ᐂᓮᐊᓯᐅᑉ ᐊᒡᓚᖏᑦ 29 - ᐊᒡᓔᑦ ᐃᑦᔪᕐᖕᓁᑦᑐᑦ

ᔨᕉᓴᓕᐅᑉ ᐊᓯᕈᕐᑕᐅᔪᒫᕐᓂᖓ

¹ ᑕᑯᒋᑦ ᐊᕅᐅᓪ, ᐊᕅᐅᓪ ᐃᒡᓗᒐᓴᒡᔪᐊᑦ ᑍᕕᑎᐅᑉ ᑕᖕᒫᕐᓯᒪᕕᒋᓚᐅᕐᑕᖏᑦ! ᐊᕐᕌᒍ ᐊᕐᕌᒍᒥᒃ ᐃᓚᒃᑲᓐᓂᕐᓕ; ᓇᓪᓕᐅᓐᓂᕐᓯᐅᕐᓂᖏᑦ ᐃᓱᓕᖁᓇᒋᑦ.

² ᐃᓱᐃᓪᓕᐅᕐᑎᑦᓴᕆᐊᖃᕐᐸᕋᓕ ᐊᕅᐅᓪ, ᑕᒪᓐᓇ ᓇᓪᓕᐅᑎᒃᐸᑦ ᕿᒃᓵᖕᓂᖃᕈᒫᕐᐳᖅ ᐅᒡᒍᐊᕐᓂᖃᕐᓗᓂᓗ, ᑕᒪᑐᒪᓕ ᑭᖑᓂᖓᒍᑦ ᐂᕆᐅᓪᓚᕆᐅᓕᕈᒫᕐᐳᖅ ᐅᕙᓐᓄᑦ.

³ ᓯᓚᑎᑦᓯᓐᓂ ᑕᖕᒫᕐᓯᒪᔪᒫᕐᐳᖓ ᐊᕙᑕᖏᕐᓯᒪᓗᑎᑦ, ᐃᒡᓗᒐᓴᒡᔪᐊᓂᒃ ᓵᓚᖃᕋᓱᒃᑐᕐᓯᐅᑎᓂᒃ ᓴᓇᔪᒫᕐᐳᖓ ᐳᕐᑐᔪᓂᒡᓗ ᐃᒡᓗᓕᐅᕐᓗᖓ, ᐃᒡᓗᒐᓴᒡᔪᐊᓂᒃ ᓵᓚᖃᕋᓲᑎᓂᒃ ᓴᓇᔪᒪᕗᖓ ᐃᓕᖕᓂᒃ ᐊᑭᕋᕐᑐᕐᓗᖓ.

⁴ ᓄᓇᕐᔪᐊᑉ ᐃᓗᐊᓂᑦ ᐃᑎᔪᒥᑦ ᓂᓪᓕᐊᓕᕈᒫᕐᐳᑎᑦ, ᓂᐱᑭᑦᑑᓗᑎᑦ ᐅᖃᐅᓯᕐᑎᑦ ᑐᓴᕐᓴᐅᔪᒫᕐᐳᑦ ᓄᓇᐅᑉ ᐃᓗᐊᓂᑦ ᐊᓂᕐᓂᑐᐃᓐᓇᐅᑉ ᓂᐱᖓᑐᑦ, ᓂᐲᑦ ᐃᓯᑦᔪᒃᑐᑎᑐᑦ ᓴᓂᕐᓂᑦ ᐱᔪᒫᕐᐳᖅ.

⁵ ᐊᑭᕋᑎᑦ ᐅᓄᕐᑐᕐᔪᐊᑦ ᐳᔪᕐᓗᒃᑎᑐᑦ ᒥᑭᔫᑎᑐᑦ ᑍᒤᑦᓱᒫᕐᐳᑦ, ᐅᓄᕐᑐᕐᔪᐊᑦ ᓂᑲᒍᓱᖃᖏᑦᑐᑦ ᓂᐊᖂᔭᒃᓴᐅᑉ ᓴᓂᖓᑐᑦ ᑎᒃᑕᐅᔪᑐᑦ ᐊᑦᔨᖃᕈᒫᕐᐳᑦ, ᑕᕝᕙᓐᖓᑦᓮᓐᓇᖅ, ᑕᕝᕙᑦᓴᐅᑎᒋᓗ.

⁶ ᕿᓚᖕᒥᐅᒐᓴᒡᔪᐃᑦ ᐊᑕᓂᖓᑦᑕ ᑎᑭᕝᕕᒋᔪᒫᕐᐹᓯ ᑲᓪᓕᕐᒧᑦ, ᓄᓇᐅᓪᓗ ᓴᔪᒃᐱᓗᖕᓂᖓᓄᑦ, ᓂᐱᖅᑯᕐᑐᔪᕐᔪᐊᒧᓪᓗ, ᐊᓄᕆᕐᔪᐊᒧᓪᓗ ᑬᕙᑦᑐᒧᑦ, ᐊᖅᑯᓇᕐᔪᐊᒧᓪᓗ, ᐃᑯᐊᓚᔪᕐᔪᐊᒧᓪᓗ ᓄᖒᑦᓯᔪᒧᑦ.

⁷ ᐃᓅᖃᑎᒌᒡᔪᐊᓂᓪᓗ ᐊᑦᔨᒌᖏᑦᑐᓂᑦ ᐱᓯᒪᓪᓗᑎᒃ ᐅᓇᑕᕆᐊᓚᐅᕐᑐᑦ ᐃᒡᓗᒐᓴᒡᔪᐊᓂᒃ ᐊᕅᐅᓪᒥᒃ, ᒎᑎᐅᑉ ᑐᓂᕐᕈᓯᕐᕕᖁᑎᖓᓂᒃ ᐱᑕᖃᕐᑐᒥᒃ ᐅᓇᑕᐅᑎᖏᑦ ᐊᐅᓚᑦᔪᑎᓕᒫᖏᓪᓗ ᑕᕝᕔᓐᓇᖅ ᐱᑕᖃᓚᐅᕐᓯᒪᖏᑦᑐᑎᑐᑦ ᓄᖑᑕᐅᔪᒫᕐᐳᑦ ᓯᓐᓇᒃᑐᕐᑎᑐᑦ ᐅᓐᓄᐊᒥ ᐃᓱᒪᒋᔭᐅᑐᐃᓐᓇᕐᑐᕕᓂᕐᑎᑐᑦ.

⁸ ᐊᑦᔨᖃᕈᒫᕐᐳᑦ ᐊᖑᒻᒥᒃ ᑳᒃᑐᒥᒃ ᓂᕆᓗᓂ ᓯᓐᓇᒃᑑᒪᔪᒥᒃ ᐃᖅᑯᒻᒪᕋᒥ ᓱᓕ ᑳᒡᓗᓂ ᐃᖅᑯᒻᒪᕐᑐᑐᑦ, ᐅᕝᕙᓘᓐᓃᑦ ᐃᒥᕈᖕᓂᕐᒧᑦ ᖀᓕᕐᑐᑎᑐᑦ ᓯᓐᓇᒃᑑᒪᔪᒥᒃ ᐃᒥᕐᓗᓂ ᐃᖅᑯᒻᒪᕐᐳᖅ ᐃᒡᒋᐊᖓ ᓱᓕ ᓴᓗᐊᖓᑎᓪᓗᒍ ᐃᒥᕈᖕᓂᕐᒧᑦ, ᑍᒤᑦᓱᒫᕐᐳᑦ ᐃᓅᖃᑎᒌᒡᔪᐊᑦ ᓇᑭᑐᐃᓐᓈᕐᓯᒪᔪᑦ ᖃᖅᑲᒥᒃ ᓮᐅᓂᒥᒃ ᐅᓇᑕᖃᑎᖃᕋᓱᐊᕐᑐᑦ.

ᐃᓂᕐᑎᕆᑦᔪᑕᐅᔪᑦ ᐃᓱᒪᒋᔭᐅᖏᓂᖏᑦ

⁹ ᑕᑕᒥᓕᕆᑦᓯ ᑲᒪᓂᐊᕐᓗᓯᓗ, ᐃᓕᑦᓯᓐᓂᒃ ᑕᐅᑐᒍᓐᓃᕐᑎᓕᕆᑦᓯ ᑕᑯᔪᓐᓁᓪᓕᓗᓯᓗ! ᐋᖓᔮᕆᑦᓯ ᕔᓂᒨᖏᑦᑐᖅ ᐅᕐᕈᔮᕆᑦᓯ, ᕔᓂᒥᒃ ᐃᒥᕐᓂᕐᒨᖏᑦᑐᖅ.

¹⁰ ᐊᑕᓂᐅᑉ ᐊᓂᕐᓂᕐᒥᒃ ᑯᕕᓯᕕᒋᖕᒪᓯ ᐃᑎᔪᒥᒃ ᓯᓂᒃᑎᑦᓯᔪᒥᒃ, ᐃᔨᓯᓗ ᐅᐃᑕᔪᓐᓁᓪᓕᑎᓪᓗᒋᑦ, ᒎᑎᐅᓪᓗ ᐱᔪᖃᓛᕐᑐᒥᒃ ᐅᖃᕐᑎᖏᑕ ᓂᐊᖁᓯ ᐅᓕᒃᐰᑦ, ᓯᕗᓂᒃᓴᒥᒃ ᓇᓚᐅᑦᑍᔩᑦ.

¹¹ ᑕᑯᑎᑕᐅᓂᖅ ᑕᒪᓐᓇ ᐃᓘᓐᓈᑦ ᐃᓕᑦᓯᓐᓄᑦ ᐱᑎᑕᐅᒐᓗᐊᕐᐳᖅ ᐃᓄᖕᒧᑦ ᐊᒡᓚᓂᒃ ᐊᑐᐊᕐᓯᔪᓐᓇᕐᑐᒧᑦ ᑐᓂᔭᐅᔪᑎᑐᑦ ᓇᕿᑦᔪᓯᕐᓯᒪᓪᓗᑎᒃ, ᐅᖃᐅᑎᓪᓗᒍᓗ, “ᐅᑯᐊ ᐊᑐᐊᒃᑭᑦ,” ᑖᓐᓇᓗ ᐅᖃᕐᐳᖅ, “ᐊᑐᐊᕈᓐᓇᓐᖏᓚᒃᑲ ᓇᕿᑦᔪᓯᕐᓯᒪᖕᒪᑕ.”

¹² ᑕᕝᕙ ᐊᒡᓔᑦ ᑐᓂᔭᐅᕗᑦ ᐊᑐᐊᕐᓯᔪᓐᓇᖏᑦᑐᒧᑦ, ᐅᖃᐅᑦᔭᐅᓗᓂ, “ᐅᑯᐊ ᐊᑐᐊᒃᑭᑦ.” ᐅᖃᕐᐳᖅ “ᐊᑐᐊᕐᓯᔪᓐᓇᓐᖏᓚᖓ.”

¹³ ᑍᒤᒻᒪᑦ ᐊᑕᓂᖅ ᐅᖃᕐᐳᖅ, “ᐃᓄᐃᑦ ᐅᑯᐊ ᖃᓂᕐᒥᖕᓄᑦ ᖃᓂᑦᑑᓇᓱᐊᕐᐳᑦ ᐅᐱᒋᓪᓗᖓᓗ ᑲᓂᕐᒥᖕᓄᑦ, ᐆᒻᒪᑎᖏᑕᓕ ᐅᖓᓯᒋᕚᖓ, ᐅᕙᓐᓂᒡᓗ ᐃᓕᕋᓱᖕᓂᖏᑦ ᐃᓄᐃᑦ ᐱᖁᔨᓂᖏᓐᓂᒃ ᒪᓕᒡᓗᑎᒃ.

¹⁴ ᑍᒤᒻᒪᑦ ᓱᓕ ᑲᒪᓇᕐᑐᓂᒃ ᐅᑯᐊ ᐃᓄᐃᑦ ᐱᓂᐊᕐᕕᒋᔪᒪᕙᒃᑲ, ᑕᑕᒥᓇᕐᑐᓂᒃ ᖁᐊᕐᓵᖓᓇᕐᑐᓂᒡᓗ; ᓯᓚᑐᔪᖁᑎᖏᓪᓗ ᐊᑐᕈᓐᓃᕈᒫᕐᐳᑦ, ᐃᓄᖏᑕᓗ ᓇᓗᓇᕐᑐᓂᒃ ᖃᐅᔨᔪᓐᓇᕐᓂᖏᑦ ᒪᑐᓯᒪᓕᕈᒫᕐᐳᖅ.”

ᓯᕗᓂᒃᓴᒥ ᓂᕆᐅᒋᔭᒃᓴᖃᕈᒫᕐᓂᖅ

¹⁵ ᑲᑉᐱᐊᓐᓇᒦᒃ ᐃᑎᔪᒥᒃ ᐃᔨᕐᓯᒪᓇᓱᒃᑐᑦ ᐊᑕᓂᕐᒧᑦ ᐃᓱᒪᓕᐅᕈᑎᒋᔭᒥᖕᓂᒃ, ᐱᓂᐊᕐᓂᖏᑦ ᑖᕐᑐᒦᑦᑐᑦ; ᐅᖃᕐᓗᑎᒃ, “ᑭᐊ ᑕᑯᓐᓇᕐᐹᑎᒍᑦ? ᑭᐊᓗ ᖃᐅᔨᒪᕚᑎᒍᑦ?”

¹⁶ ᓱᓇᓕᒫᑦ ᒧᒥᒃᑎᑉᐰᑦ! ᐃᓗᓕᖁᑎᓂᒃ ᒪᕐᕋᓕᐅᕐᑎ ᐃᓗᓕᖁᑎᓕᐊᒃᓴᖅ ᒪᕐᕋᐅᑎᓪᓗᒍ ᑕᑯᓐᓇᕐᑕᐅᔪᓐᓇᕐᐹ? ᓴᓇᔭᐅᓯᒪᔪᖅ ᓴᓇᔨᒥᓄᑦ ᐅᖃᕈᓐᓇᕐᐹ? “ᑖᑦᓱᒪ ᓴᓇᓚᐅᓐᖏᓛᖓ”; ᐅᕝᕙᓗ ᑕᐅᑦᑐᓕᐅᕐᑕᐅᔪᖅ ᑕᐅᑦᑐᓕᐅᕐᑎᒥᓂᒃ ᐅᖃᐅᓯᖃᕈᓐᓇᕆᕚ? “ᐅᓇ ᑐᑭᓯᐅᒪᖏᑦᑐᖅ.”

¹⁷ ᐱᔪᖃᓚᐅᖏᒃᑲᓗᐊᕐᑎᓪᓗᒍ, ᐊᑯᓂᐊᓘᖏᑦᑐᖅ ᓕᐸᓇᓂ ᐱᕈᕐᓰᕕᑦᓯᐊᑐᐃᓐᓇᐅᓕᕈᒫᕐᐳᖅ, ᐱᕈᕐᓰᕕᒃ ᓂᕿᒃᓴᓕᐅᕐᕕᒃ ᓇᐹᕐᑐᓕᒡᔪᐊᖑᔪᓐᓇᕐᐹ?

¹⁸ ᐅᓪᓗᖅ ᑕᒪᓐᓇ ᓇᓪᓕᐅᑎᒃᐸᑦ, ᑐᓵᖏᑦᑐᖅ ᑐᓵᓕᕈᒫᕐᐳᖅ ᐊᒡᓔᑦ ᐅᖃᐅᓯᖏᓐᓂᒃ ᐅᖃᓕᒫᕐᑐᒥᒃ, ᑕᐅᑐᖏᑦᑐᕐᓗ ᑖᕐᓯᐅᕐᓗᓂ ᐃᓅᔪᖅ, ᑕᐅᑐᓕᕈᒫᕐᐳᖅ.

¹⁹ ᒥᑭᒡᓕᑎᕐᓯᒪᔪᖅ ᖁᕕᐊᓇᕐᑐᒥᒃ ᓄᑖᒥᒃ ᐱᑎᑕᐅᔪᒫᕐᐳᖅ ᐊᑕᓂᕐᒥᒃ ᖁᕕᐊᓲᑎᖃᓕᕐᓗᓂ, ᐊᒃᓱᔪᓪᓗ ᐃᓄᐃᑦ ᐊᑯᕐᖓᓐᓂ ᖁᕕᐊᓲᑎᖃᓕᕈᒫᕐᐳᑦ ᐃᓴᕆᐊᓕᒥᐅᑦ ᐃᑦᔪᕐᓁᑦᑐᖁᑎᖓᓐᓂᒃ.

²⁰ ᓂᑲᒍᓱᖃᖏᑦᑐᖅ ᓱᓇᐅᔪᓐᓃᕈᒫᕐᐳᖅ, ᒥᑕᐅᑎᒃᓴᕐᑎᓗ ᒥᑕᐅᑎᖃᕈᓃᕐᓗᓂ, ᐊᔪᕐᑐᓕᔪᒪᓪᓗᑎᒡᓗ ᐅᑕᖅᑭᔪᓕᒫᑦ ᐊᓯᕈᕐᑕᐅᔪᒫᕐᐳᑦ.

²¹ ᓇᓪᓕᐊᑦ ᐅᖃᐅᓯᕐᒧᑦ ᐃᓄᖕᒥᒃ ᐸᓯᔭᒃᓴᓐᖑᕐᑎᑦᓯᔪᓐᓇᕐᐹ, ᐱᔭᐅᑦᔪᑎᒃᓴᖓᓂᒡᓗ ᐋᖅᑭᒃᓯᓗᓂ ᐃᑎᕐᑕᕐᕕᖕᒥ, ᐱᑦᔪᑎᒃᓴᖃᕋᓂᓗ ᐸᓯᔭᒃᓴᐅᑎᑦᓯᓗᓂ ᑕᒻᒪᓚᐅᖏᑦᑐᒥᒃ.

²² ᑍᒤᒻᒪᑦ ᐊᑕᓂᖅ ᐅᖃᕐᐳᖅ, ᐱᐅᓕᒃᓯᓚᐅᕐᑐᖅ ᐂᑉᕋᕼᐋᒻᒥᒃ, ᔧᑰᑉ ᑭᖑᕚᖏᑦ ᐱᓪᓗᒋᑦ: “ᔧᑰᑉ ᑭᖑᕚᖏᑦ ᑲᓐᖑᓱᒃᑎᑕᐅᓂᐊᕈᓐᓃᕐᐳᑦ, ᑮᓇᖏᓪᓗ ᐊᐅᖃᕈᓐᓃᖃᑦᑕᕐᓂᐊᕈᓐᓃᕐᓗᑎᒃ ᑲᓐᖑᓱᖕᓂᕐᒧᑦ;

²³ ᑭᖑᕚᒥᖕᓂᒃ ᑕᑯᓕᕈᑎᒃ, ᐊᒡᒐᓐᓄᑦ ᓴᓇᓚᐅᕐᑕᓐᓂᒃ, ᐊᑯᓐᓂᕐᒥᖕᓂ ᐊᑎᕋ ᐃᑦᔪᕐᓁᑎᑦᓱᒫᕐᐹᑦ; ᔧᑰᑉ ᐃᑦᔪᕐᓁᑦᑐᖁᑎᖓ ᐃᑦᔪᕐᓁᑎᑦᓱᒫᕐᐹᑦ, ᑕᑕᒥᓐᓂᐊᕐᓗᑎᒡᓗ ᐃᓴᕆᐊᓕᒥᐅᑦ ᒎᑎᖓᓐᓂᒃ.

²⁴ ᐊᓂᕐᓂᕐᒥᒍᑦ ᓯᓔᑦᑑᒐᓗᐊᑦ ᑐᑭᓯᓂᖃᓕᕈᒫᕐᐳᑦ, ᓈᒻᒪᒃᓴᓐᖏᒐᔪᒃᑑᒐᓗᐊᓪᓗ ᐊᔪᕆᕐᑐᕐᑕᐅᓂᕐᒥᒃ ᖁᕕᐊᒋᔭᖃᓕᕐᓗᑎᒃ.”