ᐂᓮᐊᓯᐅᑉ ᐊᒡᓚᖏᑦ 61 - ᐊᒡᓔᑦ ᐃᑦᔪᕐᖕᓁᑦᑐᑦᐅᖃᐅᓰᑦ ᑐᓴᕈᒥᓇᕐᑐᑦ ᐱᐅᓕᔭᐅᓂᕐᒥᒃ 1 ᐊᑕᓂᐅᑉ ᒎᑎᐅᑉ ᐊᓂᕐᓂᖓᑕ ᓇᔪᕐᐹᖓ, ᐊᑕᓂᐅᑉ ᐅᕐᓱᕐᑎᓚᐅᕐᒪᖓ ᐅᖃᐅᓯᕐᓂᒃ ᑐᓴᕈᒥᓇᕐᑐᓂᒃ ᐅᖃᓪᓚᖁᓪᓗᖓ ᓵᓚᐅᓯᒪᔪᓄᑦ; ᑎᓕᓚᐅᕐᐹᖓᓗ ᒪᒥᑎᑦᓯᖁᓪᓗᖓ ᐆᒻᒪᑎᒥᒍᑦ ᓯᖁᒥᓯᒪᔪᓂᒃ, ᑎᒍᔭᐅᓯᒪᔪᓂᒡᓗ ᐅᖃᐅᑦᔨᖁᓪᓗᖓ ᐊᓂᕕᒃᓴᖏᓐᓂᒃ, ᑎᒍᔭᐅᓯᒪᕕᖕᒦᑦᑐᓂᒡᓗ ᐊᓂᑎᑦᓯᖁᓪᓗᖓ. 2 ᐅᖃᐅᑦᔨᖁᓪᓗᖓᓗ ᐊᕐᕌᒍᒥᒃ ᐊᑕᓂᐅᑉ ᐊᑲᐅᓈᕐᕕᒋᓕᕐᑕᖓᓂᒃ, ᒎᑎᑦᑕᓗ ᐊᑭᓂᐊᕐᕕᒃᓴᖓᑕ ᐅᓪᓗᖓᑕ ᓇᓪᓕᐅᑎᓯᒪᓕᕐᓂᖓᓂᒃ; ᕿᒃᓵᒃᑐᓕᒫᑦ ᓮᒻᒪᕐᑎᑕᐅᖁᓪᓗᒋᑦ; 3 ᓮᐅᓂᒥ ᕿᒃᓵᒃᑐᑦ ᐃᑲᔪᕆᐊᕐᓗᒋᑦ, ᑕᑯᒥᓇᕐᑐᕐᔪᐊᕐᒥᒃ ᐱᑖᖁᓪᓗᒋᑦ ᐊᕐᔭᓕᓃᑦ ᐃᓇᖏᕐᓗᒋᑦ, ᐃᓔᓕᕿᓂᕐᒧᑦ ᕿᒃᓵᒃᑐᑦ ᖁᕕᐊᓱᖕᓂᐅᑉ ᐅᕐᓱᖓᓂᒃ ᑐᓂᓯᕕᐅᖁᓪᓗᒋᑦ, ᓂᕐᑐᐃᓂᕐᒥᒃ ᐊᓐᓄᕌᕐᑎᓪᓗᒋᑦ ᑕᖃᓯᒪᔪᒥᒃ ᐊᓂᕐᓂᖃᕐᑐᑦ; ᓇᓛᒎᕐᑐᒥᒃ ᐆᒃᒥᒃ ᓇᐹᕐᑐᒥᒃ ᑍᔭᐅᓕᖁᓪᓗᒋᑦ, ᐊᑕᓂᐅᑉ ᑲᓐᖓᕐᓱᕐᑕᖓᓂᒃ ᐱᕈᕐᓯᐊᒃᓴᒥᒃ, ᓂᕐᑐᕐᑕᐅᑦᔪᑎᒃᓴᒥᓄᑦ. 4 ᐃᒡᓗᒐᓴᒡᔪᐊᓂᒃ ᓴᓇᓕᕈᒫᕐᐳᑦ ᐊᑯᓂ ᓯᖁᑦᑎᕐᓯᒪᓕᓚᐅᕐᑐᓂᒃ, ᒪᑭᑎᑦᓯᔪᒫᕐᓗᑎᒡᓗ ᐅᕐᕈᑎᑕᐅᓯᒪᔪᑐᖃᕐᓂᒃ; ᐃᒡᓗᒐᓴᒡᔪᐊᓪᓗ ᓄᑕᐅᓯᓕᕈᒫᕐᐰᑦ ᓯᖁᑦᑎᕐᓯᒪᔪᑦ, ᓯᖁᑦᑎᕐᓯᒪᓚᐅᕐᑐᑦ ᑭᖑᕚᕇᒐᓴᒡᔪᐊᓂ ᐅᓄᕐᑐᓂ. 5 ᓄᓇᖃᑎᒋᓐᖏᑕᑦᓯᓐᓄᑦ ᓰᐱᖁᑎᓯ ᐰᕆᔭᐅᓕᕈᒫᕐᐳᑦ, ᐃᓅᖃᑎᒋᓐᖏᑕᓯᓗ ᓄᓇᒥᒃ ᐱᕈᕐᓰᕕᑦᓯᓐᓂᒃ ᒪᒃᐱᕐᑎᕆᔨᒋᓗᒋᑦ ᕔᓂᒃᓴᖁᑎᑦᓯᓐᓂᒡᓗ ᑲᒪᔨᒋᓗᒋᑦ. 6 ᑍᔭᐅᔪᒫᕐᐳᓯᓗ ᐊᑕᓂᐅᑉ ᑐᓂᕐᕈᓯᕐᑎᑦᓯᔨᖁᑎᖏᓐᓂᒃ, ᐅᖃᐅᓯᐅᔪᒫᕐᐳᓯᓗ ᒎᑎᑦᑕ ᐱᔨᑦᓯᕐᑎᖁᑎᖏᓐᓂᒃ; ᓂᕿᖃᕈᒫᕐᐳᓯ ᐊᒃᓗᐃᑦᑐᑦ ᐃᓅᖃᑎᒌᒡᔪᐊᑦ ᓂᕿᖁᑎᖏᓐᓂᒃ, ᐊᒡᓗᐃᑦᔪᑎᖏᓐᓂᒡᓗ ᐱᓐᓇᕐᓇᐅᑎᖃᕈᒫᕐᐳᓯ. 7 ᑲᓐᖑᓇᕐᑐᒦᓚᐅᕐᓂᑦᓯᓐᓄᑦ ᒪᕐᕈᐃᕐᑑᑎᓪᓗᐊᖓᓂᒃ ᐅᐱᒋᔭᐅᓂᖃᓕᕈᒫᕐᐳᓯ, ᓱᓇᒃᓴᐅᓐᖏᑎᑕᐅᓂᖅ ᑭᖑᕝᕕᕐᑕᐅᔪᒫᕐᐳᖅ ᓇᔪᕐᑕᓯᓐᓂᒃ ᖁᕕᐊᓲᑎᖃᓕᕐᓂᕐᒥᒃ, ᑍᒤᒻᒪᑦ ᓄᓇᖁᑎᒋᓕᕐᑕᑦᓯᓐᓂ ᐱᖃᓕᕈᒫᕐᐳᓯ ᒪᕐᕈᐃᕐᑑᑎᓪᓗᐊᖓᓂᒃ; ᖁᕕᐊᓱᖕᓂᕐᓗ ᐃᓱᖃᖏᑦᑐᒧᑦ ᐱᒋᓕᕈᒫᕐᐸᓯ. 8 ᐅᕙᖓ ᐊᑕᓂᖅ ᖁᕕᐊᒋᔭᖃᕋᒪ ᐊᑦᔨᒌᒃᑎᑦᓯᓂᕐᒥᒃ, ᐆᒥᓱᒡᓗᖓᓗ ᑎᒡᓕᒐᕐᓂᕐᒥᒃ ᓈᒻᒪᖏᑦᑐᓕᓂᕐᒥᒡᓗ; ᓱᕐᕋᔪᐃᑦᑑᓂᓐᓄᑦ ᐱᔭᕆᐊᖃᕐᑕᖏᓐᓂᒃ ᐊᑭᓕᕈᒫᕐᐸᒃᑲ, ᐊᖏᖃᑎᒌᒍᑎᓕᐅᕐᓗᖓᓗ ᑖᒃᑯᓄᖓ ᐃᓱᖃᖏᑦᑐᒧᑦ ᑐᕌᖓᔪᒥᒃ. 9 ᑭᖑᕚᖏᑦ ᐃᓅᖃᑎᒌᒡᔪᐊᓄᑦ ᖃᐅᔨᒪᔭᐅᑦᓯᐊᕈᒫᕐᐳᑦ, ᕿᑐᕐᖓᖏᓪᓗ ᐃᓅᖃᑎᖏᓐᓄᑦ ᐃᓚᒋᔭᐅᑦᓯᐊᕐᓗᑎᒃ; ᑖᒃᑯᓂᖓ ᑕᑯᔪᑦ ᖃᐅᔨᔪᒫᕐᐳᑦ ᐅᖃᕈᓐᓇᕐᓗᑎᒡᓗ ᐊᑕᓂᕐᒧᑦ ᓮᒻᒪᕐᑎᑕᐅᓯᒪᓂᖏᓐᓂᒃ. 10 ᐊᑕᓂᕐᒥᒃ ᖁᕕᐊᓱᒍᑎᖃᕈᒫᕐᐳᖓ ᐊᖏᔪᒥᒃ, ᑕᕐᓂᕋ ᐊᖏᔪᕈᕐᑎᑦᓯᔪᒫᕐᒪᑦ ᒎᑎᓐᓂᒃ; ᑖᑦᓱᒪ ᐊᓐᓄᕌᕐᑎᓯᒪᖕᒪᖓ ᐱᐅᓕᔭᐅᓂᕐᒥᒃ, ᐅᓕᒃᓯᒪᓪᓗᓂᖓᓗ ᓇᓛᒎᕐᓂᕐᒥᒃ, ᐅᐃᒃᓴᕐᑐᑦ ᑲᑎᑎᑕᐅᓂᐊᕐᑎᓪᓗᒍ ᓂᐊᖁᕐᒥᐅᓯᕐᑕᐅᔪᑎᑐᑦ. ᓄᓕᐊᒃᓴᕐᓗ ᑲᑎᑎᑕᐅᓂᐊᕐᓗᓂ ᐱᐅᓴᕐᓂᕆᕙᒃᑕᖓᑐᑦ ᐱᐅᓴᐅᑎᓄᑦ. 11 ᓄᓇᑐᑦ ᐱᕈᕐᑐᒃᓴᒥᒃ ᓴᖅᑭᕝᕕᐅᔪᑎᑐᑦ, ᐱᕈᕐᓰᕕᒡᓗ ᐱᕈᕐᑐᒃᓴᓂᒃ ᐱᕈᕐᕕᐅᓕᕐᐸᖕᒪᑦ ᑲᓐᖓᕐᓲᑕᐅᓯᒪᔪᓂᒃ, ᑍᒫᒃᑕᐅᖅ ᐊᑕᓂᐅᑉ ᒎᑎᐅᑉ ᓇᓛᒎᕐᓂᖅ ᓂᕐᑐᓕᕐᓂᕐᓗ ᐱᕈᕐᑎᑦᓱᒫᕆᕔᑦ ᐃᓅᖃᑎᒌᒡᔪᐊᓕᒫᓂ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society