, ‘ᐊᒥᐊᒃᑯᖏᑦ ᖃᕐᑕᐅᑦᑍᓕᓕᑦ, ᓮᒻᒪᕐᑎᑕᐅᓇᕐᑐᖃᕐᒪᑕ.’ ᑍᒫᒃᑕᐅᖅ ᐱᔨᒃᑲ ᐱᓪᓗᒋᑦ ᓄᖑᑦᓱᒫᓐᖏᓚᒃᑲ.

⁹ ᑭᖑᕚᕐᑖᕐᑎᑦᓱᒫᕐᐸᒃᑲ ᔧᑰᑉ ᑭᖑᕚᖏᓐᓂᑦ ᐱᔪᓂᒃ, ᔫᑕᐅᓪᓗ ᑭᖑᕚᖏᑦᑕ ᖃᖅᑲᖁᑎᒃᑲ ᐱᒋᔪᒫᕐᐹᑦ; ᓂᕈᐊᕐᓯᒪᔭᒪ ᐱᒋᓕᕈᒫᕐᐹᑦ, ᐱᔨᒃᑲᓗ ᓄᓇᖃᕈᒫᕐᐳᑦ ᑕᕝᕙᓂ.

¹⁰ ᓵᕋᓐ ᓄᓇᖓ ᓰᐱᓕᕆᕝᕕᐅᔪᒫᕐᐳᖅ, ᐂᑯᐊᓪᓗ ᓇᕐᓴᖓ ᐆᒪᔪᖁᑎᖏᓐᓄᑦ ᓄᖅᑲᖓᕕᐅᕙᒡᓗᓂ, ᐃᓄᖁᑎᓐᓄᑦ ᐅᕙᓐᓂᒃ ᕿᓂᓚᐅᕐᑐᓄᑦ.

¹¹ “ᐃᓕᑦᓯᓕ ᐅᕙᓐᓂᒃ ᑐᓄᑦᓯᓯᒪᔪᑦ, ᖃᖅᑲᖁᑎᓐᓂᒡᓗ ᐃᑦᔪᕐᓁᑦᑐᒥᒃ ᐳᐃᒍᕐᓯᒪᔪᑦ, ᓵᒥᒃ ᐋᖅᑭᒃᓱᐃᕙᒃᑐᓄᑦ ᓇᓚᐅᑦᑍᓂᕐᓗᒃᑐᓂᒃ ᑕᑎᖃᕐᓗᑎᒃ, ᒪᒃᑲᐅᔭᐅᑉ ᐃᒪᖓᓄᑦ ᖃᐅᔨᓇᓱᐊᕈᑎᖃᕐᐸᒃᑐᓄᑦ ᓯᕗᓂᒃᓴᒥᖕᓂᒃ.

¹² ᓯᕗᓂᒃᓴᖃᕐᑎᑦᓱᒫᕐᐸᑦᓯ ᓴᕕᒡᔪᐊᕐᒧᑦ ᑐᖁᑕᐅᑎᓪᓗᓯ, ᑕᒪᑦᓯ ᑐᖁᕅᔨᓄᑦ ᐅᑯᔪᒫᕐᐳᓯ; ᕾᖁᔨᑎᓪᓗᖓ ᐃᓕᑦᓯᓐᓂᒃ ᑭᐅᓚᐅᖏᓐᓇᑦᓯ, ᐅᖃᕐᑎᓪᓗᖓ ᓈᓚᓚᐅᖏᓐᓇᑦᓯ, ᐱᐅᖏᑦᑐᓂᒃ ᐱᓇᓱᐊᑐᐃᓐᓇᓚᐅᕋᑦᓯ ᑕᑯᓐᓇᕐᑎᓪᓗᖓ, ᖁᕕᐊᒋᓐᖏᑕᓐᓂᒡᓗ ᓂᕈᐊᖔᕐᓗᓯ.”

¹³ ᑍᒤᒻᒪᑦ ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: “ᑕᑯᓕᕆᑦᓯ, ᐱᔨᒃᑲ ᓂᕆᔪᒫᕐᐳᑦ, ᐃᓕᑦᓯ ᑳᒃᑎᓪᓗᓯ; ᑕᑯᒋᓪᓗ, ᐱᔨᒃᑲ ᐃᒥᕈᒫᕐᐳᑦ, ᐃᓕᑦᓯᓕ ᐃᒥᕈᒍᒫᕐᐳᓯ; ᑕᑯᒋᓪᓗ, ᐱᔨᒃᑲ ᖁᕕᐊᓱᒍᒫᕐᐳᑦ, ᐃᓕᑦᓯᓕ ᑲᓐᖑᓱᒃᑎᑕᐅᔪᒫᕐᐳᓯ;

¹⁴ ᑕᑯᒋᑦᓯ, ᐱᔨᒃᑲ ᐃᓐᖏᕈᒫᕐᐳᑦ ᐆᒻᒪᑎᒥᒍᑦ ᖁᕕᐊᓱᖕᓂᕐᒧᑦ, ᐃᓕᑦᓯᓕ ᕿᐊᔪᒫᕐᐳᓯ ᐆᒻᒪᑎᑦᓯᒍᑦ ᐋᓐᓂᐊᕐᓂᕐᒧᑦ, ᕿᐊᓗᓯᓗ ᐆᒻᒪᑎᑦᓯᒍᑦ ᓯᖁᒥᓯᒪᓂᕐᒧᑦ.

¹⁵ ᐊᑎᕐᓯ ᐃᓕᔪᒫᕐᐸᓯ ᓂᕈᐊᕐᓯᒪᔭᓐᓄᑦ ᓇᕐᕈᒋᔭᒃᓴᓐᖑᖁᓪᓗᒋᑦ; ᐊᑕᓂᐅᓪᓗ ᒎᑎᐅᑉ ᑐᖁᑦᓱᒫᕐᐹᓯ; ᐱᔨᓂᓕ ᑍᒎᓯᖃᓕᕐᑎᑦᓱᒫᕐᐰᑦ ᐊᑎᖏᑕ ᐊᓯᐊᓂᒃ.

¹⁶ ᓇᓪᓕᐊᑦ ᓄᓇᒥᓂᒃ ᓮᒻᒪᕐᑎᑕᐅᖁᔨᓗᓂ ᕿᓄᔪᖅ, ᓮᒻᒪᕐᑎᑕᐅᔪᒫᕐᐳᖅ ᒎᑎᒧᑦ ᓱᓕᑦᓯᐊᕐᑐᒧᑦ; ᐅᖃᕕᒍᒪᔪᖅ ᓴᖑᑎᓐᓂᐊᖏᓪᓗᒍ, ᐅᖃᕕᖕᓂᐊᕐᐳᖅ ᒎᑎᐅᑉ ᓱᓕᑦᓯᐊᕐᓂᖓᒍᑦ; ᐃᓱᐊᖏᑦᑐᕐᓯᐅᕐᓂᐅᓚᐅᕐᑐᑦ ᐃᖅᑲᐅᒪᔭᐅᔪᒫᖏᒻᒪᑕ, ᐃᔨᒪᓗ ᓵᖓᓂ ᑕᑯᒃᓴᐅᔪᓐᓃᕐᓗᑎᒃ.”

ᒎᑎᐅᑉ ᓄᑖᓐᖑᕐᑎᕆᓂᖓ

¹⁷ “ᑕᑯᒋᑦ, ᐱᓐᖑᕐᑎᑦᓯᔪᒫᕐᐳᖓ ᕿᓚᖕᒥᒃ ᓄᑖᒥᒃ, ᓄᓇᒥᒡᓗ ᓄᑖᒥᒃ, ᐱᑐᕾᑦ ᐃᖅᑲᐅᒪᔭᐅᔪᒫᓐᖏᓚᑦ ᐃᓱᒪᓇᕈᓐᓃᕐᓗᑎᒡᓗ.

¹⁸ ᐊᓕᐊᓁᒍᓱᒡᓗᓯ ᖁᕕᐊᓱᕕᒡᔪᐊᕆᑦᓯ ᐃᓱᖃᖏᑦᑐᒧᑦ ᐱᓐᖑᕐᑎᑦᓱᒫᕐᑕᒃᑲ ᐱᓪᓗᒋᑦ, ᑕᑯᒋᓪᓗ, ᔨᕉᓴᓕᒻ ᐱᓐᖑᕐᑎᑦᓱᒫᕐᐸᕋ ᖁᕕᐊᓱᒡᕕᐅᖁᓪᓗᒍ, ᐃᓄᖏᓪᓗ ᖁᕕᐊᓇᕐᓗᑎᒃ.

¹⁹ ᔨᕉᓴᓕᒻ ᖁᕕᐊᓲᑎᒋᔪᒫᕐᐸᕋ, ᐃᓄᖏᓪᓗ ᖁᕕᐊᒋᓗᒋᑦ; ᕿᐊᕙᓗᒃᑐᑦ ᑐᓴᕐᓴᐅᓚᐅᕐᓯᒪᔪᓐᓃᕈᒫᕐᐳᑦ ᑕᕝᕙᓂ, ᑲᑉᐱᐊᓱᒡᕙᓗᒡᒥᒡᓗ ᓂᓪᓕᕐᑐᖃᓚᐅᕐᓯᒪᔪᓐᓃᕐᓗᓂ.

²⁰ ᐃᓅᕋᑖᕐᑐᓂᒃ ᑕᕝᕙᓂ ᐱᑕᖃᕈᒫᓐᖏᓚᖅ ᐅᓪᓗᓂᒃ ᐅᓄᖏᑦᑐᓂᒃ ᐃᓅᓚᐅᑲᑐᐃᓐᓇᕐᑐᓂᒃ, ᐃᑦᑑᓕᕐᑐᓂᒡᓗ ᐃᓅᓯᕆᒋᐊᖃᕐᑕᒥᖕᓂᒃ ᓈᔨᓯᒪᖏᑦᑐᓂᒃ ᐱᑕᖃᕈᒫᖏᓐᓂᕗᖅ; 100ᓂᒃ ᐊᕐᕌᒍᖃᕐᓗᓂ ᑐᖁᔪᖅ ᐃᓅᓱᓗᐊᕐᓂᕋᕐᑕᐅᔪᒫᕐᐳᖅ, ᐊᔪᕐᑐᓕᔪᖅ 100ᓂᒃ ᐊᕐᕌᒍᖃᓕᕐᓗᓂ ᑐᖁᔪᖅ ᐃᓱᒪᓂᕐᓗᒡᕕᐅᓯᒪᔪᒥᒃ ᐅᖃᕐᑕᐅᔪᒫᕐᐳᖅ.

²¹ ᓇᖕᒥᓂᒃᓴᒥᖕᓂᒃ ᐃᒡᓗᓕᐅᖃᑦᑕᕈᒫᕐᐳᑦ ᐃᓂᒋᓂᐊᕐᑕᒥᖕᓂᒃ; ᐱᕈᕐᓰᕕᓕᐅᕈᒫᕐᐳᑦ ᐸᐅᕐᖓᖃᐅᑎᒃᓴᓂᒃ ᐸᐅᕐᖓᖏᓪᓗ ᓂᕿᒋᕙᒡᓗᒋᑦ.

²² ᐊᓯᒥ ᐃᒡᓗᒋᓂᐊᕐᑕᖏᓐᓂᒃ ᐃᒡᓗᓕᐅᕐᑐᖃᕐᐸᒍᓐᓃᕈᒫᕐᐳᖅ, ᐱᕈᕐᓰᕕᓕᐅᕐᐸᒍᓐᓃᕐᓗᑎᒡᓗ ᐊᓯᖏᑕ ᓂᕿᒃᓴᖃᕐᕕᒋᓂᐊᕐᑕᖏᓐᓂᒃ, ᓇᐹᕐᑑᑉ ᐆᒪᓂᕆᕙᒃᑕᖓᑐᑦ ᐃᓄᖁᑎᒃᑲ ᐆᒪᑯᑖᒃᑎᒋᖃᑦᑕᕉᒪᕐᐳᑦ, ᓂᕈᐊᕐᓯᒪᔭᒃᑲ ᐱᓇᓱᐊᕈᑎᒋᖃᑦᑕᕐᑕᒥᖕᓂᒃ ᐊᒡᒐᖕᒥᖕᓄᑦ ᐊᑯᓂ ᖁᕕᐊᓲᑎᖃᖃᑦᑕᕈᒫᕐᐳᑦ.

²³ ᐱᓇᓱᐊᕐᑕᒥᖕᓂᒃ ᑕᒪᐅᖓᑐᐃᓐᓈᕐᑎᑦᓯᔪᒫᓐᖏᓚᑦ, ᕿᑐᕐᖏᐅᖃᑦᑕᕈᓐᓃᕐᓗᑎᒡᓗ ᖃᓄᐃᓐᓇᕐᑐᓄᑦ ᑎᑭᑕᐅᕙᒃᑐᓂᒃ; ᕿᑐᕐᖓᕆᔭᐅᔪᒫᕐᒪᑕ ᐊᑕᓂᕐᒧᑦ ᓮᒻᒪᕐᑎᑕᐅᓯᒪᓗᑎᒃ. ᑭᖑᕚᖏᓐᓄᑦ ᑎᑭᐅᑎᓯᒪᔪᒥᒃ.

²⁴ ᐅᖃᓚᐅᕐᑎᓐᓇᒋᑦ ᓱᓕ ᑭᐅᖃᑦᑕᕈᒫᕐᐸᒃᑲ, ᐅᖃᕇᕐᑎᓐᓇᒋᑦ ᓱᓕ ᑐᓴᖃᑦᑕᕈᒫᕐᐸᒃᑲ.

²⁵ ᐊᒪᕈᖅ ᓰᐱᐅᓪᓗ ᓄᕐᕋᖓ ᓂᕆᓇᓱᖃᑎᒌᒍᒫᕐᐴᒃ, ᓛᔭᓗ ᐃᕕᒃᓱᒐᕐᓂᒃ ᓂᕿᖃᕈᒫᕐᐳᖅ ᐃᒻᒧᒃᓯᐅᒐᕐᑎᑐᑦ; ᖁᒡᓗᒋᐊᓪᓕ ᓄᓇᐅᑉ ᐳᔪᕋᖓᓂᒃ ᓂᕆᔭᒃᓴᖃᕈᒫᕐᐳᑦ, ᐋᓐᓂᖃᑦᑕᐅᑎᔪᒫᓐᖏᓚᑦ ᑐᖁᕋᐅᑎᓇᑎᒡᓗ ᐃᓘᓐᓇᑎᒃ ᖃᖅᑲᖁᑎᓐᓂ ᐃᑦᔪᕐᓁᑦᑐᒥ.” ᐊᑕᓂᖅ ᑍᒪᒃ ᐅᖃᕐᐳᖅ.