ᐂᓮᐊᓯᐅᑉ ᐊᒡᓚᖏᑦ 50 - ᐊᒡᓔᑦ ᐃᑦᔪᕐᖕᓁᑦᑐᑦ1 ᐊᑕᓂᖅ ᐃᒫᒃ ᐅᖃᕐᐳᖅ, “ᓇᐅᒡᓕ ᐊᓈᓇᕕᑦ ᐊᕕᑦᑎᑦᔪᑎᖓᑕ ᐊᒡᓚᒃᓯᒪᔪᖁᑎᖓ, ᑍᑦᓱᒧᖓ ᐊᕕᓚᐅᕋᒃᑰ? ᐅᕝᕙᓗ ᐊᑭᓕᒃᓴᖃᕐᕕᒋᔨᓐᓄᑦ ᓇᓪᓕᐊᓐᓄᑦ ᓂᐅᕐᕈᑎᒋᓚᐅᕐᐸᑦᓯ? ᑕᑯᒋᑦᓯ, ᐊᔪᕐᑐᓕᓂᑦᓯᓐᓄᑦ ᓇᖕᒥᓂᖅ ᓂᐅᕐᕈᑕᐅᓚᐅᕐᐳᓯ, ᐊᔪᕐᑐᓕᓂᑦᓯᓐᓄᓪᓗ ᐊᓈᓇᓯ ᐊᕕᑕᐅᓚᐅᕐᐳᖅ. 2 ᓱᖕᒪᑦ, ᐃᓄᖁᑎᒃᑲ ᑎᑭᓐᓇᒃᑭᑦ ᐊᖑᑎᑕᖃᓚᐅᓐᖏᓚᑦ? ᓱᖕᒪᓪᓗ ᓂᓪᓕᐊᑎᓪᓗᖓ ᑭᐅᔪᖃᓚᐅᓐᖏᓚᖅ? ᑕᓕᕋ ᓁᓗᐊᓕᕐᐹ ᐱᐅᓕᓯᔭᕆᐊᒥᒃ ᑎᑭᐅᑎᔪᓐᓁᓪᓕᕚ? ᓴᐳᑦᔨᓇᓱᒋᐊᒥᒃ ᐱᔪᓐᓇᕐᓂᖃᕈᓐᓃᕐᐳᖔ? ᑕᑯᒋᑦ, ᐃᓂᕐᑎᕆᒐᒪ ᐃᒪᕐᔪᐊᖅ ᐃᒤᕐᑎᑉᐸᕋ, ᑰᓪᓗ ᓴᓗᐊᕐᐳᑦ, ᐃᒪᖃᓐᖏᓗᐊᒧᑦ ᐃᖃᓗᐃᑦ ᒪᒤᓕᕗᑦ, ᓴᓗᐊᕋᒥᒡᓗ ᑐᖁᕋᕐᓗᑎᒃ. 3 ᓯᓚ ᐊᓐᓄᕌᕐᐸᕋ ᑖᕐᑐᒥᒃ, ᕿᒃᓵᒃᑐᕐᓯᐅᑎᒥᒡᓗ ᓵᑦᑐᒥᒃ ᐊᓐᓄᕌᕐᑎᓪᓗᒍ.” ᐊᑕᓂᐅᑉ ᓈᓚᑦᓯᐊᕐᑐᒥᒃ ᐱᔨᖃᕐᓂᖓ 4 ᐊᑕᓂᐅᑉ ᒎᑎᐅᑉ ᑐᓂᓯᕕᒋᕚᖓ ᐅᖃᕐᒥᒃ ᐃᓕᓯᒪᔪᒥᒃ, ᖃᐅᔨᒪᖁᓪᓗᖓ ᖃᓄᖅ ᐅᖃᕆᐊᖃᕐᒪᖔᕐᒪ, ᑕᖃᓯᒪᔪᓂᒃ ᐱᔪᓐᓇᕐᓯᑎᑦᓯᖁᓪᓗᖓ, ᐅᓪᓛᑕᒫᑦ ᑐᐸᒃᑎᖃᑦᑕᕐᐹᖓ, ᓯᐅᑏᒃᑲᒃ ᑐᐹᖃᑦᑕᕐᐹᒃ ᑐᓵᖁᓪᓗᖓ ᐃᓕᓐᓂᐊᕐᑎᑕᐅᔪᑎᑐᑦ. 5 ᐊᑕᓂᐅᑉ ᒎᑎᐅᑉ ᑐᑭᓯᔪᓐᓇᕐᓂᖃᕐᑎᑉᐹᖓ; ᐊᑭᕋᕐᑐᓚᐅᓐᖏᓚᖓ, ᑐᓄᐃᓚᐅᕐᓇᖓᓗ. 6 ᐋᓐᓂᕐᓯᕆᔪᓄᑦ ᑐᓄᒐ ᒪᓂᕙᕋ, ᐅᓗᐊᒃᑲᒡᓗ ᒪᓂᓪᓗᒋᒃ ᐅᒥᓐᓂᒃ ᓄᓲᕅᔪᓄᑦ; ᑮᓇᕋᓗ ᑕᓕᑎᓚᐅᓐᖏᓚᕋ ᒥᑕᐅᑎᖃᕐᑐᓄᑦ ᑎᕝᕗᓗᒃᑐᓄᓪᓗ. 7 ᐊᑕᓂᐅᑉ ᒎᑎᐅᑉ ᐃᑲᔪᕐᓂᐊᕐᒪᖓ; ᑍᒤᒻᒪᑦ ᑲᓐᖑᓱᒃᑎᑕᐅᓐᖏᓚᖓ; ᑍᒤᒻᒪᑦ ᑮᓇᕋ ᐅᔭᕋᒃᑐᑦ ᓯᑎᔪᑐᑦ ᒪᓂᕙᕋ, ᖃᐅᔨᒪᒐᒪ ᑲᓐᖑᓱᒃᑎᑕᐅᓂᐊᖏᓐᓂᓐᓂᒃ. 8 ᑖᓐᓇ ᐅᕙᓐᓂᒃ ᐃᓱᐊᕐᓂᕅᔪᖅ ᖃᓂᒻᒪᑦ; ᑭᓇ ᓈᒻᒪᒃᓴᖏᑦᔪᑎᒃᓴᖃᕐᐸ ᐅᕙᓐᓄᑦ? ᐊᑏ ᓇᖏᖃᑎᒌᓚᐅᕐᓗᒃ. ᑭᓇ ᐊᑭᕋᕐᑐᕐᑎᒋᕙᕌ? ᐊᑏ ᐅᕙᓐᓄᑦ ᕾᓕᕐᓕ. 9 ᑕᑯᒋᑦ, ᐊᑕᓂᖅ ᒎᑎ ᐃᑲᔪᕐᑎᒋᕙᕋ; ᑭᐊ ᐸᓯᔭᒃᓴᐅᓂᕋᕈᓐᓇᕐᐹᖓ? ᑕᑯᒋᑦ ᑖᒃᑯᐊ ᓄᑕᐅᔪᓐᓃᕈᒫᕐᐳᑦ ᐊᓐᓄᕌᑎᑐᑦ; ᓄᖑᔪᒫᕐᐳᑦ ᖁᐱᕐᕈᓄᑦ ᖃᓪᓗᓈᕐᑕᕐᑐᓲᓄᑦ ᓂᕆᔭᐅᔪᒫᕐᒪᑕ. 10 ᓇᓪᓕᓯ ᐊᑕᓂᕐᒥᒃ ᐃᓕᕋᒋᔭᖃᕐᐹ? ᓈᓚᒡᓗᓂᓗ ᐱᔨᖓᑕ ᓂᐱᖓᓂᒃ, ᓇᓪᓕᐊᑦ ᑖᕐᑐᒥ ᐃᓅᔪᖅ ᖃᐅᒪᔪᕐᓯᐅᖏᑦᑐᖅ, ᑖᓐᓇ ᑕᑎᖃᓕᕐᓕ ᐊᑕᓂᐅᑉ ᐊᑎᖓᓂᒃ ᒎᑎᒥᓂᒡᓗ ᑕᑎᖃᕐᓗᓂ. 11 ᑕᑯᒋᑦ, ᐃᑯᒪᒥᒃ ᐃᑯᐊᓪᓔᔪᓕᒫᑦ, ᖃᕐᔪᓂᒡᓗ ᐃᑯᒪᑎᑦᓯᓪᓗᑎᒃ ᐊᕙᑖᒍᑦ ᐱᓱᒃᑐᑦ: ᐱᓱᒃᐳᓯ ᐃᑯᒪᑎᑕᑦᓯ ᖃᐅᒪᑎᑕᖓᒍᑦ, ᖃᕐᔪᓄᓪᓗ ᐃᑯᒪᑎᑕᑦᓯᓐᓄᑦ! ᑍᒤᑦᑐᒥᒃ ᐱᑎᑕᐅᔪᒫᕐᐳᓯ ᐊᒡᒐᓐᓂᑦ: ᓇᓚᔪᒫᕐᐳᓯᓗ ᐋᓐᓂᐊᑎᑕᐅᓇᕐᑐᒥ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society