ᐂᓮᐊᓯᐅᑉ ᐊᒡᓚᖏᑦ 57 - ᐊᒡᓔᑦ ᐃᑦᔪᕐᖕᓁᑦᑐᑦ

ᐃᓴᕆᐊᓕᒥᐅᑉ ᐊᓯᓐᓂᐊᕐᓂᖓᑦᑕ ᐱᐅᖏᑦᑑᓂᕋᕐᑕᐅᓂᖓ

¹ “ᓇᓛᒎᕐᑐᑦ ᑐᖁᔭᕌᖓᑕ, ᐃᓄᐃᑦ ᐆᒻᒪᑎᒥᒍᑦ ᐃᓱᒫᓘᑎᖃᓐᖏᓚᑦ; ᐱᓇᓱᐊᑦᓯᐊᕐᑐᑦ ᐃᓅᔪᓐᓃᕋᖓᑕ, ᐃᓱᒪᒋᔭᐅᓐᖏᓚᑦ ᑲᑉᐱᐊᓇᕐᑐᒥᑦ ᓴᐳᑎᔭᐅᖁᓪᓗᒋᑦ ᐱᔭᐅᓂᖏᓐᓂᒃ.

² ᑍᒤᑦᑐᑦ ᐃᑎᕐᓂᐊᕐᐳᑦ ᓮᒪᓇᕐᑐᒧᑦ; ᓇᓚᕕᖕᒥᖕᓂ ᑕᕾᕐᓯᓕᕐᐳᑦ, ᓈᒻᒪᓈᕐᓯᒪᓪᓗᑎᒃ ᐃᓅᓚᐅᕋᒥᒃ.

³ ᐃᓕᑦᓯᓕ ᕾᒋᑦᓯ ᒪᐅᖓ, ᐃᕐᓂᕆᔭᐅᔪᓯ ᐊᖓᒃᑯᓄᑦ, ᑭᖑᕚᖑᔪᓯᓗ ᐊᓯᓐᓂᐊᕐᑎᓄᑦ ᐊᑭᓕᕐᑕᐅᓗᑎᒡᓗ ᐊᖑᑎᓂᐊᕐᑎᓄᑦ.

⁴ ᑭᓇᒥᒃ ᒥᑕᐅᑎᖃᕐᐱᓰ? ᑭᓇᒧᓪᓗ ᐱᔮᕐᓱᕐᓗᓯ ᖃᓂᓯ ᐂᑦᑕᕐᑎᑉᐱᓯᐅᒃ ᐅᖃᓯ ᓄᐃᑦᑕᕐᑎᓪᓗᒋᑦ? ᐊᔪᕐᑐᓕᔪᓄᑦ ᕿᑐᕐᖓᐅᓐᖏᓚᓰ, ᐅᐃᕕᕐᕆᒃᓯᔩᑦ ᑭᖑᕚᖏᑦ,

⁵ ᐃᒡᓕᒎᕐᓂᕐᔪᐊᒧᑦ ᐱᔪᒪᓂᐊᓗᓯ ᑲᔪᓯᑎᖃᑦᑕᕐᐸᓯ ᓇᐹᕐᑐᐃᑦ ᓯᑕᒃᑍᑦ ᐊᑯᓐᓂᖏᓐᓂ, ᓇᐹᕐᑐᓕᒫᓪᓗ ᐊᑖᓂ; ᕿᑐᕐᖓᓯ ᑐᖁᑉᐸᒃᐸᓯ ᓇᕐᓴᓂ, ᕾᕈᓱᐃᓪᓗ ᖁᖕᓈᖏᑕ ᐃᓗᖏᓐᓂ.

⁶ ᐅᔭᕋᖕᓂᒃ ᕾᕋᑦᑐᓂᒃ ᓇᕐᓴᓂᑦ ᐱᓇᓱᐊᕐᐸᒃᐳᓯ; ᓇᓚᐅᑦᑖᕐᓂᒃᑯᑦ ᑐᑭᑖᕈᑎᒋᓪᓗᒋᑦ ᐃᒥᕐᓂᐊᕐᑕᑦᓯᓐᓂᒃ ᑯᕕᓯᓪᓗᓯ ᑐᓂᕐᕈᓯᕐᐸᒃᐳᓯ, ᓂᐊᖂᔭᒃᓴᓂᒡᓗ ᑐᓂᕐᕈᓯᕐᕕᒋᓪᓗᒋᑦ, ᑕᒪᒃᑯᓄᖓ ᓮᒻᒪᕐᑎᑕᐅᔪᓐᓇᕐᐳᖔ?

⁷ ᓄᓇᓂ ᐳᕐᑐᔪᓂ ᐱᖑᕐᓂᓗ ᐃᓇᖓᖃᑎᒌᒋᐊᕐᑐᕐᐸᒃᐳᓯ, ᑐᓂᔭᒃᓴᑦᓯᓐᓂᒡᓗ ᑐᓂᕐᕈᓯᕆᐊᕐᑐᕐᐸᒃᓗᓯ.

⁸ ᐅᒃᑯᐊᑦᓯᓐᓄᑦ ᐊᕙᓗᖏᓐᓄᓪᓗ ᓂᕕᓐᖓᕐᑎᑦᓯᕙᒃᐳᓯ ᒎᑎᖃᖏᑦᑐᑦ ᐱᔪᓐᓇᐅᑎᖏᓐᓂᒃ; ᐅᕙᓐᓂᒃ ᖁᔭᓈᕐᓯᖔᕐᓗᓯ, ᕿᐱᓯᓗ ᒪᒃᐱᕐᓗᒋᑦ ᐃᓐᓇᖓᖃᑎᒌᒃᐸᒃᐳᓯ; ᓯᓂᒡᕕᓯ ᓴᓂᒧᑐᔫᓕᕐᑎᓪᓗᒋᑦ ᐊᖏᖃᑎᖃᕐᐸᒃᐳᓯ ᐊᑭᑭᒡᓕᒋᐊᕈᑎᒃᓴᖏᓐᓂᒃ ᑖᒃᑯᐊ; ᓯᓂᒡᕕᖏᑦ ᐅᖓᒋᒐᑦᓯᐅᒃ, ᐊᓐᓄᕅᓐᖔᕐᑎᓪᓗᒋᑦ ᑕᑯᓐᓇᕈᒪᓪᓗᒋᑦ.

⁹ ᐂᓚᐅᕐᐳᓯ ᒧᓕᑭᒧᑦ ᐅᕐᓱᒥᒃ ᓇᒃᓴᕐᓗᓯ ᑎᐱᑦᓯᐊᕆᒃᓴᐅᑎᓯ ᐅᓄᕐᓯᑎᓪᓗᒋᑦ; ᐊᐅᓪᓚᕐᑎᑦᓯᓚᐅᕐᐳᓯ ᐃᓚᑦᓯᓐᓂᒃ, ᐅᖓᓯᑦᑐᒥᐅᓄᑦ, ᐊᒡᓛᑦ ᑐᖁᓯᒪᔪᑦ ᐃᓂᖏᓐᓄᑦ.

¹⁰ ᐃᓕᖅᑯᓯᕆᔭᓯ ᓯᕕᑐᓂᖓ ᑕᖃᑦᔪᑎᒋᒐᑦᓯᐅᒃ, ᓱᓕ ᐅᖃᓚᐅᓐᖏᓚᓯ, ‘ᓴᐱᕐᓇᕐᓯᕗᖅ,’ ᐱᔪᓐᓇᕐᓯᒃᑲᓐᓂᓚᐅᕋᑦᓯ, ᑍᒤᒻᒪᑦ ᐊᔪᓕᓚᐅᓐᖏᓚᓯ.

¹¹ ᑭᓇᒃᑯᓐᓂᒃ ᑲᑉᐱᐊᒋᔭᖃᒧᑦ ᓯᕘᕋᒋᔭᖃᒧᓪᓗ ᓴᒡᓗᓚᐅᕐᐱᓰ? ᐅᕙᓐᓂᒡᓗ ᐃᖅᑲᐅᒪᔪᓐᓃᕐᓗᓯ, ᐃᖅᑬᔪᓐᓇᕋᓯᓗ ᐅᕙᓐᓂᒃ, ᓂᐱᖃᓚᐅᖏᓐᓂᓐᓄᑦ ᐊᑯᓂ, ᑍᒤᒻᒪᑦ ᐅᕙᓐᓂᒃ ᓯᕘᕋᔪᓐᓃᕐᐱᓰ?

¹² ᐃᓱᐊᕐᑑᓂᕋᕐᓗᓯ ᐱᓂᐊᕐᓂᑦᓯᐊᕆᖕᓂᕋᕐᓗᓯᓗ ᐅᖃᐅᓯᕆᓂᐊᕐᐸᑦᓯ, ᑕᒪᓐᓇᓕ ᐃᓕᑦᓯᓐᓄᑦ ᐃᑲᔪᕈᑎᒃᓴᖃᕐᓂᐊᓐᖏᓚᖅ.

¹³ ᐃᑲᔪᕐᑎᒃᓴᕐᓯᐅᕐᓗᓯ ᓂᓪᓕᐊᒍᑦᓯ ᒎᑎᓐᖑᐊᑦᓯᓐᓄᑦ ᐱᐅᓕᔭᐅᓂᐊᓕᕐᐳᓯ, ᐊᓄᕆᒧᑦ ᑎᒃᑕᐅᕋᕈᒫᕐᐳᑦ, ᐊᓂᕐᓵᕐᓂᑐᐃᓐᓇᕐᒧᑦ ᑎᒃᑕᐅᔭᕇᕈᒫᕐᐳᑦ, ᐅᕙᓐᓂᒡᓕ ᑕᑎᖃᕐᑑᑉ ᓄᓇ ᐱᒋᔪᒫᕐᐹ, ᖃᖅᑲᖁᑎᒐᓗ ᐃᑦᔪᕐᓁᑦᑐᖅ ᓇᖕᒥᓂᕆᓕᕐᓗᓂᐅᒃ.”

ᒎᑎᐅᑉ ᒪᒥᑎᑦᓯᑦᔪᑎᒃᓴᖏᑦ ᐹᓪᓚᒃᓯᒪᔪᒧᑦ

¹⁴ ᐅᖃᕐᑐᖃᕈᒫᕐᐳᖅ, “ᓴᓇᒋᑦᓯ, ᓴᓇᒋᑦᓯ, ᐊᖅᑯᑎᒃᓴᖅ ᐱᔭᕇᓕᕐᓯᐅᒃ, ᐃᓄᖁᑎᒪ ᐊᑐᕐᓂᐊᕐᑕᖓᓂ ᐊᒡᕕᐊᕈᑎᒃᓮᑦ ᐲᔭᕐᑕᐅᓕᕐᓕᑦ.”

¹⁵ ᐊᑕᓂᖅ ᖁᑦᓯᖕᓃᕐᐹᒥ ᐃᓂᖃᕐᑐᖅ ᐃᓱᖃᖏᑦᑐᒥ, ᐊᑎᖓᓗ ᐃᑦᔪᕐᓁᑦᑐᖅ ᐃᒫᒃ ᐅᖃᕐᒪᑦ, “ᖁᑦᓯᒃᑐᒥ ᐃᑦᔪᕐᓁᑦᑐᒥᓗ ᐃᓂᖃᕐᐳᖓ, ᓯᖁᒥᓯᒪᔪᓂᒃ ᐊᓂᕐᓂᕐᒥᒍᓪᓗ ᒥᑭᒡᓕᑎᕐᓯᒪᔪᓂᒃ ᐃᓚᖃᕐᐳᖓ, ᓯᖁᒥᓯᒪᔪᓪᓗ ᐆᒻᒪᑎᖏᑦ ᐆᒻᒪᕐᑎᑦᓱᒪᓪᓗᒋᑦ.

¹⁶ ᐸᓯᒃᓯᓂᐊᓐᖏᓚᖓ ᑕᐅᕗᖓᓕᒫᖅ, ᓂᓐᖓᐅᒤᓐᓇᕐᓂᐊᕐᓇᖓᓗ; ᐃᓅᑉ ᐊᓂᕐᓂᖓ ᓵᓐᓂ ᐊᔪᓕᖁᓇᒍ, ᑕᕐᓂᖏᓪᓗ ᓴᓇᓚᐅᕋᒃᑭᑦ.

¹⁷ ᓂᓐᖓᓚᐅᕋᒪ ᐊᔪᕐᑐᓕᔪᒪᓗᐊᕐᓂᖏᓐᓂᒃ ᐱᑦᔪᑎᖃᕐᓗᖓ, ᓱᒋᐊᓚᐅᕐᐸᒃᑲ, ᐃᔨᕐᓗᖓᓗ ᑖᒃᑯᓇᓐᖓᑦ ᓂᓐᖓᓚᐅᕋᒪ, ᑭᓯᐊᓂᓕ ᑲᑕᒃᐸᓪᓕᐊᑐᐃᓐᓇᓚᐅᕐᐳᑦ ᐊᑐᕈᒪᔭᑐᐃᓐᓇᕐᒥᖕᓂᒃ ᑲᔪᓯᕙᒃᓗᑎᒃ.

¹⁸ ᐱᓂᐊᕐᓂᖏᑦ ᑕᑯᓯᒪᕙᒃᑲ, ᐋᖅᑭᒍᒫᕐᐸᒃᑲᓕ; ᑕᓯᐅᕈᒫᕋᒃᑭᑦ ᐅᑎᕐᑎᑦᓯᕕᒋᓗᒋᓪᓗ ᓮᒻᒪᕐᑎᑕᐅᓂᕐᒥᒃ, ᕿᒃᓵᖕᓂᕆᔭᖏᓐᓂᓪᓗ ᒪᓂᒍᕐᓗᒋᑦ.

¹⁹ ᓮᒪᓂᕐᑕᖃᕐᓕ, ᓮᒪᓂᕐᑕᖃᕐᓕ, ᖃᓂᑦᑐᒦᑦᑐᓄᑦ ᐅᖓᓯᒃᑐᒦᑦᑐᓄᓪᓗ, ᐊᑕᓂᖅ ᐅᖃᕐᐳᖅ; ᑕᕝᕙ ᐋᖅᑭᒍᒫᕐᐸᒃᑲ.

²⁰ ᐱᐅᖏᑦᑐᓂᒃ ᐃᓕᖅᑯᓯᓖᑦ ᑕᕆᐅᑉ ᒪᓕᖏᑎᑐᑦ ᑍᒤᑉᐳᑦ ᓄᖅᑲᖓᔪᓐᓇᖏᑦᑐᑦ, ᒪᓕᒡᔪᐊᖏᓪᓗ ᓴᖅᑭᑎᑦᓯᓪᓗᑎᒃ ᐃᓱᕐᑐᒥᒃ ᒪᕐᕋᕐᒥᒡᓗ.

²¹ ᓮᓕᑦᓯᐊᕐᓇᕐᑐᒥᒃ ᐱᑕᖃᓐᖏᓚᖅ, ᐱᐅᖏᑦᑐᒥᒃ ᐃᓕᖅᑯᓯᖃᕐᑐᓄᑦ, ᒎᑎᒐ ᐅᖃᕐᐳᖅ.”