ᐂᓮᐊᓯᐅᑉ ᐊᒡᓚᖏᑦ 34 - ᐊᒡᓔᑦ ᐃᑦᔪᕐᖕᓁᑦᑐᑦᒎᑎᐅᑉ ᓱᒋᐊᕐᓯᓂᖓ ᐊᑭᕋᕐᑐᕐᑎᒥᓂᒃ 1 ᖃᒡᓕᒋᑦᓯ, ᐃᓅᖃᑎᒌᒡᔪᐊᖑᔪᓯ ᑐᓴᕆᐊᕐᑐᕐᓗᓯ, ᓈᓚᓕᕆᑦᓯ ᐃᓅᔪᓯ! ᓈᓚᓕᕐᓕᑦ ᓄᓇᕐᔪᐊᕐᒥᐅᓕᒫᑦ ᑕᕝᕙᓐᖔᕐᓯᒪᔪᓕᒫᓪᓗ. 2 ᐊᑕᓂᐅᑉ ᓂᓐᖓᒡᕕᒋᖕᒪᒋᑦ ᐃᓅᖃᑎᒌᒡᔪᐊᑦ, ᐅᓇᑕᕐᑐᒃᓴᖁᑎᖏᓪᓗ ᑕᒪᕐᒥᒃ ᓂᓐᖓᐅᑎᓯᒪᕔᑦ; ᐊᓯᕈᕐᑕᐅᔪᒃᓴᕈᕐᑎᑉᐰᑦ, ᑐᖁᕋᕐᑕᐅᔪᒃᓴᓐᖑᕐᑎᓪᓗᒋᓪᓗ. 3 ᑐᖁᕋᕐᑕᐅᓯᒪᔪᑦ ᑕᒫᓃᕐᕆᔪᒫᕐᐳᑦ, ᑎᒥᕕᓂᖏᓪᓗ ᐃᒍᓇᕐᓂᓕᕈᒫᕐᐳᑦ: ᖃᖅᑬᓪᓗ ᑰᓕᕈᒫᕐᐳᑦ ᐊᐅᖏᓐᓂᒃ. 4 ᕿᓚᖕᒥ ᑕᑯᒃᓴᐅᔪᓕᒫᑦ ᐊᐅᒍᒫᕐᐳᑦ, ᕿᓚᒡᓗ ᐃᒧᔭᐅᔪᒫᕐᐳᖅ ᐰᑉᐹᖁᑎᑎᑐᑦ ᐃᒧᔫᑎᑐᑦ, ᐅᓪᓗᕆᐊᓕᒫᓪᓗ ᑲᑕᒐᕈᒫᕐᐳᑦ, ᓇᐹᕐᑑᑉ ᕔᓂᒃᓴᓂᒃ ᐸᐅᕐᖓᓕᐅᑉ ᐸᐅᕐᖓᖏᑕ ᑲᑕᒐᕐᓂᖏᑎᑐᑦ, ᓇᐹᕐᑑᓪᓗ ᐱᒋᓕᒃᓴᐅᑉ ᐅᖃᐅᔭᖏᑕ ᑲᑕᒐᕐᓂᖏᑎᑐᑦ. 5 ᓴᕕᒡᔪᐊᕋ ᐃᒥᕈᐃᕐᓯᒪᓕᕐᒪᑦ ᕿᓚᖕᒥ; ᑕᕝᕙ ᐊᖅᑲᓕᕆᕗᖅ ᐄᑐᒥᒥᐅᓄᑦ, ᐃᓄᖏᓐᓄᑦ ᐊᓯᕈᒐᒃᓴᓄᑦ. 6 ᐊᑕᓂᐅᑉ ᓴᕕᒡᔪᐊᖓ ᐊᐅᒥᑎᕐᓯᒪᕗᖅ; ᑐᓐᓄᕈᔫᓪᓗᓂᓗ, ᓰᐱᐅᑉ ᓄᕐᕋᖏᑕ ᒎᑦᓰᓪᓗ ᐊᐅᖏᓐᓂᑦ, ᓰᐲᓪᓗ ᐊᖑᓴᓪᓗᖏᑕ ᑕᕐᑐᕈᑎᖏᑕ ᑐᓐᓄᖏᓐᓂᑦ, ᐊᑕᓂᖅ ᑐᓂᕐᕈᓯᕐᓯᒪᖕᒪᑦ ᐳᔾᕋᒥ, ᐅᓄᕐᑐᕐᔪᐊᓂᒡᓗ ᑐᖁᕅᓪᓗᓂ ᐄᑐᒥᐅᑉ ᓄᓇᖓᓂ. 7 ᐃᒻᒧᒃᓯᐅᒊᑦ ᓄᔪᐊᕐᑐᑦ ᐸᖕᓂᖏᑦ ᐅᕐᕈᖃᑎᒋᔪᒫᕐᐰᑦ, ᐸᖕᓃᓪᓗ ᓴᓐᖏᔪᕐᔪᐊᑦ ᐱᖃᓯᐅᑦᔭᐅᓗᑎᒃ, ᓄᓇ ᐃᑦᑎᖃᓕᕈᒫᕐᐳᖅ ᐊᐅᕕᓂᖏᓐᓂᑦ, ᓄᓇᓗ ᐱᕈᕐᕕᒃᓴᑦᓯᐊᖑᓕᕈᒫᕐᐳᖅ ᑐᓐᓄᕈᔫᓗᓂ. 8 ᐊᑕᓂᐅᑉ ᐊᑭᓂᐊᕐᕕᖓᑕ ᐅᓪᓗᖓ ᓇᓪᓕᐅᑎᖕᒪᑦ, ᐊᕐᕌᒍ ᐊᑭᓂᐊᕈᑦᔨᓂᒃᓴᖓ ᓮᐅᓂᒥᒃ. 9 ᐄᑐᓂᐅᑉ ᑰᖏᑦ ᑖᓚᑎᑐᑦ ᑯᑦᓲᔭᕐᑎᑐᑦ ᑍᒤᓕᕈᒫᕐᐳᑦ, ᓄᓇᓗ ᐆᓇᕐᑐᕐᔪᐊᖑᓕᕐᓗᓂ; ᓄᓇᖓᓗ ᐃᑯᐊᓚᔪᒫᕐᐳᖅ ᑖᓚᑎᑐᑦ. 10 ᖃᒥᔪᐃᑦᑑᓕᕈᒫᕐᐳᖅ ᐅᓪᓗᒃᑯᑦ ᐅᓐᓄᐊᒃᑯᓪᓗ, ᐳᔫᖏᓐᓇᓕᕐᓗᓂ ᐃᓱᖃᖏᑦᑐᒧᑦ, ᑭᖑᕚᕇᑦ ᐅᓄᕐᑐᑦ ᑎᑭᓪᓗᒋᑦ ᓄᓇᒋᔭᒃᓴᐅᔪᓐᓃᕈᒫᕐᐳᖅ, ᐃᖏᕐᕋᔪᓄᓪᓗ ᐊᖅᑯᑕᐅᕙᒍᓐᓃᕐᓗᓂ ᐃᓱᖃᖏᑦᑐᒥᑦ ᐃᓱᖃᖏᑦᑐᒧᑦ. 11 ᕿᓐᓄᐊᔪᐊᑦ ᐃᓪᓛᖁᑦᓰᓪᓗ ᓄᓇᒋᓕᕈᒫᕐᐹᑦ, ᐅᒃᐱᒡᔪᐊᓪᓗ ᑐᓗᒊᓪᓗ ᑕᒫᓂ ᐃᓂᖃᕈᒫᕐᐳᑦ, ᐃᓯᕕᑦᓯᔪᒫᕐᐳᖅ ᖄᖓᓄᑦ ᓇᓗᓕᕐᓇᕐᑐᒥᒃ, ᐅᐃᒻᒪᒃᑎᑦᓯᓂᕐᒥᒡᓗ ᐱᑎᑦᓯᓗᓂ ᐊᖓᔪᖅᑳᖁᑎᖏᓐᓄᑦ. 12 ᐊᖓᔪᖅᑳᕐᔪᐊᖃᕐᕕᒃᓴᐅᖏᑦᑐᒥᒃ ᐊᑦᓯᕈᒫᕐᐹᑦ ᑍᖕᓇ, ᐊᖓᔪᖅᑳᖁᑕᐅᔪᓪᓗ ᑕᕝᕙᓂ ᐱᑕᖃᕈᒫᓐᖏᓚᑦ. 13 ᐅᕐᐱᒊᑦ ᑲᑭᓐᓇᕐᑐᓖᑦ ᐱᕈᕈᒫᕐᐳᑦ ᐊᖓᔪᖅᑳᕐᔪᐊᒃᑯᕕᕕᓂᕐᓂ, ᐃᒡᓗᖃᕐᕕᕕᓂᖏᓐᓂ ᐱᕈᕐᑐᑦ ᐅᖏᓚᖕᓇᕐᑐᑦ ᑲᑭᓪᓚᕐᓇᕐᑐᓪᓗ ᐱᕈᕈᒫᕐᐳᑦ. ᐃᒡᓗᒐᓮᓪᓗ ᐆᒪᔪᓄᑦ ᕿᒻᒥᐅᔮᕐᑐᓄᑦ ᔮᑯᓄᑦ, ᐋᔅᑐᕆᑦᓯᓄᓪᓗ ᑎᖏᔪᓐᓇᖏᑦᑐᓄᑦ ᓇᔪᒐᐅᓕᕈᒫᕐᐳᑦ. 14 ᐆᒪᔪᓪᓗ ᓄᔪᐊᕐᑐᑦ ᕿᒻᒥᖓᔪᑦ ᑕᕝᕙᓂᒥᐅᑕᐅᓕᕈᒫᕐᐳᑦ ᔮᑯᓄᑦ ᐃᓚᓕᐅᑎᓗᑎᒃ, ᐊᓂᕐᓂᕐᓗᐃᓪᓗ ᓴᑍᕇᑦ ᐃᒻᒥᖕᓄᑦ ᐱᓇᓱᐊᖃᑦᑕᐅᑎᔪᒫᕐᐳᑦ ᑕᕝᕙᓂ; ᐅᓐᓄᐊᕐᓯᐅᑏᓪᓗ ᐊᓂᕐᓂᕐᓗᐃᑦ ᐃᓂᒃᓴᕐᓯᐅᕈᒫᕐᐳᑦ ᑖᒃᑯᓇᓂ. 15 ᐅᒃᐱᒡᔪᐊᓪᓗ ᐃᕙᔭᕐᑐᖃᑦᑕᕈᒫᕐᐳᖅ ᒪᓐᓂᖃᕆᐊᕐᑐᕐᓗᑎᒃ, ᐱᐊᕋᕐᒥᖕᓂᒡᓗ ᐱᕈᕐᓮᕕᒋᕙᒡᓗᒋᑦ; ᑎᖕᒥᐊᓪᓗ ᑬᑦ ᑎᒥᕕᓂᕐᑐᓲᑦ ᑲᑎᕐᓱᕐᕕᒋᖃᑦᑕᕈᒫᕆᕚᑦ ᓄᓕᐊᔮᕇᒃᓱᕐᓗᑎᒃ. 16 ᕿᓂᕆᑦᓯ ᐊᑐᐊᕐᓯᓗᓯᓗ ᐊᑕᓂᐅᑉ ᐅᖃᐅᓯᖏᓐᓂᑦ; ᑖᒃᑯᐊ ᐆᒪᔪᓕᒫᑦ ᑭᑭᑕᐅᔪᖃᕐᓂᐊᓐᖏᓚᑦ, ᑕᒪᕐᒥᒡᓗ ᐊᕐᓇᖁᑎᖃᕈᒫᕐᐳᑦ ᐱᖃᑎᒋᔭᒃᓴᒥᖕᓂᒃ, ᐊᑕᓂᐅᑉ ᑍᒤᖁᓪᓗᒋᑦ ᐱᖁᓚᐅᕐᒪᒋᑦ, ᐊᓂᕐᓂᖓᑕᓗ ᑲᑎᕐᓱᓚᐅᕐᒪᒋᑦ. 17 ᐊᑕᓂᐅᑉ ᓄᓇᖁᑎᒃᓴᖏᓐᓂᒃ ᐊᑐᓂᑦ ᐱᑖᕐᑎᓚᐅᕐᒪᒋᑦ ᓇᓚᐅᑦᑖᕈᑎᒃᑯᑦ, ᐱᔪᓐᓇᕐᓂᕐᒥᓄᑦ ᐊᒡᒍᐃᑦᔪᑎᓚᐅᕐᐰᑦ ᓄᓇᖁᑎᒋᓂᐊᕐᑕᖏᓐᓂᒃ; ᑖᒃᑯᐊᓗ ᐃᓂᒋᔪᒫᕐᐰᑦ ᐃᓱᖃᖏᑦᑐᒧᑦ; ᑭᖑᕚᕇᓂᑦ ᑭᖑᕚᕇᓄᑦ ᐃᓂᒋᔪᒫᕐᐰᑦ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society