ᐂᓮᐊᓯᐅᑉ ᐊᒡᓚᖏᑦ 36 - ᐊᒡᓔᑦ ᐃᑦᔪᕐᖕᓁᑦᑐᑦᐊᓯᕆᐊᒥᐅᑦ ᓯᕘᕋᓵᕆᓂᖏᑦ ᔨᕉᓴᓕᒥᐅᓂᒃ ᐊᑕᓃᑦ ᐂᑉᐸᖏᑦ 18:13-27 ; ᑯᕉᓂᑲ ᐂᑉᐸᖏᑦ 32:1-19 1 ᕼᐃᓯᑬᐊᐅᑉ ᐊᖓᔪᖅᑳᕐᔪᐊᖑᓂᖓᑕ ᐊᕐᕌᒍᐃᑦ 14ᒋᓕᕐᑕᖓᓐᓂ, ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓᑦ ᓯᓇᑯᕆᑉ ᐅᓇᑕᕆᐊᕐᑐᓚᐅᕐᐳᖅ ᔫᑕᐅᑉ ᓄᓇᖓᓂ ᓄᓇᓖᑦ ᐊᕙᓗᕐᔪᐊᓖᑦ ᓵᓚᒋᓪᓗᒋᑦ ᐃᓄᖏᑦ ᑎᒍᓚᐅᕐᐰᑦ. 2 ᑕᕝᕙ ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓ ᑎᓕᓯᓚᐅᕐᐳᖅ ᕌᑉᓴᑭᒥᒃ ᐅᓇᑕᕐᑎᖁᑎᒥᓂᒃ ᐅᓄᕐᑐᓂᒃ ᐃᓚᖃᕐᓗᓂ ᓚᑮᓯᒥᑦ ᐱᓗᑎᒃ ᐊᖓᔪᖅᑳᕐᔪᐊᕐᒧᑦ ᕼᐃᓯᑬᐊᒧᑦ ᔨᕉᓴᓕᒧᐊᖁᓪᓗᒋᑦ. ᑖᓐᓇ ᓇᖏᓚᐅᕐᐳᖅ ᐃᒪᐅᑉ ᐊᖅᑯᑎᖓᓂ ᐃᒥᕐᑕᕐᕕᐅᑉ ᖁᑦᓯᖕᓂᕐᓴᐅᑉ ᑰᒡᕕᖓᓂ ᐊᖅᑯᒻᒥ ᖃᓪᓗᓈᕐᑕᒃᓴᓂᒃ ᐱᓇᓱᐊᕐᕕᒋᕙᒃᑕᖏᑕ ᐊᖅᑯᑎᖓᓂ. 3 ᐅᐸᒃᑕᐅᓚᐅᕐᐳᖅ; ᐊᖓᔪᖅᑳᕐᔪᐊᑉ ᐃᒡᓗᖓᓄᑦ ᑲᒪᔨᒻᒪᕆᐅᔪᒧᑦ ᐃᓔᐊᑭᒻᒧᑦ ᕼᐃᓪᑬᐊᐅᑉ ᐃᕐᓂᖓᓄᑦ; ᓯᑉᓇᒧᓪᓗ ᑎᑎᕋᕐᑎᐅᔪᒧᑦ; ᔪᐊᒧᓪᓗ ᐊᓴᐸᐅᑉ ᐃᕐᓂᖓᓄᑦ ᑎᑎᕋᖁᑎᓂᒃ ᑲᒪᔨᒻᒪᕆᐅᔪᒧᑦ. 4 ᕌᑉᓴᑭᐅᑉ ᐅᖃᐅᑎᕔᑦ, “ᕼᐃᓯᑬᐊ ᐃᒫᒃ ᐅᖃᐅᑎᓯᐅᒃ, ‘ᐊᖓᔪᖅᑳᕐᔪᐊᖅ ᐊᔪᖏᑦᑐᖅ, ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓᑦ ᐃᒫᒃ ᐅᖃᖁᔨᖕᒪᑦ; ᓱᓇᒥᒃ ᐱᔪᓐᓇᐅᑎᖃᕐᐲᑦ? 5 ᐅᖃᐅᓯᑐᐃᓐᓁᑦ ᐱᔪᓐᓇᕐᓂᕐᓴᐅᓇᓱᒋᕕᒋᑦ ᐅᓇᑕᕐᑐᒃᓮᑦ ᐱᔪᓐᓇᕐᓂᖏᓐᓂᑦ? ᑭᓇᒧᑦ ᑕᑉᐱᕐᑕᐅᓂᐊᕋᓱᒋᒐᕕᑦ ᐅᕙᓐᓂᒃ ᐊᑭᕋᕐᑐᕈᕕᑦ? 6 ᑕᑯᒋᑦ, ᐄᑦᔨᑉᑎᒥᐅᓄᑦ ᐃᑲᔪᕐᑕᐅᓂᐊᕋᓱᒋᒐᓗᐊᕐᑐᑎᑦ, ᑍᓐᓇᓕ ᕿᔪᒃ ᓱᓪᓗᓕᒃ ᐊᔭᐅᑉᐱᐊᖅ ᓇᕕᒃᓯᒪᕗᖅ, ᐊᒡᒐᖕᒥᒃ ᐳᑐᓯᒐᔭᕐᑐᖅ ᐄᒐᕐᕕᐅᒍᓂ. ᐰᕉ ᐄᑦᔨᑉᑎᒥᐅᑉ ᐊᖓᔪᖅᑳᕐᔪᐊᖓᑦ ᑍᒤᑦᑑᖕᒪᑦ ᐃᑲᔪᕐᑎᒋᔭᐅᔪᒪᓕᕌᖓᒥ. 7 ᐅᕝᕙᓐᓄᓪᓕ ᐅᖃᕈᕕᑦ, “ᐊᑕᓂᕐᒥᒃ ᒎᑎᑦᑎᓐᓂᒃ ᑕᑎᖃᕐᓂᐊᕐᐳᒍᑦ,” ᑍᓐᓇᐅᓐᖏᓛᖅ ᑐᒃᓯᐊᕐᕕᖁᑎᖏᑦ ᐱᓪᓚᕆᒋᔭᖏᑦ ᑐᓂᕐᕈᓯᕐᕕᖁᑎᖏᓪᓗ ᕼᐃᓯᑬᐊᐅᑉ ᐲᔭᓚᐅᕐᑕᖏᑦ, ᐅᖃᕐᓗᓂ ᔫᑕᒥᐅᓄᑦ ᔨᕉᓴᓕᒥᐅᓄᓪᓗ, “ᐅᕙᓂᑐᐊᖅ ᑐᒃᓯᐊᖃᑦᑕᕐᓂᐊᕐᐳᓯ”? 8 ᐊᑏ ᐊᖏᖃᑎᒋᓚᐅᕈᒃ ᐊᖓᔪᖅᑳᕋ ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓᑦ; ᕿᒻᒥᕐᔪᐊᓂᒃ 2,000ᓂᒃ ᑐᓂᓯᕕᒋᓂᐊᕐᐸᒋᑦ ᑍᒫᒃ ᐅᓄᕐᑎᒋᔪᓂᒃ ᐊᖑᑎᓂᒃ ᑖᒃᑯᓇᓂ ᐃᑭᒪᔪᒃᓴᓂᒃ ᓇᓂᓯᔪᓐᓇᕈᕕᑦ. 9 ᖃᓄᖅ ᓇᓪᓕᐅᒻᒪᑎᔪᓐᓇᕐᐱᓰ ᐊᓯᕆᐊᒥᐅᑦ ᐅᓇᑕᕐᑎᖁᑎᖏᑕ ᐊᖓᔪᖅᑳᖏᓐᓄᑦ ᐊᑕᐅᓯᕐᒧᓪᓘᓐᓃᑦ ᐊᔪᕐᓂᕐᐹᕋᓗᐊᖏᓐᓄᑦ, ᑕᑎᖃᕋᓱᒃᑲᓗᐊᕈᑦᓯ ᐄᑦᔨᑉᑎᒥᐅᑦ ᕿᒻᒥᕐᔪᐊᖏᑕ ᐊᒃᓴᓗᐊᓕᖁᑎᖏᓐᓂᒃ ᕿᒻᒥᕐᔪᐊᖏᓐᓂᓗ ᐃᑭᒪᔪᓂᒃ? 10 ᓱᓖ, ᐊᑕᓂᕐᒧᑦ ᐃᑲᔪᕐᑕᐅᖏᓪᓗᑕ ᓄᓇᖁᑎᑦᓯᓐᓂᒃ ᓴᓚᖃᕆᐊᕐᑐᕋᓱᒋᕕᑎᒎᑦ ᐊᓯᕈᕆᐊᕐᑐᕐᓗᒍᓗ? ᐊᑕᓂᐅᑉ ᓇᖕᒥᓂᖅ ᐅᖃᐅᑎᓚᐅᕐᐹᑎᒍᑦ ᐅᓇᑕᕆᐊᖁᓪᓗᑕ ᓄᓇᑦᓯᓐᓂᒃ ᐊᓯᕈᐃᔭᕐᑐᖁᓪᓗᑕᓗ.’” 11 ᑕᕝᕙ ᐃᓔᐊᑭᒻ ᓯᑉᓇᐅᓪᓗ, ᔪᐊᓪᓗ, ᕌᑉᓴᑭ ᐅᖃᐅᑎᕚᑦ, “ᐊᕋᒥᐊᒃᑎᑐᑦ ᐅᖃᓪᓚᒡᕕᒋᓚᐅᕐᑎᒍᑦ ᔫᑎᑎᑐᑦ ᒪᑯᐊ ᐃᓄᐃᑦ ᐊᕙᓗᕐᔪᐊᒦᑦᑐᑦ ᑐᓵᖕᒪᑕ.” 12 ᕌᑉᓴᑭᐅᓪᓕ ᑭᐅᕔᑦ, “ᐊᖓᔪᖅᑳᒪ ᑎᓕᓪᓗᖓ ᐃᓕᑦᓯᓐᓄᑦ ᐊᖓᔪᖅᑳᕐᔪᐊᑦᓯᓐᓄᓪᓗ ᐅᖃᕆᐊᕐᑐᖁᓚᐅᕐᐹᖓ ᐅᖃᐅᓯᕆᔭᒃᑲᓗ ᐃᓕᑦᓯᓐᓄᑐᐊᖅ ᑐᕌᖓᓐᖏᓚᑦ, ᐊᕙᓗᕐᔪᐊᒥ ᐃᒃᓯᕚᕐᑐᓄᑦ ᑐᕌᖓᒋᕗᑦ, ᑖᒃᑯᐊ ᐊᓇᕐᒥᖕᓂᒃ ᓂᕿᖃᓕᕈᒫᕐᐳᑦ ᐃᑎᕈᕐᒥᖕᓂᒡᓗ ᐃᒥᖃᓕᕐᓗᑎᒃ.” 13 ᑕᕝᕙ ᕌᑉᓴᑭ ᓂᑯᕕᓪᓗᓂ ᓂᐱᖅᑯᕐᑐᓪᓗᓂᓗ ᔫᑎᑎᑐᑦ ᐅᖃᓕᕐᐳᖅ, “ᑐᓴᕆᑦᓯ ᐊᖓᔪᖅᑳᕐᔪᐊᑉ ᐊᔪᖏᑦᑑᑉ, ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓᑦᑕ ᐅᖃᐅᓯᐅᖁᔭᖏᓐᓂᒃ ᐃᓕᑦᓯᓐᓄᑦ! 14 ᐊᖓᔪᖅᑳᕐᔪᐊᖅ ᐅᖃᖁᔨᕗᖅ: ‘ᕼᐃᓯᑬᐊᒧᑦ ᐅᐃᕕᕐᕆᔭᐅᑦᑍᓕᒋᑦᓯ, ᑖᑦᓱᒪ ᓴᐳᑎᔪᓐᓇᕐᓂᐊᖏᒻᒪᓯ; 15 ᕼᐃᓯᑬᐊᐅᑉ ᐊᑕᓂᕐᒥᒃ ᑕᑎᖃᖁᑦᑍᓕᓛᓯ ᐅᖃᕐᓗᓂ, “ᐊᑕᓂᐅᑉ ᓇᓗᓇᖏᑦᑐᒥᒃ ᓴᐳᑎᓂᐊᕐᐹᑎᒍᑦ; ᐅᑯᐊ ᐃᒡᓗᒐᓴᒡᔪᐊᑦ ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓᓐᓄᑦ ᑎᒍᔭᐅᓂᐊᖏᑦᑐᑦ.” 16 ᕼᐃᓯᑬᐊᒥᒃ ᓈᓚᒃᑍᓕᒋᑦᓯ, ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓᑦ ᐅᖃᕐᒪᑦ: ᖃᓄᐃᓕᐅᕋᑦᓯ ᐅᕙᓐᓂᒃ ᕾᑐᐃᓐᓇᓕᕆᑦᓯ ᐅᕙᓐᓄᑦ, ᕔᓂᒃᓴᓂᒃ ᐸᐅᕐᖓᓂᒃ ᓇᖕᒥᓂᖅ ᐱᕈᕐᓰᕕᖁᑎᑦᓯᓐᓂᑦ ᓂᕿᖃᕈᓐᓇᕐᑎᑕᐅᓛᕐᐳᓯ, ᓇᖕᒥᓂᕐᓗ ᓇᐹᕐᑐᖁᑎᑦᓯ ᐱᕈᕐᑐᖏᓐᓂᒃ ᓂᕆᖃᑦᑕᕐᓂᐊᕐᐳᓯ, ᓇᖕᒥᓂᕐᓗ ᐃᒥᕐᑕᕐᕕᖁᑎᑦᓯᓐᓂᑦ ᐃᒪᖃᕈᓐᓇᕐᓂᐊᕐᐳᓯ. 17 ᐊᐅᓪᓚᕈᑎᓂᐊᕐᐸᑦᓯ ᓇᖕᒥᓂᖅ ᓄᓇᒋᓂᐊᕐᑕᑦᓯᓐᓄᑦ, ᑖᓐᓇ ᓄᓇᑖᕆᓂᐊᕐᑕᓯ ᓄᓇᑦᓯ ᐊᑦᔨᑐᐃᓐᓇᕆᖕᒪᒍ, ᐱᕈᕐᕕᐅᔪᓐᓇᕐᑐᖅ ᓂᐊᖂᔭᒃᓴᓂᒃ ᕔᓂᒃᓮᓪᓗ ᐸᐅᕐᖓᖏᓐᓂᒃ, ᓂᐊᖂᔭᒃᓴᓕᒃ ᕔᓂᒃᓴᖃᕐᓗᓂᓗ. 18 ᕼᐃᓯᑬᐊᒧᑦ ᓯᓔᕐᕆᔭᐅᑦᑍᓕᒋᑦᓯ ᐅᖃᕐᓗᓂ, “ᐊᑕᓂᐅᑉ ᓴᐳᑎᓂᐊᕐᐹᑎᒍᑦ.” ᐊᓯᓯ ᐃᓅᖃᑎᒌᒡᔪᐊᑦ ᒎᑎᒋᔭᒥᖕᓄᑦ ᓴᐳᑎᔭᐅᔪᓐᓇᖃᑦᑕᓚᐅᕐᐹᑦ? ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓᑦᑕ ᐱᔪᓐᓇᕐᓂᖓᓂᑦ? 19 ᓇᐅᒃ ᑍᒪ ᕼᐊᒫᑎᒥᐅᑦ ᒎᑎᖓᑦ, ᐋᕐᐹᑦᒥᐅᓪᓗ, ᓇᐅᒡᓕ ᓯᑉᕼᐊᕋᕔᒥᐅᓪᓗ ᒎᑎᖓᑦ, ᓴᒥᐊᕆᐊᒥᐅᑦ ᓴᐳᑦᔨᔨᒃᓴᖃᓚᐅᕐᐹᑦ? 20 ᖃᖓ ᑖᒃᑯᐊ ᓄᓇᓕᒡᔪᐊᑦ ᒎᑎᒋᔭᒥᖕᓄᑦ ᓴᐳᑎᔭᐅᔪᓐᓇᕐᑎᓪᓗᒋᑦ ᖃᐅᔨᖃᑦᑕᓚᐅᕐᐱᓰ? ᖃᓄᐃᒻᒪᓪᓕ ᑕᕝᕙ ᐊᑕᓂᕐᒧᑦ ᔨᕉᓴᓕᒻ ᓴᐳᑎᔭᐅᔪᓐᓇᕋᓱᒋᓪᓗᒍ ᐃᓱᒪᓇᓱᐊᕐᐱᓰ?’” 21 ᑖᒃᑯᐊᓕ ᓂᓪᓕᓚᐅᓐᖏᓚᑦ ᑭᐅᓚᐅᓐᖏᓚᓪᓘᓐᓃᑦ, ᐊᖓᔪᖅᑳᕐᔪᐊᒥᖕᓄᑦ ᐃᒫᒃ ᐱᖁᔭᐅᓯᒪᒐᒥᒃ, “ᑭᐅᓂᐊᕋᓯᐅᒃ.” 22 ᑕᕝᕙ ᐃᓔᐊᑭᒻ, ᕼᐃᓪᑬᐊᐅᑉ ᐃᕐᓂᖓ, ᐊᖓᔪᖅᑳᕐᔪᐊᑉ ᐃᒡᓗᖓᓄᑦ ᑲᒪᔨ, ᓯᑉᓇᓗ ᐊᒡᓚᒃᑎ, ᔪᐊᓗ ᐊᓴᐸᐅᑉ ᐃᕐᓂᖓ, ᐊᓐᓄᕌᒥᖕᓂᒃ ᐊᓕᒃᑐᐃᕗᑦ ᕿᒃᓵᖕᓂᕐᒧᑦ, ᕼᐃᓯᑬᐊᒧᓪᓗ ᐂᕗᑦ ᑐᓴᕐᑎᒋᐊᕐᑐᕐᓗᒍ ᐊᓯᕆᐊᒥᐅᑦ ᐊᖓᔪᖅᑳᖁᑎᖏᑦᑕ ᐅᖃᐅᓯᕆᔭᖏᓐᓂᒃ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society