ᐂᓮᐊᓯᐅᑉ ᐊᒡᓚᖏᑦ 39 - ᐊᒡᓔᑦ ᐃᑦᔪᕐᖕᓁᑦᑐᑦ

ᐹᐱᓘᓂᒥᐅᓂᑦ ᐅᖃᕆᐊᕐᑐᕐᑐᑦ ᑎᑭᓐᓂᖏᑦ

¹ ᑍᑦᓱᒪᓂᐅᑎᓪᓗᒍ ᓱᓕ ᐹᐱᓘᓂᒥᐅᑉ ᐊᖓᔪᖅᑳᕐᔪᐊᖓᑦ ᒥᕈᑖᒃ-ᐸᓚᑖᓐ ᐸᓚᑖᓂᐅᑉ ᐃᕐᓂᖓ ᑐᓴᕋᒥ ᐊᖓᔪᖅᑳᕐᔪᐊᖅ ᕼᐃᓯᑬᐊᐅᑉ ᖃᓂᒪᓚᐅᕐᓗᓂ ᐋᖅᑭᒃᑕᐅᓂᖓᓂᒃ ᑎᑎᕋᕐᕕᒋᕚ ᑐᔪᕐᓗᒍᓗ ᑐᓂᕐᕈᑎᒥᓂᒃ.

² ᑕᕝᕙ ᕼᐃᓯᑬᐊᐅᑉ ᑎᑭᑎᑕᐅᔪᑦ ᑐᓐᖓᓱᒃᑎᑉᐰᑦ; ᕿᒥᕐᕈᐊᕐᑎᓪᓗᓂᒋᓪᓗ ᐊᒃᓗᐃᓐᓂᕐᒥᓂᒃ, ᓯᐅᓪᕕᕆᖁᑎᒥᓂᒃ, ᒎᓗᖁᑎᒥᓂᒃ, ᓂᕿᓄᓪᓗ ᐃᓚᐅᕈᑎᒃᓴᖁᑎᒥᖕᓂᒃ, ᒪᒪᕐᓴᐅᑎᖁᑎᒥᖕᓂᒡᓗ ᐅᓇᑕᐅᑎᖁᑎᒥᖕᓂᒡᓗ, ᐱᖁᑎᒃᑯᕕᖕᒥᓃᑦᑐᓕᒫᓂᒃ ᕿᒥᕐᕈᑎᑉᐰᑦ ᐊᖓᔪᖅᑲᐅᕕᖕᒥᓃᑦᑐᓕᒫᓂᒡᓗ.

³ ᑕᕝᕙ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓ ᐂᓮᐊᓯ ᐊᖓᔪᖅᑳᕐᔪᐊᕐᒧᑦ ᕼᐃᓯᑬᐊᒧᐊᕐᐳᖅ ᐊᐱᕆᓪᓗᓂᓗ: “ᓇᑭᓄᑯᐊ ᐱᓯᒪᔪᑦ, ᖃᓄᕐᓗ ᐅᖃᕐᕕᐅᕖᑦ ᑖᒃᑯᓄᖓ?” ᕼᐃᓯᑬᐊᐅᑉ ᑭᐅᕚ, “ᐅᖓᓯᒃᑐᒥᑦ ᐅᑯᐊ ᑎᑭᓯᒪᔪᑦ ᐹᐱᓘᓂᒥᑦ.”

⁴ ᐂᓮᐊᓯᐅᑉ ᐊᐱᕆᒃᑲᓐᓂᕐᐹ, “ᐊᖓᔪᖅᑲᐅᕕᖕᓂᒃ ᓱᓇᓂᒃ ᑕᑯᑎᖅᑲᐅᕕᒌᑦ?” ᕼᐃᓯᑬᐊᐅᑉ ᑭᐅᕚ, “ᓱᓇᓕᒫᑦᓯᐊᓂᒃ ᕿᒥᕐᕈᓇᒃᑎᖅᑲᐅᔭᒃᑲ, ᐱᖁᑎᓕᒫᑦᑎᓐᓂᒃ ᕿᒥᕐᕈᓐᖏᑕᖃᓐᖏᓚᑦ.”

⁵ ᐂᓮᐊᓯᐅᑉ ᕼᐃᓯᑬᐊ ᐅᖃᐅᑎᓕᕆᕚ, “ᕿᓚᖕᒥᐅᒐᓴᒡᔪᐃᑦ ᐊᑕᓂᖓᑦᑕ ᐅᖃᐅᓯᖏᑦ ᑐᓴᓕᒃᑭᑦ;

⁶ ᑕᑯᒋᑦ, ᐅᓪᓗᐃᑦ ᓇᓪᓕᐅᑎᔪᒫᕐᐳᑦ ᐊᖓᔪᖅᑲᐅᕕᖕᓃᑦᑐᓕᒫᑦ ᓯᕗᓕᑦᓯ ᑲᑎᕐᓱᐊᕆᓯᒪᔭᖏᑦ ᐅᓪᓗᒥᒧᑦ ᑎᑭᓪᓗᒍ, ᐹᐱᓘᓂᒧᑦ ᐊᐅᓪᓚᕈᑦᔭᐅᔪᒫᕐᐳᑦ, ᓇᓪᓕᐊᓐᓂᒡᓘᓐᓃᑦ ᐊᒥᐊᒃᑯᔭᐅᔪᒫᓐᖏᓚᑦ.

⁷ ᓇᖕᒥᓂᖅ ᐃᕐᓂᕕᑦ ᐃᓚᖏᑦ ᕿᑐᕐᖓᕐᑖᕆᓚᐅᕐᑕᑎᑦ, ᐊᐅᓪᓚᕈᑦᔭᐅᔪᒫᕐᐳᑦ ᓄᓕᐊᕈᓐᓁᓪᓕᑎᑕᐅᓗᑎᒃ ᑭᒡᒐᕐᑐᕐᑎᐅᓕᕐᓗᑎᒡᓗ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᑦᑕ ᐃᒡᓗᖓᓂ.”

⁸ ᑕᕝᕙ ᕼᐃᓯᑬᐊ ᐂᓮᐊᓯᒧᑦ ᐅᖃᕐᐳᖅ, “ᐊᑕᓂᐅᑉ ᐅᖃᐅᓯᖏᑦ ᐅᖃᕐᑕᑎᑦ ᐱᐅᕗᑦ.” ᐅᖃᕐᑕᖓ ᑐᑭᖃᕋᓱᒋᓚᐅᕐᐹ, “ᓮᓕᑦᓯᐊᕐᓇᕐᑐᒥᒃ ᖃᓄᐃᓐᓇᕐᑐᖃᖏᑦᑐᒥᒡᓗ ᐃᓅᕕᒋᓛᕋᓱᒋᓪᓗᒍ.”