ᐂᓮᐊᓯᐅᑉ ᐊᒡᓚᖏᑦ 6 - ᐊᒡᓔᑦ ᐃᑦᔪᕐᖕᓁᑦᑐᑦ

ᒎᑎᐅᑉ ᐂᓮᐊᓯᒥᒃ ᕾᖁᔨᓂᖓ ᐱᔪᖃᓛᕐᑐᓂᒃ ᐅᖃᕐᑎᒋᔪᒪᓪᓗᓂᐅᒃ

¹ ᐊᕐᕌᒍᒥ ᐊᖓᔪᖅᑳᕐᔪᐊᑉ ᐅᓮᐊᐅᑉ ᑐᖁᕝᕕᐊᓂ, ᐊᑕᓂᖅ ᑕᑯᓚᐅᕐᐸᕋ ᐃᒃᓯᕙᐅᑕᕐᔪᐊᖕᒥᓂ ᐃᒃᓯᕙᔪᖅ, ᖁᑦᓯᒃᑐᒥ ᐳᕐᑐᔪᒥᓗ, ᐊᓐᓄᕌᖓᑕᓗ ᐅᓕᒡᔪᐊᖓᑕ ᑐᒃᓯᐊᕐᕕᒡᔪᐊᑉ ᐃᓗᐊ ᓈᓯᒪᕚ.

² ᓯᕌᕖᓪᓗ ᖁᓛᓃᑉᐳᑦ ᐊᑐᓂᑦ ᐱᖓᓲᔪᕐᑐᓂᒃ ᐃᓴᕈᖃᕐᓗᑎᒃ; ᐃᓴᕈᖏᑦ ᒪᕐᕉᒃ ᑮᓇᕐᒥᖕᓂᒃ ᒪᑐᓯᓯᒪᑦᔪᑎᒋᕚᒃ, ᒪᕐᕉᒃᑕᐅᖅ ᐃᓴᕈᖏᒃ ᐃᑎᒐᖏᓐᓂᒃ ᐅᓕᒃᓯᓯᒪᓪᓗᑎᒃ, ᒪᕐᕉᒃᑕᐅᖅ ᖃᖓᑕᑦᔪᑎᒋᓪᓗᒋᒃ.

³ ᑖᒃᑯᐊᓗ ᐃᒻᒥᖕᓄᑦ ᕾᒐᓛᖃᑦᑕᐅᑎᕗᑦ: “ᐃᑦᔪᕐᓁᑉᐳᖅ, ᐃᑦᔪᕐᓁᑉᐳᖅ, ᐃᑦᔪᕐᓁᑉᐳᖅ, ᕿᓚᖕᒥᐅᒐᓴᒡᔪᐃᑦ ᐊᑕᓂᖓᑦ! ᐱᓐᓇᕐᓇᕐᓂᕐᔪᐊᖓ ᑕᑍᓯᒪᕗᖅ ᓄᓇᕐᔪᐊᕐᒥᒃ!”

⁴ ᕾᒐᓛᕐᑑᓪᓗ ᓂᐱᖓᓄᑦ ᑐᒃᓯᐊᕐᕕᒡᔪᐊᑉ ᑐᓐᖓᕕᖏᑦ ᐊᐅᓚᑎᑕᐅᕗᑦ, ᑐᒃᓯᐊᕐᕕᒡᔪᐊᕐᓗ ᐳᔪᕐᒥᒃ ᑕᑕᑕᐅᕗᖅ.

⁵ ᑕᕝᕙ ᐅᖃᕐᐳᖓ: “ᑲᑉᐱᐊᓐᓇᒦᒃ, ᑐᖁᓂᐊᓕᕐᐳᖓ; ᓴᓗᒪᖏᑦᑐᒥᒃ ᖃᓂᕋ ᑕᑕᒻᒪᑦ, ᐃᓅᖃᑎᖃᕋᒪᓗ ᓴᓗᒪᖏᑦᑐᓂᒃ ᐅᖃᓪᓚᖃᑦᑕᕐᑐᓂᒃ; ᐃᔨᓐᓄᑦ ᓇᖕᒥᓂᖅ ᑕᑯᒐᒃᑯ ᐊᖓᔪᖅᑳᕐᔪᐊᖅ, ᕿᓚᖕᒥᐅᒐᓴᒡᔪᐃᑦ ᐊᑕᓂᖓᑦ.”

⁶ ᓯᕌᕖᓪᓗ ᐃᓚᖓᑦᑕ ᖃᖓᑕᓪᓗᓂ ᐅᐸᒃᐹᖓ, ᑎᒍᒥᐊᕈᑏᖕᓄᑦ ᕿᔪᒃᓴᒥᒃ ᐊᐅᒪᒥᒃ ᑎᒍᒥᐊᕐᓗᓂ ᑎᒍᒥᐊᕈᑏᖕᓄᑦ ᑐᓂᕐᕈᓯᕐᕕᖕᒥᑦ ᑎᒍᔭᒥᓂᒃ.

⁷ ᖃᓂᕋᓗ ᐊᐅᒪᒧᑦ ᐊᒃᑐᕐᓗᒍ ᐅᖃᕐᐳᖅ, “ᑕᑯᒋᑦ, ᐆᒪ ᖃᓃᑦ ᐊᒃᑐᕐᒪᒍ; ᐊᔪᕐᑐᓕᓂᑎᑦ ᐲᕐᑕᐅᕗᑦ, ᐊᔪᕐᓂᑎᓪᓗ ᐃᓱᒪᒋᔪᓐᓁᕐᑕᐅᕗᑦ.”

⁸ ᐊᑕᓂᕐᓗ ᐅᖃᕐᑐᖅ ᑐᓴᕐᐸᕋ, “ᑭᓇᒥᒃ ᑎᓕᓯᓂᐊᕐᐳᖓ, ᐱᔪᖃᓛᕐᑐᒥᒃ ᐅᖃᕐᑎᒋᓂᐊᕐᑕᑦᑎᓐᓂᒃ?” ᑕᕝᕙ ᐅᖃᕐᐳᖓ, “ᐅᕝᕙᐅᕗᖓ! ᑎᓕᓚᐅᓐᖓ.”

⁹ ᐅᖃᐅᑎᕚᖓᓗ, “ᐂᓕᕆᑦ, ᐃᓄᐃᓪᓗ ᐅᑯᐊ ᐅᖃᐅᑎᒃᑭᑦ, ‘ᑐᓵᖃᑦᑕᕋᓗᐊᕐᓗᓯ, ᑐᑭᓯᓂᐊᓐᖏᓚᓯ; ᑕᑯᖃᑦᑕᕋᓗᐊᕈᑦᓯ, ᑐᑭᓯᔪᓐᓇᕐᓂᐊᓐᖏᓚᓯ.’”

¹⁰ ᐅᖃᐅᑎᒋᕚᖓᓗ, “ᐃᓄᐃᑦ ᐅᑯᐊ ᐆᒻᒪᑎᖏᑦ ᑐᑭᓯᔪᓐᓁᓪᓕᑎᒃᑭᑦ, ᓯᐅᑎᖏᓪᓗ ᑐᓵᔪᓐᓃᕐᑎᓪᓗᒋᑦ, ᐃᔨᖏᑦ ᑕᐅᑐᖁᓇᒋᑦ; ᑕᑯᑐᐃᓐᓇᕆᐊᖃᕐᒪᑕ ᐃᔨᒥᖕᓄᑦ, ᓯᐅᑎᒥᖕᓄᓪᓗ ᑐᓴᑐᐃᓐᓇᕆᐊᖃᕐᒪᑕ, ᐆᒻᒪᑎᒥᖕᓄᓪᓗ ᑐᑭᓯᑐᐃᓐᓇᕆᐊᖃᕐᒪᑕ, ᓵᒋᐊᕐᓗᑎᒡᓗ, ᐋᖅᑭᒃᑕᐅᑐᐃᓐᓇᕆᐊᖃᕐᒪᑕ.”

¹¹ ᑕᕝᕙ ᐅᖃᕐᐳᖓ, “ᐊᑕᓃᖅ, ᖃᓄᖅ ᑕᒪᓐᓇ ᐊᑯᓂᐅᑎᒋᔭᕆᐊᖃᕐᐹ?” ᑭᐅᕚᖓᓗ ᐅᖃᕐᓗᓂ: “ᐃᒡᓗᒐᓴᒡᔪᐊᑦ ᓯᖁᒥᑦᓯᐊᕐᐸᑕ ᑭᓯᐊᓂ ᐃᓄᖃᕈᓐᓃᕐᓗᑎᒡᓗ, ᐃᒡᓗᐃᓪᓗ ᐃᓄᖃᕈᓐᓃᕐᐸᑕ, ᓄᓇᖓᓪᓗ ᐃᓄᖃᕈᓐᓃᑦᓯᐊᕐᐸᑦ.

¹² ᐊᑕᓂᐅᑉ ᐃᓄᐃᑦ ᐅᖓᓯᒃᑐᐊᓗᖕᒧᑦ ᐊᐅᓪᓚᕐᑎᓯᒪᓕᕐᐸᒋᑦ, ᓄᓇᒋᔭᖏᓪᓗ ᐅᓄᕐᓯᑉᐸᑕ ᕿᒪᒃᑕᐅᓯᒪᔪᑦ ᓄᓇᑖᕆᓯᒪᔭᖓᓐᓂ.

¹³ ᐃᓄᐃᑦ ᖁᓕᐅᑦᔪᑎᖏᑦ ᕿᒪᒃᑕᐅᓯᒪᔪᑦ ᐊᒥᐊᒃᑯᒋᔭᐅᓕᕐᐸᑕ, ᑖᒃᑯᐊᑦᑕᐅᖅ ᐃᑯᐊᓪᓚᒃᑎᑕᐅᔪᒫᕆᕗᑦ, ᓇᐹᕐᑐᑐᓪᓗ ᐆᒃᒥᒃ ᐊᑎᓕᐅᑉ ᑭᐱᓯᒪᔫᑉ ᒪᓐᖑᖓᑦ ᓄᓇᒦᖏᓐᓇᓲᖑᖕᒪᑦ ᓇᑲᑕᐅᓯᒪᓂᖓ. ᑍᒫᒃᑕᐅᖅ ᐃᑦᔪᕐᓁᑦᑐᖅ ᑲᓐᖓᕐᓲᑎᒃᓴᖅ ᓇᐹᕐᑑᑉ ᒪᓐᖑᖓᓃᑦᓱᒫᕐᐳᖅ.”