ᐂᓮᐊᓯᐅᑉ ᐊᒡᓚᖏᑦ 48 - ᐊᒡᓔᑦ ᐃᑦᔪᕐᖕᓁᑦᑐᑦᒎᑎ ᓯᕗᓂᒃᓴᒧᑦ ᐊᑕᓂᐅᕗᖅ 1 “ᐆᒥᖓ ᑐᓴᓕᕆᑦᓯ, ᔧᑯᒃᑯᑦ ᑭᖑᕚᖏᑦ, ᐄᓴᕆᐅᓪ ᐊᑎᖓᓂᒃ ᑍᔭᐅᔪᑦ, ᐃᕐᓂᐊᖑᓯᒪᔪᓪᓗ ᔫᑕᐅᑉ ᑭᖑᕚᖏᓐᓂᑦ ᐱᓯᒪᓪᓗᑎᒃ; ᐊᖏᕈᑎᖃᕐᓯᒪᔪᓪᓗ ᐊᑕᓂᐅᑉ ᐊᑎᖓᓂᒃ ᐅᖃᐅᓯᖃᕐᑐᓪᓗ ᐃᓴᕆᐊᓕᐅᑉ ᒎᑎᖓᓂᒃ, ᓱᓕᔪᒃᑰᕋᑎᒃ ᓇᓛᒎᕋᑎᒡᓗ. 2 ᐃᒻᒥᖕᓂᒃ ᑍᕙᒃᑐᑦ ᐃᒡᓗᒐᓴᖕᓄᑦ ᐃᑦᔪᕐᓁᑦᑐᓄᑦ ᐃᓚᐅᓂᕋᕐᓗᑎᒃ, ᑕᑎᑐᐊᖃᕐᓂᕋᕐᓗᑎᒡᓗ ᐃᓴᕆᐊᓕᒥᐅᑦ ᒎᑎᖓᓐᓂᒃ; ᑖᓐᓇ ᐊᑎᖃᕐᒪᑦ ᕿᓚᖕᒥᐅᒐᓴᒡᔪᐃᑦ ᐊᑕᓂᖓᓐᓂᒃ. 3 ᑍᑦᓱᒪᓂᐊᓘᑎᓪᓗᒍ ᓱᓕ ᐱᓚᐅᕐᑐᕕᓂᕐᓂᒃ ᐅᖃᐅᑎᓯᒪᕙᑦᓯ, ᓇᖕᒥᓂᖅ ᖃᓂᓐᓂᑦ ᐊᓂᓪᓗᑎᒃ, ᑐᓴᕐᑕᐅᑎᓪᓗᒋᓪᓗ. ᐃᓕᑦᓯᓐᓄᑦ ᓇᓪᓕᐅᑎᑳᓪᓚᓚᐅᕐᐳᑦ ᐱᓇᓱᐊᓚᐅᕋᒃᑭᑦ ᖄᖏᕐᓗᑎᒡᓗ. 4 ᖃᐅᔨᒪᒐᒪ ᓯᑎᔫᒐᑦᓯ, ᖁᖓᓯᓯᓗ ᓄᑭᖏᑦ ᓴᕕᕋᔭᐅᓪᓗᑎᒃ, ᖃᐅᓯᓗ ᑲᓐᓄᔭᐅᓪᓗᑎᒃ. 5 ᑍᑦᓱᒪᓂᐊᓗᖕᓂᑦ ᐱᔪᒫᕐᑐᓂᒃ ᐅᖃᐅᑎᓯᒪᕙᑦᓯ, ᓱᓕ ᓇᓪᓕᐅᑎᓂᐅᓴᑎᓐᓇᒋᑦ ᑐᓴᕐᑕᐅᑎᖃᑦᑕᓕᓚᐅᕐᓯᒪᕙᒃᑲ ᐃᓕᑦᓯᓐᓄᑦ, ᐅᖃᖃᑦᑕᖁᓇᓯ, ‘ᒎᑎᓐᖑᐊᑦᑕ ᑍᒤᑎᑉᐰᑦ, ᒎᑎᑦᑕ ᕿᔪᖕᒥᑦ ᓴᓇᓯᒪᔫᑉ ᖁᕕᔭᐅᓪᓗᑎᒡᓗ ᐃᓄᓐᖑᐊᓕᐊᕆᔭᐅᓯᒪᔫᑉ ᓇᓪᓕᐅᑎᑎᑉᐰᑦ.’ 6 ᑐᓴᓚᐅᕐᐸᓯ; ᒫᓐᓇ ᑕᑯᓕᕐᓯᐅᒃ; ᐅᖃᐅᓯᕆᓂᐊᓐᖏᓚᓯᐅᒃ? ᒫᓐᓇᒥᑦ ᐱᒋᐊᕐᓗᒍ ᓄᑖᓂᒃ ᑐᓴᕐᑎᖃᑦᑕᕈᒪᓕᕐᐸᑦᓯ, ᐊᒡᓛᑦ ᐃᔨᕐᓯᒪᔪᓂᒃ ᖃᐅᔨᒪᓐᖏᑕᑦᓯᓐᓂᒃ. 7 ᒫᓐᓇ ᐱᓐᖑᕐᑎᑕᐅᕗᑦ, ᑍᑦᓱᒪᓂᐊᓗᖕᓂᐅᖏᑦᑐᖅ; ᓯᕗᓂᖓᓂ ᑐᓴᓚᐅᕐᓯᒪᓐᖏᑕᑦᓯ ᐅᓪᓗᒥ ᑭᓯᐊᓂ ᑐᓴᓕᕐᑕᓯ, ᐅᖃᕈᓐᓇᖁᓇᓯ ᐃᒫᒃ, ‘ᑕᑯᒋᑦ, ᖃᐅᔨᒪᔭᒃᑲ ᒪᑯᐊ.’ 8 ᑐᓴᓚᐅᕐᓯᒪᖏᓐᓇᑦᓯᐅᑦ ᖃᐅᔨᓚᐅᕐᓯᒪᓇᒋᓪᓗ; ᑍᒪᓐᖔᓗᖕᓂᑦ ᐃᓕᑦᓯᓐᓄᑦ ᑐᓴᕐᑕᐅᑎᓚᐅᕐᓯᒪᓐᖏᓚᒃᑲ. ᖃᐅᔨᒪᒐᒪ ᐅᒃᐱᕆᔭᒃᓴᐅᖏᓐᓂᑦᓯᓐᓂᒃ, ᐃᓅᓕᕐᓂᑦᓯᓐᓂᑦ ᐊᑭᕋᕐᑐᕐᑎᑐᐃᓐᓇᐅᓂᕋᕐᑕᐅᒐᑦᓯ. 9 ᐊᑎᕋ ᐱᓪᓗᒍ ᓂᓐᖓᐅᑎᓇᓵᕐᐸᑦᓯ, ᓂᕐᑐᕐᓇᕐᓂᕋᓗ ᐱᓪᓗᒍ ᕿᓄᐃᓵᕈᑎᒋᕙᑦᓯ, ᐃᓕᑦᓯᓐᓂᒃ ᖁᔭᓈᕐᓯᔪᒪᓇᖓ. 10 ᑕᑯᒋᑦ, ᓴᓗᒻᒪᕐᓴᓚᐅᕐᐸᑦᓯ, ᓯᐅᓪᕕᕆᑎᑑᖏᑦᑐᖅ; ᖃᐅᔨᓴᓚᐅᕐᐸᑦᓯ ᐅᖁᒤᑦᑐᑎᒍᑦ ᐃᑯᐊᓚᑦᓯᕕᖕᒦᑎᑕᐅᔪᑎᑐᑦ. 11 ᐅᕙᖓ ᓇᖕᒥᓂᓐᓂᒃ ᐱᑦᔪᑎᖃᕐᓗᖓ, ᐃᓛᒃ ᐅᕙᖓ ᓇᖕᒥᓂᓐᓂᒃ ᐱᑦᔪᑎᖃᕐᓗᖓ ᑍᒤᓕᐅᕐᕕᒋᕙᑦᓯ, ᖃᓄᖅ ᐊᑎᕋ ᓇᕐᕈᓇᕐᓯᑎᑕᐅᔪᒃᓴᐅᕚ? ᓂᕐᑐᕐᓇᕐᓂᕋ ᐊᓯᓐᓄᑦ ᑐᓂᑦᔪᑎᒋᓂᐊᓐᖏᓚᕋ.” ᓮᕋᓯᐅᑉ ᓯᕗᓕᕐᑎᐅᖁᓪᓗᒍ ᓂᕈᐊᕐᑕᐅᓯᒪᓂᖓ 12 “ᔧᑰᑉ ᑭᖑᕚᖏᑦ, ᓈᓚᓚᐅᕐᓯᓐᖓ ᐃᓴᕆᐊᓕᒥᐅᓪᓗ ᕾᖁᓚᐅᕐᑕᒃᑲ! ᐅᕙᖓᐅᕗᖅ, ᓯᕗᓪᓕᕐᐹᖑᔪᖅ, ᑭᖑᓪᓕᕐᐹᖑᓪᓗᖓᓗ. 13 ᐃᓛᒃ ᐊᒡᒐᓐᓄᑦ ᓄᓇᕐᔪᐊᖅ ᑐᓐᖓᕕᓕᐅᓚᐅᕐᐸᕋ, ᐊᒡᒐᓐᓄᓪᓗ ᑕᓕᕐᐱᓐᓄᑦ ᕿᓔᑦ ᐃᓯᕕᓚᐅᕐᐸᒃᑲ; ᕾᖁᒐᒃᑭᑦ, ᐊᑕᐅᑦᓯᒃᑯᑦ ᓵᓐᓄᐊᓚᐅᕐᐳᑦ. 14 ᐊᑕᖏᕐᓗᓯ ᑲᑎᓕᕆᑦᓯ, ᓈᓚᒡᓗᓯᓗ! ᓇᓪᓕᐊᑦᑕ ᑕᒪᒃᑯᐊ ᓇᓪᓕᐅᒃᑐᒃᓮᑦ ᐅᖃᐅᓯᕆᓚᐅᕐᐰᑦ? ᑖᓐᓇ ᐊᑕᓂᐅᑉ ᓇᒡᓕᒋᕚ; ᐱᓇᓱᐊᕈᒪᔭᓂᓗ ᐊᑐᕈᒫᕐᐹ ᐹᐱᓘᓂᒧᑦ, ᑕᓕᖓᓗ ᐱᒋᐊᕈᒫᕐᐳᖅ ᑲᐅᓪᑎᐊᒥᐅᓄᑦ. 15 ᐅᕙᖓ, ᐃᓛᒃ ᐅᕙᖓ, ᐅᖃᐅᓯᕆᕙᕋ; ᐄᓛᒃ, ᕾᖁᓚᐅᕐᐸᕋ, ᑕᒪᐅᓐᖓᐅᑎᓪᓗᒍᓗ, ᐱᓇᓱᐊᕐᑕᖓᓗ ᐱᕙᓪᓕᐊᓇᑦᓯᐊᕈᒫᕐᐳᖅ. 16 ᐅᕙᓐᓄᑦ ᖃᒡᓕᒋᑦᓯ, ᐅᓇᓗ ᑐᓴᕐᓗᒍ: ᐱᒋᐊᕐᓂᖓᓂᑦ ᐅᖃᕐᐸᓚᐅᓐᖏᓚᖓ ᐃᔨᕐᓯᒪᔪᓂᒃ, ᑍᒪᓐᖓᓂᑦ ᑕᒫᓃᓯᒪᒐᒪ. ᒫᓐᓇᓗ ᐊᑕᓂᐅᑉ ᒎᑎᐅᑉ ᐊᓂᕐᓂᖓᑕᓗ ᑎᓕᕚᖓ.” ᐊᑕᓂᐅᑉ ᐋᖅᑭᒃᓱᐃᓯᒪᓂᖓ ᐃᓄᖁᑎᖏᑕ ᐊᑐᒐᒃᓴᖏᓐᓂᒃ 17 ᐊᑕᓂᖅ ᐃᒫᒃ ᐅᖃᕐᐳᖅ, ᓂᐅᕕᐊᕆᓪᓗᓯ ᐅᑎᕐᑎᑦᓯᔨᓯ, ᐃᓴᕆᐊᓕᒥᐅᑦ ᐃᑦᔪᕐᓁᑦᑐᖁᑎᖓᑦ: “ᐅᕙᖓᐅᕗᖅ ᐊᑕᓂᖅ ᒎᑎᓯ, ᐃᓕᓐᓂᐊᕐᑎᑉᐸᑦᓯ ᐱᕚᓪᓕᖁᓪᓗᓯ, ᑕᓯᐅᕐᐸᑦᓯᓗ ᐊᖅᑯᒻᒧᑦ ᐊᑐᕆᐊᖃᕐᑕᑦᓯᓐᓄᑦ. 18 ᓈᓚᑦᓯᐊᖃᑦᑕᓚᐅᕈᑦᓯᓕ ᑍᒪ ᐱᖁᔭᓐᓂᒃ! ᓮᒪᓇᕐᑐᖅ ᑰᒃᑎᑐᑦ ᑰᒐᔭᕐᐳᖅ, ᓇᓛᒎᕐᓂᓯᓗ ᑕᕆᐅᑉ ᒪᓕᖏᑎᑐᑦ ᑍᒤᓪᓗᓂ. 19 ᑭᖑᕚᓯ ᓯᐅᕋᕐᑎᑐᑦ ᐅᓄᕐᑎᒋᒐᔭᓚᐅᕐᐳᑦ, ᕿᑐᕐᖓᓯᓗ ᓂᐊᖂᔭᒃᓮᑦ ᓯᖃᓪᓕᓯᒪᔪᑦ ᐅᓄᕐᓂᖏᑎᑐᑦ ᑍᒤᓪᓗᑎᒃ; ᐊᑎᖏᑦ ᐃᓱᓕᖃᑦᑕᕋᔭᓚᐅᓐᖏᓚᑦ ᐊᓯᕈᕐᑕᐅᖃᑦᑕᕋᔭᕋᑎᒡᓗ ᓵᓐᓂ.” 20 ᐹᐱᓘᓂᒥᑦ ᐊᐅᓪᓚᓕᕆᑦᓯ! ᑲᐅᓪᑎᐊᒥᐅᓂᒃ ᕿᒫᓕᕆᑦᓯ! ᑕᒪᓐᓇ ᐃᓐᖏᕈᑎᒋᓯᐅᒃ ᓂᐱᖅᑯᕐᑐᓗᓯ ᖁᕕᐊᓱᖕᓂᕐᒧᑦ, ᓇᓗᓁᕐᓯᐅᒃ ᑐᓴᕐᑕᐅᑎᓪᓗᒍ ᓄᓇᕐᔪᐊᑉ ᑭᒡᓕᖏᓐᓄᑦ; ᐅᖃᕐᓗᓯ, “ᐊᑕᓂᐅᑉ ᐱᔨᓂ ᔧᑯ ᐃᒻᒥᓄᑦ ᐅᑎᕐᑎᑉᐹ!” 21 ᐃᒥᕈᓕᓚᐅᓐᖏᓚᑦ ᑖᑦᓱᒪ ᑕᓯᐅᕐᒪᒋᑦ ᓱᓇᖃᔪᐃᑦᑐᒃᑯᑦ ᐃᖏᕐᕋᑎᓪᓗᒋᑦ; ᕾᕐᑐᒥᓪᓗ ᑰᒃᑎᑦᓯᓪᓗᓂ ᐃᒪᕐᑖᕐᑎᓚᐅᕐᐰᑦ; ᕾᕐᑐᖅ ᖁᐱᖕᒪᒍ ᐃᒪᖅ ᑰᓕᓚᐅᕐᐳᖅ. 22 ᐊᑕᓂᖅ ᐅᖃᕐᐳᖅ, “ᓮᒻᒪᓇᕐᑐᖃᓐᖏᓚᖅ, ᐊᔪᕐᑐᓕᔪᓄᑦ.” |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society