ᐂᓮᐊᓯᐅᑉ ᐊᒡᓚᖏᑦ 38 - ᐊᒡᓔᑦ ᐃᑦᔪᕐᖕᓁᑦᑐᑦ

ᐊᖓᔪᖅᑳᕐᔪᐊᑉ ᕼᐃᓯᑬᐊᐅᑉ ᖃᓂᒪᓂᖓ ᐋᖅᑭᒃᑕᐅᓂᖓᓗ

¹ ᐅᓪᓗᐃᑦ ᐃᓚᖏᓐᓂ ᐊᖓᔪᖅᑳᕐᔪᐊᖅ ᕼᐃᓯᑬᐊ ᖃᓂᒻᒪᓚᐅᕐᐳᖅ ᖁᓚᕐᓇᕐᓯᓪᓗᓂ ᐃᓅᓂᐊᕐᒪᖔᑦ, ᒎᑎᐅᓪᓗ ᐱᔪᖃᓛᕐᑐᒥᒃ ᐅᖃᕐᑎᖓᑕ ᐂᓮᐊᓯᐅᑉ ᐂᒨᓯᐅᑉ ᐃᕐᓂᖓᑕ ᑕᑯᔭᕐᑐᕋᒥᐅᒃ, ᐅᖃᓪᓚᒡᕕᒋᕚ ᐅᖃᕐᓗᓂ, “ᐊᑕᓂᐅᑉ ᐅᖃᐅᑎᖁᖕᒪᑎᑦ ᓱᓇᓕᒫᓂᒃ ᐅᐸᓗᖎᔭᓕᕆᑦ ᐋᖅᑭᓚᐅᖏᓪᓗᑎᑦ ᐃᓅᔪᓐᓃᕐᓂᐊᓕᕋᕕᑦ.”

² ᕼᐃᓯᑬᐊᓗ ᐃᒡᓘᑉ ᐊᑭᓐᓇᖓᓄᑦ ᓵᓐᓇᒥ, ᐊᑕᓂᕐᒧᑦ ᑐᒃᓯᐊᕐᐳᖅ:

³ ᐅᖃᕐᓗᓂ, “ᐊᑕᓃᖅ ᐃᖅᑲᐅᒪᒋᑦ, ᒫᓐᓇ ᐊᑕᓃᖅ ᓵᖕᓂ ᐃᓅᓚᐅᕋᒪ ᓱᖁᓯᔪᐃᑦᑐᒥᒃ ᐃᓕᖕᓂᒃ ᒪᓕᒡᓗᖓ ᐆᒻᒪᑎᒪ ᐱᔪᓐᓇᕐᑕᓕᒫᖓᓄᑦ, ᐱᓇᓱᐊᓚᐅᕐᓗᖓᓗ ᐱᔪᒪᔭᕐᓂᒃ.” ᕼᐃᓯᑬᐊᓗ ᕿᐊᓯᒐᒥ ᕿᐊᕕᒡᔪᐊᓕᕐᐳᖅ.

⁴ ᐊᑕᓂᐅᓪᓗ ᐂᓮᐊᓯ ᐅᖃᐅᑎᕚ,

⁵ “ᕼᐃᓯᑬᐊ ᐅᐸᒡᓗᒍ ᐅᖃᐅᑎᔭᕐᑐᓚᐅᕈᒃ, ᐊᑕᓂᖅ, ᓯᕗᓕᕕᓂᕐᐱᑦ ᑍᕕᑎᐅᑉ ᒎᑎᖓ ᐃᒫᒃ ᐅᖃᕐᐳᖅ: ‘ᑐᒃᓯᐊᕐᓂᑎᑦ ᑐᓴᕐᐸᒃᑲ, ᕿᐊᓂᕆᔧᓪᓗ ᑕᑯᓪᓗᒍ: ᐃᓅᓰᑦ ᐃᓚᒃᑲᓐᓂᕐᓂᐊᓕᕐᐸᕋ ᐊᕐᕌᒍᓂᒃ 15ᓂᒃ.

⁶ ᓴᐳᑎᓂᐊᕐᐸᒋᑦ ᐅᑯᐊᓗ ᐃᒡᓗᒐᓴᒡᔪᐊᑦ ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓᓐᓂᑦ, ᐃᒡᓗᒐᓴᒡᔪᐊᓪᓗ ᓴᐳᓐᓂᐊᕐᓂᐊᕐᐸᒃᑲ.’

⁷ ᐊᑕᓂᐅᑉ ᓇᓗᓁᒃᑯᑕᕐᒥᒃ ᑕᑯᑎᓐᓂᐊᕐᐹᑎᑦ ᐱᔪᖃᓛᕐᑐᒥᒃ ᐅᖃᕐᑕᖓᑕ ᓱᓕᓂᖓᓂᒃ ᖃᐅᔨᒪᐅᑎᒋᓂᐊᕐᑕᕐᓂᒃ:

⁸ ᑕᑯᒋᑦ ᓯᕿᓂᕐᒧᑦ ᖃᐅᔨᓴᐅᑎᐅᑉ ᑕᕐᕋᖓ ᐂᕼᐊᓯᐅᑉ ᓴᓇᓚᐅᕐᑕᖓ ᐊᓪᓗᕐᓂᕐᓂᒃ ᖁᓕᓂᒃ ᐅᑎᕆᐊᕐᑎᑦᓱᒪᕙᕋ.” ᑍᒤᒻᒪᑦ ᓯᕿᓂᐅᑉ ᑕᕐᕋᖓ ᐅᑎᕆᐊᓚᐅᕐᐳᖅ ᐊᓪᓗᕐᓂᕐᓂᒃ ᖁᓕᓂᒃ ᓯᕗᒧᐊᒡᕕᒋᓚᐅᕐᑕᒥᓂᑦ.

⁹ ᕼᐃᓯᑬᐊ ᔫᑕᒥ ᐊᖓᔪᖅᑳᕐᔪᐊᖅ ᑎᑎᕋᓚᐅᕐᐳᖅ, ᖃᓂᒪᓚᐅᕐᑐᕕᓂᐅᓪᓗᓂ ᐋᖅᑭᒃᑲᒥ, ᐃᒫᒃ:

¹⁰ “ᐃᓱᒪᓚᐅᕐᐳᖓ, ᐃᓅᓯᕐᒪ ᐃᓅᔪᒥᓇᑦᓯᐊᕐᓂᖓᓂ ᐊᐅᓪᓚᕆᐊᖃᕋᓱᒋᓪᓗᖓ; ᑐᖁᖓᔪᑦ ᐃᑎᕐᑕᕐᕕᖓᒍᑦ; ᐃᓅᓯᕋ ᑭᐱᔭᐅᓂᐊᕋᓱᒋᓪᓗᒍ.

¹¹ ᐅᖃᓚᐅᕐᐳᖓ, ᐊᑕᓂᕐᒥᒃ ᑕᑯᓂᐊᕈᓐᓃᕐᐳᖓ ᐃᓄᐃᑦ ᐃᓅᔪᑦ ᓄᓇᖓᓂ; ᐃᓄᖕᓂᒃ ᑕᑯᖃᑦᑕᕐᓂᐊᕈᓐᓃᕐᐳᖓ ᓄᓇᕐᔪᐊᕐᒥ ᐃᓂᖃᕐᑐᓂᒃ.

¹² ᐃᒡᓗᒐ ᑎᒍᔭᐅᓪᓗᓂ ᓅᑕᐅᓚᐅᕐᒪᑦ ᐅᕙᓐᓂᑦ ᓰᐱᓕᕆᔩᑦ ᑐᐱᖏᑎᑐᑦ; ᓄᕕᕐᓴᕐᑑᑉ ᓄᕕᕐᓴᕐᑕᖓᑐᑦ ᐃᓅᓯᕋ ᐃᒧᓚᐅᕐᐸᕋ; ᑭᐱᓚᐅᕐᐹᖓ ᓄᕕᕐᓴᕐᑑᑉ ᐃᒧᓯᕝᕕᖓᓂᑦ; ᐅᓪᓗᕐᒥᑦ ᐅᓐᓄᐊᒧᑦ ᑎᑭᑦᑐᑐᑦ ᐃᓱᓕᑎᓚᐅᕐᐸᕐᒪ;

¹³ ᓂᓪᓕᐊᓚᐅᕐᐳᖓ ᐃᑲᔪᕐᑕᐅᔪᒪᓪᓗᖓ ᐅᓪᓛᒧᑦ ᑎᑭᓪᓗᒍ; ᓛᔭᒧᑦ ᓴᐅᓂᒃᑲ ᖃᖅᑯᐊᕐᑕᐅᔪᑎᑐᑦ ᑍᒤᓚᐅᕐᐳᑦ; ᐅᓪᓗᕐᒥᑦ ᐅᓐᓄᐊᒧᑦ ᑎᑭᑦᑐᑐᑦ ᐃᓱᓕᑎᓚᐅᕐᐸᕐᒪ.

¹⁴ ᖁᐸᓄᐊᑎᑐᑦ ᑕᑎᒡᒐᕐᔪᐊᑐᓪᓗ ᓂᓪᓕᐊᓕᓚᐅᕐᐳᖓ, ᑑᕕᑎᑐᑦ ᑎᖕᒥᐊᑐᑦ ᓂᑦᔮᔫᔮᓕᕐᓗᖓ, ᐃᔩᒃᑲᒡᓗ ᑕᖃᓪᓗᑎᒃ ᖁᒻᒧᑦ ᑕᑯᓇᓱᖕᓂᕐᒧᑦ, ᐊᑕᓃᖅ, ᐅᖁᒤᒃᓴᕕᒡᔪᐊᓕᕋᒪ ᓴᐳᑎᓚᐅᓐᖓ!

¹⁵ ᖃᓄᖅ ᐅᖃᕈᓐᓇᕐᐳᖔ? ᐊᑕᓂᐅᑉ ᐅᖃᕐᕕᒋᖕᒪᖓ, ᑖᑦᓱᒪᓗ ᑕᒪᓐᓇ ᐱᓇᓱᐊᕐᓯᒪᖕᒪᒍ. ᓯᓂᒐ ᐅᕙᓐᓂᑦ ᕿᒫᓯᒪᖕᒪᑦ ᐆᒻᒪᑎᒃᑯᑦ ᐅᖁᒤᒃᓴᕐᓂᕋ ᐱᓪᓗᒍ.

¹⁶ ᐊᑕᓃᖅ, ᑍᒤᑦᑐᒃᑰᕋᓗᐊᕐᓗᑎᒃ ᐃᓄᐃᑦ ᐃᓅᕙᒃᒪᑕ; ᑍᒤᑦᑐᓪᓗ ᑕᒪᕐᒥᒃ ᐊᓂᕐᓂᕐᒪ ᐃᓅᕕᒋᓕᕐᐸᒋᑦ, ᐊᑏ ᐋᖅᑭᒡᓗᖓ ᐃᓅᔪᓐᓇᕐᑎᓚᐅᓐᖓ.

¹⁷ ᐃᓛᒃ ᐱᕚᓪᓕᕈᓐᓇᖁᓪᓗᖓ ᓂᓐᖓᐅᒪᓂᕐᔪᐊᖃᓚᐅᕐᐳᖓ; ᓇᒡᓕᖕᓂᕐᓄᓪᓕ ᓴᐳᑎᓚᐅᕐᐸᕐᒪ ᐃᑎᕐᓴᒥᑦ ᐊᓯᕈᕐᑕᐅᕕᖕᒥᑦ.

¹⁸ ᑐᖁᖓᔪᑦ ᐃᓂᖓᓐᓂ ᖁᔭᓕᕕᐅᔪᓐᓇᓐᖏᓚᑎᑦ, ᑐᖂᓪᓗ ᓂᕐᑐᕈᓐᓇᓐᖏᓛᑎᑦ; ᐃᑎᕐᓴᕐᔪᐊᕐᒦᑦᑐᑦ ᓱᖁᓯᔪᐃᓐᓂᕐᓂᒃ ᓂᕆᐅᒋᔭᒃᓴᖃᕈᓐᓇᓐᖏᓚᑦ.

¹⁹ ᐃᓅᔪᑦ, ᐃᓅᔪᑦ, ᖁᔭᒋᕚᑎᑦ, ᐅᕙᖓᑦᑕᐅᖅ ᐅᓪᓗᒥ ᖁᔭᒋᓕᕐᐸᒋᑦ; ᐊᑖᑕ ᕿᑐᕐᖓᒥᓂᒃ ᖃᐅᔨᑎᑦᓯᓂᐊᕐᐳᖅ ᓱᖁᓯᔪᐃᑦᑑᓂᕐᓂᒃ.

²⁰ ᐊᑕᓂᐅᑉ ᐱᐅᓕᖕᒪᖓ, ᐃᓐᖏᕐᓂᐊᕐᐳᒍᑦ ᑐᓴᕐᓂᕋᐅᑎᓄᑦ ᓄᖃᕐᑎᓕᖕᓄᑦ ᐃᓅᓂᓕᒫᑦᑎᓐᓂ, ᐊᑕᓂᐅᑉ ᐃᒡᓗᖓᓂ.”

²¹ ᐂᓮᐊᓯᓗ ᐅᖃᓚᐅᕐᐳᖅ, “ᐸᐅᕐᖓᓂᒃ ᐱᒋᓕᒃᓴᓂᒃ ᑲᑎᓐᖓᔪᓂᒃ ᑎᒍᓯᓕᕆᑦᓯ, ᒥᖑᐊᕈᑎᒋᓗᒋᓪᓗ ᐊᔪᐊᖓᓄᑦ ᑕᕝᕙ ᐋᖅᑭᒃᑕᐅᓂᐊᕐᐳᖅ.”

²² ᕼᐃᓯᑬᐊᓗ ᐊᐱᕆᓚᐅᕐᐳᖅ, “ᓱᓇᒥᒃ ᓇᓗᓁᒃᑯᑕᖃᕐᓂᐊᕐᐹ ᐊᑕᓂᐅᑉ ᑐᒃᓯᐊᕐᕕᒡᔪᐊᖁᑎᖓᓄᑦ ᐃᑎᒃᑲᓐᓂᕈᓐᓇᕐᓯᓛᕐᓂᓐᓂᒃ?”