ᐂᓮᐊᓯᐅᑉ ᐊᒡᓚᖏᑦ 33 - ᐊᒡᓔᑦ ᐃᑦᔪᕐᖕᓁᑦᑐᑦ

ᑐᒃᓯᐊᕐᓂᖅ ᐃᑲᔪᕐᑕᐅᔪᒪᓂᕐᒧᑦ

¹ ᑲᑉᐱᐊᓐᓇᒦᒃ ᐊᓯᕈᐃᔨᐅᔪᑎᑦ, ᐃᕝᕕᑦ ᓇᖕᒥᓂᖅ ᐊᓯᕈᕐᑕᐅᓯᒪᖏᒃᑲᓗᐊᕐᑐᑎᑦ; ᐃᕝᕕᑦ ᐃᕐᓯᓇᕈᒪᔪᑎᑦ, ᑭᓇᒧᓪᓘᓐᓃᑦ ᑲᑉᐱᐊᓱᒃᑎᑕᐅᓚᐅᕐᓯᒪᓇᑎᑦ! ᐊᓯᕈᐃᖃᑦᑕᕈᓐᓃᕈᕕᑦ ᐊᓯᕈᕐᑕᐅᔪᒫᕐᐳᑎᑦ; ᐃᕐᓯᓵᕆᖃᑦᑕᕈᓐᓃᕋᓗᐊᕈᕕᑦ; ᐃᕐᓯᓵᕐᑕᐅᓕᕈᒫᕐᐳᑎᑦ.

² ᐊᑕᓃᖅ ᓈᒃᑭᒋᑎᒍᑦ; ᐃᓕᖕᓂᒃ ᓂᕆᐅᒡᕕᖃᕋᑦᑕ, ᐅᓪᓛᑕᒫᑦ ᓴᐳᑎᓯᒪᓚᐅᕐᑎᒍᑦ ᐱᐅᓕᓗᑕᓗ ᖃᓄᐃᓐᓇᕐᑐᓂᑦ.

³ ᐃᒃᑐᓚᐅᕐᓂᖅ ᑐᓴᕐᓴᕈᑐᐊᕐᒪᑦ ᐃᓄᐃᑦ ᕿᒫᕙᒃᐳᑦ; ᒪᑭᓕᑐᐊᕋᕕᓪᓗ, ᐃᓅᖃᑎᒌᒡᔪᐊᑦ ᐊᕙᒻᒧᑦ ᓯᐊᒻᒪᒃᐸᒃᐳᑦ.

⁴ ᐱᖁᑎᖏᓪᓗ ᐸᕐᓚᔭᐅᓪᓗᑎᒃ ᑎᒎᖅᑲᕐᑕᐅᕙᒃᐳᑦ ᖁᐱᕐᕈᑎᑐᑦ ᑲᑎᕐᓱᐃᔪᑎᑐᑦ; ᐱᒡᓕᕐᑕᐅᔭᑎᑐᓪᓗ ᐊᕙᒻᒧᑭᑕᒃᑐᑎᑐᑦ, ᑍᒫᒃ ᐊᕙᒻᒧᒃᑎᑦᓱᒫᕐᐸᑎᑦ.

⁵ ᐊᑕᓂᖅ ᐊᖏᔪᕈᕐᑎᑕᐅᕗᖅ, ᖁᑦᓯᒃᑐᒥ ᐃᓂᖃᕐᒪᑦ; ᓮᐅᓂ ᑕᑕᑎᑦᓱᒫᕐᐹ ᐊᑦᔨᒌᒃᑎᑦᓯᓂᕐᒥᒃ ᓇᓛᒎᑦᓯᐊᕐᓂᕐᒥᒡᓗ.

⁶ ᐊᑕᓂᖅ ᐊᐅᓚᑕᐅᔪᓐᓇᖏᑦᑐᒥᒃ ᑐᓐᖓᕕᒃᓴᐅᓂᐊᕐᐳᖅ ᐊᑐᕐᑕᑦᓯᓐᓂ. ᐊᔪᕐᓴᕐᑎᑦᓯᓂᐊᓐᖏᓚᖅ ᐱᐅᓕᔭᐅᓂᕐᒥᒃ ᓯᓚᑐᓂᕐᒥᒡᓗ ᖃᐅᔨᒪᓂᕐᒥᒡᓗ. ᐊᑕᓂᕐᒥᒃ ᓯᕘᕋᒋᔭᖃᕐᓂᖅ ᑕᒪᒃᑯᓂᖓ ᐊᔪᕐᓴᖏᑦᔪᑎᐅᓂᐊᕐᐳᖅ.

⁷ ᐃᓛᒃ ᓯᕘᕋᒋᔭᖃᖏᑦᑐᖁᑎᖏᑦ ᐃᑲᔪᕐᑕᐅᔪᒪᓪᓗᑎᒃ ᕿᓄᕗᑦ ᓯᓚᑖᓂ, ᐃᓅᖃᑎᒌᑦᓯᐊᓕᕈᑎᒃᓴᒥᒃ ᐱᓇᓱᐊᕆᐊᕐᑐᕐᑎᑕᐅᓯᒪᔪᑦ ᕿᐊᕐᔪᐊᓕᕈᒫᕐᐳᑦ.

⁸ ᐊᖅᑯᑎᓪᓚᕆᐅᕙᓚᐅᕐᑐᑦ ᐊᑐᕐᑕᐅᔪᓐᓁᕐᐳᑦ, ᐃᖏᕐᕋᖃᑦᑕᓚᐅᕐᑑᒐᓗᐊᑦ ᓄᖅᑲᖓᓕᕐᒪᑕ. ᐊᖏᖃᑎᒌᒍᑎᕕᓃᑦ ᓯᖁᒥᑕᐅᕙᓕᕐᐳᑦ, ᐊᖏᖃᑎᒌᒍᑎᓕᐅᕐᑐᕕᓃᓪᓗ ᓇᕐᕈᒋᔭᐅᓕᕐᐳᑦ, ᐃᓄᐃᑦ ᐅᐱᒋᔭᐅᓂᖃᕈᓐᓃᕐᒪᑕ.

⁹ ᓄᓇ ᕿᒃᓵᓕᕐᐳᖅ ᓴᓐᖐᓕᓪᓗᓂᓗ; ᓕᐸᓇᓂᐅᑉ ᓇᐹᕐᑐᒐᓴᒃᔪᐊᖏᑦ ᓇᓗᓕᕐᓂᕐᒧᑦ ᑐᖁᓕᕗᑦ; ᓵᕋᓂᐅᑉ ᓇᑎᕐᓇᖓ ᓱᓇᖃᔪᐃᑦᑐᑎᑐᑦ ᑍᒤᓕᕐᐳᖅ; ᐹᓴᓂᒥ ᑳᕐᒥᐅᓪᒥᓗ ᓇᐹᕐᑐᐃᑦ ᐅᖃᐅᔭᖏᑦ ᑲᑕᒐᕐᓯᒪᓕᕐᐳᑦ.

ᐊᑕᓂᐅᑉ ᐊᑭᕋᕐᑐᕐᑎᒥᓂᒃ ᓯᕘᕋᓵᕆᓂᖓ

¹⁰ ᐊᑕᓂᖅ ᐅᖃᕐᐳᖅ, “ᒫᓐᓇ ᒪᑭᓐᓂᐊᓕᕐᐳᖓ, ᐅᕙᓐᓂᒃ ᖃᐅᔨᔭᐅᑎᓪᓗᖓ, ᒫᓐᓇ ᐊᖏᔪᕈᕐᑎᑕᐅᖁᓪᓗᖓ.

¹¹ ᓴᓂᕐᓂᒃ ᐱᕈᕐᑎᑦᓯᕗᓯ, ᐱᕈᕐᑎᑕᓯᓗ ᓁᑦᑑᑕᐅᓪᓗᑎᒃ; ᐊᓂᕐᓵᕐᓂᓯ ᐃᑯᒪᐅᕗᖅ ᐃᓕᑦᓯᓐᓂᒃ ᓄᖒᑦᓯᔪᒫᕐᑐᖅ.

¹² ᐃᓄᐃᑦ ᕿᔪᒃᑎᑐᑦ ᐃᑯᒪᒧᑦ ᐊᕐᔭᓕᓂᓐᖑᕐᓯᒪᔪᑎᑐᑦ ᑍᒤᑦᓱᒫᕐᐳᑦ, ᑲᑭᓪᓚᐅᑎᓕᒃᑎᑐᑦ ᓇᑲᑎᕐᑕᐅᓗᑎᒃ ᐃᑯᐊᓪᓚᒃᑎᑕᐅᔪᑎᑐᑦ.

¹³ ᑐᓴᕆᑦᓯ, ᐅᖓᓯᒃᑐᒥᐅᖑᔪᓯ ᐱᓇᓱᐊᕐᕆᓚᐅᕐᑕᓐᓂᒃ; ᐃᓕᑦᓯᓗ ᖃᓂᑦᑐᒥᐅᖑᔪᓯ ᐱᔪᓐᓇᕐᓂᕐᔪᐊᓐᓂᒃ ᓇᓗᓁᕐᓯᓕᕆᑦᓯ.”

¹⁴ ᐊᔪᕐᑐᓕᔪᑦ ᓮᐅᓂᒦᑦᑐᑦ ᑲᑉᐱᐊᓱᓕᕐᐳᑦ; ᒎᑎᖃᖏᑦᑐᓪᓗ ᓴᔪᓕᕐᓗᑎᒃ; ᓇᓕᕐᐳᑦ ᐃᓅᔪᓐᓇᕐᐹ ᐃᑯᐊᓚᔪᒥ ᓄᖒᑦᓯᔪᒥ? ᓇᓕᕐᐳᓪᓗ ᐃᓂᖃᕈᓐᓇᕐᐹ ᐃᓱᖃᖏᑦᑐᒧᑦ ᐃᑯᐊᓚᔪᒥ?

¹⁵ ᓇᓪᓕᐊᑦ ᓇᓛᒎᕐᑐᒥᒃ ᐃᓅᓯᖃᕐᑐᖅ ᓱᓕᔪᓂᒃ ᐅᖃᐅᓯᖃᕐᐳᖅ, ᐆᒥᓱᒡᓗᓂᓗ ᓵᓚᓯᐊᖃᕐᓂᒃᑯᑦ ᐱᕙᓪᓕᐅᑎᖃᕋᓱᐊᕐᑐᓂᒃ, ᐅᐃᕕᕆᒃᓯᓂᒃᑯᑦ ᐱᓯᒪᔪᓂᒃ ᓱᓇᒥᒃ ᑎᒍᓯᔪᒪᓐᖏᓚᖅ, ᑐᖁᑦᓯᓂᕐᒥᒡᓗ ᑐᓴᕈᒪᓐᖏᓚᖅ ᐊᔪᕐᑐᓕᓂᕐᒥᒃ ᑕᑯᔪᒪᖏᓐᓇᒥ:

¹⁶ ᑍᒤᑦᑐᖅ ᐃᓂᖃᕐᓂᐊᕐᐳᖅ ᖁᕝᕙᓯᒃᑐᒥ; ᕿᒫᕕᒃᓴᖃᕐᓂᐊᕐᐳᖅ ᐅᔭᖅᑲᓂᒃ ᐊᕙᓗᓕᐅᕐᓯᒪᔪᓂ; ᓂᕿᒃᓴᖃᕐᑎᑕᐅᓂᐊᕐᐳᖅ, ᐃᒥᒃᓴᖃᕐᑎᑕᐅᓗᓂᓗ ᑲᔪᓯᑦᓯᐊᕐᑐᒥᒃ.

ᓯᕗᓂᒃᓴᖃᕐᓂᖅ ᖁᕕᐊᓇᕐᑐᒥᒃ

¹⁷ ᐃᔨᑦᓯᓐᓄᑦ ᑕᑯᔪᒫᕐᐳᓯ ᐊᖓᔪᖅᑳᕐᔪᐊᑉ ᐃᓂᖁᓇᕐᓂᕐᔪᐊᖓᓂᒃ; ᑕᑯᓗᑎᓪᓗ ᓄᓇᒥᒃ ᐅᖓᓯᒃᑐᒧᑦ ᑕᑯᒃᓴᐅᓇᕐᑐᒥᒃ.

¹⁸ ᐃᖅᑲᐅᒪᔪᒫᕐᐳᓯᓗ ᑲᑉᐱᐊᓱᖕᓂᐅᓚᐅᕐᑐᓂᒃ, “ᓇᐅᒡᓕ ᑎᑎᕋᕐᐸᓚᐅᕐᑐᑦ? ᓇᐅᒡᓕ ᑖᒃᓰᔭᕐᑎᑦᓯᔨᐅᕙᓚᐅᕐᑐᑦ? ᓇᐅᒡᓕ ᐃᒡᓗᒐᓴᒡᔪᐊᑦ ᐊᕙᓗᖏᑕ ᖃᐅᔨᓴᕐᕕᖏᓐᓂ ᓈᓮᕙᓚᐅᕐᑐᑦ?”

¹⁹ ᐃᓄᖕᓂᒃ ᓵᓚᓯᐊᖃᕐᑐᓂᒃ ᑕᑯᔪᓐᓃᕈᒫᕐᐳᓯ, ᑐᑭᓯᐊᓐᖏᑕᑦᓯᓐᓂᒡᓗ ᐅᖃᐅᓯᖃᕐᑐᓂᒃ ᑕᑯᔪᓐᓃᕈᒫᕐᐳᓯ, ᐃᒃᑐᕆᒃᑐᓂᒡᓗ ᐅᖃᐅᓯᖃᕐᑐᑦ ᑐᑭᓯᔪᓐᓇᓐᖏᑕᑦᓯᓐᓂᒃ.

²⁰ ᓮᐅᓂ ᑕᑯᓐᓈᓕᕐᓯᐅᒃ, ᓇᓪᓕᐅᓐᓂᕐᓯᐅᕕᖕᓂ ᓂᕆᕕᒡᔪᐊᕐᕕᐅᕙᒃᑐᖅ! ᐃᔨᑦᓯᓐᓄᑦ ᑕᑯᔪᒫᕐᐸᓯ ᔨᕉᓴᓕᒻ ᓂᐰᑦᑐᒥᒃ ᐃᓂᓪᓚᖓᑦᓯᐊᕐᓇᓕᕐᑐᖅ, ᑐᐱᕐᓗ ᓅᓚᐅᕐᓯᒪᔪᓐᓃᕐᑐᖅ ᐃᓂᒥᓂᑦ, ᐊᒃᓱᓈᖏᑕᓗ ᐸᐅᒍᐊᖏᑦ ᐊᒧᓚᐅᕐᓯᒪᖏᑦᑐᑦ, ᓄᑦᓲᑎᖏᓪᓗ ᕿᒃᑐᕋᓚᐅᕐᓯᒪᖏᑦᑐᑦ.

²¹ ᑕᕝᕙᓂ ᐊᑕᓂᐅᑉ ᐊᖓᔪᖅᑳᕐᔪᐊᖑᓂᖓᑕ ᐃᓚᒋᔪᒫᕐᐹᑎᒍᑦ, ᑰᖃᕐᑐᖅ ᓯᓕᒃᑐᓂᒃ ᐊᒥᓐᓂᕐᓴᓂᒡᓗ, ᐅᒥᐊᕐᔪᐊᑦ ᑎᖏᕐᕋᐅᑕᓖᑦ ᐃᐳᑎᖃᕐᑐᑦ ᑕᒪᐅᓈᕈᓐᓇᕈᒫᓐᖏᓚᑦ, ᐅᒥᐊᕐᔪᐊᓪᓗ ᐊᖏᓂᕐᓮᑦ ᑕᒪᐅᓈᕈᓐᓇᕈᒫᖏᓐᓂᕗᑦ.

²² ᐊᑕᓂᖅ ᐃᖅᑲᕐᑐᐃᔨᒋᒐᑦᑎᒍ, ᐊᑕᓂᖅ ᐊᐅᓚᑦᓯᔨᒋᒐᑦᑎᒍ, ᐊᑕᓂᖅ ᐊᖓᔪᖅᑳᕐᔪᐊᕆᒐᑦᑎᒍ; ᑖᑦᓱᒪ ᐱᐅᓕᓂᐊᕐᐹᑎᒍᑦ.

²³ ᑎᖏᕐᕋᐅᑕᑦᓯ ᐊᒃᓱᓈᖏᑦ ᖃᓱᖓᓗᐊᕐᐳᑦ, ᓇᐸᕈᑕᓯᓗ ᐊᑦᓱᖏᕐᓯᒪᑦᓯᐊᕋᓂ, ᑎᖏᕐᕋᐅᑕᓯᓗ ᐃᓯᕕᑦᓯᐊᕈᓐᓇᕋᓂ, ᐅᓇᑕᕐᓂᒃᑯᑦ ᑎᒍᔭᐅᔪᑦ ᐱᖁᑎᑦ ᐊᒥᒐᕈᒫᓐᖏᓚᑦ, ᐱᓱᒍᓐᓇᖏᑦᑐᑦ ᐊᒡᓛᑦ ᑎᒍᓯᖃᑕᐅᔪᒫᕐᐳᑦ.

²⁴ ᑕᕝᕙᓂᒥᐅᑦ ᓇᓪᓕᐊᑦ ᐅᖃᕈᒫᓐᖏᓚᖅ, “ᐋᓐᓂᐊᒐᒪ,” ᐃᓄᐃᓪᓗ ᑕᕝᕙᓃᑦᑐᑦ ᐊᔪᕐᑐᓕᓂᖏᑦ ᐃᓱᒪᒋᔪᓐᓁᕐᑕᐅᔪᒫᕐᐳᑦ.