ᐂᓮᐊᓯᐅᑉ ᐊᒡᓚᖏᑦ 60 - ᐊᒡᓔᑦ ᐃᑦᔪᕐᖕᓁᑦᑐᑦ

ᔨᕉᓴᓕᐅᑉ ᓂᕐᑐᕐᓇᕐᓯᑎᑕᐅᔪᒫᕐᓂᖓ

¹ “ᒪᑭᓪᓗᓯ ᖃᐅᒪᓕᕆᑦᓯ; ᖃᐅᒻᒪᖅᑯᑎᓯ ᑎᑭᒻᒪᑦ, ᐊᑕᓂᐅᑉ ᓂᕐᑐᕐᓇᕐᓂᕐᔪᐊᖓᑕ ᖃᐅᒻᒪᒡᕕᒋᖕᒪᓯ.

² ᑕᑯᒋᑦ, ᓄᓇᕐᔪᐊᖅ ᑖᕐᑐᒧᑦ ᐅᓕᒃᑕᐅᓯᒪᒐᓗᐊᕐᐳᖅ, ᐃᓄᐃᓪᓗ ᑖᕐᓯᐅᕐᑐᕐᔪᐊᖑᓗᑎᒃ, ᐊᑕᓂᐅᓪᓕ ᖁᓚᖏᐊᕐᓂᐊᕐᐹᑎᑦ, ᓂᕐᑐᕐᓇᕐᓂᕐᔪᐊᖓᓗ ᑕᑯᔭᐅᓂᐊᕐᐳᖅ ᐃᓕᑦᓯᓐᓂ.

³ ᐃᓅᖃᑎᒌᒡᔪᐊᓪᓗ ᖃᐅᒪᓂᑦᓯᓐᓄᑦ ᐂᔪᒫᕐᐳᑦ, ᐊᖓᔪᖅᑳᕐᔪᐊᓪᓗ ᖃᐅᒻᒪᒃᐸᓪᓕᐊᓂᓯ ᖃᐅᒪᓂᖓᓄᑦ ᕾᓗᑎᒃ.

⁴ ᐊᕙᒻᒧᑦ ᑕᑯᑦᓯᐊᕆᐊᓕᕆᑦᓯ, ᑕᑯᓗᓯᓗ; ᑲᑎᕙᓪᓕᐊᔪᓂᒃ ᕾᔪᓂᒡᓗ ᐃᓕᑦᓯᓐᓄᑦ; ᐃᕐᓂᓯ ᐅᖓᓯᒃᑐᒥᑦ ᕾᔪᒫᕐᐳᑦ, ᐸᓂᓯᓗ ᐊᒡᔭᕐᑕᐅᓗᑎᒃ ᐰᕆᔨᒥᖕᓄᑦ.

⁵ ᑕᕝᕙ ᖃᐅᔨᓕᕈᒫᕐᐳᓯ ᑕᑯᒥᓇᕐᑐᒥᒃ ᖃᐅᒪᓂᖃᕐᓂᑦᓯᓐᓂᒃ, ᐆᒻᒪᑎᓯᓗ ᑕᑕᑦᓱᒫᕐᐳᑦ ᖁᕕᐊᓱᖕᓂᕐᒥᒃ, ᐃᒪᕐᔪᐊᑦ ᐊᔪᕐᓴᖏᑦᔪᑎᖏᑦ ᐃᓕᑦᓯᓐᓄᑦ ᑐᓂᔭᐅᔪᒫᕐᒪᑕ, ᐃᓅᖃᑎᒌᒡᔪᐊᑦ ᐊᒃᓗᐃᑦᔪᑎᖏᓐᓂᒃ ᕾᑦᓯᕕᐅᔪᒫᕋᑦᓯ.

⁶ ᑳᒧᓕᖕᓂᒃ ᓇᖕᒪᒃᑐᓂᒃ ᓄᓇᓯ ᑕᑕᑦᓱᒫᕐᐳᖅ, ᐱᕈᕇᕋᑖᕐᓂᕐᓂᒡᓗ ᑳᒥᓕᖕᓂᒃ ᒥᑎᐊᓂᒥᑦ ᐄᐸᒥᓪᓗ ᑎᑭᑦᑐᓂᒃ; ᓰᐸᐅᑉ ᓄᓇᓕᒫᖓᓂᑦ ᐱᔪᓄᑦ ᐅᓄᕐᑐᓄᑦ ᑎᑭᐅᑦᔨᕕᒋᔪᒫᕐᐹᓯ, ᒎᓗᓂᒃ ᐳᔫᕐᑎᑕᒐᕐᓂᒡᓗ ᑎᐱᑦᓯᐊᕆᒃᓴᐅᑎᓂᒃ ᓇᒃᓴᕐᓗᑎᒃ, ᐅᖃᐅᓯᖃᕐᓗᑎᒡᓗ ᐊᑕᓂᐅᑉ ᓂᕐᑐᕐᑕᐅᔪᒃᓴᐅᓂᖓᓂᒃ.

⁷ ᑭᑕᕆᒥᐅᑦ ᓰᐱᖁᑎᓕᒫᖏᑦ ᐃᓕᑦᓯᓐᓄᑦ ᑲᑎᑕᐅᔪᒫᕐᐳᑦ, ᓂᐰᐅᑎᐅᑉ ᓰᐱᖁᑎᖏᑕ ᐊᖑᓴᓪᓗᖏᑦ ᐱᓇᓲᑎᒋᓕᕈᒫᕐᐸᓯ; ᑐᓂᕐᕈᓯᐅᑎᒃᓴᐅᔪᓐᓇᕐᓗᑎᒡᓗ ᑐᓂᕐᕈᓯᕐᕕᖁᑎᓐᓂ ᐃᓚᓕᐅᕈᒫᕐᐸᒃᑲ, ᑐᒃᓯᐊᕐᕕᒡᔪᐊᖁᑎᒐᓗ ᐱᐅᔪᕐᔪᐊᖅ ᐱᓐᓇᕐᓇᕐᓯᑎᑦᓱᒫᕐᐸᕋ.

⁸ ᑭᓇᑯᑦ ᒪᑯᐊ ᖃᖓᑕᕙᑦ ᓄᕗᔭᑎᑐᑦ, ᑎᖕᒥᐊᑎᑐᑦ ᐃᕙᕕᖕᒥᖕᓄᑦ ᐅᑎᓕᕐᑐᑎᑐᑦ?

⁹ ᐃᒪᐅᑉ ᓯᓇᓂᒥᐅᑦ ᐅᑕᖅᑭᔪᒫᕐᐳᑦ ᐅᕙᓐᓂᒃ, ᐅᒥᐊᕐᔪᐊᑦ ᑖᕐᓯᓯᒥᑦ ᐱᔪᑦ ᑎᑭᖅᑳᕈᒫᕐᐳᑦ, ᐃᕐᓂᑦᓯᓐᓂᒃ ᓇᒃᓴᕐᓗᑎᒃ ᐅᖓᓯᒃᑐᒥᑦ, ᓯᐅᓪᕕᕆᖁᑎᒥᖕᓂᒃ ᒎᓗᖁᑎᒥᖕᓂᒡᓗ ᐱᖃᓯᐅᑦᔨᓗᑎᒃ, ᐊᑕᓂᐅᑉ ᒎᑎᑦᓯ ᐊᑎᖓᓄᑦ, ᐃᓴᕆᐊᓕᑏᓪᓗ ᐃᑦᔪᕐᓁᑦᑐᖁᑎᖓᓐᓄᑦ, ᑖᑦᓱᒪ ᐅᐱᓐᓇᕐᓯᑎᓯᒪᖕᒪᓯ.

¹⁰ ᔫᑎᐅᖏᑦᑐᑦ ᐊᕙᓗᕐᔪᐊᖁᑎᑦᓯᓐᓂᒃ ᓴᓇᔪᒫᕐᐳᑦ, ᐊᖓᔪᖅᑳᕐᔪᐊᖏᑕ ᐱᔨᑦᓯᕋᕈᒫᕐᐹᓯ; ᐃᓕᑦᓯᓐᓂᒃ ᓂᓐᖓᒃᕕᖃᕐᓂᓐᓄᑦ ᓱᒋᐊᓚᐅᕋᑦᓯ, ᐱᑦᓯᐊᕐᓂᓐᓄᓪᓕ ᓈᒃᑭᒋᓚᐅᕐᐸᑦᓯ.

¹¹ ᑍᒤᒻᒪᑦ ᐃᑎᕐᑕᕐᕕᖁᑎᓯ ᐅᒃᑯᐃᓐᖔᖏᓐᓇᓕᕈᒫᕐᐳᑦ; ᐅᒃᑯᐊᕐᑕᐅᕙᒍᓐᓃᕐᓗᑎᒃ ᐅᓪᓗᒃᑯᑦ ᐅᓐᓄᐊᒃᑯᓪᓗ; ᐃᓅᖃᑎᒌᒡᔪᐊᑦ ᐊᒡᓗᐃᑦᔪᑎᒥᖕᓂᒃ ᕾᑦᓯᖃᑦᑕᖁᓪᓗᒋᑦ ᐃᓕᑦᓯᓐᓄᑦ, ᐊᖓᔪᖅᑳᕐᔪᐊᖏᓪᓗ ᑭᖑᓕᕇᒡᓗᑎᒃ ᕾᔪᒫᕐᐳᑦ.

¹² ᐃᓅᖃᑎᒌᒡᔪᐊᑦ ᐊᖓᔪᖅᑲᐅᕖᓪᓗ ᐃᓕᑦᓯᓐᓂᒃ ᐱᔨᑦᓯᕈᒪᖏᑦᑐᑦ ᐊᓯᕈᕈᒫᕐᐳᑦ; ᓄᓇᒥᓗ ᐃᓅᖃᑎᒌᒡᔪᐊᑦ ᑐᖁᖓᐅᓕᕐᓗᑎᒃ.

¹³ ᓕᐸᓇᓂᐅᑉ ᑕᑯᒥᓇᕐᓂᖏᓐᓄᑦ ᑎᑭᑕᐅᔪᒫᕐᐳᓯ, ᓇᐹᕐᑐᖏᑕ ᓮᐳᕋᓯᒥᒃ ᑍᔭᐅᔪᑦ, ᓇᐹᕐᑐᑐᐃᓐᓁᓪᓗ, ᓇᐹᕐᑐᓪᓗ ᐰᓂᓂᒃ ᑍᔭᐅᔪᑦ, ᐃᑦᔪᕐᓁᑦᑐᕕᖁᑎᒪ ᐃᓂᖓ ᑕᑯᒥᓇᕐᓯᖁᓪᓗᒍ; ᐃᑎᒐᖕᒪ ᐃᓂᖓ ᐱᓐᓇᕐᓇᕐᓯᑎᑦᓱᒪᒐᒃᑯ.

¹⁴ ᐃᓕᑦᓯᓐᓂᒃ ᐅᖁᒤᒃᓴᕐᑎᑦᓯᕙᓚᐅᕐᑐᑦ ᐃᕐᓂᖏᓐᓄᑦ ᐹᒻᒪᒃᑎᕐᕕᐅᔭᕐᑐᕈᒫᕐᐳᓯ; ᐆᒥᓱᒃᑎᒋᓚᐅᕐᑕᓕᒫᓯᓗ ᒥᑭᒡᓕᑎᕐᓗᑎᒃ ᐃᑎᒐᑦᓯᓐᓄᑦ ᐹᒻᒪᒋᐊᕐᑐᕈᒫᕐᐳᑦ; ᑍᔭᐅᓕᕐᓗᓯᓗ ᐊᑕᓂᐅᑉ ᐃᒡᓗᒐᓴᒡᔪᐊᖁᑎᖏᓐᓂᒃ, ᓮᐅᓂᒥᒃ ᐃᓴᕆᐊᓕᐅᑉ ᐃᑦᔪᕐᓁᑦᑐᖁᑎᖓᓂᒃ.

¹⁵ ᖁᔭᓈᕐᑕᐅᓯᒪᓚᐅᕋᓗᐊᕐᑎᓪᓗᓯ ᐆᒥᒋᔭᐅᓪᓗᓯᓗ, ᐊᖅᑯᓵᕐᑕᐅᕙᒍᓐᓃᕐᓗᓯᓘᓐᓃᑦ, ᐅᐱᓐᓇᕐᓯᑎᑦᓱᒫᕐᐸᑦᓯ ᐃᓱᖃᖏᑦᑐᒧᑦ, ᑭᖑᕚᕇᓄᓪᓗ ᐅᓄᕐᑐᓄᑦ ᖁᕕᐊᒋᔭᐅᓕᕐᓗᓯ.

¹⁶ ᐃᓅᖃᑎᒌᒡᔪᐊᑦ ᐃᒻᒧᖏᓐᓂᒃ ᐃᒥᕈᒫᕐᐳᓯ, ᐊᖓᔪᖅᑳᕐᔪᐊᓪᓗ ᐊᒫᒪᖏᓐᓂᑦ ᐊᒫᒪᒡᓗᓯ; ᖃᐅᔨᓕᖁᓪᓗᓯ ᐅᕙᖓ ᐊᑕᓂᖅ ᐱᐅᓕᔨᐅᒐᒪ ᐃᓕᑦᓯᓐᓄᑦ ᐅᑎᕐᑎᑦᓯᔨᓯ, ᔧᑰᑉ ᑭᖑᕚᖏᑕ ᐊᔪᒐᖃᖏᑦᑐᖁᑎᖓ.

¹⁷ ᑲᓐᓄᔭᖁᑎᓯ ᐊᓯᑦᔨᕈᒫᕐᐸᒃᑲ ᒎᓗᓂᒃ ᐱᑎᖔᕐᓗᓯ, ᓴᕕᕋᔭᑐᐃᓐᓁᑦ ᐊᓯᑦᔨᕐᓗᒋᑦ ᓯᐅᓪᕕᕆᓂᒃ; ᕿᔪᖁᑎᓯᓗ ᑭᖑᕝᕕᕐᓗᒋᑦ ᑲᓐᓄᔭᓂᒃ, ᐅᔭᕋᖁᑎᓯᓗ ᓴᕕᕋᔭᒃᓴᓂᒃ ᑭᖑᕝᕕᕐᓗᒋᑦ, ᓮᓕᑎᑦᓯᔪᓂᒃ ᐊᐅᓚᑦᓯᔨᑖᕐᑎᑦᓱᒫᕐᐸᑦᓯ ᓇᓛᒎᕐᑐᓂᒡᓗ ᐊᖓᔪᖅᑳᖃᓕᕐᓗᓯ.

¹⁸ ᑲᑉᐱᐊᓵᕆᔪᓂᒃ ᓄᓇᑦᓯᓐᓂ ᑐᓴᕐᓇᕐᑐᖃᕈᓐᓃᕈᒫᕐᐳᖅ, ᖃᓄᐃᓕᔭᐅᔪᓂᒃ ᑲᑉᐱᐊᓇᕐᑐᓂᒡᓗ ᓄᓇᒋᔭᑦᓯ ᑭᒡᓕᖓ ᑎᑭᓪᓗᒍ ᑐᓴᒐᒃᓴᕐᑕᖃᕈᒫᓐᖏᓚᖅ; ᐊᑭᓐᓇᖁᑎᓯ ᑍᔪᒫᕐᐸᓯ ᐱᐅᓕᔭᐅᕕᖕᒥᒃ, ᐃᑎᕐᑕᕐᕕᖁᑎᓯᓗ ᓂᕐᑐᐃᓂᕐᒥᒃ.

¹⁹ ᓯᕿᓂᖅ ᐅᓪᓘᒐᓗᐊᒃᑯᑦ ᖃᐅᒪᑦᔪᑎᒋᔭᕆᐊᖃᕈᒫᓐᖏᓚᓯ, ᑕᖅᑭᐅᓪᓗ ᖃᐅᒪᓂᖓ ᐅᓐᓄᐊᒥ ᖃᐅᒪᑦᔪᑎᒋᔭᕆᐊᖃᕈᒫᓐᖏᓐᓂᕙᓯ; ᐊᑕᓂᐅᑉ ᖃᐅᒪᓂᖓᓄᑦ ᖃᐅᒪᑎᑕᐅᓕᕈᒫᕋᑦᓯ ᑍᒫᓐᖓᓕᒫᖅ, ᒎᑎᓯᓗ ᐱᓐᓇᕐᓇᕐᓂᕆᔪᒫᕐᐸᓯ.

²⁰ ᓯᕿᓂᓯ ᓂᐱᔪᐃᑦᑑᓕᕈᒫᕐᐳᖅ, ᑕᖅᑭᕐᓗ ᑕᕐᕆᑉᐸᒍᓐᓃᕐᓗᓂ; ᐊᑕᓂᐅᑉ ᖃᐅᒪᓂᖓᑕ ᐃᓱᖃᖏᑦᑐᒧᑦ ᖃᐅᒪᑎᑦᓱᒫᕐᐹᓯ, ᐅᓪᓗᐃᑦ ᕿᒃᓵᒡᕕᒋᓚᐅᕐᑕᓯ ᐃᓱᓕᑦᓱᒫᕐᒪᑕ.

²¹ ᐃᓄᖁᑎᓕᒫᓯ ᓇᓛᒎᑦᓯᐊᓕᕈᒫᕐᒪᑕ; ᓄᓇᓗ ᐱᒋᓕᕐᓗᒍ ᐃᓱᖃᖏᑦᑐᒧᑦ, ᐱᕈᕐᓯᐊᒃᓴᓐᖑᕐᑎᓚᐅᕋᒃᑭᑦ ᐱᕈᕐᓰᕕᓐᓂ ᐊᒡᒐᓐᓄᑦ ᐋᖅᑭᒃᓱᕐᓗᒋᑦ, ᐱᓐᓇᕐᓇᕐᑎᑕᐅᖁᓪᓗᖓ ᑖᒃᑯᑎᒎᓇᖅ.

²² ᐅᓄᖏᓐᓂᕐᐹᑦ ᐃᓅᖃᑎᒌᒡᔪᐊᓐᖑᕈᒫᕐᐳᑦ, ᐃᓄᑭᓐᓂᕐᐹᓪᓗ ᐅᓄᕐᓂᕐᐹᓐᖑᕈᒫᕐᐳᑦ ᐱᔪᓐᓇᕐᑐᕐᔪᐊᓐᖑᕐᓗᑎᒃ, ᐅᕙᖓ ᐊᑕᓂᐅᒐᒪ; ᑕᒪᑐᒪ ᓇᓪᓕᐅᑎᓂᒃᓴᖓ ᐊᑯᓂᐅᑎᓐᓂᐊᕈᓐᓃᕐᐸᕋ.”