ᐂᓮᐊᓯᐅᑉ ᐊᒡᓚᖏᑦ 28 - ᐊᒡᓔᑦ ᐃᑦᔪᕐᖕᓁᑦᑐᑦᐊᖓᔪᖅᑳᕐᔪᐊᖃᕐᕕᐅᑉ ᐅᓐᓄᐊᓪᓗᐊᑉ ᓇᓛᓃᑦᑑᑉ ᐅᓗᕆᐊᒋᔭᒃᓴᖏᑦ 1 ᑲᑉᐱᐊᓐᓇᒦᒃ ᐃᕗᕅᑎᒥᐅᑦ ᐋᖓᔮᕐᑐᑦ, ᐊᖓᔪᖅᑳᕐᔪᐊᕐᓯᐅᑦ ᓂᐊᖂᑎᖓ ᐅᐱᓐᓇᓚᐅᕐᑐᖅ ᑕᑯᒥᓇᕐᓂᖓ ᓄᖑᓕᕐᐳᖅ ᓄᓇᕋᕐᑎᑐᑦ ᑐᖁᓕᓕᕐᑐᑐᑦ, ᐊᖓᔪᖅᑳᕆᔭᖏᑕ ᐃᒥᕐᓯᒪᓗᐊᖃᑦᑕᕐᓂᖏᓐᓄᑦ, ᐱᔪᓐᓇᕋᓱᒋᓂᕐᒧᑦ ᓂᐊᖁᖏᑦ ᑎᐱᑎᑦᓯᐊᕐᓯᒪᒐᓗᐊᕐᐳᑦ ᓇᓚᑐᐃᓐᓇᓕᕐᐳᓪᓕ ᐋᖓᔮᓗᐊᕐᓂᕐᒧᑦ. 2 ᑕᑯᒋᑦ, ᐊᑕᓂᖅ ᓂᕈᐊᕐᓯᓯᒪᓕᕇᕐᐳᖅ ᓴᓐᖏᔪᕐᔪᐊᒥᒃ ᓯᕘᕋᔪᐃᑦᑐᒥᒃ; ᑎᑭᑲᓪᓚᒍᓐᓇᕐᑐᒥᒃ ᓇᑕᖅᑯᕐᓇᓕᕐᑐᑎᑐᑦ ᐊᖅᑯᓇᕐᔪᐊᑎᑐᓪᓗ, ᓯᓚᓗᕕᒡᔪᐊᕐᑐᑎᑐᓪᓗ, ᐅᓗᑦᔭᐅᔪᑐᓪᓘᓐᓃᑦ, ᑖᑦᓱᒪ ᓄᓇᕐᔪᐊᖅ ᑕᒪᒃᑯᓂᖓ ᑎᑭᑕᐅᑎᑦᓱᒫᕐᐹ ᑲᑉᐱᐊᓇᕐᑐᒧᑦ. 3 ᐃᕗᕅᑎᒥᐅᑦ ᐋᖓᔮᕐᑐᑦ ᓂᐊᖂᑎᖓᑦ ᐊᖓᔪᖅᑳᕐᔪᐊᕐᓯᐅᑦ ᐱᐅᔪᕆᑦᔪᑎᖓᑦ, ᑐᓪᓕᕋᕐᑕᐅᔪᑎᑐᑦ ᑍᒤᑕᐅᔪᒫᕐᐳᖅ. 4 ᓄᓇᕋᐅᓪᓗ ᑕᑯᒥᓇᕐᑑᓚᐅᕐᑑᑉ ᑐᖁᓕᓕᕐᓂᖓ, ᐃᓂᖃᓚᐅᕐᑐᖅ ᓇᕐᓴᐅᑉ ᐱᕈᑦᓯᐊᕐᓇᕐᑑᑉ ᕿᓐᖑᐊᓂ, ᐊᑦᔨᖃᕈᒪᕐᐳᖅ ᐸᐅᕐᖓᕐᒥᒃ ᐱᒋᒥᒃ ᐊᐅᔭᒥ ᐱᕈᓕᓵᕐᑐᒥᒃ; ᐃᓅᑉ ᑕᑯᒐᒥᐅᒃ, ᓂᕆᔭᕇᕐᐹ ᑎᒍᑐᐊᕋᒥᐅᒃ. 5 ᑕᒪᓐᓇ ᐅᓪᓗᖅ ᓇᓪᓕᐅᑎᒃᐸᑦ ᕿᓚᖕᒥᐅᒐᓴᒡᔪᐃᑦ ᐊᑕᓂᖓᑦ ᓂᐊᖂᑎᑎᑐᑦ ᐱᓐᓇᕐᓇᐅᑎᒋᔭᐅᔪᒫᕐᐳᖅ, ᓄᓇᕋᕐᑎᑐᑦ ᑕᑯᒥᓇᕐᑐᑎᑐᑦ ᓂᐊᖂᑎᓕᐊᕆᓯᒪᔪᑐᑦ, ᐃᓄᖁᑎᒥᓄᑦ ᐊᒥᐊᒃᑰᔪᓄᑦ. 6 ᓱᓕᑦᓯᐊᕐᑐᒥᒃ ᐃᖅᑲᕐᑐᐃᑎᑦᓯᔪᒫᕐᐳᖅ ᐃᖅᑲᕐᑐᐃᔨᓂᒃ ᐃᒃᓯᕙᐅᑕᒥᓂ ᐃᖅᑲᕐᑐᐃᔪᓂᒃ. ᓴᐱᕈᓐᓃᕐᑎᓪᓗᒋᓪᓗ ᐃᒡᓗᒐᓴᒡᔪᐊᑦ ᐃᑎᕐᑕᕐᕕᖏᓐᓂᒃ ᓴᐳᑦᔨᔩᑦ ᐅᓇᑕᕋᓱᐊᕐᑐᓂᒃ. ᐂᓮᐊᓯ ᔫᑕᐅᓪᓗ ᐅᖃᕐᑎᖏᑦ ᐋᖓᔮᕐᑏᑦ 7 ᓇᓚᐅᑦᑍᔪᑦ ᑐᓂᕐᕈᓯᕐᑎᑦᓯᔩᓪᓗ ᐋᖓᔮᓗᐊᕐᓂᕐᒧᑦ ᐅᕐᕈᔮᓕᕐᐳᑦ, ᐃᒥᓗᐊᕐᓂᕐᒧᓪᓗ ᕔᓂᒥᒃ ᓴᓐᖏᔪᒥᒡᓗ ᐅᕐᕈᖃᑦᑕᑐᐃᓐᓇᓕᕐᐳᑦ; ᕔᓂᑐᕐᓂᕐᒧᑦ ᓇᓗᓕᕐᓯᒪᓕᕐᐳᑦ, ᐅᕐᕈᔮᕐᐳᑦ ᐃᒥᓗᐊᒧᑦ ᓴᓐᖏᔪᒧᑦ; ᑕᑯᓐᓇᕐᑕᖏᑦ ᐱᐅᔪᓐᓃᕐᓗᑎᒃ, ᑕᒻᒪᖃᑦᑕᓕᕐᐳᑦ ᐃᖅᑲᕐᑐᐃᓇᓱᐊᕐᓗᑎᒃ. 8 ᐃᒃᓯᕙᕕᒋᔭᖏᓪᓗ ᓵᑦ ᒥᕆᐊᕕᓂᕐᓂᒃ ᑳᖏᑦ ᓈᓯᒪᕗᑦ; ᓴᓗᒪᓂᖃᕋᑎᒡᓗ ᓇᐅᒃᑯᓕᒫᖅ. 9 “ᑭᓇᒥᒃ ᐃᓕᓐᓂᐊᕐᑎᑦᓯᓂᐊᕐᐸᑦ ᑐᑭᓯᑎᑦᓯᓂᕐᒥᒃ, ᑭᓇᒧᓪᓗ ᓇᓗᓁᕐᓯᓂᐊᕐᐸᑦ ᐅᖃᐅᓯᒃᓴᒥᒃ? ᑕᒪᒃᑯᓄᖓ ᑭᓯᐊᓂ ᐊᒫᒪᒍᓐᓃᓕᓵᕐᑐᓄᑦ; ᐊᒫᒪᖕᒥᖕᓂᒃ ᓴᒃᑯᐃᓕᕋᑖᕐᑐᓄᑦ. 10 ᐊᔪᕆᕐᑐᕋᓱᓕᕐᒪᑎᒍᑦ ᑎᑎᕋᑯᓗᐃᑦ ᐊᑕᐅᓯᐅᓈᕐᑎᕐᓱᒋᑦ, ᐅᖃᕐᓯᒪᓂᖏᓪᓗ ᐊᑐᓃᕐᑕᕐᓗᒋᑦ, ᐊᔪᕆᕐᑐᐃᑦᔪᑎᒃᓴᓪᓗ ᐃᓛᒃᑰᕐᑎᕐᓯᒪᓂᖏᑦ ᒪᓕᑦᓯᐊᕐᓗᒋᑦ.” 11 ᓈᓚᖏᒃᑯᑦᓯ ᐃᓄᐃᑦ ᑐᑭᓯᐊᓐᖏᑕᑦᓯᓐᓂᒃ ᐅᖃᐅᓯᓖᑦ, ᐊᑐᕐᓗᒋᑦ ᐊᑕᓂᐅᑉ ᐃᓄᖁᑎᓂ ᐅᖃᓪᓚᒡᕕᒋᔪᒫᕐᐰᑦ. 12 ᑖᒃᑯᓄᖓ ᐃᒫᒃ ᐅᖃᓚᐅᕐᒪᑦ, “ᒥᕐᖑᐃᕐᓯᕐᕕᒃᓴᖅ ᑕᕝᕙ; ᑕᖃᔪᑦ ᒥᕐᖑᐃᓯᕐᑎᓯᒋᒃ”; ᑖᒃᑯᐊᓕ ᓈᓚᒍᒪᓚᐅᓐᖏᓚᑦ. 13 ᑕᕝᕙ ᐊᑕᓂᐅᑉ ᐊᔪᕆᕐᑐᕈᒪᓕᕐᐹᓯ ᑎᑎᕅᑦ ᐊᑕᐅᓯᐅᓈᕐᑕᕐᓗᒋᑦ, ᐅᖃᕐᓯᒪᓂᖏᓪᓗ ᐃᓛᒃᑰᕐᑎᕐᓗᒋᑦ, ᐊᔪᕆᕐᑐᐃᑦᔪᑎᒃᓴᓪᓗ ᐃᓛᒃᑰᕐᓯᒪᓂᖏᑦ ᒪᓕᒡᓗᒋᑦ. ᑍᒫᒃ ᑕᕝᕙ ᐅᕈᔮᕐᓂᐊᕐᐳᓯ ᐊᓪᓗᑐᐊᕅᒍᑦᓯ, ᐃᑭᓕᕐᑕᐅᓂᐊᕐᐳᓯ, ᐊᔪᕐᓯᑎᑕᐅᓗᓯᓗ, ᑎᒍᔭᐅᓗᓯᓗ ᑎᒍᔭᐅᓯᒪᕕᖕᒧᐊᕐᑕᐅᔪᒫᕐᐳᓯ. ᓮᐅᓂᐅᑉ ᐊᑐᕐᓂᕐᐹᒥ ᐊᐅᓚᑦᔧᒃᑯᑎᖓ ᐅᔭᕋ 14 ᑍᒤᒻᒪᑦ ᐊᑕᓂᐅᑉ ᐅᖃᐅᓯᖏᓐᓂᒃ ᑐᓴᓚᐅᕆᑦᓯ, ᐃᓕᑦᓯ ᒥᑕᐅᑎᖃᖃᑦᑕᕐᑐᓯ, ᐃᓄᖕᓂᒃ ᔨᕉᓴᓕᒦᑦᑐᓂᒃ ᐊᐅᓚᑦᓯᔨᐅᔪᓯ, 15 ᐅᖃᓚᐅᕋᑦᓯ, “ᑐᖁ ᐊᖏᖃᑎᒌᒍᑎᓕᐅᕐᕕᒋᓯᒪᕙᕗᑦ, ᑐᖁᖓᔪᓪᓗ ᐃᓂᖓᑦ ᐊᖏᖃᑎᒋᓯᒪᕙᕗᑦ; ᑏᒐᕈᑎᒧᑦ ᑏᒐᕆᐊᕐᑕᐅᒐᓗᐊᕈᑦᑕ ᐅᕙᑦᑎᓐᓄᑦ ᑎᑭᐅᑎᓂᐊᓐᖏᓚᑦ; ᓴᒡᓗᕿᑦᓯᓂᕐᒥᒃ ᕿᒫᕕᒃᓴᓕᐅᕐᓯᒪᒐᑦᑕ, ᓯᓔᕐᕆᒃᓯᓂᒃᑯᓪᓗ ᓱᓕᖏᑦᑐᒃᑯᑦ ᐅᕙᑦᑎᓐᓂᒃ ᐃᔨᕐᓯᒪᕕᒃᓴᖃᕐᓗᑕ.” 16 ᑍᒤᒻᒪᑦ ᐊᑕᓂᖅ ᒎᑎ ᐅᖃᕐᐳᖅ: “ᑕᑯᒋᑦ, ᓮᐅᓂᒥ ᐅᔭᕋᖕᒥᒃ ᑐᓐᖓᕕᒃᓴᓕᐅᕐᐳᖓ, ᐆᒃᑐᕋᕐᑕᐅᓯᒪᔪᒥᒃ ᐅᔭᕋᖕᒥᒃ, ᐃᒡᓘᑉ ᑎᕆᖅᑯᒃᓴᖓᓂᒃ, ᑐᓐᖓᕕᒃᓴᒥᒃ ᐊᐅᓚᖏᑦᑐᒥᒃ; ᓇᓪᓕᐊᓪᓗ ᐅᒃᐱᕐᑐᖅ ᑐᐊᕕᕐᓗᓂ ᐱᓇᓱᐊᕆᐊᖃᕈᒫᓐᖏᓚᖅ. 17 ᓱᓕᔪᒥᒡᓗ ᐃᖅᑲᕐᑐᐃᓂᖅ ᐆᒃᑐᕋᐅᑎᒋᔪᒫᕐᐸᕋ, ᓇᓛᒎᕐᓂᕐᓗ ᒪᑭᑕᑦᓯᐊᓕᕐᑐᕐᓯᐅᑎᒋᓗᒍ, ᑕᕝᕙ ᓇᑕᖅᑯᕐᓁᑦ ᓴᒡᓗᕿᑦᓯᓂᒃᑯᑦ ᕿᒫᕕᐅᕐᓯᒪᔪᓂᒃ ᐲᔧᔪᒫᕐᐳᑦ, ᐃᔨᕐᓯᒪᕕᐅᔪᓪᓗ ᐃᒪᕐᒧᑦ ᑕᑕᑕᐅᔪᒫᕐᐳᑦ. 18 “ᑕᕝᕙ ᑐᖁᒧᑦ ᐊᖏᖃᑎᒌᒍᑎᒋᓯᒪᔭᓯ ᐃᓱᓕᑎᑕᐅᔪᒫᕐᐳᑦ, ᑐᖁᖓᔪᓪᓗ ᐃᓂᖓᓄᑦ ᐊᖏᖃᑎᖃᕐᓯᒪᓂᓯ ᐊᑐᕈᓐᓃᕐᓗᑎᒃ; ᑏᒐᕈᑎᒧᑦ ᑏᒐᕆᐊᕐᑕᐅᒍᑦᓯ ᐊᑭᓐᖓᕐᑕᐅᔪᒫᕐᐳᓯ ᐅᕐᕈᑎᑕᐅᓗᓯ. 19 ᑏᒐᕐᑕᐅᖃᑦᑕᕈᒫᕐᐳᓯ ᐱᒋᐊᕐᑕᐅᓂᑕᒫᑦ; ᖃᐅᑕᒫᑦ ᐅᓪᓛᑕᒫᑦ ᑏᒐᕐᑕᐅᖃᑦᑕᕈᒫᕐᐳᓯ, ᐅᓪᓗᒃᑯᓪᓗ ᐅᓐᓄᐊᒃᑯᓪᓗ; ᑲᑉᐱᐊᓇᖃᑦᑕᕈᒫᕐᐳᖅ ᐅᖃᐅᓯᕐᒥᒃ ᑐᓴᕐᓗᓯ ᑐᑭᓯᑦᓯᐊᕐᓗᒍᓗ.” 20 ᓯᓂᒡᕕᒃ ᓁᓗᐊᕐᒪᑦ ᓯᑦᑐᕐᕕᐅᔪᓐᓇᓐᖏᓚᖅ, ᕿᐱᒡᓗ ᐊᒥᓗᐊᕐᒪᑦ ᐊᑕᖏᕐᓗᓂ ᐅᓕᒍᑕᐅᔪᓐᓇᓐᖏᓚᖅ. 21 ᐊᑕᓂᖅ ᒪᑭᑦᓱᒫᕐᒪᑦ ᖃᖅᑲᒥ ᐱᕋᔨᒻᒥ ᐱᓇᓱᐊᓚᐅᕐᓯᒪᓂᕐᒥᑐᑦ, ᓂᓐᖓᐅᒪᕕᒡᔪᐊᕈᒫᕐᐳᖅ ᒋᐱᐅᓂᐅᑉ ᓇᕐᓴᖓᓂ ᓂᓐᖓᐅᒪᓚᐅᕐᓯᒪᓂᕐᒥᑐᑦ; ᐃᓕᑕᕐᓇᖏᑦᑐᒥᒃ ᐱᓂᐊᕐᓂᓕᒃ, ᐱᓇᓱᐊᕐᑕᒥᓂᒡᓗ ᐱᓇᓱᐊᕐᓗᓂ ᑖᑦᓱᒪ ᐱᓇᓱᐊᕐᓂᖓ ᐊᑦᔨᐅᓐᖏᓚᖅ! 22 ᒫᓐᓇ ᑍᒤᒻᒪᑦ ᒥᑕᐅᑎᒃᓴᕈᓐᓃᕆᑦᓯ, ᐲᕈᓐᓇᖏᓐᓂᕐᓴᓄᑦ ᕿᓚᒃᑕᐅᖁᓇᓯ; ᑐᓴᓚᐅᕋᒪ ᐃᓱᒪᓕᐅᕇᕐᓯᒪᔪᒥᒃ ᐊᓯᕈᐃᔪᒪᓂᕐᒧᑦ ᐊᑕᓂᕐᒥᑦ ᕿᓚᖕᒥᐅᒐᓴᒡᔪᐃᑦ ᒎᑎᖓᓐᓂᒃ ᓄᓇᕐᔪᐊᓕᒫᖅ ᐱᓪᓗᒍ. ᒎᑎᐅᑉ ᓯᓚᑐᓂᖓ 23 ᓈᓚᒡᓗᓯ ᓂᐱᒐ ᑐᓴᓚᐅᕐᓯᐅᒃ; ᓈᓚᑦᓯᐊᕐᓗᓯ ᐅᖃᐅᓯᒃᑲ ᐃᒃᐱᒋᑦᓯᐊᕐᓗᓯᐅᒃ. 24 ᐱᕈᕐᓰᕕᖕᒥ ᐱᕈᕐᓯᐊᒃᓴᓂᒃ ᑲᓐᖓᕐᓱᐃᔪᖅ ᓄᓇᒥᒃ ᒪᒃᐱᕐᑎᕇᓐᓇᓲᖑᕚ ᐅᓪᓗᓕᒫᖅ ᑲᓐᖓᕐᓱᐃᕕᒋᔭᒥᓂᒃ? ᐱᕈᕐᓰᕕᖁᑎᖓᑕ ᓄᓇᖓ ᒪᒃᐱᕐᑎᕐᐸᓪᓕᐊᖏᓐᓇᓲᕆᕙᐅᒃ? 25 ᓄᓇᓕᕆᔭᓂ ᒪᓂᖅᑲᒃᓴᕇᕈᓂᐅᒃ, ᑲᓐᖓᕐᓱᐃᓕᕐᐸᓐᖏᓛᖅ ᐱᕈᕐᑐᒃᓴᓂᒃ ᓂᕿᐅᑉ ᐃᓚᒃᓴᖏᓐᓂᒃ ᑎᐅᓪᓂᒃ, ᑯᒥᓐᓂᒃ, ᓂᐊᖂᔭᒃᓮᓪᓗ ᑲᑎᓪᓗᒋᑦ ᑐᑭᓕᕇᒃᑎᑉᐸᓐᖏᓔᑦ; ᓂᐊᖂᔭᒃᓮᓪᓗ ᓄᕗᖏᑦ ᐹᓖᑦ ᐃᓂᒋᔭᕆᐊᓕᖏᓐᓄᐊᖅᑲᕐᐸᓐᖏᓔᑦ, ᐊᕕᒃᓯᒪᐅᑎᖃᕐᑎᓪᓗᒋᑦ ᓇᓗᓁᕐᐸᓐᖏᓔᑦ ᑲᑎᒪᑦᔧᒃᑯᑎᒃᓴᖏᓐᓂᒃ? 26 ᑕᕝᕙ ᑖᑦᓱᒪ ᐊᔪᕆᕐᑐᕐᓯᒪᕚ ᓱᓕᔪᒥᒃ ᐱᓇᓱᐊᖁᓪᓗᒍ; ᒎᑎᐅᑉ ᐊᔪᕆᕐᑐᕐᓯᒪᖕᒪᒍ. 27 ᕿᕐᓂᕐᑍᑦ ᑯᒥᓐᑏᑦ ᐸᐅᕐᖎᔭᕐᑕᐅᕙᓐᖏᓚᑦ ᐊᒃᓴᑳᔪᒧᑦ ᒪᓂᖅᑲᒃᓴᐅᑎᒧᑦ, ᐊᒃᓴᑳᔪᒧᓪᓗ ᑯᒥᓐᑏᑦ ᖃᓪᓕᕐᑕᐅᓪᓗᑎᒃ ᐊᒃᓴᑳᕕᐅᕙᓐᖏᓚᑦ; ᕿᕐᓂᕐᑍᓪᓕ ᑯᒥᓐᑏᑦ ᐊᓇᐅᓕᕐᑕᐅᕙᒃᐳᑦ ᕿᔪᑯᑖᒧᑦ, ᑯᒥᓐᑏᓪᓗ ᐊᓇᐅᑕᕐᒧᑦ. 28 ᓂᐊᖂᔭᒃᓮᑦ ᓄᓇᒧᑦ ᐅᕐᕈᑎᑕᐅᒐᒥᒃ; ᖃᓪᓕᕌᕐᑕᐅᓲᖑᓐᖏᓚᑦ ᑕᐅᕗᖓᓕᒫᖅ; ᐊᒃᓴᑳᔪᒧᑦ ᒪᓂᖅᑲᒃᓴᐅᑎᒧᑦ ᕿᒻᒥᕐᔪᐊᒧᑦ ᑲᓕᑕᐅᔪᒧᑦ, ᑭᓯᐊᓂᓕ ᖄᖓᒎᕐᕕᐅᒐᓗᐊᕐᓗᑎᒃ ᓯᖃᓪᓕᔭᐅᕙᓐᖏᓚᑦ. 29 ᑍᒫᒃᑕᐅᖅ ᑕᒪᓐᓇ ᕿᓚᒥᐅᒐᓴᒡᔪᐃᑦ ᐊᑕᓂᖓᓐᓂᑦ ᐱᕗᖅ; ᑖᑦᓱᒪ ᐅᖃᐅᑦᔪᐃᓂᖓ ᐱᐅᔪᐊᓘᖕᒪᑦ, ᓯᓚᑐᓂᖓᓗ ᐱᐅᓂᕐᐹᖑᓪᓗᓂ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society