ᐂᓮᐊᓯᐅᑉ ᐊᒡᓚᖏᑦ 51 - ᐊᒡᓔᑦ ᐃᑦᔪᕐᖕᓁᑦᑐᑦ

ᑐᓐᖓᓇᕐᑐᓂᒃ ᔨᕉᓴᓕᒥᐅᑦ ᐅᖃᐅᑦᔪᕐᑕᐅᓂᖓᑦ

¹ “ᓈᓚᒃᓯᓐᖓ, ᐃᓕᑦᓯ ᓇᓛᒎᕐᓂᕐᒥᒃ ᒪᓕᒃᑐᓯ, ᐊᑕᓂᕐᒥᒡᓗ ᕿᓂᕐᑐᓯ; ᕾᕐᑐᖅ ᐃᓚᓐᖔᔭᐅᕕᒋᓯᒪᔭᓯ ᓵᕝᕕᒋᓯᐅᒃ, ᐃᑎᕐᓴᓕᐅᕐᓯᒪᔪᕐᓗ ᑕᑯᓗᒍ ᐅᔭᕋᖕᓂᐊᕐᕕᐅᔪᑎᑐᑦ ᐲᕐᓯᕕᐅᕕᒋᓚᐅᕐᑕᓯ.

² ᐂᑉᕋᕼᐋᒻ ᓯᕗᓕᕕᓂᓯ ᐃᖅᑲᕐᓯᐅᒃ, ᓵᕋᓗ ᐊᓂᕕᒋᓯᒪᔭᓯ; ᐂᑉᕋᕼᐋᒻ ᐊᑕᐅᓯᑐᐊᖑᑎᓪᓗᒍ ᕾᖁᓚᐅᕐᐸᕋ, ᓮᒻᒪᕐᑎᓪᓗᒍᓗ ᐃᓄᒋᐊᒃᓯᑎᓚᐅᕐᐸᕋ.

³ ᐊᑕᓂᐅᑉ ᓮᒻᒪᕐᓴᕈᒫᕐᐹ ᓮᐅᓂ, ᓯᖁᑦᑎᕐᑕᐅᓯᒪᓂᖏᓪᓗ ᐋᖅᑭᒃᓗᒋᑦ, ᓄᓇᖁᑎᖓ ᓱᓇᖃᕈᓐᓁᓚᐅᕐᑐᖅ ᐱᕈᕐᓰᕕᒃᑐᑦ ᐄᑕᓂᑎᑐᑦ ᑍᒤᑎᑦᓱᒫᕐᐹ, ᓄᓇᖓᑕᓗ ᐃᓚᖓ ᓯᐅᕅᓐᓇᖅ ᐊᑕᓂᐅᑉ ᐱᕈᕐᓰᕕᖁᑎᖓᓄᑦ ᐊᑦᔨᐅᓕᕐᑎᑦᓱᒫᕐᓗᒍ, ᑕᕝᕙᓂ ᖁᕕᐊᓱᖕᓂᖃᕈᒫᕐᐳᑦ ᐊᓕᐊᓁᒍᓱᒡᓗᑎᒡᓗ, ᖁᔭᓕᔪᒫᕐᐳᑦ ᓂᕐᑐᐃᓗᑎᒡᓗ ᐃᓐᖏᕈᒫᕐᐳᑦ.

⁴ ᐃᓄᖁᑎᒃᑲ, ᓈᓚᓚᐅᕐᓯᓐᖓ; ᑐᓴᕐᓗᖓᓗ ᐃᓅᖃᑎᒌᒡᔪᐊᖁᑎᒃᑲ, ᐱᖁᔭᒃᑲ ᐅᕙᓐᓂᑦ ᐊᓂᔪᒫᕐᐳᑦ, ᐊᑦᔨᒌᒃᑎᑦᓯᓂᓐᓄᓪᓗ ᐃᓄᐃᑦ ᖃᐅᒪᒃᓴᕐᑕᐅᔪᒫᕐᓗᑎᒃ.

⁵ ᓇᓛᒎᕐᓂᕋ ᖃᓂᑉᐳᖅ, ᐱᐅᓕᒃᓯᓂᕋᓗ ᑎᑭᓕᕐᐳᖅ, ᐱᔪᓐᓇᕐᓂᓐᓄᑦ ᐃᓄᐃᑦ ᐊᐅᓚᑦᓱᒫᕐᐸᒃᑲ; ᐃᒪᐅᑉ ᑭᒡᓕᖓᓃᑦᑐᑦ ᐅᕙᓐᓂᒃ ᐅᑕᖅᑭᔪᒫᕐᐳᑦ, ᐊᖓᔪᖅᑲᐅᓂᓐᓂᒃ ᑕᑎᖃᕐᓗᑎᒃ.

⁶ ᕿᓚᖕᒧᑦ ᑕᑯᓴᓕᕆᑦᓯ, ᐊᒻᒧᓪᓗ ᕿᕕᐊᕐᓗᓯ ᓄᓇᒧᑦ; ᕿᓔᑦ ᐳᔪᕐᑐᑦ ᐊᓯᐅᔪᒫᕐᐳᑦ, ᓄᓇᕐᔪᐊᕐᓗ ᐱᑐᖃᓐᖑᕈᒫᕐᐳᖅ ᐊᓐᓄᕌᑐᑦ, ᐃᓄᖏᓪᓗ ᐊᓇᓐᖏᕐᑎᑐᑦ ᑐᖁᕋᕈᒫᕐᐳᑦ; ᐱᐅᓕᒃᓯᓂᕋᓕ ᐃᓱᖃᖏᑦᑐᒧᑦ ᐃᓕᖓᕗᖅ, ᓇᓛᒎᕐᓂᕋᓗ ᓄᖑᑎᑕᐅᔪᒫᓐᖏᓚᖅ.

⁷ ᓈᓚᒃᓯᓐᖓ ᓇᓛᒎᕐᓂᕐᒥᒃ ᖃᐅᔨᒪᔪᓯ, ᐱᖁᔭᓐᓂᒡᓗ ᐆᒻᒪᒻᒥᐅᑕᖃᕐᑐᓯ; ᓯᕗᕋᑦᑍᓕᒋᑦᓯ ᐸᓯᒃᓯᕐᑐᓂᒃ, ᕿᒃᓵᒍᑎᖃᕐᓂᐊᕋᓯᓗ ᒥᑕᐅᑎᖃᕐᑐᓂᒃ.

⁸ ᖁᐱᕐᕈᓄᑦ ᖃᓪᓗᓈᕐᑕᓂᒃ ᓂᕆᓲᓄᑦ ᓂᕆᔭᐅᔪᒫᕐᒪᑕ, ᖁᐱᕐᕈᓄᓪᓗ ᓄᕕᕐᓵᒃᓴᓂᒃ ᓂᕆᓲᓄᑦ ᓂᖃᐅᓗᑎᒃ; ᓴᐳᑦᔨᓂᕋᓕ ᐃᓱᖃᖏᑦᑐᒧᑦ ᓱᕐᕋᖕᓂᐊᓐᖏᓚᖅ, ᐱᐅᓕᒃᓯᓂᕋᓗ ᑭᖑᕚᖑᖃᑎᒌᓕᒫᓄᑦ.

⁹ ᑐᐸᓕᕆᑦ, ᑐᐸᓕᕆᑦ, ᐊᓐᓄᕌᕐᓗᑎᓪᓗ ᐱᔪᓐᓇᕐᓂᕐᒥᒃ, ᐊᑕᓂᐅᑉ ᐱᔪᓐᓇᕐᓂᖓᓂᒃ; ᑐᐸᓕᕆᑦ, ᑍᑦᓱᒪᓂᐊᓗᒃᑎᑐᑦ, ᕅᕼᐊᐱᒥᒃ ᐊᒡᒍᐃᓚᐅᕐᓯᒪᓐᖏᓚᑏᑦ, ᐆᒪᔪᕐᔪᐊᒥᒡᓗ ᖁᒡᓗᒋᐊᖑᔮᕐᑐᒥᒃ ᑲᐱᓯᓚᐅᓐᖏᓚᑏᑦ?

¹⁰ ᐃᕝᕕᓂᓐᓈ ᐃᒪᕐᔪᐊᖅ ᐃᒤᕈᑎᑎᓚᐅᕐᐱᐅᒃ? ᐃᒪᕐᐱᒃ ᐃᑎᔪᖅ; ᐊᖅᑯᑎᓕᐅᕐᓗᑎᑦ ᐃᒪᕐᔪᐊᒃᑯᑦ, ᓂᐅᕕᐊᖑᓪᓗᑎᒃ ᐅᑎᕐᑎᑕᐅᓯᒪᔪᑦ ᐊᖅᑯᑎᖃᕐᓗᑎᒃ ᐃᑳᕈᓐᓇᕐᓯᖁᓪᓗᒋᑦ.

¹¹ ᐊᑕᓂᐅᑉ ᐊᑭᓕᕐᓗᒋᑦ ᐱᑖᕆᒃᑲᓐᓂᕐᓯᒪᔭᖏᑦ ᐅᑎᕈᒫᕐᐳᑦ, ᓮᐅᓂᒧᑦ ᐃᑎᓕᕈᒫᕐᐳᑦ ᐃᓐᖏᕐᓗᑎᒃ; ᐃᓱᖃᖏᑦᑐᒧᑦ ᖁᕕᐊᓱᖕᓂᕐᔪᐊᖃᕈᒫᕐᐳᑦ, ᐊᓕᐊᓁᒍᓱᒡᓗᑎᒃ ᖁᕕᐊᓱᖕᓂᐊᓗᖕᒧᑦ, ᕿᒃᓵᖕᓂᖅ ᐊᓂᕐᓴᐅᒥᓂᕐᓗ ᕿᒫᔪᒫᕐᐴᒃ.

¹² ᐅᕙᖓ, ᑖᓐᓇᐅᕗᖓ ᓮᒻᒪᕐᑎᑦᓯᔪᖅ ᐃᓕᑦᓯᓐᓂᒃ; ᓱᖕᒪᑦ ᓯᕘᕋᕕᑦ ᐃᓄᖕᒥᒃ ᑐᖁᕙᒃᑐᒥᒃ, ᐃᓅᑉ ᐃᕐᓂᖓᓂᒃ ᐃᕕᒃᓱᒐᕐᑎᑐᑦ ᑍᒤᑦᑐᒥᒃ,

¹³ ᐳᐃᒍᕐᓯᒪᓪᓗᑎᑦ ᐊᑕᓂᕐᒥᒃ, ᐃᓕᖕᓂᒃ ᓴᓇᓚᐅᕐᑐᒥᒃ, ᕿᓚᖕᒦᑦᑐᓂᒃ ᐃᓯᕕᑦᓯᓯᒪᔪᖅ ᓄᓇᕐᔪᐊᕐᒥᒡᓗ ᐃᓂᒋᔭᒃᓴᖓᓄᑦ ᐃᓕᓯᓯᒪᔪᖅ, ᓯᕘᕋᖃᑦᑕᕐᐲᑦ ᐅᓪᓗᖅ ᓈᓗᒍ ᐊᑭᕋᕐᑐᕐᑎᕕᑦ ᓂᓐᖓᐅᒪᓂᖓᓂᒃ, ᑐᖁᑦᓯᔪᒪᑎᓪᓗᒍ? ᐊᑭᕋᕐᑐᕐᑎᕖᑦ ᑲᑉᐱᐊᓇᕐᓂᖓ ᓇᓃᒻᒪᑦ?

¹⁴ ᐊᐅᓪᓚᕈᑦᔭᐅᓯᒪᔪᑦ ᐊᓂᑎᑕᐅᕕᒃᓴᖓᑦ ᖃᒡᓕᕗᖅ; ᑐᖁᓂᐊᓐᖏᓚᑦ ᐃᑎᕐᓴᒧᓪᓗ ᐃᓕᔭᐅᓂᐊᓐᖏᓚᑦ, ᓂᕿᒃᓮᕈᑎᓂᐊᕋᑎᒡᓗ.

¹⁵ ᐅᕙᖓᐅᕗᖅ ᐊᑕᓂᖅ ᒎᑎᓯ, ᐃᒪᕐᔪᐊᓂᒃ ᒪᓪᓕᕐᑎᑦᓯᔪᓐᓇᕐᑐᖅ ᐃᒃᑑᓕᔮᕐᑎᓪᓗᒋᓪᓗ, ᕿᓚᖕᒥᐅᒐᓴᒡᔪᐃᑦ ᐊᑕᓂᖓᓐᓂᒃ ᐊᑎᖃᕐᐳᖅ.

¹⁶ ᐅᖃᐅᓯᒃᑲ ᐃᓕᕙᒃᑲ ᖃᓂᕐᓄᑦ; ᐃᔨᕐᓯᒪᓪᓗᓯᓗ ᐊᒡᒐᖕᒪ ᑕᕐᕋᖓᓄᑦ, ᕿᓚᖕᓂᒃ ᐃᓯᕕᑦᓯᖁᓪᓗᖓ, ᓄᓇᕐᔪᐊᕐᒥᒡᓗ ᐃᓂᒋᓂᐊᕐᑕᖓᓄᑦ ᐃᓕᓯᖁᓪᓗᖓ, ᓮᐅᓂᒧᓪᓗ ᐅᖃᕐᓗᖓ, ‘ᐃᓄᖁᑎᒋᕙᑦᓯ.’”

ᔨᕉᓴᓕᒥᐅᑦ ᐋᓐᓂᐊᑎᑕᐅᓂᖓᑦᑕ ᐃᓱᓕᓐᓂᖓ

¹⁷ ᑐᐸᓕᕆᑦ, ᑐᐸᓕᕆᑦ! ᒪᑭᓪᓗᑎᓪᓗ ᔨᕉᓴᓕᒻ. ᐃᓕᑦᓯ ᐃᒥᓚᐅᕐᑐᓯ ᐊᑕᓂᐅᑉ ᐊᑭᓂᐊᕐᓂᖓᑕ ᐃᒥᐅᑎᖓᓂᑦ ᓂᓐᖓᐅᒪᓂᖓᓂᒃ ᐃᒪᓕᖕᒥᒃ. ᐃᒤᕐᓗᒍ ᓄᖑᓚᐅᕐᐸᓯ ᐃᓗᓕᖁᑎᐅᑉ ᐃᒪᖓ ᐋᖓᔮᕈᑎᒋᓕᕐᓗᒍᓗ.

¹⁸ ᑕᓯᐅᕐᑎᒃᓴᖃᓐᖏᓚᖅ ᕿᑐᕐᖓᖃᐅᕋᓗᐊᕋᒥ ᐅᓄᕐᑐᓂᒃ; ᓱᓕ ᐊᒡᒐᖏᑎᒍᑦ ᑎᒍᔭᐅᓗᓂ ᑕᓯᐅᕐᑎᒃᓴᖃᓐᖏᓚᖅ, ᐃᕐᓂᓂ ᐅᓄᕐᑐᑦ ᐱᕈᐃᓚᐅᕋᓗᐊᕋᒥᒋᑦ.

¹⁹ ᑖᒃᑯᐊ ᒪᕐᕈᐃᑦ ᐃᓕᖕᓄᑦ ᑎᑭᐅᑎᓯᒪᕘᒃ; ᑭᐊᓕ ᕿᒃᓵᖃᑎᒋᓂᐊᕐᐹᑎᑦ? ᓄᖑᕈᑦᔭᐅᓯᒪᒐᕕᑦ ᐃᒡᓗᒐᓴᒡᔪᐊᓪᓗ ᓯᖁᑦᑎᕐᑕᐅᓪᓗᑎᒃ, ᑳᖕᓇᕐᑐᕐᔪᐊᖃᓕᕐᐳᑦ, ᐅᓇᑕᕐᓃᓪᓗ; ᑭᓇᒧᓕ ᓮᒻᒪᕐᓴᕐᑕᐅᓂᐊᓕᕐᐲ?

²⁰ ᐃᕐᓂᑎᑦ ᓄᑮᕈᑎᓯᒪᕗᑦ, ᓇᓚᓪᓗᑎᒡᓗ ᐊᖅᑯᑏᑦ ᓴᖑᒋᐊᕐᕕᖏᓐᓂ, ᑐᒃᑐᖓᔪᑎᑐᑦ ᓄᓗᐊᕐᑎᑕᐅᓯᒪᔪᑎᑐᑦ; ᑖᒃᑯᐊ ᐊᑕᓂᐅᑉ ᓂᓐᖓᐅᒪᓂᖓᓄᑦ ᐊᒃᑐᐊᔭᐅᕗᑦ, ᒎᑎᑦᓯᓗ ᐃᓂᕐᑎᕆᓂᖓᓄᑦ.

²¹ ᑍᒤᒻᒪᑦ ᑐᓴᓕᕆᑦᓯ ᐆᒥᖓ, ᐅᖁᒤᒃᓴᕐᓇᕐᑐᒦᑦᑐᓯ, ᐋᖓᔮᑐᓯᓗ ᕔᓂᒨᖏᑦᑐᖅ.

²² ᐊᑕᓂᓯ ᐃᒫᒃ ᐅᖃᕐᐳᖅ, ᑖᓐᓇ ᐊᑕᓂᖅ ᒎᑎᓯ, ᓯᕐᓈᕐᑐᖅ ᐃᓄᖁᑎᒥᓂᒃ: “ᑕᑯᒋᑦᓯ ᐃᒥᐅᑦ ᐅᕐᕈᔮᕈᑎᒋᓚᐅᕐᑕᓯ ᐲᕐᐸᕋ ᐊᒡᒐᑦᓯᓐᓂᑦ, ᐃᒥᐅᑦ ᐃᒪᖃᓚᐅᕐᑐᖅ ᓂᓐᖓᐅᒪᓂᓐᓂᒃ, ᑕᕝᕙᓐᖓᑦ ᐃᒥᒃᑲᓐᓂᕐᓂᐊᕈᓐᓃᕐᐳᓯ.

²³ ᐃᓕᑦᓯᓐᓂᒡᓗ ᐋᓐᓂᐊᑎᑦᓯᔪᓄᑦ ᐃᓕᖔᕐᓂᐊᓕᕐᐸᕋ, ᑍᒃᑯᐊ ᐃᓕᑦᓯᓐᓄᑦ ᐅᖃᕐᒪᑕ, ‘ᐅᕐᕈᖓᓚᐅᕆᑦᓯ ᖄᑦᓯᒍᑦ ᐱᓱᖕᓂᐊᕋᑦᑕ.’ ᑐᓄᓯᓗ ᓄᓇᑐᑦ ᑍᒤᑎᓚᐅᕐᐸᓯ, ᐊᖅᑯᑎᑎᑐᑦ ᐱᓱᒃᕕᐅᖃᑦᑕᕐᓗᑎᒃ.”