ᐂᓮᐊᓯᐅᑉ ᐊᒡᓚᖏᑦ 58 - ᐊᒡᓔᑦ ᐃᑦᔪᕐᖕᓁᑦᑐᑦ

ᓂᕆᑦᑍᓕᓂᖃᕐᓂᖅ ᓱᓕᔪᒥᒃ

¹ “ᓂᐱᖅᑯᕐᑐᓗᓯ ᓂᓪᓕᐊᓕᕆᑦᓯ, ᓂᐰᓐᖔᕐᓂᐊᕋᓯ, ᑎᑦᑐᓚᐅᑎᑎᑐᑦ ᓂᐱᖅᑯᕐᑐᑎᒋᓗᓯ ᓂᓪᓕᐊᒋᑦᓯ; ᐃᓄᖁᑎᒃᑲ ᐊᔪᕐᑐᓕᓂᖏᓐᓂᒃ ᐅᖃᐅᑎᓯᒋᒃ, ᔧᑰᓪᓗ ᑭᖑᕚᖏᑦ ᐅᖃᐅᑎᓗᒋᑦ ᐊᔪᕐᓂᖏᓐᓂᒃ.

² ᖃᐅᑕᒫᑦ ᐅᕙᓐᓂᒃ ᕿᓂᕋᓗᐊᕐᐳᑦ, ᐊᖅᑯᑎᓐᓂᒡᓗ ᖃᐅᔨᔪᒪᑦᓯᐊᕐᓗᑎᒃ, ᐃᓅᖃᑎᒌᒡᔪᐊᖑᓪᓗᑎᒃ ᓲᕐᓗ ᓇᓛᒎᕐᑐᒥᒃ ᐃᓕᖅᑯᓯᓕᒃᑎᑐᑦ, ᒎᑎᖓᑦᑕ ᐱᖁᔭᖏᓐᓂᒃ ᒪᓕᑦᓯᐊᖏᓐᓇᕐᑐᑎᑐᑦ, ᓈᒻᒪᑦᓯᐊᕐᑐᒥᒡᓗ ᑐᑭᑖᕐᑎᑕᐅᔪᒪᕗᑦ, ᒎᑎᒧᑦ ᖃᓂᒋᔭᐅᔪᒪᓪᓗᑎᒃ.”

³ ᐅᖃᓚᐅᕐᐳᑦ, “ᓱᖕᒪᑦ ᓂᕆᑦᑍᓕᓚᐅᕐᐱᑖ? ᓂᕆᑦᑍᓕᒐᓗᐊᕐᑎᓪᓗᑕ ᑕᑯᕙᓐᖏᓚᑏᑦ? ᓱᖕᒪᓪᓗ ᒥᑭᒡᓕᑎᕋᓱᐊᕐᐸᒃᐱᑖ ᒥᑭᒡᓕᑎᕐᑎᓪᓗᑕ ᐅᑦᔨᕈᓱᖃᑦᑕᖏᓐᓇᕖᑦ?” ᑕᑯᓕᕆᑦᓯ, ᓂᕆᑦᑍᓕᕕᒋᔭᑦᓯ ᐅᓪᓗᖓᓂ ᖁᕕᐊᒋᔭᑐᐃᓐᓇᑦᓯᓐᓂᒃ ᐊᑐᕐᐸᒃᑐᓯ, ᐱᓇᓱᐊᕐᑎᓯᓗ ᐅᖁᒤᒃᓴᕐᑎᓪᓗᒋᑦ.

⁴ ᑕᑯᓕᕆᑦᓯ ᓂᕆᑦᑍᓕᕙᒃᐳᓯ ᐂᕙᖃᑎᒌᒃᐸᒃᓗᓯ ᐹᖃᑎᒌᒃᓗᓯ ᐱᒋᐊᖃᑦᑕᐅᑎᓪᓗᓯᓗ. ᑍᒫᒃ ᓂᕆᑦᑍᓕᑦᔪᓯᖃᕈᑦᓯ ᑐᒃᓯᐊᕐᓂᓯ ᑐᓴᕐᑕᐅᓂᐊᓐᖏᓚᑦ ᕿᓚᖕᒥ.

⁵ ᑍᒤᑦᑐᒥᒃ ᓂᕆᑦᑍᓕᓂᕐᒥᒃ ᐊᑐᕐᑕᐅᖁᔨᓯᒪᕗᖔ? ᐃᓅᑉ ᐃᒻᒥᓂᒃ ᒥᑭᒡᓕᑎᕐᕕᒃᓴᖓᓂᒃ? ᓂᐊᖁᕐᒧᑦ ᐅᑯᑦᑕᕐᕕᑐᐃᓐᓇᐅᓗᓂ ᐅᕐᐱᒐᕐᑐᑦ ᓂᐅᓐᖓᒃᑕᕐᑐᑎᑐᑦ? ᒪᒥᐊᑦᑐᕐᓯᐅᒻᒥᒃ ᐊᓐᓄᕌᕐᓯᒪᓗᓂ ᐊᕐᔭᓕᓂᕐᓂᒃ ᐃᒃᓯᕙᕕᑐᐃᓐᓇᖅ, ᑕᒪᑦᔮ ᓂᕆᑦᑍᓕᓂᐅᓂᕋᕐᑕᓰ? ᐅᓪᓗᖅ ᓈᒻᒪᒋᔭᐅᔪᖅ ᐊᑕᓂᕐᒧᑦ?

⁶ ᐃᒫᖓᕐᓕ ᓂᕆᑦᑍᓕᓂᕐᒥᒃ ᐊᑐᕐᑕᐅᖁᔨᓚᐅᓐᖏᓚᖔ? ᐊᔪᕐᑐᓕᓂᕐᒧᑦ ᕿᓚᒃᓱᕐᓯᒪᔪᑦ ᕿᓚᕈᑦᔮᕐᑕᐅᖁᓪᓗᒋᑦ, ᐅᖁᒤᑦᑐᑦ ᐊᒃᔭᕐᑕᖏᑦ ᐲᕐᑕᐅᖁᓪᓗᒋᑦ, ᓵᓚᐅᓯᒪᔪᓪᓗ ᕿᓚᕈᑦᔮᕐᑕᐅᖁᓪᓗᒋᑦ, ᓇᖕᒪᐅᑎᒋᔭᐅᔪᓕᒫᓂᒡᓗ ᓯᖁᒥᓪᓗᒋᑦ ᐲᕐᑎᑦᓯᖁᓪᓗᓯ.

⁷ ᐃᒫᖑᓐᖏᓛᖅ ᑳᒃᑐᑦ ᓂᕆᑎᖃᑦᑕᕐᓗᒋᑦ ᓂᕿᒃᓴᑦᓯᓐᓂᑦ, ᐊᔪᕐᓴᕐᓂᕐᒧᑦ ᐊᖏᕐᕋᒃᓴᖃᖏᑦᑐᑦ ᐊᖏᕐᕋᑦᓯᓐᓄᑦ ᐃᑎᕐᑎᑉᐸᒡᓗᒋᑦ; ᐊᓐᓄᕌᒃᓴᖃᖏᑦᑐᑦ ᐊᓐᓄᕌᕐᑎᑉᐸᒡᓗᒋᑦ, ᐃᓅᖃᑎᒋᒐᑦᓯᐅᒃ ᑐᓄᒋᐊᑐᐃᓐᓇᕐᐸᖏᓪᓗᒋᑦ.

⁸ ᑍᒤᒃᑯᑦᓯ ᑕᕝᕙ ᖃᐅᒪᓂᓯ ᖃᐅᒻᒤᓕᕐᓂᐊᕐᐳᑦ ᖃᐅᕙᓪᓕᐊᔪᑎᑐᑦ, ᐋᖅᑭᒃᑕᐅᓂᓯ ᑕᕝᕙ ᐱᕙᓪᓕᐊᓂᖏᑦ ᓱᑲᑦᑑᓕᕋᔭᕐᐳᑦ; ᓇᓛᒎᕐᑎᑕᐅᓂᓯᓗ ᓯᕗᓂᑦᓯᓐᓃᓕᕐᓗᓂ; ᐊᑕᓂᐅᓪᓗ ᓂᕐᑐᕐᓇᕐᓂᖓ ᓴᐳᑦᔨᔨᒋᓕᕐᓗᒍ ᑭᖑᓂᑦᓯᓐᓃᓪᓗᓂ.

⁹ ᑕᕝᕙ ᓂᓪᓕᐊᓕᕈᑦᓯ, ᐊᑕᓂᐅᑉ ᑭᐅᖃᑦᑕᕐᓂᐊᕐᐹᓯ; ᓂᓪᓕᐊᑐᐊᕌᖓᑦᓯᓗ ᐃᑲᔪᕐᑕᐅᔪᒪᓗᓯ ᐅᖃᖃᑦᑕᕐᓗᓂ “ᐅᕝᕙᐅᕗᖓ.” “ᐅᖁᒤᒃᓴᕐᑎᑦᓯᓂᕐᒥᒃ ᐊᓯᑦᓯᓐᓂᒃ ᕿᒤᓂᐊᕈᑦᓯ, ᐃᖅᑲᕐᑐᖃᑦᑕᐅᑎᓂᕐᒥᒃ, ᐱᐅᖏᑦᑐᓂᒡᓗ ᐅᖃᐅᓯᖃᕐᓂᕐᒥᒃ.

¹⁰ ᑳᒃᑐᓂᒃ ᐃᑲᔪᕋᓱᐊᑦᓯᐊᖃᑦᑕᕈᑦᓯ, ᓵᓚᐅᓯᒪᔪᓪᓗ ᐱᔭᕆᐊᖃᕐᑕᖏᓐᓂᒃ ᓈᒻᒪᒃᓯᑎᑦᓯᖃᑦᑕᕈᑦᓯ, ᑕᕝᕙ ᖃᐅᒪᓂᓯ ᑖᕐᑐᒥ ᖃᐅᒪᓕᕐᓂᐊᕐᐳᖅ, ᑖᕐᓯᐅᕐᓂᓯᓗ ᐅᓪᓗᓪᓗᐊᑐᑦ ᖃᐅᒪᑎᒋᓕᕐᓗᓂ.

¹¹ ᐊᑕᓂᐅᑉ ᑕᕝᕙ ᑕᓯᐅᖏᓐᓇᕐᓂᐊᕐᐹᓯ, ᑕᕐᓂᑦᓯᓗ ᑭᓐᖒᒪᔭᖏᑦ ᓈᒻᒪᒃᓯᑎᓐᓂᐊᕐᐰᑦ, ᓴᐅᓂᓯ ᓴᓐᖏᔫᓕᕐᑎᓪᓗᒋᑦ; ᐃᒪᖃᕐᑎᑕᐅᔪᑎᑐᑦ ᐱᕈᕐᓰᕕᒃᑐᑦ ᑍᒤᓐᓂᐊᕐᐳᓯ, ᓄᓇᐅᓪᓗ ᐃᓗᐊᓂᑦ ᑰᒃᕕᐅᔪᑎᑐᑦ, ᐃᒤᕈᓚᐅᕐᓯᒪᖏᑦᑐᑎᑐᑦ ᑍᒤᓪᓗᓯ.

¹² ᐃᒡᓗᒐᓴᒡᔪᐊᕕᓂᓯ ᓯᖁᑦᑎᕐᓯᒪᔪᑐᕾᑦ ᓇᑉᐸᕐᑎᕐᑕᐅᒃᑲᓐᓂᕈᒫᕐᐳᑦ; ᑐᓐᖓᕕᓕᐅᕐᓗᓯᓗ ᑭᖑᕚᑦᓯᓐᓄᑦ ᑭᖑᓕᕇᓄᑦ ᐅᓄᕐᑐᓄᑦ ᐱᒋᔭᐅᔪᒃᓴᓂᒃ; ᑍᔭᐅᓕᕈᒫᕐᐳᓯ ᐋᖅᑭᒃᓱᐃᔨᓂᒃ ᓯᖁᒥᓯᒪᓚᐅᕐᑐᓂᒃ, ᐊᖅᑯᑎᓂᒡᓗ ᐋᖅᑭᒃᓱᐃᔨᐅᓂᕋᕐᑕᐅᓗᓯ ᐊᑐᕐᑕᐅᔪᒃᓴᓂᒃ.”

ᓴᐸᑎᒥᒃ ᑲᒪᑦᓯᐊᕐᓂᐅᑉ ᐅᐱᒍᓲᑕᐅᓂᖓ

¹³ “ᓴᐸᑎ ᑲᒪᒋᑦᓯᐊᕐᓂᐊᕈᑦᓯᐅᒃ, ᐱᔪᒪᔭᑐᐃᓐᓇᑦᓯᓐᓂᒃ ᐱᓇᓱᐊᕐᕕᒋᖏᓪᓗᒍ ᐅᓪᓗᖅ ᐃᑦᔪᕐᓁᑎᑕᕋ, ᓴᐸᑎᓗ ᑍᓪᓗᒍ ᖁᕕᐊᓇᕐᑐᒥᒃ, ᐊᑕᓂᐅᑉ ᐅᓪᓗᖓ ᐃᑦᔪᕐᓁᑦᑐᖅ ᐅᐱᓐᓇᕐᑑᑎᒃᑯᑦᓯᐅᒃ; ᐅᐱᒋᒍᑦᓯᐅᒡᓗ, ᐊᑐᕈᒪᔭᑐᐃᓐᓇᕐᓂᒃ ᐱᓇᓱᐊᕐᕕᒋᖏᓪᓗᒍ, ᖁᕕᐊᒋᔭᑐᐃᓐᓇᑦᓯᓐᓂᒃ ᐱᓇᓱᐊᕐᕕᒋᖏᓪᓗᒍ, ᐅᖃᕈᓘᔭᑐᐃᓐᓇᕐᕕᒋᖏᓪᓗᒍᓗ ᐊᑐᖏᑦᑐᓂᒃ;

¹⁴ ᑕᕝᕙ ᐊᑕᓂᖅ ᖁᕕᐊᒋᓕᕐᓂᐊᕐᐸᓯ, ᐃᖏᕐᕋᑎᑦᓱᒫᕐᐸᑦᓯᓗ ᓄᓇᐅᑉ ᐳᕐᑐᓂᕐᐹᖏᑎᒍᑦ; ᓂᕆᑎᑦᓱᒫᕐᓗᓯᓗ ᓯᕗᓕᕕᓂᓯ ᔧᑰᑉ ᓂᕿᒋᕙᓚᐅᕐᑕᖏᓐᓂᒃ, ᐊᑕᓂᐅᑉ ᖃᓂᖓ ᑍᒫᒃ ᐅᖃᕐᐳᖅ.”