ᐂᓮᐊᓯᐅᑉ ᐊᒡᓚᖏᑦ 64 - ᐊᒡᓔᑦ ᐃᑦᔪᕐᖕᓁᑦᑐᑦ1 ᐊᑏ ᕿᓚᒃ ᐊᓕᒡᓗᒍ ᐊᖅᑲᓚᐅᕆᑦ, ᖃᖅᑳᓗᐃᑦ ᓴᔪᒃᐱᓗᖕᓂᐊᕐᒪᑕ ᓇᔫᑎᓂᕐᓄᑦ. 2 ᓲᕐᓗ ᐃᑯᒪ ᐃᑯᐊᓪᓔᕙᖕᒪᑦ ᐊᕚᓚᕿᐊᓂᒃ, ᐃᑯᒪᓗ ᐃᒪᕐᒥᒃ ᑎᕐᑎᓕᕐᑎᑦᓯᕙᒃᓗᓂ, ᐊᑏᑦ ᖃᐅᔨᔭᐅᓕᖁᓪᓗᒍ ᐊᑭᕋᕐᑐᕐᑎᖕᓄᑦ, ᐃᓅᖃᑎᒌᒡᔪᐊᓪᓗ ᓴᔪᖁᓪᓗᒋᑦ ᓇᔫᑎᓂᕐᓄᑦ! 3 ᑲᒪᓇᕐᑐᕐᔪᐊᓂᒃ ᐱᓇᓱᐊᖃᑦᑕᓚᐅᕋᕕᑦ ᓂᕆᐅᒃᑎᓐᓇᑕ, ᐊᖅᑲᕋᕕᑦ, ᖃᖅᑳᓗᒃ ᓴᔪᒃᐱᓗᓚᐅᕐᐳᖅ ᓇᔫᑎᓂᕐᓄᑦ. 4 ᑍᑦᓱᒪᓂᐊᓗᖕᓂᑦ ᑐᓴᕐᑐᖃᓚᐅᕐᓯᒪᓐᖏᓚᖅ ᓯᐅᑎᒥᖕᓄᓪᓗ ᑐᑭᓯᔪᖃᓚᐅᕐᓯᒪᓇᓂ, ᐃᔩᖕᓄᓪᓗ ᑕᑯᔪᖃᓚᐅᕐᓯᒪᓐᖏᓚᖅ ᒎᑎᒥᒃ ᐊᓯᖕᓂᒃ, ᐱᓇᓱᐊᕈᑦᔨᓲᒥᒃ ᐅᑕᖅᑭᔨᒥᓄᑦ. 5 ᑲᑎᓯᓲᖑᕗᑎᑦ ᖁᕕᐊᒋᓪᓗᒍ ᐃᓱᐊᕐᑐᒦᑦᓱᒪᔪᓂᒃ, ᑖᒃᑯᓄᖓ ᐱᓂᐊᕐᓯᒪᔭᕐᓂᒃ ᐃᖅᑲᐅᒪᔪᓄᑦ, ᑕᑯᒋᑦ ᓂᓐᖓᓚᐅᕐᐳᑎᑦ ᐊᔪᕐᑐᓕᓚᐅᕋᑦᑕ; ᐊᑯᓂ ᐊᔪᕐᑐᓕᓂᕐᒦᓕᕋᑦᑕ; ᑕᕝᕙ ᐱᐅᓕᔭᐅᔭᕆᐊᖃᓕᕐᐳᒍᑦ. 6 ᐃᓘᓐᓇᑕ ᓴᓗᒪᖏᑦᑐᑎᑐᑦ ᓇᕐᕈᓇᕐᓯᕗᒍᑦ, ᐃᓱᐊᕐᑑᓇᓱᐊᕐᓂᕗᓪᓗ ᖃᓪᓗᓈᕐᑕᑎᑐᑦ ᓴᓗᒤᑦᑐᑎᑐᑦ ᑍᒤᑉᐳᑦ, ᐅᖃᐅᔭᑎᑐᓪᓗ ᑐᖁᓕᖓᔪᑎᑐᑦ ᑍᒤᑉᐳᒍᑦ, ᐊᔪᕐᑐᓕᓂᑦᑕᓗ ᐊᓄᕆᒧᑦ ᑎᒃᑕᐅᔪᑎᑐᑦ ᑍᒤᑎᑉᐹᑎᒍᑦ. 7 ᓇᓪᓕᐊᓐᓂᒃ ᐊᑎᕐᓄᑦ ᑐᒃᓯᐊᕐᑐᖃᓚᐅᕐᓯᒪᔪᓐᓃᕐᐳᖅ, ᐊᒃᓱᕈᕐᓗᓂᓗ ᐃᓕᖕᓄᑦ ᐊᔪᐃᓐᓇᕐᑐᖃᓚᐅᕐᓯᒪᔪᓐᓃᕐᐳᖅ; ᑮᓁᑦ ᐅᕙᑦᑎᓐᓄᑦ ᐃᔨᕐᓯᒪᓕᕋᕕᐅᒃ, ᓄᖑᑕᐅᕙᓪᓕᐊᑐᐃᓐᓇᓕᕐᐳᒍᑦ ᐊᔪᕐᓂᑦᑎᓐᓄᑦ. 8 ᐊᑕᓃᕐᓕ ᐊᑖᑕᒋᕙᑦᑎᒋᑦ; ᒪᕐᕋᐅᕗᒍᑦ ᐃᕝᕕᑦ ᒪᕐᕋᓕᐅᕐᑎᐅᓪᓗᑎᑦ; ᐊᒡᒐᖕᓄᓪᓗ ᐃᓘᓐᓇᑕ ᓴᓇᔭᐅᓂᑰᓪᓗᑕ. 9 ᓂᓐᖓᐅᒪᔪᐊᓘᑦᑍᓕᒋᑦ ᑕᐅᕗᖓᓕᒫᖅ, ᐊᑕᓃᖅ, ᐊᔪᕐᑐᓕᓂᕗᑦ ᐃᖅᑲᐅᒤᓐᓇᕐᓂᐊᕐᓇᒋᑦ ᐃᓱᖃᖏᑦᑐᒧᑦ; ᑕᑯᒋᑦ ᐃᓱᒪᓚᐅᕆᑦ ᐃᓕᖕᓄᑦ ᐃᓘᓐᓇᑕ ᐃᓄᖁᑎᒋᔭᐅᓂᑦᑎᓐᓂᒃ. 10 ᐃᑦᔪᕐᓁᑦᑐᑦ ᐃᒡᓗᒐᓴᒡᔪᐊᖁᑎᑎᑦ ᓱᓇᖃᖏᑦᑐᓐᖑᕐᓯᒪᕗᑦ, ᓮᐅᓂᓗ ᓱᓇᖃᖏᑦᑐᒦᓕᕐᐳᖅ, ᔨᕉᓴᓕᒻᓗ ᐃᓄᖃᕈᓐᓃᕐᓗᓂ. 11 ᐃᑦᔪᕐᓁᑦᑐᖅ ᐃᒡᓗᖁᑎᕗᑦ ᑕᑯᒥᓇᕐᑐᕐᔪᐊᖅ, ᓯᕗᓕᑦᑕ ᓂᕐᑐᐃᕕᒋᕙᓚᐅᕐᑕᖓ ᐃᓕᖕᓂᒃ, ᐃᑯᐊᓪᓚᒃᑕᐅᓪᓗᓂ ᓄᖑᓯᒪᕗᖅ, ᐃᓂᑦᓯᐊᕆᓚᐅᕐᑕᓕᒫᕗᓪᓗ ᐃᒡᓗᕕᓂᑐᐃᓐᓇᐅᓕᕐᐳᑦ. 12 ᑕᒪᒃᑯᐊ ᑍᒤᓕᖓᑎᓪᓗᒋᑦ ᓱᓕ ᐊᐅᓚᑦᔭᒋᐊᕐᓂᐊᓐᖏᓚᑏᑦ, ᐊᑕᓃᖅ? ᓱᓕ ᓂᐱᖃᕐᓂᐊᓐᖏᓚᑏᑦ, ᓱᒋᐊᕐᓯᓃᑦ ᑕᒪᓐᓇᑑᓂᐊᓕᕐᐹ ᑕᐅᕗᖓᓕᒫᖅ? |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society