ᐂᓮᐊᓯᐅᑉ ᐊᒡᓚᖏᑦ 3 - ᐊᒡᓔᑦ ᐃᑦᔪᕐᖕᓁᑦᑐᑦ

ᔨᕉᓴᓕᒥ ᐅᐃᒪᔮᕐᓂ

¹ ᑕᑯᒋᑦ ᐊᑕᓂᖅ, ᕿᓚᖕᒥᐅᒐᓴᒡᔪᐃᑦ ᐊᑕᓂᖓ, ᐊᕐᓵᕐᓯᓕᕐᐳᖅ ᔨᕉᓴᓕᒥᑦ ᔫᑎᐊᒥᓪᓗ ᓂᐅᕕᐊᒃᓴᖃᕐᕕᖕᓂᒃ ᓂᐅᕕᕐᕕᖕᓂᒡᓗ, ᓂᐊᖂᔭᒃᓴᓕᒫᓂᒃ ᐃᒥᒃᓴᓕᒫᓂᒡᓗ.

² ᐊᔪᖏᑦᑐᕐᔪᐊᖁᑎᒋᔭᐅᔪᓪᓗ ᐅᓇᑕᕐᑐᒃᓮᓪᓗ, ᐃᓱᐊᕐᓮᔩᓪᓗ, ᐱᔪᒫᕐᑐᓂᒡᓗ ᓇᓚᐅᑦᑍᓲᑦ, ᐊᖓᔪᖅᑳᓪᓗ,

³ ᐊᖓᔪᖅᑳᓪᓗ ᐅᓇᑕᕐᑐᒃᓴᓄᑦ 50ᓄᑦ ᐊᖑᑎᓪᓗ ᐊᖓᔪᖅᑳᑦ ᐱᓪᓚᕆᐅᑎᑕᐅᔪᑦ, ᐃᓅᖃᑎᒥᓂᒡᓗ ᐃᑲᔪᕐᐸᒃᑐᑦ, ᐱᔪᓐᓇᕐᑐᐊᓗᐃᓪᓗ ᐊᖓᒃᑯᐃᑦ ᓴᑲᔪᓐᓇᕐᑐᓪᓗ.

⁴ ᓄᑲᑉᐱᐊᓪᓗ ᐊᖓᔪᖅᑳᕐᔪᐊᓐᖑᕐᑎᑦᓱᒫᕐᐸᒃᑲ ᑖᒃᑯᓄᖓ, ᓄᑕᖅᑲᓄᓪᓗ ᐊᐅᓚᑕᐅᓕᕈᒫᕐᐳᑦ.

⁵ ᐃᓄᐃᑦ ᐃᒻᒥᖕᓄᑦ ᐅᖁᒤᒃᓴᕐᑎᖃᑦᑕᐅᑎᔪᒫᕐᐳᑦ, ᐊᑐᓂᑦ ᐃᓅᖃᑎᒥᖕᓄᑦ, ᓄᓇᖃᑎᒥᖕᓄᓪᓗ; ᐃᓅᓱᒃᑐᐃᑦ ᐅᐱᒍᓱᒍᓐᓃᕈᒫᕐᐳᑦ ᐃᓄᑐᖃᕐᓂᒃ, ᓱᓇᐅᒃᓴᕈᓐᓃᕐᓗᑎᒡᓗ ᐅᐱᒋᔭᐅᔪᓂᒃ.

⁶ ᐊᖑᑎᐅᑉ ᐊᖓᔪᓂ ᓄᑲᓂᓘᓐᓃᑦ ᑎᒍᔪᒫᕐᐹ ᐊᑖᑕᒥ ᐃᒡᓗᖓᓂᑦ ᐅᖃᐅᑎᓗᒍᓗ: “ᐅᓕᒡᔪᐊᖃᕋᕕᑦ ᓯᕗᓕᕐᑎᑖᕆᓚᐅᕐᓚᑦᑎᒋᑦ, ᑕᒪᓐᓇ ᓯᖁᒥᓯᒪᓂᐊᓗᒃᐳᑦ ᐃᓕᖕᓄᑦ ᐊᐅᓚᑕᐅᖁᓕᕐᑕᕗᑦ.”

⁷ ᑖᓐᓇᓕ ᐅᓪᓗᒥ ᑖᑦᓱᒪᓂ ᕿᐱᓗᒡᓗᓂ, ᐅᖃᕈᒫᕐᐳᖅ: “ᐋᖅᑭᒃᓱᐃᔨᐅᓂᐊᓐᖏᓚᖓ; ᐃᒡᓗᓐᓂ ᓂᐊᖂᔭᖃᖏᓐᓇᑦᑕ ᐅᓕᒡᔪᐊᕐᑕᖃᕋᓂᓗ; ᐊᐅᓚᑦᓯᔨᓐᖑᕐᑎᑕᐅᔪᒪᓐᖏᓚᖓ ᐃᓄᖕᓄᑦ.”

⁸ ᔨᕉᓴᓕᒻ ᐹᓪᓚᒃᓯᒪᕗᖅ, ᔫᑕᓗ ᑲᑕᒃᓯᒪᓪᓗᓂ; ᐅᖃᐅᓯᖏᑦ ᐱᓂᐊᕐᓂᖏᓪᓗ ᐊᑭᕋᕐᑐᕐᒪᑕ ᐊᑕᓂᕐᒥᒃ ᑲᒪᒋᓇᒍ ᓇᔫᑎᓂᖓᑕ ᐱᓐᓇᕐᓇᕐᓂᕐᔪᐊᖓ.

⁹ ᑮᓇᖏᑕ ᑕᑯᒃᓴᐅᓂᖏᑦ ᓇᓗᓁᕐᓯᕗᑦ ᐸᓯᔭᒃᓴᐅᓂᖏᓐᓂᒃ; ᐊᔪᕐᓂᑎᒃ ᓴᖅᑭᑎᑉᐰᑦ ᓱᑑᒪᒥᐅᑎᑐᑦ, ᐃᔨᕐᓯᒪᓇᒋᓪᓗ. ᑲᑉᐱᐊᓐᓇᒦᒃ ᑕᕐᓂᖏᑦ! ᐱᐅᖏᑦᑐᒥᒃ ᐃᒻᒥᖕᓄᑦ ᓇᖕᒥᓂᖅ ᐱᑎᑦᓯᖕᒪᑕ.

¹⁰ ᐃᓱᐊᕐᑐᓕᔪᑦ ᐅᖃᐅᑎᒃᑭᑦ ᖃᓄᐃᓐᓂᐊᖏᓐᓂᕋᕐᓗᒋᑦ, ᐱᓂᐊᕐᓂᖏᑕ ᐱᕈᕐᑎᑕᖏᓐᓂᒃ ᓂᕆᔪᒫᕐᒪᑕ.

¹¹ ᑲᑉᐱᐊᓐᓇᒦᒃ ᐸᓯᔭᒃᓴᐅᔪᖅ! ᑖᓐᓇ ᐱᐅᖏᑦᑐᐊᓗᖕᒥᒃ ᓯᕗᓂᖃᕐᒪᑦ, ᐊᒡᒐᖏᑕ ᐱᓂᐊᕐᓯᒪᔭᖏᑦ ᑖᑦᓱᒧᖓ ᐊᑭᓕᐅᑕᐅᔪᒫᕐᒪᑕ.

¹² ᐃᓄᖁᑎᒪᓕ ᓱᕈᓰᑦ ᐅᖁᒤᒃᓴᕐᑎᑦᓯᔨᒋᕔᑦ, ᐊᕐᓇᓄᓪᓗ ᐊᐅᓚᑕᐅᓪᓗᑎᒃ. ᐃᓄᖁᑎᒃᑳ, ᑕᓯᐅᕐᑎᑦᓯᓐᓄᑦ ᑕᒻᒪᕐᑎᑕᐅᓯᒪᕗᓯ, ᐊᖅᑯᑎᒋᔭᕆᐊᖃᕐᑕᑦᓯᓐᓂᒡᓗ ᓇᓗᓕᕐᑎᑕᐅᓯᒪᓪᓗᓯ.

ᐊᑕᓂᐅᑉ ᐃᖅᑲᕐᑐᐃᓂᖓ ᐃᓄᖁᑎᒥᓂᒃ

¹³ ᐊᑕᓂᖅ ᐃᓂᒥᓃᓕᕐᐳᖅ ᐊᑭᒋᐊᕐᕕᒋᓂᐊᕐᑕᒥᓂ, ᓂᑯᕕᑉᐳᖅ ᐃᖅᑲᕐᑐᐃᓂᐊᓕᕐᓗᓂ ᐃᓄᖁᑎᒥᓂᒃ.

¹⁴ ᐊᑕᓂᖅ ᐃᖅᑲᕐᑐᐃᕕᖕᒥᓄᑦ ᐃᑎᕐᐳᖅ ᐃᓄᖁᑎᖏᑕ ᐊᖓᔪᖅᑳᖏᑦ ᐊᖓᔪᖅᑳᕐᔪᐊᕆᔭᖏᓪᓗ ᐃᓚᒋᓪᓗᒋᑦ: “ᐃᓕᑦᓯ ᐱᕈᕐᓰᕕᒃ ᕔᓂᓕᒃᓴᖅ ᓂᕆᓚᐅᕐᐸᓯ, ᐊᔪᕐᓴᕐᑐᓂᓪᓗ ᐊᕐᓵᕐᓂᒐᕕᓂᓯ ᐃᒡᓗᓯᓐᓃᑉᐳᑦ.

¹⁵ ᖃᓄᖅ ᐃᓱᒪᓪᓗᓯ ᐃᓄᖁᑎᒃᑲ ᓯᖁᒥᑎᑉᐱᓯᐅᒃ, ᐊᔪᕐᓴᕐᑐᑦ ᓄᖑᕈᑎᓪᓗᒌᑦ?” ᐊᑕᓂᖅ ᕿᓚᖕᒥᐅᒐᓴᒡᔪᐃᑦ ᒎᑎᖓᑦ ᐅᖃᕐᐳᖅ.

ᐊᕐᓁᑦ ᔨᕉᓴᓕᒦᑦᑐᑦ ᐅᓗᕆᐊᒋᔭᒃᓴᖏᑦ

¹⁶ ᐊᑕᓂᖅ ᐅᖃᕐᐳᖅ: “ᓮᐅᓂᐅᑉ ᐸᓂᖏᑦ ᐱᐅᔪᕆᓗᐊᕐᒪᑕ ᐱᓱᓕᕌᖓᒥᒡᓗ ᐋᕐᓗᖓᔮᕐᓗᑎᒃ ᐱᓱᖃᑦᑕᕐᐳᑦ, ᕿᒃᓯᒥᒑᖃᑦᑕᕐᓗᑎᒃ ᐱᓱᖃᑦᑕᕐᐳᑦ, ᐱᔪᒥᓇᕋᓱᐊᕐᓗᑎᒃ, ᐊᑯᓔᑦᑐᒥᒃ ᐊᓪᓗᕋᕐᓗᑎᒃ, ᓯᖏᕐᓂᕐᒥᐅᑕᒥᖕᓂᒡᓗ ᓯᕙᓂᕋᕐᑎᑦᓯᓪᓗᑎᒃ.

¹⁷ ᑍᒤᒻᒪᑦ ᓮᐅᓂᐅᑉ ᐸᓂᖏᑕ ᓂᐊᖁᖏᑦ ᐊᑕᓂᐅᑉ ᐊᒥᕐᓗᓕᕐᑎᑦᓱᒫᕐᐰᑦ, ᑲᓐᖑᒋᔭᖏᓪᓗ ᓴᖅᑭᑎᓪᓗᒋᑦ.”

¹⁸ ᐅᓪᓗᖅ ᑕᒪᓐᓇ ᓇᓪᓕᐅᑎᒃᐸᑦ ᐊᑕᓂᐅᑉ ᐲᔭᕈᒫᕐᐰᑦ ᐱᐅᓴᐅᑏᑦ ᓯᖏᕐᓂᕐᒥᐅᑕᖏᑦ ᓯᕙᓂᕋᕈᑏᑦ, ᖃᐅᕈᑎᖏᓪᓗ ᐅᔭᒥᖏᓪᓗ;

¹⁹ ᓯᐅᑎᒥᐅᑕᖏᑦ, ᐊᒡᒐᐅᒻᒥᐅᑍᓪᓗ, ᖁᖓᓰᓕᑍᓪᓗ;

²⁰ ᓇᓴᖏᓪᓗ, ᓂᐅᒥᐅᑍᓪᓗ ᐱᐅᓴᐅᑏᑦ, ᓂᐊᖂᑎᖏᑦ, ᑎᐱᑦᓯᐊᕆᒃᓴᐅᑎᖃᐅᑏᓪᓗ, ᐋᕐᖑᐊᖏᓪᓗ:

²¹ ᕿᑎᕐᓯᕐᒥᖏᓪᓗ, ᕿᖓᕐᒥᐅᑕᖏᓪᓗ ᓄᕐᓗᓖᑦ;

²² ᐊᓐᓄᕌᖏᓪᓗ ᓇᓪᓕᐅᓐᓂᕐᓯᐅᕈᑏᑦ, ᐅᓕᒡᔪᐊᖏᓪᓗ, ᐊᓃᕐᑐᕐᓯᐅᑎᖏᓪᓗ ᐊᓐᓄᕌᑦ, ᐊᑐᐃᓐᓇᖃᐅᑎᖏᓪᓗ ᐴᑲᑕᖏᑦ;

²³ ᑕᕐᕋᕐᑑᑎᖏᑦ, ᐊᓐᓄᕌᖏᓪᓗ ᓵᑦᑐᑦ ᑕᑯᒃᓴᐅᓇᕐᑐᑦ, ᓵᑦᑐᓪᓗ ᐃᓗᓪᓖᑦ, ᓇᓴᐅᔭᖏᑦ ᓂᒻᒪᐅᑎᓯᒪᔪᑦ, ᒪᑐᐊᕆᓲᖏᓪᓗ.

²⁴ ᑎᐱᑦᓯᐊᕆᒃᓴᐅᑎᐅᑉ ᑎᐱᖓ ᑭᖑᕝᕕᕐᑕᐅᔪᒫᕐᐳᖅ ᐃᒍᓇᕐᓂᒥᒃ; ᑕᑦᓯᕈᑏᓪᓗ ᐱᐅᔪᑦ ᑭᖑᕝᕕᕐᑕᐅᓗᑎᒃ, ᐊᒃᓱᓈᒧᑦ; ᓄᔭᕐᓂᒃ ᐋᖅᑭᑦᓯᐊᕐᓯᒪᓂᖏᑦ ᑭᖑᕝᕕᕐᑕᐅᓗᑎᒃ ᓄᔧᕈᑎᓂᕐᒧᑦ; ᐊᔪᕐᓴᖏᑦᑐᕐᓯᐅᑎᓂᒃ ᐊᓐᓄᕌᕐᓯᒪᓂᖅ ᑭᖑᕝᕕᕐᑕᐅᓗᓂ ᐳᑐᕐᓛᓂᒃ ᐊᓐᓄᕌᕐᓯᒪᓂᕐᒧᑦ; ᐃᓂᖁᓇᕐᑑᓂᖅ ᑭᖑᕝᕕᕐᑕᐅᓗᓂ ᑲᓐᖑᓱᖕᓂᕐᒧᑦ.

²⁵ ᐊᖑᑎᖁᑎᑎᑦ ᑐᖁᕋᕐᑕᐅᔪᒫᕐᐳᑦ ᓴᕕᒡᔪᐊᒧᑦ, ᐊᔪᖏᑦᑐᕐᔪᐊᖁᑎᑎᓪᓗ ᑐᖁᕋᕐᑕᐅᔪᒫᕐᐳᑦ ᐅᓇᑕᕐᓂᕐᒧᑦ.

²⁶ ᐃᑎᕐᑕᕐᕕᖏᑦ ᐅᒡᒍᐊᕐᓂᕐᒧᑦ ᕿᐊᔪᒫᕐᐳᑦ; ᐃᒡᓗᒐᓴᒡᔪᐊᓪᓗ ᐊᓐᓄᕅᔭᕐᑕᐅᓯᒪᔪᑎᑐᑦ ᒪᓂᖅᑲᒥ ᐃᒃᓯᕙᑐᐃᓐᓇᓕᕐᑐᑎᑐᑦ ᑍᒤᑦᓱᒫᕐᐳᑦ.