ᐂᓮᐊᓯᐅᑉ ᐊᒡᓚᖏᑦ 54 - ᐊᒡᓔᑦ ᐃᑦᔪᕐᖕᓁᑦᑐᑦ

ᐊᑕᓂᐅᑉ ᐃᓴᕆᐊᓕᒥᐅᓂᒃ ᓇᒡᓕᒍᓱᖕᓂᖓ

¹ “ᐃᓐᖏᓕᕆᑦ ᕿᑐᕐᖏᓱᐃᑦᑑᒐᕕᑦ, ᕿᑐᕐᖓᕐᑖᓚᐅᕐᓯᒪᖏᑦᑐᑎᑦ ᐃᓐᖏᕐᓯᓗᑎᑦ ᕾᒐᓛᓕᕆᑦ ᖁᕕᐊᓱᖕᓂᕐᒧᑦ, ᐃᕐᓂᓱᖕᓂᐅᑉ ᐋᓐᓂᐊᓇᕐᓂᖓᓂᒃ ᖃᐅᔨᓚᐅᕐᓯᒪᖏᑦᑐᑎᑦ! ᕿᑐᕐᖏᓱᐃᑦᑐᖅ ᑭᖑᕚᖃᕐᓂᕐᓴᐅᓂᐊᕐᒪᑦ ᐅᐃᓕᖕᒥᑦ,” ᐊᑕᓂᖅ ᐅᖃᕐᐳᖅ.

² “ᑐᐲᑦ ᓂᕈᑦᑐᕆᐊᓕᕈᒃ, ᑐᐱᕐᐱᑦ ᓴᓂᕋᖏᑦ ᐅᖓᕙᕆᐊᓕᒃᑭᒃ; ᐱᐅᕐᓱᐊᖏᓪᓗᑎᑦ ᑐᐱᒃᓴᒥᒃ, ᓄᖃᕈᑎᑎᓪᓗ ᑕᑭᓕᒋᐊᕐᓗᒋᑦ ᐸᐅᒍᐊᖏᓪᓗ ᐊᑦᑕᕐᓁᓕᒋᐊᕐᓗᒋᑦ.

³ ᐱᕕᑦᑐᕆᐊᕆᐊᖃᕐᓂᐊᕋᕕᐅᒃ ᓴᐅᒥᒧᑦ ᑕᓕᕐᐱᒧᓪᓗ, ᑭᖑᕚᒃᓴᑎᑦ ᐃᓅᖃᑎᒌᒡᔪᐊᓂᒃ ᓄᓁᕈᑦᔨᔪᒫᕐᒪᑕ ᐃᒡᓗᒐᓴᒡᔪᐊᖃᕐᕕᕕᓂᖏᓐᓂᓗ ᐃᓄᖃᔪᐃᑦᑑᓕᕐᑐᓂᒃ ᐃᒡᓗᒐᓴᒃᑖᕐᑐᕐᓗᓯ.

⁴ ᑲᑉᐱᐊᓱᒃᑍᓕᒋᑦᓯ, ᑲᓐᖑᓇᕐᑐᒧᐊᕐᑎᑕᐅᓂᐊᓐᖏᓚᓯ; ᓇᓗᓕᕐᑎᑕᐅᓂᐊᓐᖏᓚᓯᓗ, ᑲᓐᖑᓱᒃᑎᑕᐅᓂᐊᕋᓯᓗ; ᐅᕕᒐᕐᑑᓂᑦᓯᓐᓄᑦ ᑲᓐᖑᓇᕐᑐᒦᓐᓂᕆᕙᓚᐅᕐᑕᓯ ᐳᐃᒍᕈᒫᕐᐸᓯ; ᐅᐃᒡᒐᕐᓂᐅᓂᑦᓯᓐᓄᑦ ᓇᕐᕈᓇᕈᑎᒋᓚᐅᕐᑕᓯ ᐃᖅᑲᐅᒪᔪᓐᓁᕈᒫᕐᐸᓯ.

⁵ ᐱᓐᖑᕐᑎᑦᑎᔨᓯ ᐅᐃᒋᒐᑦᓯᐅᒃ, ᕿᓚᖕᒥᐅᒐᓴᒡᔪᐃᑦ ᐊᑕᓂᖓᓐᓂᒃ ᐊᑎᖃᕐᑐᖅ; ᐃᓴᕆᐊᓕᒥᐅᑦ ᐃᑦᔪᕐᓁᑦᑐᖁᑎᖓᑦ ᐃᒻᒥᓄᑦ ᐅᑎᕐᑎᑦᓯᔨᒋᒐᑦᓯᐅᒃ, ᓄᓇᕐᔪᐊᕐᒥᐅᓕᒫᑦ ᒎᑎᖓᓂᒃ ᑍᔭᐅᔪᖅ.

⁶ ᐊᑕᓂᐅᑉ ᐅᑎᖁᓪᓗᓯ ᐃᒻᒥᓄᑦ ᕾᖁᓚᐅᕐᐹᓯ ᐊᕐᓇᑐᑦ ᐊᕕᑕᐅᓯᒪᓪᓗᓂ ᐊᓂᕐᓂᕐᒥᒍᑦ ᐅᖁᒤᒃᓴᕐᑐᑎᑐᑦ, ᐅᕕᒐᕐᑑᓪᓗᓂ ᓄᓕᐊᕐᑖᕆᔭᐅᓚᐅᕐᑐᑎᑐᑦ ᐊᕕᑕᐅᑐᐃᓐᓇᕐᓯᒪᔪᑐᑦ, ᑍᒫᒃ ᒎᑎᓯ ᐅᖃᕐᐳᖅ.

⁷ ᓯᕐᓛᐱᒃ ᕿᒪᑬᓐᓇᓚᐅᕐᐸᑦᓯ, ᑭᓯᐊᓂᓕ ᓇᒡᓕᒋᓗᐊᕋᑦᓯ ᐅᑎᕐᑎᓐᓂᐊᕐᐸᑦᓯ ᐅᕙᓐᓄᑦ.

⁸ ᓂᓐᖓᓗᐊᕐᓂᑯᒧᑦ ᐊᑯᓂᐅᖏᑦᑐᖅ ᑮᓇᕋ ᐃᓕᑦᓯᓐᓂᑦ ᐊᓚᓚᐅᕋᒃᑯ; ᓇᒡᓕᖕᓂᓐᓄᓪᓕ ᓱᖁᓯᔪᐃᑦᑐᒧᑦ ᐱᑦᓯᐊᕐᕕᒋᓂᐊᕐᐸᑦᓯ, ᑍᒫᒃ ᐊᑕᓂᖅ ᐅᖃᕐᐳᖅ, ᑖᓐᓇ ᐃᒻᒥᓄᑦ ᐅᑎᕐᑎᑦᓯᔨᓯ.

⁹ ᑕᒪᓐᓇ ᐊᑦᔨᖃᕐᑎᑉᐸᕋ ᓄᐊ ᐃᓅᑎᓪᓗᒍ ᐱᓚᐅᕐᑐᒥᒃ; ᐅᖃᕕᒃᓗᖓ ᐅᖃᓚᐅᕋᒪ ᓄᐊ ᐃᓅᑎᓪᓗᒍ ᓄᓇᕐᔪᐊᓕᒫᖅ ᐅᓕᕕᒡᔪᐊᒧᑦ ᑎᑭᑕᐅᒃᑲᓐᓂᖁᓇᒍ, ᒫᓐᓇᑦᑕᐅᖅ ᐅᖃᕕᒃᓗᖓ ᐅᖃᕐᐳᖓ ᓂᓐᖓᒡᕕᒋᓂᐊᕈᓐᓃᕐᐸᑦᓯ ᓱᐊᖕᓂᐊᕈᓐᓃᕐᓗᓯᓗ.

¹⁰ ᖃᖅᑳᓗᐃᑦ ᐱᑕᖃᕈᓐᓃᕈᒫᕐᐳᑦ ᐱᖑᐃᓪᓗ ᐲᔭᕐᑕᐅᔪᒫᕐᓗᑎᒃ, ᓇᒡᓕᒍᓱᖕᓂᕋᓕ ᓱᖁᓯᔪᐃᑦᑐᖅ ᐃᓕᑦᓯᓐᓂᒃ ᕿᒤᓂᐊᓐᖏᓚᖅ, ᓮᒻᒪᕐᑎᑦᓯᓂᕋᓗ ᐊᖏᖃᑎᒌᒍᑎᒐ ᐲᕐᑕᐅᓂᐊᖏᓐᓂᕗᖅ, ᐊᑕᓂᖅ ᐅᖃᕐᐳᖅ, ᐃᓕᑦᓯᓐᓂᒃ ᓇᒡᓕᒍᓱᒃᑐᖅ.

¹¹ ᐋᓐᓂᐊᑎᑕᐅᔪᓯ, ᐊᖅᑯᓇᕐᒧᓪᓗ ᐃᒋᑕᐅᖃᑦᑕᕐᑐᓯ, ᐃᑲᔪᕐᑕᐅᓇᓯᓗ, ᑕᑯᒋᑦ, ᐃᓕᐅᕋᕐᓂᐊᕐᐸᑦᓯ ᐅᔭᖅᑲᓄᑦ ᐱᐅᔪᓄᑦ, ᑐᓐᖓᕕᓕᐅᕐᓗᓯᓗ ᐅᔭᕋᖕᓄᑦ ᑕᑯᒥᓇᕐᑐᕐᔪᐊᓄᑦ.

¹² ᐊᕙᓗᕐᔪᐊᑦᓯᓗ ᓄᕗᕈᓯᖏᑦ ᐅᔭᖅᑭᕐᑐᕐᓗᒋᑦ ᑕᕐᓴᖃᐅᕐᑐᓂᒃ, ᐃᑎᕐᑕᕐᕕᓯᓗ ᐅᔭᕋᒃᑕᖃᐅᕐᓗᑎᒃ ᕿᓪᓕᕐᑐᓂᒃ ᐊᑦᔨᒌᖏᑦᑐᓂᒃ, ᐊᕙᓗᕐᔪᐊᑦᓯᓗ ᐊᑭᓐᓇᖏᑦ ᐃᓕᐅᕅᕕᒋᓗᒋᑦ ᐅᔭᕋᖕᓂᒃ ᐊᑭᑐᔪᕐᔪᐊᓂᒃ.

¹³ ᐃᕐᓂᓕᒫᓯᓗ ᐊᔪᕆᕐᑐᐊᖑᔪᒫᕐᐳᑦ ᐊᑕᓂᕐᒧᑦ, ᐊᔪᕐᓴᖏᑦᑐᕐᔪᐊᖑᔪᒫᕐᓗᑎᒡᓗ ᕿᑐᕐᖓᓯ.

¹⁴ ᓇᓛᒎᕐᓂᕐᒥᒃ ᐱᐅᓯᕐᑖᕈᒫᕐᐳᓯ; ᐅᖁᒤᒃᓴᕐᑎᑕᐅᔪᒫᓐᖏᓚᓯ ᑲᑉᐱᐊᒋᔭᒃᓴᖃᖏᓪᓗᓯᓗ; ᑲᑉᐱᐊᓇᕐᑐᑦ ᐃᓕᑦᓯᓐᓄᑦ ᑎᑭᐅᑎᔪᓐᓇᕈᒫᖏᒻᒪᑕ.

¹⁵ ᐱᒋᐊᕐᑕᐅᒐᓗᐊᕈᑦᓯ ᐅᓇᑕᕐᓂᕐᒧᑦ, ᐱᒋᐊᕐᑕᐅᓂᓯ ᐅᕙᓐᓂᑦ ᐱᔪᒫᓐᖏᓚᑦ; ᐃᓕᑦᓯᓐᓂᒃ ᐱᒋᐊᕋᓱᒃᑐᑦ ᐅᕐᕈᖃᑦᑕᕈᒫᕐᐳᑦ ᐃᓕᑦᓯ ᐱᑦᔪᑎᒋᓗᓯ.

¹⁶ ᑕᑯᒋᑦ, ᐅᕙᖓ ᓴᕕᕋᔭᓕᕆᔨᒥᒃ ᓴᓇᓚᐅᕐᐳᖓ ᐊᐅᒪᓂᒃ ᐃᑯᒪᔪᓂᒃ ᓱᐴᕈᓐᓇᕐᑐᒥᒃ, ᓴᓇᓪᓗᓂᓗ ᓴᓇᕐᕈᑎᒥᓄᑦ; ᐱᓇᓱᐊᕐᑕᖓᓄᑦ ᓈᒻᒪᒃᑐᓂᒃ, ᐅᕙᖓᑦᑕᐅᖅ ᓴᖅᑭᑎᑦᓯᓚᐅᕆᕗᖓ ᑐᖁᑦᓯᓇᓱᐊᕐᑐᒥᒃ ᓄᖑᑎᕆᖁᓪᓗᒍ.

¹⁷ ᐅᓇᑕᐅᑏᑦ ᐃᓕᑦᓯᓐᓄᑦ ᐊᑐᕐᑕᐅᓇᓱᒃᑐᑦ ᐊᑑᑎᖃᕈᒫᓐᖏᓚᑦ, ᐅᖃᐅᓯᒃᓮᕈᑎᔪᒫᕐᐸᓯ ᐅᖃᓕᒫᑦ ᐃᓕᑦᓯᓐᓂᒃ ᐊᑭᕋᕐᑐᕋᓱᒃᑐᑦ ᐃᖅᑲᕐᑐᐃᕕᖕᓂ, ᑕᒪᓐᓇ ᑕᕝᕙ ᐊᑕᓂᐅᑉ ᐱᔨᖏᑕ ᐱᒋᔪᒫᕐᑕᖓᑦ ᓴᐳᑦᔭᐅᓂᕆᔪᒫᕐᑕᖓᓪᓗ ᐅᕙᓐᓂᑦ, ᐊᑕᓂᖅ ᐅᖃᕐᐳᖅ.”