ᐂᓮᐊᓯᐅᑉ ᐊᒡᓚᖏᑦ 37 - ᐊᒡᓔᑦ ᐃᑦᔪᕐᖕᓁᑦᑐᑦ

ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓᑦᑕ ᐃᓱᒪᓯᐅᕆᓂᖓ ᐂᓮᐊᓯᒥᒃ

¹ ᐊᖓᔪᖅᑳᕐᔪᐊᖅ ᕼᐃᓯᑬᐊ ᑐᓴᕋᒥ, ᐊᓐᓄᕌᓂ ᐊᓕᒃᐰᑦ ᕿᒃᓵᒃᑐᕐᓯᐅᑎᒥᒃ ᐃᒃᐱᐊᕐᔪᒐᔭᐅᔮᕐᑐᒥᒃ ᐊᑎᓪᓗᓂ, ᐊᑕᓂᐅᓪᓗ ᐃᒡᓗᖓᓄᑦ ᐂᕗᖅ.

² ᑎᓕᓯᓪᓗᓂᓗ ᐃᓔᐊᑭᒻᒥᒃ ᐊᖓᔪᖅᑳᕐᔪᐊᑉ ᐃᒡᓗᖓᓄᑦ ᑲᒪᔨᒻᒪᕆᐅᔪᒥᒃ, ᓯᑉᓇᒥᒡᓗ ᑎᑎᕋᕐᑎᐅᔪᒥᒃ, ᑐᓂᕐᕈᓯᕐᑎᑦᓯᔩᓪᓗ ᓯᕗᓕᕐᑎᖏᓐᓂᒃ, ᑖᒃᑯᐊᓗ ᕿᒃᓵᒃᑐᕐᓯᐅᑎᒥᒃ ᐃᒃᐱᐊᕐᔪᒐᔭᐅᔮᕐᑐᒥᒃ ᐊᓐᓄᕌᕐᓯᒪᓪᓗᑎᒃ, ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓᓄᑦ ᐂᓮᐊᓯᒧᑦ ᐂᒨᓯᐅᑉ ᐃᕐᓂᖓᓄᑦ ᐂᕗᑦ.

³ ᐃᒫᒡᓗ ᐅᖃᕐᐳᑦ, “ᕼᐃᓯᑬᐊ ᐅᖃᖁᔨᖕᒪᑦ, ‘ᐅᓪᓗᒥ ᐅᖁᒤᒃᓴᕐᓇᕐᑑᖕᒪᑦ; ᓱᒋᐊᕐᑕᐅᒐᑦᑕ, ᑲᓐᖑᓇᕐᑐᒦᑎᑕᐅᕗᒍᑦ; ᐊᕐᓇᒥᒃ ᐃᕐᓂᓱᒃᑐᒥᒃ ᐊᑦᔨᖃᓕᕐᐳᒍᑦ ᓄᑭᖃᑦᓯᐊᕈᓐᓃᒧᑦ ᐃᕐᓂᔪᓐᓁᓪᓕᖅᑲᔪᑎᑐᑦ.

⁴ ᐃᒻᒪᖄ, ᐊᑕᓂᐅᑉ ᒎᑎᕕᑦ ᕌᑉᓴᑭᐅᑉ ᐅᖃᐅᓯᖏᑦ ᑐᓴᕐᐰᑦ, ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓᑦᑕ ᑎᓕᓚᐅᕐᒪᒍ ᒎᑎᒥᒃ ᐆᒪᔪᒥᒃ ᒥᑕᐅᑎᖃᖁᓪᓗᒍ, ᐃᓂᕐᑎᕆᑐᐃᓐᓇᕆᐊᖃᕐᓗᓂᓗ ᐅᖃᐅᓯᖏᓐᓂᒃ ᐊᑕᓂᐅᑉ ᒎᑎᕕᑦ ᑐᓴᕐᑕᒥᓂᒃ; ᑍᒤᒻᒪᑦ ᑐᒃᓯᐅᑎᓚᐅᒃᑭᑦ ᐃᓄᐃᑦ ᐊᒥᐊᒃᑰᔪᑦ ᐱᓪᓗᒋᑦ.’”

⁵ ᐊᖓᔪᖅᑳᕐᔪᐊᑉ ᕼᐃᓯᑬᐊᐅᑉ ᐱᔨᖏᑦ ᕾᖕᒪᑕ ᐂᓮᐊᓯᒧᑦ,

⁶ ᐂᓮᐊᓯᐅᑉ ᑭᐅᑦᔪᑎᒥᓂᒃ ᐃᒫᒃ ᐅᖃᐅᑎᔭᐅᖁᕚ, “ᐊᖓᔪᖅᑳᓯ ᐅᖃᐅᑎᓯᐅᒃ, ᐊᑕᓂᖅ ᐃᒫᒃ ᐅᖃᕐᐳᖅ, ‘ᑲᑉᐱᐊᓱᖕᓂᐊᕐᓇᒃ ᐅᖃᐅᓯᖏᓐᓂᒃ ᑐᓴᕐᑕᕐᓂᒃ, ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓᑕ ᐱᔨᒥᒍᑦ ᐊᑭᕋᕐᑐᕈᑎᒋᔭᖏᓐᓂᒃ ᐅᕙᓐᓂᒃ.

⁷ ᑕᑯᒋᑦ, ᐊᓂᕐᓂᕐᒥᒃ ᐃᓗᒻᒥᕈᒪᕙᕋ, ᑕᒫᓐᖓᑐᐃᓐᓇᖅ ᑐᓴᕐᑕᒥᓂᒃ ᐱᑦᔪᑎᖃᕐᓗᓂ, ᓄᓇᒥᖕᓄᑦ ᐅᑎᕐᓂᐊᕐᒪᑦ; ᓄᓇᖓᓄᓪᓗ ᐅᑎᕐᓯᒪᓕᕐᐹᑦ ᓴᕕᒡᔪᐊᒧᑦ ᑐᖁᑕᐅᔪᒫᕐᐳᖅ ᓄᓇᒥᓂ.’”

ᐊᓯᕆᐊᒥᐅᑦ ᓯᕘᕋᓵᕆᒃᑲᓐᓂᕐᓂᖓᑦ

⁸ ᕌᑉᓴᑭ ᐅᑎᕋᒥ, ᖃᐅᔨᓕᕐᐳᖅ ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓ ᓕᑉᓇᒥᐅᓂᒃ ᐅᓇᑕᖃᑎᖃᕐᓂᖓᓂᒃ; ᑐᓴᓚᐅᕋᒥ ᐊᖓᔪᖅᑳᕐᔪᐊᖓ ᓚᑮᓯᒥᑦ ᓅᓯᒪᓕᕐᓂᖓᓂᒃ.

⁹ ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓ ᑐᓴᓚᐅᕋᒥ ᑎᕼᐊᑲ ᐃᑎᐅᐱᐊᒥᐅᑦ ᐊᖓᔪᖅᑳᕐᔪᐊᖓᓂᒃ ᐃᒫᒃ, “ᑍᑦᓱᒧᖓ ᓱᕐᔪᒃᑕᐅᓕᕋᕕᑦ.” ᑕᒪᓐᓇ ᑐᓴᕋᒥᐅᑦ ᑎᓕᓯᓕᕐᐳᖅ ᕼᐃᓯᑬᐊᒧᑦ ᐅᖃᕐᓗᓂ,

¹⁰ “ᐃᒫᒃ, ᐅᖃᕆᐊᖃᕐᐳᓯ ᕼᐃᓯᑬᐊᒧᑦ ᔫᑕᒥ ᐊᖓᔪᖅᑳᕐᔪᐊᕐᒧᑦ, ‘ᒎᑎᒧᑦ ᑕᑎᒋᔭᕐᓄᑦ ᐅᐃᕕᕆᔭᐅᑦᑍᓕᒋᑦ ᐅᖃᕐᓗᓂ, “ᔨᕉᓴᓕᒻ ᑐᓂᔭᐅᓂᐊᓐᖏᓚᖅ ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓᓐᓄᑦ.”

¹¹ ᑕᑯᒋᑦ, ᑐᓴᕐᓯᒪᒐᕕᑦ ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓ ᖃᓄᐃᓕᐅᕆᓯᒪᖕᒪᖔᑦ ᓄᓁᑦ ᐊᓯᖏᓐᓂᒃ, ᐊᓯᕈᐃᓪᓗᓂ ᐃᓘᓐᓇᖏᓐᓂᒃ, ᓱᓕ ᓴᐳᑎᔭᐅᓂᐊᕋᓱᒋᕖᑦ?

¹² ᐃᓅᖃᑎᒌᒡᔪᐊᑦ ᑍᒃᑯᐊ ᒎᑎᒥᖕᓄᑦ ᓴᐳᑎᔭᐅᓚᐅᕐᐹᑦ? ᓯᕗᓕᕕᓂᕐᒪ ᐊᓯᕈᓚᐅᕐᑕᖏᑦ, ᒎᔭᓂᒥᐅᑦ, ᕼᐊᕋᓐᒥᐅᑦ, ᕇᔨᑉᒥᐅᑦ, ᐄᑎᒥᐅᓪᓗ ᐃᓄᖏᑦ ᓄᓇᖃᕐᑐᑦ ᑎᓚᓴᕆᒥ.

¹³ ᓇᐅᒡᓕ ᐊᖓᔪᖅᑳᕐᔪᐊᑦ ᕼᐊᒫᑎᒥᐅᓄᑦ, ᐋᕐᐹᑦᒥᐅᓄᓪᓗ; ᓯᑉᕼᐊᕋᕔᒥᐅᓄᓪᓗ, ᕼᐄᓇᒥᐅᓄᓪᓗ ᐂᐅᐊᒥᐅᓄᓪᓗ?’”

¹⁴ ᐊᖓᔪᖅᑳᕐᔪᐊᑉ ᕼᐃᓯᑬᐊᐅᑉ ᑎᑎᖅᑲᑦ ᐱᓪᓗᓂᒋᑦ ᑎᓕᔭᐅᔪᓂᑦ, ᐅᖃᓕᒫᕋᒥᒋᑦ, ᑐᒃᓯᐊᕐᕕᒡᔪᐊᓕᐊᕈᑎᕔᑦ ᐊᑕᓂᐅᓪᓗ ᓵᖓᓄᑦ ᐃᓕᓗᒋᑦ,

¹⁵ ᕼᐃᓯᑬᐊᓗ ᑐᒃᓯᐊᓕᕐᐳᖅ ᐊᑕᓂᕐᒧᑦ ᐅᖃᕐᓗᓂ:

¹⁶ “ᕿᓚᖕᒥᐅᒐᓴᒡᔪᐃᑦ ᐊᑕᓂᖓᑦ, ᐃᓴᕆᐊᓕᒥᐅᑦ ᒎᑎᖓᑦ, ᐃᒃᓯᕙᐅᑕᕐᔪᐊᕐᒦᑦᑐᖅ ᓯᕈᐱᒻ ᖁᓛᓂ, ᐃᕝᕕᑐᐊᖅ ᒎᑎᑑᕗᑎᑦ, ᐊᖓᔪᖅᑲᐅᕕᖕᓂᒃ ᓯᓚᕐᔪᐊᕐᒥ ᑕᒤᓐᓂ; ᐱᓐᖑᕐᑎᑦᓯᓯᒪᔪᑎᑦ ᕿᓚᕐᒥᒃ ᓄᓇᕐᔪᐊᒥᒡᓗ.

¹⁷ ᒫᓐᓇ ᐊᑕᓃᖅ ᓈᓚᓚᐅᕆᑦ ᑐᓴᕐᓗᑎᓪᓗ; ᐊᑕᓃᖅ ᑕᑯᓕᕆᑦ; ᑐᓵᓗᑎᓪᓗ ᓯᓇᑯᕆᐅᑉ ᐅᖃᐅᓯᖏᓐᓂᒃ ᑕᒤᓐᓂᒃ, ᑎᓕᓯᑦᔪᑎᒋᓚᐅᕐᑕᖏᑦ ᒥᑕᐅᑎᖃᕐᑐᑦ ᒎᑎᒥᒃ ᐆᒪᔪᒥᒃ.

¹⁸ ᓱᓕᓪᓗᓂ ᐊᑕᓃᖅ, ᖃᐅᔨᒪᔪᐃᓐᓇᐅᕗᒍᑦ ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖏᑦ ᓄᖑᕅᖃᑦᑕᕐᓯᒪᖕᒪᑕ ᐃᓅᖃᑎᒌᒡᔪᐊᓂᒃ ᐅᓄᕐᑐᓂᒃ ᓄᓇᖁᑎᖏᓐᓂᒡᓗ ᓱᒃᑯᑎᕆᖃᑦᑕᕐᓯᒪᓪᓗᑎᒃ.

¹⁹ ᒎᑎᓐᖑᐊᖏᓐᓂᒡᓗ ᐃᑯᐊᓪᓔᕙᒡᓗᑎᒃ; ᑕᒪᒃᑯᐊ ᒎᑎᓪᓚᕆᐅᖏᒻᒪᑕ, ᐃᓅᑉ ᐊᒡᒐᖏᓐᓄᑦ ᓴᓇᔭᐅᓯᒪᓪᓗᑎᒃ ᕿᔪᒥᒃ ᐅᔭᕋᖕᓂᒡᓗ; ᑍᒤᒻᒪᑦ ᓯᖁᒥᑕᐅᓚᐅᕐᐳᑦ.

²⁰ ᒫᓐᓇᓕ ᐊᑕᓃᖅ ᒎᑎᕗᑦ, ᓴᐳᑎᓚᐅᕐᑎᒍᑦ ᑖᑦᓱᒪ ᐱᔪᓐᓇᕐᓂᖓᓂᑦ, ᓯᓚᕐᔪᐊᕐᒥᐅᑦ ᐊᖓᔪᖅᑳᕐᔪᐊᖃᕐᕕᓕᒫᖏᑦ ᑐᑭᓯᓕᖁᓪᓗᒋᑦ ᐃᕝᕕᑐᐊᖅ ᐊᑕᓂᑑᒐᕕᑦ.”

ᐂᓮᐊᓯᐅᑉ ᐅᖃᐅᑦᔨᓂᖓ ᐊᖓᔪᖅᑳᕐᔪᐊᒥᒃ

²¹ ᐂᓮᐊᓯ ᐂᒨᓯᐅᑉ ᐃᕐᓂᖓ ᑎᓕᓯᓕᕆᕗᖅ ᕼᐃᓯᑬᐊᒧᑦ ᐅᖃᕐᓗᓂ, “ᐊᑕᓂᖅ ᐃᓴᕆᐊᓕᒥᐅᑦ ᒎᑎᖓᑦ ᐅᖃᕐᐳᖅ; ᑐᒃᓯᐊᓚᐅᕋᕕᑦ ᐅᕙᓐᓄᑦ ᓯᓇᑯᕆᑉ ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓ ᐱᓪᓗᒍ.

²² ᐊᑕᓂᖅ ᐃᒫᒃ ᐅᖃᕐᐳᖅ ᓯᓇᑭᕆᑉ ᐱᓪᓗᒍ: ‘ᐅᐃᒡᒐᓲᑉ ᓮᐅᓂᐅᑉ ᐸᓂᖓᑕ; ᐆᒥᒋᕚᑎᑦ, ᒥᑕᐅᑎᒋᓪᓗᑎᓪᓗ; ᐃᓕᕿᑕᒫᕐᓗᓂᓗ ᑐᓄᖕᓂ ᔨᕉᓴᓕᐅᑉ ᐸᓂᖓ.

²³ ᑭᓇᒥᒃ ᒥᑕᐅᑎᖃᓚᐅᕐᐲᑦ ᐅᖃᕐᓂᕐᓘᑎᖃᕐᓗᑎᓪᓗ? ᑭᓇᒧᑦ ᓂᐱᖅᑯᕐᑐᓪᓗᑎᑦ ᓂᓪᓕᐊᓚᐅᕐᐱᑦ ᐃᔩᒃᑭᒡᓗ ᖁᒻᒧᑦ ᕿᕕᐊᖓᓪᓗᒋᒃ ᐱᐅᔪᕆᓂᕐᒧᑦ? ᐊᑭᕋᕐᑐᕐᓗᑎᑦ ᐃᓴᕆᐊᓕᒥᐅᑦ ᐃᑦᔪᕐᓁᑦᑐᖁᑎᖓᓐᓂᒃ!

²⁴ ᐱᔨᑎᑦ ᑎᓕᓚᐅᕋᕕᒋᑦ ᒥᑕᐅᑎᖃᕐᑎᓚᐅᕐᐸᑎᑦ ᐊᑕᓂᕐᒥᒃ, ᐅᖃᓚᐅᕐᐳᑎᓪᓗ, ᕿᒻᒥᕐᔪᐊᑦ ᐊᒃᓴᓗᐊᓕᖏᓐᓄᑦ ᖃᖅᑬᑦ ᖄᖏᓐᓄᑦ ᒪᔪᓚᐅᕐᐳᖓ, ᓕᐸᓇᓂᐅᑉ ᐳᕐᑐᓂᖏᑎᑐᑦ, ᓇᐹᕐᑐᖏᑕ ᑕᑭᓂᖏᓐᓂᒃ ᓰᑕᕆᓂᒃ ᓇᑲᑎᕆᓚᐅᕐᐳᖓ, ᓇᐹᕐᑐᕆᖕᓂᕐᐹᓂᒃ ᑎᑭᐅᑎᓯᒪᕗᖓ, ᖁᓪᓕᕐᐹᓄᑦ ᓇᐹᕐᑐᑦ ᖁᑦᓯᖕᓂᕐᐹᖏᓐᓄᑦ.

²⁵ ᐃᒥᕐᑕᕐᕕᓕᐅᕐᓯᒪᕗᖓ ᐃᒥᖃᑦᑕᕐᓗᖓᓗ ᐃᒪᖏᓐᓂᒃ, ᐄᑦᔨᑉᑎᐅᓪᓗ ᑰᓕᒫᖏᑦ ᓴᓗᐊᕐᑎᓚᐅᕐᐸᒃᑲ ᐃᑎᒐᓐᓄᑦ ᑐᓪᓕᕋᕐᓗᒋᑦ.

²⁶ ᑐᓴᓚᐅᓐᖏᓚᑏᑦ ᑕᒪᒃᑯᐊ ᑍᑦᓱᒪᓂᐊᓗᖕᓂᑦ ᐃᓱᒪᒋᓯᒪᓚᐅᕋᒃᑭᑦ? ᑍᒤᑦᑐᒃᓴᓕᐊᕆᓚᐅᕐᓗᒋᓪᓗ ᒫᓐᓇᓗ ᐊᓂᒍᕐᓯᒪᓕᕐᑐᑦ, ᐱᔪᓐᓇᕐᓂᖃᕐᑎᓐᓇᒃᑭᑦ ᑭᓯᐊᓂ ᐃᒡᓗᒐᓴᒡᔪᐊᓂᒃ ᐊᕙᓗᕐᔪᐊᖃᕐᑐᓂᒃ ᓯᖁᑦᑎᕆᖃᑦᑕᓚᐅᕐᐳᓯ.

²⁷ ᐃᓄᐃᓪᓗ ᑖᒃᑯᓇᓃᑦᑐᑦ, ᐱᔪᓐᓇᕐᓂᖃᕈᓐᓇᓚᐅᓐᖏᓚᑦ, ᑲᑉᐱᐊᓱᖃᑦᑕᓚᐅᕐᐳᑦ ᓇᓗᓕᕐᐸᒡᓗᑎᒃ, ᐱᕈᕐᓯᐊᑎᑐᑦ ᓇᑎᕐᓇᒦᑦᑐᑎᑐᑦ ᑍᒤᑉᐸᓚᐅᕐᐳᑦ ᐃᕕᒃᓱᒐᕐᑎᑐᑦ ᓇᑲᓴᕅᑦᑐᑎᑐᑦ, ᐃᕕᒃᓱᒐᕐᑎᑐᑦ ᐃᒡᓗᐃᑦ ᖄᖏᓐᓂ, ᐱᕈᕇᓚᐅᕋᑎᒃ ᑐᖁᓕᓕᕐᑐᑐᑦ.

²⁸ ᖃᐅᔨᒪᕙᕋ ᐃᓂᒋᕙᒃᑍᑦ, ᐊᓂᕕᒋᕙᒃᑍᓪᓗ ᐃᑎᕐᕕᒋᕙᒃᑍᓪᓗ, ᐅᕙᓐᓂᒡᓗ ᓂᓐᖓᐅᑦᔨᓯᒪᓪᓗᑎᑦ ᐊᑭᕋᕐᑐᕋᓱᖕᓃᑦ.

²⁹ ᐅᕙᓐᓄᑦ ᐊᒃᓱᕈᕐᓗᑎᑦ ᐊᑭᕋᕐᑐᕋᕕᑦ ᐱᐅᔪᕆᓃᓪᓗ ᓯᐅᑎᓐᓄᑦ ᑎᑭᑉᐳᖅ, ᑍᒤᒻᒪᑦ ᕿᖓᒃᑯᑦ ᓂᒃᓯᖕᓂᐊᕐᐸᒋᑦ ᖃᓂᒃᑯᓪᓗ ᕿᓪᓗᒻᒥᑦᔪᑎᑖᕐᑎᓪᓗᑎᑦ, ᐅᑎᕐᑎᓐᓂᐊᕐᐸᒋᑦ ᑕᒪᐅᓇᑦᓮᓐᓇᖅ ᑎᑭᕝᕕᒋᓚᐅᕐᑕᒃᑯᑦ.’”

³⁰ ᑕᕝᕙ ᕼᐃᓯᑬᐊ ᐅᖃᐅᑎᕚ, “ᐅᑯᐊ ᑕᕝᕙ ᓇᓗᓁᒃᑯᑕᐅᓂᐊᕐᑐᑦ ᐃᓕᖕᓄᑦ: ᐊᕐᕌᒍᒥ ᑕᕝᕙᓂ ᓂᕿᖃᕐᓂᐊᕐᐳᓯ ᐃᒻᒥᓂᒃ ᐱᕈᕐᑐᕕᓂᕐᓂᒃ, ᐊᕐᕌᒎᓪᓗ ᐂᑉᐸᖓᓂ ᓂᐊᖂᔭᒃᓴᓂᒃ ᐃᒻᒥᖕᓂᒃ ᐱᕈᕐᑐᕕᓂᕐᓂᒃ; ᐊᕐᕌᒍᐃᓪᓗ ᐱᖓᔪᐊᓐᓂ ᑲᓐᖓᕐᓱᐃᓛᕐᐳᓯ ᑲᑎᕐᓱᐃᓗᓯᓗ, ᐱᕈᕐᓰᕕᖕᓂᒃ ᕔᓂᒃᓴᓂᒃ ᐋᖅᑭᒃᓱᐃᓗᓯ ᐱᕈᕐᑐᖏᓐᓂᒡᓗ ᓂᕿᖃᕐᓗᓯ.

³¹ ᔫᑕᐅᓪᓗ ᑭᖑᕚᖏᓐᓂ ᐊᒥᐊᒃᑰᑦ ᓱᓕ ᐊᒻᒧᑦ ᐊᒫᖃᓕᕈᒫᕐᐳᑦ, ᐆᒻᒪᕐᒥᓗᑎᒡᓗ ᐱᕈᕐᑐᖃᑦᓯᐊᓕᕈᒫᕐᐳᑦ.

³² ᔨᕉᓴᓕᒥᑦ ᐊᓂᔪᒫᕐᐳᑦ ᐊᒥᐊᒃᑯᑦ, ᓮᐅᓂᐅᑉ ᖃᖅᑲᖓᓂ ᐊᓐᓇᒃᑐᑦ ᐊᓂᔪᒫᕐᐳᑦ, ᑕᒪᓐᓇ ᕿᓚᖕᒥᐅᒐᓴᒡᔪᐃᑦ ᐊᑕᓂᖓᑦᑕ ᑲᔪᓯᑎᑦᓱᒪᒐᒥᐅᒃ ᐱᓇᓱᐊᕈᒫᕐᒪᒍ.

³³ ᐃᒫᒡᓗ ᐊᑕᓂᖅ ᐅᖃᕐᓯᒪᒋᕗᖅ ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓᑦ ᐱᑦᔪᑎᒋᓪᓗᒍ: ᐃᒡᓗᒐᓴᖕᓄᑦ ᑕᕝᕗᖓ ᐃᑎᕐᓂᐊᓐᖏᓚᖅ, ᖃᕐᔪᒥᒡᓘᓐᓃᑦ ᐊᑕᐅᓯᕐᒥᒃ ᐱᓯᒋᐊᕐᓂᐊᓐᖏᓚᖅ ᑖᒃᑯᓄᖓ, ᐊᒃᕖᕋᐅᓯᔭᕐᓗᓂᓘᓐᓃᑦ ᑕᕝᕗᖓ ᑎᑭᓐᓂᐊᓐᖏᓚᖅ, ᐃᒡᓗᒐᓴᒡᔪᐊᓂᒡᓗ ᐃᓗᓯᓯᒪᓗᓂ ᐱᓂᐊᓐᖏᓚᖅ.

³⁴ ᓄᓇᒥᓄᑦ ᐅᑎᕐᓂᐊᕐᐳᖅ ᑕᒪᐅᓈᕐᓗᓂ ᐊᑐᓚᐅᕐᑕᒥᒍᑦ; ᐃᒡᓗᒐᓴᒡᔪᐊᓄᑦ ᑕᕝᕗᖓ ᑎᑭᓐᓂᐊᓐᖏᓚᖅ, ᐊᑕᓂᖅ ᑍᒫᒃ ᐅᖃᕐᐳᖅ.

³⁵ ᐃᒡᓗᒐᓴᒡᔪᐊᑦ ᑖᒃᑯᐊ ᓴᐳᑎᓯᒪᓂᐊᕋᒃᑭᑦ ᐱᐅᓕᓗᒋᓪᓗ, ᐅᕙᖓ ᓇᖕᒥᓂᖅ ᐱᑦᔪᑎᒋᓪᓗᖓ, ᐱᔨᒐᓗ ᑍᕕᑎ ᐱᑦᔪᑎᒋᓪᓗᒍ.”

³⁶ ᑕᕝᕙ ᐊᑕᓂᐅᑉ ᐂᖏᓕᖁᑎᖓ ᐂᓚᐅᕐᐳᖅ, ᑐᖁᕅᓪᓗᓂᓗ ᐅᓇᑕᕐᑎᓂᒃ 185,000ᓂᒃ ᐊᓯᕆᐊᒥᐅᓂᒃ ᑕᖕᒫᕐᓯᒪᕕᒋᔭᖏᓐᓂ; ᖃᐅᒻᒪᓕᕐᑎᓪᓗᒍ ᐅᓪᓛᒃᑯᑦ, ᑎᒥᕕᓃᑦ ᑐᖁᖓᐅᓚᐅᕐᐳᑦ ᓇᓂᓕᒫᖅ.

³⁷ ᑕᕝᕙ ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓᑦ ᓯᓇᑯᕆᑉ ᐊᐅᓪᓚᕐᐳᖅ, ᓄᓇᒥᓄᓪᓗ ᓂᓂᕕᒧᑦ ᐅᑎᕐᒥᓗᓂ.

³⁸ ᑐᒃᓯᐊᕐᑎᓪᓗᒍᓕ ᑐᒃᓯᐊᕐᕕᖕᒥᓂ ᒎᑎᒥᓄᑦ ᓂᓱᕌᒃᒧᑦ, ᐃᕐᓂᖏᒃᑕ ᒪᕐᕉᒃ ᐋᑕᕋᒥᓕᑭᐅᑉ ᓴᕆᔨᕆᐅᓪᓗ, ᓴᕕᒡᔪᐊᒥᖕᓄᑦ ᑲᐱᓪᓗᒍ ᑐᖁᑉᐹᒃ, ᕿᒫᓪᓗᑎᒡᓗ ᓄᓇᒧᑦ ᐊᕋᕌᑦᒧᑦ, ᐃᕐᓂᕆᖕᒥᔭᖓᓗ ᐃᓴᕼᐊᑕᓂ ᐊᖓᔪᖅᑳᕐᔪᐊᓐᖑᓚᐅᕐᐳᖅ ᑭᖑᕝᕕᐅᑎᓪᓗᓂ.