ᐂᓮᐊᓯᐅᑉ ᐊᒡᓚᖏᑦ 26 - ᐊᒡᓔᑦ ᐃᑦᔪᕐᖕᓁᑦᑐᑦ

ᒎᑎᐅᑉ ᐃᓄᖁᑎᒥᓂᒃ ᓵᓚᖃᕐᑎᑦᓯᔪᒫᕐᓂᖓ

¹ ᐅᓪᓗᖅ ᑕᒪᓐᓇ ᓇᓪᓕᐅᑎᒃᐸᑦ ᔫᑕᒥᐅᑦ ᐃᓐᖏᕈᒫᕐᐳᑦ ᐱᓯᕐᒥᒃ ᐆᒥᖓ: “ᐱᔪᓐᓇᑦᓯᐊᕐᑐᒥᒃ ᐃᒡᓗᒐᓴᒡᔪᐊᖃᕐᐳᒍᑦ; ᒎᑎᐅᑉ ᓇᖕᒥᓂᖅ ᐱᐅᓕᔭᐅᕕᒃᓴᐅᑎᒻᒪᒋᑦ ᐊᕙᓗᕐᔪᐊᖏᑦ ᓴᐴᓗᑕᖏᓪᓗ.

² ᐃᑎᕐᑕᕐᕕᒡᔪᐊᖏᑦ ᐅᒃᑯᐃᕐᑕᐅᓕᕐᓕᑦ ᐃᓅᖃᑎᒌᒡᔪᐊᑦ ᓱᖁᓯᔪᐃᓪᓗᑎᒃ ᐃᓱᐊᕐᑐᑦ ᐃᑎᕐᑎᑕᐅᖁᓪᓗᒋᑦ.

³ ᐊᑕᓃᖅ ᓮᒪᓇᕐᑐᒦᑦᓮᓐᓇᕐᑎᑦᓯᕗᑎᑦ, ᓱᖁᓯᔪᐃᑦᑑᓪᓗᑎᒃ ᐃᓱᒪᖏᑦ ᐃᓕᖕᓃᑦᓮᓐᓇᕐᑐᓂᒃ, ᐃᓕᖕᓂᒃ ᑕᑎᖃᕐᓂᕐᒥᖕᓄᑦ.

⁴ ᐊᑕᓂᖅ ᑕᑎᒋᓯᐅᒃ ᐃᓱᖃᖏᑦᑐᒧᑦ, ᑖᓐᓇ ᐊᑕᓂᖅ ᒎᑎᐅᖕᒪᑦ ᔭᕼᐊ! ᐃᓱᖃᖏᑦᑐᒧᑦ ᐱᔪᓐᓇᐅᑎᒃᓴᖅ ᕾᕐᑑᔪᖅ.

⁵ ᐱᐅᔪᕆᔪᑦ ᐊᒃᐸᓯᒃᑐᒥ ᐃᓂᑖᕐᑎᑉᐰᑦ, ᐃᒡᓗᒐᓴᒡᔪᐊᑦ ᖁᕝᕙᓯᒃᑐᒦᑦᑐᑦ ᐊᒃᐸᓯᒃᑐᒥ ᐃᓂᖃᓕᕐᑎᑉᐰᑦ, ᒪᓂᕋᐅᑉ ᐊᒃᐸᓯᖕᓂᖓᑐᑦ, ᓴᓂᕐᑎᑐᑦ ᑍᒤᓕᕐᑎᓪᓗᒋᑦ.

⁶ ᐅᖁᒤᒃᓴᕐᑎᓚᐅᕐᑕᖏᓐᓄᑦ ᑐᓪᓕᕋᕐᑕᐅᑎᑉᐰᑦ, ᐊᒃᓱᔪᑦ ᐃᑎᒐᖏᓐᓄᑦ, ᐊᔪᕐᓴᕐᑐᓄᑦ ᐱᓱᒡᕕᐅᑎᓪᓗᒋᑦ.”

⁷ ᐃᓱᐊᕐᑐᑦ ᐊᖅᑯᑎᖏᑦ ᒪᓂᕋᕈᕐᑎᑉᐸᑎᑦ; ᐃᓱᐊᕐᑐᑦ ᐱᓱᒡᕕᒃᓴᖏᑦ ᕾᕋᑦᑑᑎᑉᐸᑎᑦ.

⁸ ᓱᓕᔪᒃᑯᑦ ᐃᖅᑲᕐᑐᐃᓂᕐᐱᑦ ᐊᖅᑯᑎᖓᒍᑦ, ᐊᑕᓃᖅ ᐅᑕᖅᑭᕙᑦᑎᒋᑦ; ᐊᑎᕐᓂᒡᓗ ᐃᖅᑲᐅᒪᓂᖅ ᑕᕐᓂᑦᑕ ᐱᔪᒪᔭᑐᐊᕆᕚ.

⁹ ᑕᕐᓂᕋ ᐅᖓᕗᖅ ᐃᓕᖕᓄᑦ ᐅᓐᓄᐊᒃᑯᑦ, ᐊᓂᕐᓂᕐᒪ ᐃᓗᓐᓃᑦᑑᑉ ᐃᓗᖏᕐᑐᕐᓗᓂ ᕿᓂᕐᐹᑎᑦ; ᓄᓇᕐᔪᐊᕐᒥᐅᑦ ᐃᓄᖏᑦ ᐃᖅᑲᕐᑐᓕᕌᖓᕕᒋᑦ, ᑕᕝᕙ ᐃᓕᓐᓂᐊᓕᕐᐸᒃᐳᑦ ᐃᓱᐊᕐᑐᓕᓂᕐᒥᒃ.

¹⁰ ᐱᐅᖏᑦᑐᓕᔪᑦ ᐱᑦᓯᐊᕐᕕᒋᒐᓗᐊᕋᕕᒋᑦ, ᐃᓱᐊᕐᑐᒥᒃ ᐊᑐᓕᕆᐊᒃᓴᖅ ᐃᓕᑦᓯᔪᓐᓇᓐᖏᓚᑦ; ᐃᓱᐊᕐᑐᓕᔪᑦ ᓄᓇᖓᓐᓂ ᐊᒡᓛᑦ ᐃᓱᐊᖏᑦᑐᓂᒃ ᓱᓕ ᐱᔪᖃᕐᐸᒃᐳᑦ, ᐊᑕᓂᐅᑉ ᐊᖓᔪᖅᑳᕐᔪᐊᖑᓂᖓᓂᒃ ᐃᓕᑕᕐᓯᐅᒪᔪᒪᖏᓐᓇᒥᒃ.

¹¹ ᐊᑕᓃᖅ ᐊᒡᒐᑎᑦ ᐅᕐᓕᑐᕐᑐᑦ ᐃᓴᐅᑎᓯᒪᓕᕐᐸᑎᑦ, ᓱᓕᓕ ᑕᒪᑐᒥᖓ ᖃᐅᔨᓐᖏᓚᑦ. ᐃᓄᖁᑎᖕᓂᒃ ᓇᒡᓕᒍᓱᒃᑐᐊᓘᓂᕐᓂᒃ ᑕᑯᑎᓚᐅᒃᑭᑦ ᑲᓐᖑᓱᓕᖅᑯᓪᓗᒋᑦ. ᐊᑭᕋᕐᑐᕐᑎᕕᑦ ᓂᓐᖓᐅᒪᓂᖏᑕ ᐃᑯᐊᓚᓂᖏᓐᓄᑦ ᓄᖑᑕᐅᑎᓚᐅᒃᑭᑦ.

¹² ᐊᑕᓃᖅ, ᓮᓕᓂᕐᒥᒃ ᐅᕙᑦᑎᓐᓂ ᐱᒋᐊᕐᑎᑦᓯᓚᐅᕐᒥᒋᑦ, ᐱᓂᐊᕐᓂᕗᑦ ᑕᒪᕐᒥᒃ ᐊᔪᕐᓇᕈᓐᓃᕐᑎᓯᒪᒐᕕᒋᑦ.

¹³ ᐊᑕᓃᖅ ᒎᑎᕗᑦ, ᐊᓯᖕᓄᑦ ᐊᐅᓚᑕᐅᖃᑦᑕᕐᓯᒪᕗᒍᑦ ᐊᑕᓂᐅᑎᔪᓄᑦ, ᐊᑏᓪᓕ ᑭᓯᒥ ᑖᓐᓇᑐᐊᖅ ᐅᐱᒋᕙᕗᑦ.

¹⁴ ᑐᖁᖓᓕᕋᒥᒃ ᐆᒻᒪᒃᑲᓐᓂᕐᓂᐊᕈᓐᓃᕐᐳᑦ; ᐊᓂᕐᓂᐅᓕᕋᒥᒃ ᒪᑭᓐᓂᐊᓐᖏᓚᑦ; ᓱᒋᐊᕐᓯᓂᕐᓄᑦ ᐊᓯᕈᓚᐅᕋᕕᒋᑦ, ᐃᖅᑲᕐᑕᐅᓂᐊᕈᓐᓃᕐᓗᑎᒡᓗ.

¹⁵ ᐊᑕᓃᖅ, ᐃᓅᖃᑎᒌᒡᔪᐊᖑᓂᕗᑦ ᐱᕈᕐᑎᓯᒪᕙᑦ, ᐃᓅᖃᑎᒌᒡᔪᐊᑦ ᐅᓄᕐᓯᑎᑉᐸᑎᑦ, ᑕᒪᓐᓇ ᐅᐱᒋᔭᐅᑦᔪᑎᒋᕙᑦ; ᓄᓇᖁᑎᕗᓪᓗ ᐃᓚᕙᓪᓕᐊᑎᓪᓗᒋᑦ.

¹⁶ ᐊᑕᓃᖅ, ᐅᖁᒤᒃᓴᓕᕌᖓᒥᒃ ᐃᓕᖕᓂᒃ ᕿᓂᓕᕐᐸᒃᐳᑦ, ᐃᓗᖏᕐᑐᕐᓗᑎᒃ ᑐᒃᓯᐊᓕᖃᑦᑕᕐᒪᑕ, ᐃᓕᖕᓄᑦ ᓱᒋᐊᕐᑕᐅᓕᕌᖓᒥᒃ.

¹⁷ ᐊᕐᓇᐅᑉ ᐃᕐᓂᓱᒡᓗᓂ ᐋᓐᓂᐊᓂᕐᒧᑦ ᐃᓗᖏᕐᓱᕐᓂᕆᕙᒃᑕᖓᑐᑦ, ᐊᐅᓚᔪᑐᑦ ᓂᓪᓕᐊᓪᓗᓂᓗ ᐋᓐᓂᐊᓂᕐᒥᓄᑦ, ᐃᕐᓂᕕᒋᓂᐊᕐᑕᖓ ᓇᓪᓕᐅᑎᓕᕐᑎᓪᓗᒍ, ᐃᓕᖕᓄᑦ ᑍᒤᑉᐸᒃᑭᕗᒍᑦ, ᐊᑕᓃᖅ.

¹⁸ ᐃᕐᓂᓱᒃᑐᑎᑐᑦ ᐋᓐᓂᐊᓚᐅᕐᐳᒍᑦ ᓂᒪᒃᓗᑕᓗ, ᓱᓇᒥᒡᓕ ᓴᖅᑭᑎᑦᓯᓚᐅᓐᖏᓚᒍᑦ, ᓄᓇᑦᑕᓗ ᓵᓚᒃᓴᕈᑎᒃᓴᖓᓂᒃ ᓴᖅᑭᑦᑐᖃᓚᐅᓐᖏᓚᖅ, ᐱᕚᓪᓕᕐᓇᕐᑐᒥᒡᓗ ᓴᖅᑭᑎᑦᓯᓚᐅᕐᓇᑕ.

¹⁹ ᑐᖁᖓᔪᖁᑎᑎᑦ ᐆᒻᒪᒃᑲᓐᓂᕈᒫᕐᐳᑦ, ᑎᒥᖏᑦ ᒪᑭᑦᓱᒫᕆᕗᑦ, ᑕᒪᕐᒥᒃ ᐃᓗᕕᕐᑕᐅᓯᒪᔪᑦ ᑐᐸᒍᒫᕐᐳᑦ. ᑐᐸᒡᓗᑎᒃ ᐃᓐᖏᕈᒫᕐᐳᑦ ᖁᕕᐊᓱᖕᓂᕐᒧᑦ, ᓲᕐᓗ ᐸᑐᒃ ᕿᓪᓕᒐᓛᒃᑎᑦᓯᕙᖕᒪᑦ ᓄᓇᒥᒃ ᖃᐅᓯᓕᕐᑎᑦᓯᓕᕌᖓᒥ ᑍᒫᒃᑕᐅᖅ ᐊᑕᓂᐅᑉ ᐆᒻᒪᕐᑎᑦᓱᒫᕐᐰᑦ ᑐᖁᓚᐅᕐᑐᕕᓃᑦ.

ᒎᑎᐅᑉ ᐃᖅᑲᕐᑐᐃᓂᖓ ᐱᔪᓐᓇᕐᓯᑎᑦᓯᒃᑲᓐᓂᕐᓂᖓᓗ

²⁰ ᐃᒡᓗᑦᓯᓐᓄᑦ ᐃᑎᐅᖅᑲᓕᕆᑦᓯ, ᐃᓄᖁᑎᒃᑲ, ᐃᑎᕈᑦᓯ ᐅᒃᑯᐊᓯ ᐅᒃᑯᐊᕐᓗᒋᑦ; ᐃᔨᕐᓯᒪᑬᓐᓇᕆᑦᓯ ᒎᑎᐅᑉ ᓂᓐᖓᐅᒪᓂᖓ ᐊᓂᒍᕐᓯᐊᕆᓗᒍ.

²¹ ᑕᑯᒋᑦ, ᐊᑕᓂᖅ ᐃᓂᒋᔭᒥᓂᑦ ᑎᑭᓐᓂᐊᕐᒪᑦ ᓄᓇᕐᔪᐊᕐᒥᐅᓂᒃ ᓱᒋᐊᕐᓯᔭᕐᑐᕐᓗᓂ ᐊᔪᕐᑐᓕᓂᖏᑦ ᐱᑦᔪᑎᒋᓗᒋᑦ, ᐃᔨᕋᕐᑐᕐᓗᑎᒃ ᐃᓄᐊᕐᓯᖃᑦᑕᕐᓃᑦ ᓄᓇᕐᔪᐊᕐᒥ ᓴᖅᑭᑎᑕᐅᔪᒫᕐᒪᑕ, ᐃᓄᐊᕐᑕᐅᖃᑦᑕᕐᑐᕕᓃᓪᓗ ᓄᓇᐅᑉ ᐃᔨᕐᓯᒪᓂᐊᕈᓐᓃᕐᐰᑦ.