ᐂᓮᐊᓯᐅᑉ ᐊᒡᓚᖏᑦ 30 - ᐊᒡᓔᑦ ᐃᑦᔪᕐᖕᓁᑦᑐᑦ

ᐄᑦᔨᑉᑎᒥᐅᓂᒃ ᐊᖏᖃᑎᒌᒍᑎᓕᐅᕐᓂᐅᑉ ᐊᑐᕐᓇᖏᓐᓂᖓ

¹ ᐊᑕᓂᖅ ᐅᖃᕐᐳᖅ, “ᑲᑉᐱᐊᓐᓇᒦᒃ ᑭᖑᕚᖑᖃᑎᒌᑦ ᓈᓚᖏᑦᑐᑦ, ᑲᔪᓯᑎᑦᓯᓪᓗᑎᒡᓗ ᐃᓱᒻᒥᕐᑑᑕᐅᔪᒥᒃ ᐋᖅᑭᓚᐅᓐᖏᑕᓐᓂᒃ; ᑲᑐᑦᔨᖃᑎᒌᓕᐅᕐᐳᑦ ᐋᖅᑭᒃᓱᐃᓪᓗᑎᒃ, ᐅᕙᖓ ᐊᓂᕐᓂᓐᓂᒃ ᐃᓚᖃᖏᑦᑐᓂᒃ, ᐊᔪᕐᓂᖅ ᐃᓚᒃᑲᓐᓂᕈᒪᓪᓗᒍ ᐊᔪᕐᓂᕐᒥᒃ;

² ᐄᑦᔨᑉᑎᒥᐅᓄᑦ ᐃᑲᔪᕐᑕᐅᔪᒪᖃᑦᑕᕐᐳᑦ, ᐅᕙᓐᓂᒡᓘᓐᓃᑦ ᐃᓱᒪᓯᐅᕆᓇᓱᐊᓚᐅᕋᑎᒃ, ᐄᑦᔨᑉᑎᒥᐅᓄᑦ ᓴᐳᑎᔭᐅᓯᒪᔪᒪᒐᒥᒃ, ᐄᑦᔨᑉᑎᒥᐅᑦ ᐊᖓᔪᖅᑳᕐᔪᐊᖏᓐᓂᒃ ᑕᑎᒃᓴᕐᐳᑦ.

³ ᐊᖓᔪᖅᑳᕐᔪᐊᓪᓕ ᐃᑲᔪᕐᑎᒋᔪᒪᔭᖏᑦ ᐱᔪᓐᓇᕐᓂᖃᕈᒫᓐᖏᓚᑦ, ᐄᑦᔨᑉᑎᒥᐅᓄᑦ ᓴᐳᑦᔭᐅᓇᓱᐊᕐᓂᖓᑦ ᐊᓯᕈᕐᑕᐅᑦᔪᑎᒃᓴᑐᐃᓐᓇᐅᔪᒫᕐᐳᖅ.

⁴ ᐄᑦᔨᑉᑎᒥᐅᑦ ᐊᖓᔪᖅᑳᖁᑎᒋᑦ ᐃᒡᓗᒐᓴᒡᔪᐊᓄᑦ ᔪᐊᓐᒧᑦ ᑎᑭᓯᒪᓕᕋᓗᐊᕐᐳᑦ, ᑎᓕᓯᒪᔭᖏᓪᓗ ᓄᓇᓕᖕᓄᑦ ᕼᐂᓂᒧᑦ.

⁵ ᐃᓘᓐᓇᑎᒃ ᑲᓐᖑᓇᕐᑐᒧᑦ ᑎᑭᑉᐳᑦ ᐃᓄᐃᑦ ᐃᑲᔪᕈᓐᓇᖏᑦᑐᑦ ᐊᖅᑯᑎᒋᓪᓗᒋᑦ, ᐃᑲᔪᕈᓐᓇᖏᒻᒪᑕ ᐱᕙᓪᓕᕐᑎᑦᓯᔪᓐᓇᕋᑎᒡᓗ, ᑲᓐᖑᓇᕐᓯᑎᑦᓯᑐᐃᓐᓇᕐᐳᑦ ᓇᕐᕈᓇᕐᓯᑎᑦᓯᓪᓗᑎᒡᓗ.”

⁶ ᒎᑎᐅᑉ ᐅᖃᐅᓯᖃᕐᓂᖓ ᐆᒪᔪᓂᒃ ᓯᐅᕌᓗᖕᒥᐅᑕᓂᒃ ᐅᓪᓗᓪᓗᐊᑉ ᓇᓛᓂᒥᐅᓂᒃ ᓂᒋᑉᒥ, ᑎᓕᔭᐅᓯᒪᔪᑦ ᐃᖏᕐᕋᔭᕆᐊᖃᕐᐸᒃᐳᑦ ᓄᓇᑎᒍᑦ ᑲᑉᐱᐊᓇᕐᑐᖃᕐᑐᑎᒍᑦ ᓛᔭᓄᑦ ᐃᓂᒋᔭᐅᕙᒃᑐᑯᑦ, ᖁᒡᓗᒋᐊᓂᒃ ᑐᖁᓐᓇᕐᑐᓕᒃᑯᑦ, ᐆᒪᔪᕐᓗᖃᕐᑐᒃᑯᑦ ᖃᖓᑕᓲᓂᒃ, ᓯᐅᑎᖅᑯᕐᑐᔪᖁᑎᑎᒃ ᓇᖕᒪᒃᑎᑉᐸᒃᐰᑦ ᐊᑭᑐᔪᒃᓴᔭᓂᒃ, ᐱᒃᑯᒥᓇᕐᑐᓂᒡᓗ ᑳᒥᓕᖁᑎᑎᒃ ᓇᖕᒪᒃᑎᖃᑦᑕᕐᐰᑦ ᐃᓅᖃᑎᒋᒡᔪᐊᓄᑦ ᐃᑲᔪᕈᓐᓇᖏᑦᑐᓄᑦ.

⁷ ᐄᑦᔨᑉᑎᒥᐅᑦ ᐃᑲᔪᕈᓐᓇᕐᓂᖓᑦ ᐊᑐᕐᓇᕐᓂᖃᖏᒻᒪᑦ, ᑍᒤᒻᒪᑦ ᐄᑦᔨᑉᑎᒥᐅᑦ ᑍᒎᓯᕐᑖᕐᑎᓯᒪᕙᒃᑲ, “ᕋᕼᐊᑉ-ᕼᐃᒻ-ᓯᐱᑎᒥᒃ ᐃᒃᓯᕙᑐᐃᓐᓇᕐᑐᒥᒃ.”

ᐃᓅᖃᑎᒌᑦ ᓈᓚᖏᓐᓂᖓᑦ

⁸ ᒫᓐᓇᓕ ᑎᑎᕋᓕᕆᑦ ᐊᒡᓚᖕᓂᒃ ᐅᖃᐅᓯᕆᓗᒋᑦ ᐊᒡᓚᕕᒃᓴᑎᒍᑦ, ᑎᑎᕋᕐᓯᒤᓐᓇᕐᑐᖃᖁᓪᓗᒍ ᖃᐅᔨᒪᑦᔪᑕᐅᓂᐊᕐᑐᓂᒃ ᖃᓄᐃᑦᑑᖕᒪᖔᑕ.

⁹ ᓈᓚᖏᑦᑑᖕᒪᑕ, ᓴᒡᓗᑐᓪᓗᑎᒡᓗ, ᕿᑐᕐᖎᑦ ᓈᓚᒍᒪᖏᑦᑐᑦ ᐊᑕᓂᐅᑉ ᐊᔪᕆᕐᑑᓯᖏᓐᓂᒃ.

¹⁰ ᓇᓚᐅᑦᑍᔪᓄᑦ ᐅᖃᖃᑦᑕᕐᐳᑦ, “ᓱᓕᔪᓂᒃ ᓇᓚᐅᑦᑍᓂᐊᕋᓯ ᐅᕙᑦᑎᓐᓄᑦ, ᐅᖃᐅᑦᔪᐃᖃᑦᑕᓚᐅᕆᑦᓯ ᑐᓴᕈᒪᔭᑦᑎᓐᓂᒃ ᐊᑐᓪᓚᕆᒍᒫᖏᑦᑐᓂᒃ ᐅᕙᑦᑎᓐᓄᑦ.

¹¹ ᐊᖅᑯᒻᒥᑦ ᐊᒡᕔᕆᑦᓯ, ᐊᖅᑯᑕᐅᕙᒃᑐᖅ ᐊᑐᕈᓐᓃᕐᓗᒍ, ᑐᓴᕐᑎᑦᓯᓂᐊᕋᓯ ᐃᓴᕆᐊᓕᑎᑦ ᐃᑦᔪᕐᓁᑦᑐᖁᑎᖓᓂᒃ ᐅᕙᑦᑎᓐᓄᑦ.”

¹² ᑍᒤᒻᒪᑦ ᐃᓴᕆᐊᓕᒥᐅᑦ ᐃᑦᔪᕐᓁᑦᑐᖁᑎᖓᑦ ᐃᒫᒃ ᐅᖃᕐᐳᖅ, “ᐅᖃᐅᓯᕆᔭᒃᑲ ᓈᓚᒍᒪᖏᓐᓇᑦᓯᐅᒃ, ᐅᖁᒤᒃᓴᕐᑎᑕᐅᓂᕐᒥᒃ ᑕᑎᖃᕈᒪᓪᓗᓯ ᖃᓄᐃᕈᓘᔭᕐᓇᕐᑐᓂᒡᓗ, ᒪᓕᖔᕈᒪᓪᓗᓯ.

¹³ ᑍᒤᒻᒪᑦ ᐊᔪᕐᑐᓕᓂᖅ ᑕᒪᓐᓇ ᐃᓕᑦᓯᓐᓄᑦ ᐱᔪᒫᕐᐳᖅ ᐊᕙᓗᕐᔪᐊᑐᑦ ᐃᓚᓐᖓᕐᓯᒪᔪᑐᑦ, ᐊᓂᖓᔪᑐᑦ ᓯᖁᒥᑉᐸᓪᓕᐊᓕᕐᑐᑐᑦ, ᑍᒤᑦᑐᖅ ᐅᕐᕈᓂᐊᕐᐳᖅ ᓂᕆᐅᓇᖏᑦᑐᒥᒃ ᑕᕝᕔᓐᓇᖅ.

¹⁴ ᓯᖁᒥᑉᐳᖅ ᒪᕐᕋᓕᐅᕐᑎᐅᑉ ᐃᓗᓕᖁᑎᓕᐊᖓᑐᑦ, ᓯᖁᒥᑕᐅᔪᑐᑦ ᓂᑲᒋᔭᐅᓇᓂ ᓯᖁᒥᓐᓂᑯᖏᑦ ᐊᒡᓛᑦ ᓇᓂᔭᒃᓴᐅᓐᖏᓚᑦ ᐃᑯᒪᒥᓘᓐᓃᑦ ᐊᒥᐊᒃᑯᕕᓂᕐᒥᒃ ᑎᒍᔭᐅᔪᒃᓴᖃᓐᖏᓚᖅ, ᐃᒥᕐᑕᕐᕕᖕᒥᓪᓘᓐᓃᑦ ᐃᑎᔪᒥᑦ ᖃᓗᓯᑦᔪᑎᒃᓴᖃᓐᖏᓚᖅ.”

¹⁵ ᐊᑕᓂᖅ ᒎᑎ, ᐃᓴᕆᐊᓕᒥᐅᑦ ᐃᑦᔪᕐᓁᑦᑐᖁᑎᖓᑦ, ᐃᒫᒃ ᐅᖃᕐᐳᖅ, “ᐅᕙᓐᓄᑦ ᐅᑎᕈᑦᓯ ᓮᓕᓇᕐᑐᒦᓪᓗᓯ ᐱᐅᓕᔭᐅᒐᔭᕐᐳᓯ; ᓂᐰᑦᑑᓂᖅ ᖁᓚᖏᓐᓂᕐᓗ ᐱᔪᓐᓇᕐᓂᕆᓂᐊᕐᐸᓯ.” ᑭᓯᐊᓂᓕ ᑍᒤᑦᑐᒪᓚᐅᓐᖏᓚᓯ.

¹⁶ ᐅᖃᓚᐅᕐᐳᓯᓕ, “ᕿᒻᒥᕐᔪᐊᓄᑦ ᓱᒃᑲᓕᔪᓄᑦ ᕿᒫᔪᓐᓇᕐᓂᐊᕐᐳᒍᑦ.” ᑍᒤᒻᒪᑦ ᕿᒫᔪᒫᕐᐳᓯ; ᐃᓕᑦᓯᓐᓂᒡᓕ ᒪᓕᒍᒫᕐᑐᑦ ᕿᒻᒥᕐᔪᐊᖃᕈᒫᕐᐳᑦ ᓱᒃᑲᓂᕐᓴᒋᐊᓪᓚᖕᓂᒃ.

¹⁷ 1000 ᕿᒫᔪᒫᕐᐳᑦ ᐊᑭᕋᑦᓯ ᐅᓇᑕᕐᑎᖁᑎᖓᓂᒃ ᐊᑕᐅᓯᕐᒥᒃ ᑕᑯᒍᑎᒃ, ᑕᓪᓕᒪᓂᒃ ᑕᑯᓕᕈᑦᓯ ᐊᑕᖏᕐᓗᓯ ᕿᒫᔪᒪᕐᐳᓯ, ᐊᒥᐊᒃᑯᑕᖃᖏᓪᓗᓯ, ᓮᒻᒪᑎᐅᑉ ᓇᑉᐸᖅᑯᑎᖓᑐᑦ ᖃᖅᑲᐅᑉ ᖄᖓᓃᑦᑐᑐᑦ ᖃᖅᑲᐅᓪᓗ ᑳᖓᓂ ᖃᓕᕇᓕᕈᒫᕐᐳᓯ ᓇᓗᓁᒃᑯᑕᐅᔪᑎᑐᑦ.

¹⁸ ᐊᑕᓂᕐᓕ ᐅᑕᖅᑭᕗᖅ, ᐃᓕᑦᓯᓐᓂᒃ ᐱᑦᓯᐊᕐᕕᖃᕈᒪᓪᓗᓂ; ᑍᒤᒻᒪᑦ ᒪᑭᑦᓱᒫᕐᐳᖅ ᓂᑲᒍᓱᖕᓂᕐᒥᓂᒃ ᖃᐅᔨᑎᑦᓱᒪᓪᓗᓯ, ᐊᑕᓂᖅ ᒎᑎᐅᖕᒪᑦ ᐊᑦᔨᒌᒃᑎᑦᓯᔪᖅ; ᖁᕕᐊᓱᒍᑎᒃᓴᖃᕐᐳᑦ ᐊᑕᓂᕐᒥᒃ ᐅᑕᖅᑭᔪᓐᓇᕐᑐᓕᒫᑦ.

ᒎᑎᐅᑉ ᓮᒻᒪᕐᑎᑦᓯᔪᒫᕐᓂᖓ ᐃᓄᖁᑎᒥᓂᒃ

¹⁹ ᓮᐅᓂᒥᐅᑕᐅᔪᓯ ᓄᓇᖃᕐᑐᓯᓗ ᔨᕉᓴᓕᒥ; ᕿᐊᓂᐊᕈᓐᓃᕐᐳᓯ. ᑖᑦᓱᒪ ᐊᖏᔪᒥᒃ ᐱᑦᓯᐊᕐᕕᒋᖕᒪᓯ ᕿᓄᓂᑦᓯᓐᓂᒃ ᑐᓴᕈᓂ; ᑐᓴᕈᓂᓯ ᑭᐅᓂᐊᕐᒪᓯ.

²⁰ ᐊᑕᓂᐅᑉ ᓂᐊᖂᔭᒥᒃ ᑐᓂᓯᕕᒋᖕᒪᓯ ᐊᑭᕋᕐᑐᕐᑕᐅᓂᕐᒥᒃ ᐃᓗᓕᓕᖕᒥᒃ ᐃᒥᖃᕐᑎᓪᓗᓯᓗ ᐅᖁᒤᒃᓴᕐᑎᑕᐅᓂᕐᒥᒃ, ᐃᓕᓮᔨᓯᓕ ᐃᔨᕐᓯᒪᓂᐊᕈᓐᓃᕐᐳᖅ, ᐃᔨᑦᓯᓐᓄᑦ ᓇᖕᒥᓂᖅ ᑕᑯᔪᒫᓕᕋᑦᓯᐅᒃ.

²¹ ᓴᖑᓕᕈᑦᓯ ᑕᓕᕐᐱᒧᑦ ᓴᐅᒥᒧᓪᓘᓐᓃᑦ, ᓯᐅᑎᑦᓯᓐᓄᑦ ᑐᓄᑦᓯᓐᓂ ᓂᐱᖓ ᑐᓴᕈᒫᕐᐸᓯ ᐅᖃᕐᑐᖅ, “ᑕᒪᑦᔭ ᐊᖅᑯᑎᒃᓴᓯ, ᐱᓱᒡᕕᒋᓕᕐᓯᐅᒃ.”

²² ᒎᑎᓐᖑᐊᕕᓂᓯ ᓯᐅᓪᕕᕆᒥᒃ ᒎᓗᒥᒡᓗ ᖄᐹᕐᓯᒪᔪᑦ, ᐃᒋᐅᖅᑲᕈᒫᕐᐸᓯ ᓴᓂᕐᑎᑐᑦ ᕾᒐᓛᕐᓗᓯᓗ ᐅᖃᐅᑎᔪᒫᕐᐸᓯ, “ᑕᑯᓐᓇᕈᒪᔪᓐᓃᕐᐸᑦᓯ!”

²³ ᐱᕈᕐᑐᒃᓴᓂᒃ ᑲᓐᖓᕐᓱᐃᔭᕌᖓᑦᓯ ᐊᑕᓂᖅ ᓯᓚᓗᒃᑎᑦᓯᕙᒍᒫᕐᐳᖅ ᐱᕈᕈᑎᒃᓴᖏᓐᓂᒃ, ᐱᕈᕐᑐᕕᓂᕐᓂᒃ ᑲᑎᕐᓱᒐᒃᓴᖃᑦᓯᐊᖁᓪᓗᓯ, ᐱᕈᕐᓯᒪᑦᓯᐊᕐᑐᓂᒃ ᐊᒥᒐᖏᑦᑐᓂᒡᓗ. ᐅᓪᓗᖅ ᑕᒪᓐᓇ ᓇᓪᓕᐅᑎᒃᐸᑦ ᐆᒪᔪᖁᑎᓯ ᓂᕆᓇᓱᐊᕈᒫᕐᐳᑦ ᓄᓇᒥ ᓂᕿᒃᓴᖃᑦᓯᐊᕐᑐᒥ ᐊᒥᒐᖏᑦᑐᓂᒃ.

²⁴ ᑐᒃᑐᕙᖁᑎᓯ ᓯᐅᑎᖅᑯᕐᑐᔪᖁᑎᓯᓗ ᐱᕈᕐᓰᕕᒃᓴᑦᓯᓐᓂᒃ ᓄᓇᓕᕆᑦᔪᑎᒋᕙᒃᑕᓯ, ᓂᕿᒃᓴᓕᐊᖑᓯᒪᔪᓂᒃ ᓂᕆᔭᒃᓴᖃᑦᓯᐊᖃᑦᑕᕈᒫᕐᐳᑦ ᑐᖁᓕᑦᓯᐊᖑᓯᒪᔪᓂᒃ, ᓴᓃᔭᕐᓯᒪᔪᓂᒃ ᐳᐊᕐᕆᑎᓄᑦ ᑲᑭᐊᒡᔪᐊᓄᓪᓗ.

²⁵ ᖃᖅᑲᓕᒫᓂᑦ ᐱᖑᓕᒫᓂᓪᓗ ᐳᕐᑐᔪᓂᑦ ᑰᒐᓛᒃᑕᖃᕈᒪᕐᐳᖅ ᑰᓪᓚᕆᒃᑕᖃᕐᓗᓂᓗ, ᐅᓇᑕᕐᓂᕐᒥ ᐅᓄᕐᑐᓂᒃ ᑐᖁᕅᔪᖃᕐᑎᓪᓗᒍ, ᓇᐸᔪᐊᓗᐃᓪᓗ ᐅᕐᕈᑎᑕᐅᑎᓪᓗᒋᑦ.

²⁶ ᑕᒪᓐᓇ ᓇᓪᓕᐅᑎᒃᐸᑦ ᑕᖅᑭᖅ ᓯᕿᓂᕐᑎᑐᑦ ᖃᐅᒪᑎᒋᔪᒫᕐᐳᖅ, ᓯᕿᓂᕐᓗ ᖃᐅᒻᒪᓯᕆᕙᒃᑕᒥᓂᑦ 7ᐃᕐᑐᕈᑎᓪᓗᐊᒥᓂᒃ ᖃᐅᒪᓂᕐᓴᐅᓕᕈᒫᕐᐳᖅ, ᐅᓪᓗᐃᑦ 7 ᐊᑕᐅᓯᕐᒧᑦ ᑲᑎᑕᐅᓯᒪᔪᑎᑐᑦ ᑕᒪᓐᓇ ᑍᒤᑦᓱᒫᕐᐳᖅ, ᐊᑕᓂᐅᑉ ᐃᓄᖁᑎᓂ ᐋᓐᓂᐊᓂᖏᑦ ᒪᑦᑐᓯᕐᑐᓕᕐᐸᒋᑦ ᐃᑭᖏᓪᓗ ᒪᒥᓴᓕᕐᐸᒋᑦ.

ᒎᑎᐅᑉ ᓱᒋᐊᕐᓯᔪᒫᕐᓂᖓ ᐊᓯᕆᐊᒥᐅᓂᒃ

²⁷ ᑕᑯᒋᑦ, ᐊᑕᓂᐅᑉ ᐊᑎᖓ ᐅᖓᓯᒃᑐᒥᑦ ᑕᑯᒃᓴᐅᓕᕐᐳᖅ, ᐃᑯᐊᓚᔪᖅ ᓂᓐᖓᐅᒪᓂᕐᒧᑦ, ᐳᔪᕐᔪᐊᕐᓗ ᑕᑯᒃᓴᐅᓇᖏᑦᑐᖅ ᖁᒻᒧᐊᓕᕐᐳᖅ; ᖃᓂᖓ ᓂᓐᖓᐅᒪᓂᕐᒥᒃ ᑕᑕᑉᐳᖅ, ᐅᖃᖓᓗ ᐃᑯᒪᒥᒃ ᓄᖒᑦᓯᔪᒥᒃ ᐊᑦᔨᖃᕐᐳᖅ.

²⁸ ᐊᓂᕐᓵᕐᓂᖓ ᑰᒃᑎᑐᑦ ᑰᒃᑐᕐᔪᐊᑎᑐᑦ ᑍᒤᑉᐳᖅ ᖁᖓᓯᕐᒧᑦ ᑎᑭᐅᒪᓕᕐᑐᑎᑐᑦ; ᐃᓅᖃᑎᒌᒡᔪᐊᑦ ᓴᓃᔭᕐᑕᐅᔪᑎᑐᑦ ᐱᓇᓱᐊᕐᕕᒋᔪᒫᕐᐰᑦ; ᖃᓂᖏᓐᓄᓪᓗ ᐃᓕᓯᓗᓂ ᕿᒻᒥᕐᔪᐊᑦ ᖃᓂᖏᓐᓄᑦ ᑕᓯᒍᐊᕐᕕᐅᓲᓂᒃ, ᑍᒫᒃ ᑕᓯᐅᕐᓂᐊᕐᓗᒋᑦ ᑕᒻᒪᕐᓇᕐᑐᒧᑦ.

²⁹ ᐃᓕᑦᓯᓕ ᐃᓐᖏᕈᒫᕐᐳᓯ ᐅᓐᓄᒃᑯᑦ ᐃᑦᔪᕐᓁᑦᑐᒥᒃ ᓇᓪᓕᐅᓐᓂᕐᓯᐅᕐᓂᕐᒧᑦ ᓂᕆᕕᒡᔪᐊᕐᓂᐊᕐᑐᓃᑦᑐᑎᑐᑦ, ᖁᕕᐊᓱᖃᕐᑎᒋᒍᒫᕐᐳᓯ ᓱᐴᒐᕐᑎᓄᑦ ᐅᐸᒍᑎᓕᕐᑐᑎᑐᑦ ᐊᑕᓂᐅᑉ ᖃᖅᑲᖁᑎᖓᓄᑦ, ᐃᓴᕆᐊᓕᒥᐅᑦ ᕾᕐᑐᖓᓐᓄᑦ.

³⁰ ᐊᑕᓂᐅᑉ ᓂᐱᓂ ᑲᒪᓇᕐᑐᕐᔪᐊᖅ ᑐᓴᕐᓴᐅᑎᑦᓱᒫᕐᐹ, ᑕᓕᖓᑕᓗ ᑎᒡᓗᒃᓯᓂᖓ ᑕᑯᒃᓴᐅᑎᓪᓗᒍ, ᓂᓐᖓᐅᒪᓂᕐᔪᐊᒃᑯᑦ ᐃᑯᒪᒃᑯᓪᓗ ᓄᖒᑦᓯᔪᒃᑯᑦ, ᑕᑯᒃᓴᐅᓂᖃᕐᓗᓂ ᓄᕗᔭᕐᔪᐊᒥᒃ ᓯᓚᕐᓂᕐᓗᒡᔪᐊᒥᒡᓗ ᓇᑕᖅᑯᕐᓇᕐᔪᐊᕐᓗᓂᓗ.

³¹ ᐊᓯᕆᐊᒥᐅᑦ ᖁᐊᕐᓵᖓᓗᑎᒃ ᑲᑉᐱᐊᓱᖕᓂᖃᕈᒫᕐᐳᑦ ᐊᑕᓂᐅᑉ ᓂᐱᖓᓂᒃ ᑐᓴᓕᕈᑎᒃ, ᐊᔭᐅᑉᐱᐊᒥᓄᑦ ᐊᓇᐅᓯᒃᐸᑦ.

³² ᐊᑕᓂᐅᑉ ᐱᒋᐊᕐᓯᖃᑦᑕᕐᓂᖏᑦ ᑖᒃᑯᓂᖓ, ᓂᐱᖃᕈᒫᕐᐳᖅ ᓯᕙᓂᕋᐅᑎᓂᒃ ᕼᐊᕐᐱᓂᒡᓗ ᓂᓪᓕᐊᑎᑦᓯᔪᑎᑐᑦ; ᐅᓇᑕᕐᓗᓂ ᑖᒃᑯᓂᖓ ᑕᓕᕐᒥᓄᑦ ᐱᒋᐊᕐᑕᕐᓗᓂ ᐅᓇᑕᕈᒫᕐᐰᑦ.

³³ ᑍᑦᓱᒪᓂᐊᓗᖕᓂᑦ ᐊᑐᐃᓐᓇᕈᐃᓯᒪᓚᐅᕐᒪᑦ ᐃᑯᐊᓚᑦᓯᕕᒃᔪᐊᒃᓴᒥᒃ; ᐃᓛᒃ ᐊᖓᔪᖅᑳᕐᔪᐊᖓᑦᑕ ᐃᑯᐊᓪᓚᒃᑕᐅᕕᒃᓴᖓᓂᒃ, ᐃᓗᑐᔫᓪᓗᓂ ᓴᓂᒧᑐᔫᓪᓗᓂᓗ, ᐃᑯᐊᓪᓚᖅᑯᑎᒃᓴᖏᑦ ᕿᔪᐃᑦ ᐊᒥᒐᕋᑎᒃ; ᐊᑕᓂᐅᑉ ᐊᓂᕐᓵᕐᓂᖓᑕ ᐃᑯᒪᕐᔪᐊᒥᒃ ᑰᒃᑐᑎᑐᑦ ᐃᑯᐊᓪᓚᒃᑎᑦᓱᒫᕐᐹ.