ᐂᓮᐊᓯᐅᑉ ᐊᒡᓚᖏᑦ 5 - ᐊᒡᓔᑦ ᐃᑦᔪᕐᖕᓁᑦᑐᑦᐱᕈᕐᓰᕕᖕᒥᒃ ᐃᓐᖏᐅᑎᖃᕐᓂᖅ 1 ᐃᓐᖏᓚᐅᕐᓚᖓ ᐆᒥᖓ ᓇᒡᓕᒋᔭᓐᓄᑦ, ᓇᒡᓕᖕᓂᕐᒥᒃ ᐃᓐᖏᐅᑎᖃᕐᓗᖓ ᕔᓂᒃᓴᓂᒃ ᐱᕈᕐᓰᕕᖁᑎᖓᓂᒃ; ᓇᒡᓕᒋᔭᕋ ᕔᓂᒃᓴᓂᒃ ᐱᕈᕐᓰᕕᖁᑎᖃᓚᐅᕐᐳᖅ ᐱᕈᕐᕕᐅᑦᓯᐊᕐᓇᕐᑐᒥᒃ ᐱᖒᑉ ᖄᖓᓂ. 2 ᓄᓇ ᐳᐊᕐᕆᔭᓚᐅᕐᐹ ᐅᔭᕅᔭᕐᓗᒍᓗ; ᐃᓕᐅᕅᕕᒋᓚᐅᕐᐹ ᕔᓂᒃᓴᓂᒃ ᐱᐅᓂᕐᐹᓂᒃ; ᐳᕐᑐᔪᒥᒡᓗ ᕿᑎᖓᓂ ᐃᒡᓗᓕᐅᕐᐳᖅ ᖃᐅᔨᓴᕐᕕᖕᒥᒃ, ᐃᑎᕐᓴᓕᐅᓪᓗᓂᓗ ᕔᓂᒃᓴᓂᒃ ᐃᑦᑏᔧᕕᒃᓴᒥᓂᒃ, ᕔᓂᒃᓮᓪᓗ ᐱᕈᕇᕐᓯᐊᕆᓕᕐᐰᑦ, ᐱᐅᔪᓂᒃ ᓂᕆᐅᒡᓗᓂ, ᕔᓂᒃᓮᓪᓕ ᐱᕈᕇᕋᓗᐊᕐᒪᑕ ᐱᐅᖏᑦᑐᓂᒃ ᐸᐅᕐᖓᖃᕐᐳᑦ. 3 ᒫᓐᓇᓕ, “ᔨᕉᓴᓕᒥᐅᑕᐅᔪᓯ ᔫᑕᒥᐅᑕᔪᓯᓗ, ᖃᐅᔨᓇᓱᐊᓕᕆᑦᓯ, ᐅᕙᓐᓂᒃ ᕔᓂᓂᒡᓗ ᐱᕈᕐᓰᕕᖁᑎᓐᓂᒃ. 4 ᓱᓇᒥᒃ ᐱᔭᕆᐊᖃᒃᑲᓐᓂᕋᓗᐊᕐᓗᖓ ᐱᓐᓂᖏᓐᓇᒫ? ᐸᐅᕐᖓᑦᓯᐊᕙᖕᓂᒃ ᓂᕆᐅᒃᑲᓗᐊᕋᒪ, ᓱᖕᒪᑦ ᐸᐅᕐᖓᓂᒃ ᐱᐅᖏᑦᑐᓂᒃ ᐱᕈᕐᑐᖃᕐᐹ? 5 “ᒫᓐᓇᓕ ᐅᖃᐅᑎᓂᐊᓕᕐᐸᒋᑦ ᐱᕈᕐᓰᕕᖁᑎᓐᓄᑦ ᐱᓇᓱᐊᕐᓂᐊᕐᓂᓐᓂᒃ, ᐊᕙᓗᓕᐅᕐᓯᒪᔪᖅ ᐱᕈᕐᑐᓂᒃ ᐲᕈᒪᕙᕋ, ᑕᕝᕙ ᓄᖑᑕᐅᓂᐊᕐᐳᖅ; ᐊᕙᓗᖏᓪᓗ ᓯᖁᒥᓪᓗᒋᑦ ᑐᓪᓕᕋᕐᑕᐅᓗᓂ. 6 ᐊᑑᑎᖃᕈᓐᓃᕐᑎᑦᓱᒪᕙᕋ, ᕔᓂᒃᓮᓪᓗ ᐱᕈᕐᕕᖏᑦ ᓇᑲᑎᕐᑕᐅᖃᑦᑕᕐᓂᐊᓐᖏᓪᓚᑦ ᓄᓇᖓᓗ ᐊᕿᓕᓴᕐᑕᐅᕙᖏᓪᓗᓂ, ᐊᕚᓚᕿᐊᓪᓗ ᐅᕐᐱᒊᓪᓗ ᑲᑭᓐᓇᕐᑐᓖᑦ ᐱᕈᕈᒫᕐᐳᑦ; ᓄᕗᔧᓪᓗ ᐱᖁᔪᒫᕐᐸᒃᑲ ᑕᕝᕗᖓ ᓯᓚᓗᖁᓇᒋᑦ.” 7 ᕿᓚᖕᒥᐅᒐᓴᒡᔪᐃᑦ ᐊᑕᓂᖓᑦᑕ ᕔᓂᒃᓴᓕᐅᕐᕕᒋᖕᒪᒋᑦ ᐃᓴᕆᐊᓕᐅᑉ ᑭᖑᕚᖏᑦ; ᔫᑕᐅᓪᓗ ᐃᓄᖏᑦ ᑕᑯᒥᓇᕐᑐᖁᑎᒋᓪᓗᒋᑦ ᐱᕈᕐᓰᕕᖁᑎᒋᕔᑦ; ᓂᕆᐅᒡᕕᒋᓚᐅᕐᐰᑦ ᐊᑦᔨᒌᒃᑎᑦᓯᓂᕐᒥᒃ, ᑭᓯᐊᓂᓕ ᐅᖁᒤᒃᓴᕐᑎᑦᓯᓯᒪᕗᑦ; ᐃᓱᐊᕐᓂᕐᒥᒡᓗ ᓂᕆᐅᒡᕕᒋᓚᐅᕐᐰᑦ, ᕿᐊᔪᓂᒡᓕ ᑐᓵᕗᑦ. ᐃᓄᐃᑦ ᐱᐅᖏᑦᑐᒥᒃ ᐱᓇᓱᐊᕐᓂᖏᑦ 8 ᑲᑉᐱᐊᓐᓇᒦᒃ ᐃᒡᓗᓕᐅᕐᐸᓪᓕᐊᔪᖅ ᐊᒃᑐᐊᖃᑦᑕᐅᑎᔪᓂᒃ, ᐱᕈᕐᓰᕕᓕᐅᕐᐸᓪᓕᐊᔪᕐᓗ ᐊᒃᑐᐊᖃᑦᑕᐅᑎᔪᓂᒃ, ᐃᓂᒃᓮᕈᑎᑐᐃᓐᓇᕐᓗᒍ ᖃᓂᒋᔭᖓ, ᐃᓄᑑᓗᑎᒃ ᓄᓇᖃᕐᕕᒋᓕᕐᓗᒍ ᓄᓇᒋᔭᓂ. 9 ᕿᓚᖕᒥᐅᒐᓴᒡᔪᐃᑦ ᐊᑕᓂᖓᑦ ᑐᓵᑎᓪᓗᖓ ᐅᖃᓚᐅᕐᐳᖅ: “ᐃᓛᒃ, ᐃᒡᓗᐃᑦ ᐅᓄᕐᑐᑦ ᕿᒪᒃᑕᐅᔪᒫᕐᐳᑦ, ᐊᖏᔪᑦ ᑕᑯᒥᓇᕐᑐᓪᓗ ᐃᒡᓗᐃᑦ, ᐃᓄᖃᕈᓐᓃᕈᒫᕐᐳᑦ. 10 ᐱᕈᕐᓰᕖᑦ ᕔᓂᒃᓴᕐᑕᓖᑦ ᐊᖏᓂᖃᕐᑐᑦ ᐃᒡᓗᓕᐅᕐᕕᐅᔪᓐᓇᕐᑐᒧᑦ 40ᓂᒃ ᕔᓂᑖᕐᕕᐅᔪᒫᕐᐳᖅ ᖃᓪᓗᑎᓂᒃ ᑕᓪᓕᒪᓂᒃ, ᐱᕈᕐᓯᐊᒃᓮᓪᓗ ᑲᓐᖓᕐᓲᑎᒃᓴᖏᑦ ᖃᑦᑕᐅᔧᑦ 10 ᐱᕈᕐᑎᑦᓯᔪᒫᕐᐳᑦ ᖃᑦᑕᒧᑦ ᐊᑕᐅᓯᕐᒧᑦ ᓈᒻᒪᒃᑐᒥᒃ.” 11 ᑲᑉᐱᐊᓐᓇᒦᒃ ᑍᒃᑯᐊ ᐅᓪᓛᕌᕐᔪᒃᑯᑦ ᒪᑭᑉᐸᒃᑐᑦ, ᐃᒥᐊᓗᖕᒥᒃ ᓴᓐᖏᔪᒥᒃ ᐱᔪᓐᓇᕐᓯᔪᒪᓪᓗᑎᒃ, ᐅᓐᓄᐊᒧᑦ ᑎᑭᓪᓗᒍ ᐊᖏᕐᕋᕐᐸᖏᑦᑐᑦ ᐃᒥᐊᓗᖕᒧᑦ ᐆᓇᕐᓯᑎᑕᐅᓚᐅᖏᓐᓂᕐᒥᖕᓂ! 12 ᑯᑭᑦᑕᐸᐅᑎᐅᔭᓂᒃ ᓄᖃᕐᑎᓕᖕᓂᒃ ᕼᐊᕐᐱᓂᒡᓗ ᑯᑭᑦᑕᐸᐅᑎᐅᔭᓂᒃ, ᕿᓚᐅᑎᐅᔭᓂᒡᓗ ᓱᐴᒐᓂᒡᓗ ᕔᓂᓂᒡᓗ ᖁᕕᐊᓲᑎᖃᖃᑦᑕᕐᐳᑦ ᓂᕆᕕᒡᔪᐊᓕᕌᖓᒥᒃ; ᖃᐅᔨᓇᓱᐊᓐᖏᓚᓪᓕ ᐊᑕᓂᐅᑉ ᐱᓇᓱᐊᕐᓯᒪᓂᖓᓂᒃ, ᐃᓱᒪᖃᕋᑎᒡᓗ ᑖᑦᓱᒪ ᐊᒡᒐᖏᑕ ᓴᓇᓯᒪᔭᖏᓐᓂᒃ. 13 ᑍᒤᒻᒪᑦ ᐃᓄᖁᑎᒃᑲ ᐊᐅᓪᓚᕈᑦᔭᐅᓚᐅᕐᐳᑦ ᑎᒍᔭᐅᓪᓗᑎᒃ, ᖃᐅᔨᒪᓇᓱᓚᐅᖏᓐᓇᒥᒃ; ᐊᖑᑎᑦ ᐅᐱᓐᓇᕐᑐᖁᑎᖏᑦ ᑳᖕᓂᕐᒧᑦ ᐱᕐᓕᓕᕐᐳᑦ, ᐃᓄᒐᓴᒡᔪᐊᖁᑎᖏᓪᓗ ᐃᒥᕈᖕᓂᕐᒧᑦ ᖀᓕᕐᐳᑦ. 14 ᑍᒤᒻᒪᑦ ᑐᖁᖓᔪᑦ ᐃᓂᖓᑦ ᐊᕿᐊᑦᑐᕐᑎᑕᐅᓕᕐᐳᖅ; ᖃᓂᓂᓗ ᐂᑦᑕᕐᐹ ᐊᖏᔪᕐᔪᐊᖑᓕᕐᓗᒍ ᐆᒃᑐᕋᕐᑕᐅᔪᓐᓇᖏᑦᑐᒧᑦ, ᔨᕉᓴᓕᐅᓪᓗ ᐊᖓᔪᖅᑳᖁᑎᖏᑦ ᐃᓄᒐᓴᒡᔪᐊᖏᓪᓗ ᑖᑦᓱᒪ ᖃᓂᖓᓄᑦ ᐄᔭᐅᕗᑦ, ᐃᓄᒐᓴᒡᔪᐊᑦ ᐊᖏᔪᕈᕐᑎᑦᓯᕙᒃᑐᓪᓗ ᑖᑦᓱᒥᖓ. 15 ᐃᓄᐃᑦ ᐅᑯᑎᑕᐅᕗᑦ, ᐊᖑᑎᓕᒫᓪᓗ ᓇᓗᖅᑯᑎᓕᕐᑎᑕᐅᓪᓗᑎᒃ, ᐱᐅᔪᕆᔪᓪᓗ ᒥᒃᓕᓕᕐᑎᑕᐅᕗᑦ ᓯᑭᖓᓕᕐᓗᑎᒃ. 16 ᕿᓚᖕᒥᐅᒐᓴᒡᔪᐃᓪᓕ ᐊᑕᓂᖓᑦ ᐊᖏᒡᓕᑎᑕᐅᔪᒫᕐᐳᖅ ᐃᖅᑲᕐᑐᐃᑦᓯᐊᕐᓂᒃᑯᑦ, ᒎᑎᓗ ᐃᑦᔪᕐᓁᑦᑐᖅ ᐃᒻᒥᓂᒃ ᓴᖅᑭᑎᑦᓱᒫᕐᐳᖅ ᐃᑦᔪᕐᓁᓐᓂᕐᒥ ᓇᓛᒎᕐᓂᕐᒥᓗ. 17 ᑕᕝᕙ ᓰᐱᐅᑉ ᓄᕐᕋᖏᑦ ᓂᕆᓇᓱᐊᓕᕈᒫᕐᐳᑦ ᓇᖕᒥᓂᖅ ᓂᕆᓇᓱᐊᕐᕕᖕᒥᓃᑦᑐᑐᑦ, ᓯᖁᑦᑎᕐᑕᐅᓯᒪᔪᓂ ᖁᐃᒃᓯᑦᓯᐊᖑᓯᒪᔪᑦ ᒎᑦᓰᓪᓗ ᓄᕐᕋᖏᑦ ᑕᕝᕙᓂ ᓂᕆᓇᓱᒡᓗᑎᒃ. 18 ᑲᑉᐱᐊᓐᓇᒦᒃ ᐅᓂᐊᕐᑐᑦ ᐊᔪᕐᑐᓕᓂᕐᒥᒃ ᓴᒡᓗᓂᐅᑉ ᐊᒃᓱᓈᖓᒍᑦ, ᐊᔪᕐᓂᕐᒥᒃ ᐅᓂᐊᕐᑐᑦ ᐊᒃᓱᓈᓂᒃ ᐅᓂᐊᕈᑎᖃᕐᓗᑎᒃ. 19 ᐅᖃᕐᓗᑎᒃ ᐃᒫᒃ: “ᐅᐃᒪᓚᐅᕐᓕ, ᐱᓕᕆᐊᓂ ᑐᐊᕕᐊᕆᓚᐅᕐᓕᐅᒃ ᐱᓇᓱᐊᕐᑕᖓ ᑕᑯᓂᐊᕋᑦᑎᒍ; ᐃᓴᕆᐊᓕᐅᑉ ᐃᑦᔪᕐᓁᑦᑐᖁᑎᖓᑕ ᐱᑦᔪᑎᒃᓴᖓ ᖃᒡᓕᓚᐅᕐᓕ, ᕾᓚᐅᕐᓕ ᖃᐅᔨᓂᐊᕋᑦᑎᒍ!” 20 ᑲᑉᐱᐊᓐᓇᒦᒃ ᐱᐅᖏᑦᑐᒥᒃ ᐱᐅᓂᕅᔪᑦ ᐱᐅᔪᒥᒡᓗ ᐱᐅᖏᓐᓂᕅᔪᑦ, ᑖᕐᑐᒥᒃ ᖃᐅᒪᓂᕅᔪᑦ ᖃᐅᒪᔪᒥᒡᓗ ᑖᕐᓂᕅᔪᑦ, ᓰᕐᓇᖏᑦᑐᒥᒃ ᓰᕐᓇᕐᓂᕅᔪᑦ, ᓰᕐᓇᕐᑐᒥᒡᓗ ᓰᕐᓇᖏᓐᓂᕅᔪᑦ! 21 ᑲᑉᐱᐊᓐᓇᒦᒃ ᐃᒻᒥᖕᓂᒃ ᑕᐅᑐᒃᑕᒥᒍᑦ ᓯᓚᑐᓇᓱᒋᔪᑦ, ᖃᐅᔨᒪᓂᕐᓴᐅᓇᓱᒋᔪᓪᓗ ᐃᒻᒥᒍᑦ ᑕᐅᑐᒃᑕᒥᒍᑦ! 22 ᑲᑉᐱᐊᓐᓇᒦᒃ ᕔᓂᒥᒃ ᐃᒥᕐᓯᑎᐊᓗᐃᑦ, ᐊᔪᖏᑦᑐᐊᓗᐃᓪᓗ ᓴᓐᖏᔪᒥᒃ ᑲᑎᑦᓯᓗᑎᒃ ᐃᒥᐊᓗᓕᐅᕐᑐᑦ, 23 ᓇᓪᓕᐊᑦ ᐱᐅᖏᑦᑐᒥᒃ ᐊᑭᓕᕐᑕᐅᓂᒃᑯᑦ ᐸᓯᔭᒃᓴᐅᖏᓐᓂᕅᔪᑦ, ᐸᓯᔭᒃᓴᐅᖏᑦᑐᒥᒡᓗ ᐊᕐᓵᕐᓯᔪᑦ ᐱᔪᓐᓇᕐᑎᑕᐅᑦᔪᑎᖓᓂᒃ! 24 ᑍᒤᒻᒪᑦ, ᓲᕐᓗ ᐃᑯᒪᐅᑉ ᐃᑯᐊᓚᔫᑉ ᐃᕕᖕᓂᒃ ᑭᓪᓗᐃᕕᐅᔪᕕᓃᑦ ᓄᖑᒻᒪᒋᑦ, ᓲᕐᓗᓗ ᐃᕕᒃᓱᒐᖅ ᐸᓂᕐᑐᖅ ᐃᑯᒪᒧᑦ ᓄᖑᑕᐅᖕᒪᑦ, ᑍᒫᒃᑕᐅᖅ ᐊᒫᖏᑦ ᐊᐅᓂᐅᓕᕈᒫᕐᐳᑦ, ᐱᕈᕐᑐᖏᑕᓗ ᓂᐊᖁᖏᑦ ᐳᔪᕋᕐᑎᑐᑦ ᑎᒃᑕᐅᔪᒫᕐᐳᑦ; ᕿᓚᖕᒥᐅᒐᓴᒡᔪᐃᑦ ᐊᑕᓂᖓᑕ ᐱᖁᔭᖏᑦ ᒪᓕᒍᒪᓚᐅᖏᒻᒪᒋᑦ, ᐃᓴᕆᐊᓕᐅᓪᓗ ᐃᑦᔪᕐᓁᑦᑐᖁᑎᖓᑕ ᐅᖃᐅᓯᖓ ᓇᕐᕈᒋᓚᐅᕐᒪᑦᔪᒃ. 25 ᑍᒤᒻᒪᑦ ᐊᑕᓂᐅᑉ ᓂᓐᖓᐅᓯᖓ ᐃᑯᐊᓪᓚᓚᐅᕐᐳᖅ ᐃᓄᖁᑎᒥᓄᑦ, ᑕᓕᓂᓗ ᐃᓴᒃᐹ ᑖᒃᑯᓄᖓ ᐱᒋᐊᕈᒪᓪᓗᒋᑦ, ᖃᖅᑬᑦ ᓴᔪᒃᐱᓗᒃᐳᑦ; ᑎᒥᕕᓂᖏᓪᓗ ᐊᖅᑯᑎᓂ ᐃᒋᑕᐅᓯᒪᔪᑎᑐᑦ ᑍᒤᓕᕐᓗᑎᒃ. ᓂᓐᖓᐅᒪᓂᖓ ᓴᖑᓐᖏᓚᖅ ᐊᒡᒐᖏᑦ ᓱᓕ ᐅᕐᓕᕐᑐᕐᐳᑦ. 26 ᑖᑦᓱᒪ ᓇᓗᓁᒃᑯᑕᖁᑎᓂ ᓇᑉᐸᕐᑎᓐᓂᐊᕐᐹ ᐃᓅᖃᑎᒌᒡᔪᐊᓄᑦ ᐅᖓᓯᒃᑐᒦᑦᑐᓄᑦ, ᐅᕕᓐᖏᐊᕐᕕᒋᔪᒫᕐᐰᓪᓗ ᕾᖁᓗᒋᑦ ᓄᓇᐅᑉ ᑭᒡᓕᖓᓂᑦ; ᑕᑯᒋᓪᓗ ᑐᐊᕕᒻᒪᕆᒡᓗᑎᒃ, ᕾᔪᒫᕐᐳᑦ! 27 ᑕᖃᓯᒪᔪᒫᓐᖏᓚᑦ, ᐹᓪᓚᖕᓂᐊᕋᑎᒡᓗ, ᓇᔭᖓᕐᑐᖃᕐᓂᐊᓐᖏᓚᑦ ᓯᓂᒃᑐᖃᕐᓂᐊᕋᓂᓗ, ᑕᑦᓯᕈᑎᖏᓪᓗ ᖃᓱᔪᒫᓐᖏᓚᑦ, ᐃᑎᒐᒍᑎᖏᑕᓗ ᓯᖏᖏᓐᓂᒃ ᕿᒃᑐᕋᕐᑐᖃᕐᓂᐊᕋᑎᒃ; 28 ᖃᕐᔪᖏᑦ ᐃᐱᒃᐳᑦ, ᐱᓯᒃᑎᓕᒫᖏᓪᓗ ᓂᐅᖓᒃᓯᒪᕗᑦ ᐅᕐᓕᕐᑐᕐᓗᑎᒃ, ᕿᒻᒥᕐᔪᐊᖏᑕᓗ ᑯᑭᖏᑦ ᐊᖕᒫᒃᓴᑎᑐᑦ ᓯᑎᔪᑎᑐᑦ ᑍᒤᑉᐳᑦ, ᑲᓕᒐᖏᑕᓗ ᐊᒃᓴᓗᐊᖏᑦ ᐅᓚᔪᔭᕐᑎᑐᑦ ᑬᕕᑉᐳᑦ. 29 ᓂᐱᖏᑦ ᓔᔭᑎᑐᑦ ᖃᓕᖑᐊᕐᑐᑎᑐᑦ ᑍᒤᑉᐳᑦ, ᓔᔭᑎᑐᑦ ᐃᓅᓱᒃᑐᑎᑐᑦ ᖃᓕᖑᓛᕐᐳᑦ; ᐃᕐᓯᓵᕐᓗᑎᒃ ᐅᐸᒃᑐᕐᐳᑦ ᓂᕿᒃᓴᒥᖕᓂᒃ, ᑭᖕᒥᐊᓕᕐᓗᒋᓪᓗ ᐊᐅᓪᓚᕈᑎᕔᑦ ᐅᖓᒻᒧᑦ, ᓇᓪᓕᐊᓐᓄᓪᓘᓐᓃᑦ ᐊᕐᓵᕐᑕᐅᔪᓐᓇᕋᑎᒃ. 30 ᐃᕐᓯᓵᕐᕕᒋᔪᒫᕐᐰᑦ ᑕᒪᓐᓇ ᓇᓪᓕᐅᑎᒃᐸᑦ, ᐃᒪᕐᔪᐊᑉ ᑕᕆᐅᑉ ᓄᓇᒧᑦ ᓂᐱᕐᔪᐊᖃᕐᓂᖓᑐᑦ. ᓄᓇ ᑕᑯᔭᐅᒐᔭᕐᐸᑦ ᓇᓪᓕᐊᓐᓄᑦ, ᑕᑯᔭᐅᒐᔭᕐᐳᖅ ᑖᕐᑐᐊᓗᒃ ᑲᑉᐱᐊᓇᕐᑐᕐᓗ; ᖃᐅᒪᔪᕐᓗ ᑖᕐᓯᑎᑕᐅᕗᖅ ᓄᕗᔭᓄᑦ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society