ᐂᓮᐊᓯᐅᑉ ᐊᒡᓚᖏᑦ 23 - ᐊᒡᓔᑦ ᐃᑦᔪᕐᖕᓁᑦᑐᑦᐅᖃᐅᓰᑦ ᐃᓂᕐᑎᕆᔪᑦ ᐱᓃᓯᐊᒥᐅᑦ ᐱᓪᓗᒋᑦ 1 ᐅᑯᐊ ᐅᖃᐅᓰᑦ ᐃᓂᕐᑎᕆᔪᑦ ᑍᕆᒥᐅᓂᒃ ᐱᑦᔪᑎᖃᕐᐳᑦ, ᕿᒃᓵᖕᓂᕐᒧᑦ ᓂᓪᓕᐊᒋᑦᓯ, ᐅᒥᐊᕐᑐᕐᑎᐅᔪᓯ ᑖᕐᓯᓯᒥᐅᑦ ᑕᕆᐅᕐᔪᐊᕐᒥ! ᑐᓚᒃᑕᕐᕕᒋᕙᒃᑕᓯ ᑍᕆᒥᐅᑦ ᐊᓯᕈᕐᓯᒪᖕᒪᑕ: ᐃᒡᓗᖏᑦ ᐅᒥᐊᕐᔪᐊᓄᓪᓗ ᐅᓯᓕᕐᓱᕐᕕᖏᑦ ᓯᖁᑦᑎᕐᓯᒪᓕᕐᐳᑦ, ᐅᒥᐊᕐᔪᐊᓯ ᓮᐸᕋᓯᒥᑦ ᐅᑎᕐᐸᓪᓕᐊᓕᕐᑎᓪᓗᒋᑦ ᑐᓴᓚᐅᕐᐳᓯ. 2 ᓂᐱᖅᑯᕐᑐᓗᓯ ᕿᐊᓕᕆᑦᓯ, ᓮᑐᓂᒥᑦ ᓂᐅᕕᕐᑎᐅᔪᓯ! ᐃᓕᑦᓯᓐᓂᒃ ᐱᔨᑦᓯᕐᑐᓂᒃ ᑎᓕᓯᕙᒃᑐᓯ. 3 ᑕᕆᐅᕐᔪᐊᖅ ᐃᑳᕐᓗᒍ, ᓂᐅᕕᕆᐊᕐᓗᓯ ᓂᐅᕐᕈᑎᖃᕆᐊᕐᑐᕐᓗᓯᓗ ᓂᐊᖂᔭᒃᓴᒥᒃ ᐄᑦᔨᑉᑎᒥᑦ ᐱᕈᕐᓂᑯᓂᒃ ᐃᓅᖃᑎᒌᒡᔪᐊᓄᓪᓗ ᓇᒧᑐᐃᓐᓇᖅ ᓂᐅᕕᕋᕐᑎᑦᓯᕙᒃᑐᓯ. 4 ᓮᑐᓂᒥ ᐃᒡᓗᒐᓴᒡᔪᐊᖃᕐᑐᓯ ᑲᓐᖑᓇᕐᑐᒥᒃ ᐊᑐᕐᐳᓯ! ᑕᕆᐅᑉ ᐃᒪᕐᔪᐊᓪᓗ ᐃᑎᔪᑦ ᓇᕐᕈᒋᓪᓗᓯ ᐅᖃᕐᐳᑦ, “ᕿᑐᕐᖓᕐᑖᓚᐅᕐᓯᒪᓐᖏᓚᖓ: ᐱᕈᕐᓮᓚᐅᕐᓯᒪᓇᖓᓗ ᐊᖑᑎᓂᒃ ᐊᕐᓇᓂᒡᓗ.” 5 ᐄᑦᔨᑉᑎᒥᐅᑦ ᐊᒡᓛᑦ ᑲᒪᓂᐊᕈᒫᕐᐳᑦ ᐅᒡᒍᐊᕕᒡᔪᐊᕐᓗᑎᒡᓗ ᑍᕆᒥᐅᑦ ᐊᓯᕈᕐᑕᐅᓂᖓᓂᒃ ᑐᓴᓕᕈᑎᒃ. 6 ᐱᓃᓯᐊᒥᐅᑕᐅᔪᓯ ᓂᐱᖅᑯᕐᑐᓗᓯ ᕿᐊᓕᕆᑦᓯ ᑖᕐᓯᓯᒧᑦ ᐊᓐᓇᒋᐊᓕᕆᑦᓯ. 7 ᑖᒃᑯᐊᖑᕚᑦ ᐃᒡᓗᒐᓴᒡᔪᐊᕐᒥᐅᑦ ᖁᕕᐊᓱᒃᐸᓚᐅᕐᑐᑦ ᑍᑦᓱᒪᓂᐊᓗᖕᓂᑦ ᐃᒡᓗᒐᓴᒡᔪᐊᖑᓕᕐᑐᑦ? ᑖᒃᑯᐊ ᑕᕝᕙ ᐃᓄᖁᑎᒥᖕᓂᒃ ᐊᐅᓪᓚᕐᑎᑦᓯᕙᓚᐅᕐᑐᑦ ᓄᓇᓕᖁᑎᑖᕆᐊᕐᑐᕐᓗᑏᒃ? 8 ᑭᓇᒧᑦ ᑕᒪᓐᓇ ᐊᓯᕈᕐᑕᐅᓇᕐᑐᖅ ᑍᕆᒥᐅᓄᑦ ᑎᑭᐅᑎᑎᑕᐅᓐᓂᕐᐹ, ᐃᒡᓗᒐᓴᒡᔪᐊᓂ ᐊᖏᓂᕐᐹᖑᔪᒧᑦ ᓂᐅᕕᕋᕐᑎᖏᑦ ᓇᒧᑐᐃᓐᓈᕐᑖᕐᑐᑦ ᐊᖓᔪᖅᑳᕐᔪᐊᓄᑦ ᐃᕐᓂᕆᔭᐅᕗᑦ ᓄᓇᕐᔪᐊᓕᒫᒥ ᐅᐱᒋᔭᐅᔪᑦ? 9 ᐊᑕᓂᐅᑉ ᐊᔪᒐᖄᖏᑦᑑᑉ ᑕᒪᓐᓇ ᐃᓱᒪᓕᐊᕆᓚᐅᕐᐹ, ᐱᔪᓐᓇᕋᓱᒋᓗᐊᕐᓂᖏᑦ ᓇᕐᕈᓇᕐᓯᖁᓪᓗᒋᑦ, ᐃᓄᖏᑕᓗ ᐅᐱᒋᔭᐅᓗᐊᕐᓂᖏᑦ ᑕᒪᕐᒥᒃ ᓇᓗᖅᑯᑎᑦᔪᑎᒃᓴᓐᖑᖁᓪᓗᒋᑦ. 10 ᑖᕐᓯᓯᐅᑉ ᓄᓇᖓᓂ ᓄᓇᓕᖁᑎᒋᔭᐅᔪᓯ ᓄᓇᒥ ᐱᕈᕐᓰᓇᓱᐊᓕᕆᑦᓯ! ᑭᓇᒧᑦ ᓴᐳᑎᔭᐅᓯᒪᓂᐊᕈᓐᓃᕐᑐᓯ. 11 ᐊᑕᓂᐅᑉ ᐊᒡᒐᓂ ᐃᓴᖕᒪᒋᑦ ᑕᕆᐅᑉ ᓇᓛᓄᑦ ᐊᖓᔪᖅᑳᕐᔪᐊᖃᕐᕖᑦ ᐊᓯᕈᕐᓗᒋᑦ; ᐊᑕᓂᐅᑉ ᐱᖁᔨᓂᖓᓄᑦ ᑬᓇᓂᒥᐅᑦ ᑮᓇᐅᔭᓕᐅᕐᕕᒋᓐᓂᕐᐹᖏᑦ ᐊᓯᕈᕐᑕᐅᑎᓚᐅᕐᐰᑦ. 12 ᓮᑐᓂᒥᐅᑕᐅᔪᓯ, ᖁᕕᐊᓱᖕᓂᓯ ᐃᓱᓕᑉᐳᖅ, ᐃᓄᖁᑎᓯᓗ ᐅᖁᒤᒃᓴᕐᑎᑕᐅᓕᕐᓗᑎᒃ, ᓮᐸᕋᓯᒧᑦ ᕿᒫᒐᓗᐊᕈᑎᒃ, ᓴᐳᑎᔭᐅᕚᓪᓕᕐᓂᐊᓐᖏᓚᑦ. 13 ᑲᐅᓪᑎᐊᒥᐅᓄᑦ ᐆᒪᔪᓄᑦ ᓄᔪᐊᕐᑐᓄᑦ ᑍᕆᒥᐅᑦ ᐊᖅᑯᓵᕐᑕᐅᑎᑕᐅᓚᐅᕐᐳᑦ ᐊᓯᕆᐊᒥᐅᓅᖏᑦᑐᖅ. ᑖᒃᑯᐊᓗ ᐹᐱᓘᓂᒥᐅᑦ ᐊᕙᑕᖏᕐᓯᓯᒪᓪᓗᑎᒃ ᓇᐸᔪᐊᓗᓕᐅᓚᐅᕐᐳᑦ, ᑍᕆᒥᐅᑦ ᐊᕙᓗᕐᔪᐊᖏᓐᓂᒃ ᓯᖁᒥᑦᓯᑦᔪᑎᒋᓚᐅᕐᑕᒥᖕᓂᒃ ᐃᒡᓗᒐᓴᒡᔪᐊᓂᒡᓗ ᐊᓯᕈᐃᑦᔪᑎᒋᓪᓗᒋᑦ. 14 ᓂᐱᖅᑯᕐᑐᓗᓯ ᕿᐊᓕᕆᑦᓯ ᑖᕐᓯᓯᒥᐅᑦ ᐅᒥᐊᕐᑐᕐᑎᐅᔪᓯ ᐃᒪᕐᔪᐊᑎᒍᑦ! ᐃᒡᓗᒐᓴᒡᔪᐊᑦ ᑕᑎᒋᔭᓯ ᐊᓯᕈᕐᑕᐅᖕᒪᑕ. 15 ᓇᓪᓕᐅᑎᔪᒫᕐᐳᖅ ᑍᕆᒥᐅᑦ ᐳᐃᒍᕐᑕᐅᕕᒃᓴᖓᑦ ᐊᕐᕌᒍᓂᒃ 70ᓂᒃ, ᐊᖓᔪᖅᑳᕐᔪᐊᑉ ᐃᓅᓯᕆᕙᒃᑕᖓᑎᑐᑦ ᓯᕕᑐᑎᒋᔪᒥᒃ, ᑖᒃᑯᐊᓕ ᐊᕐᕌᒍᐃᑦ ᐊᓂᒍᕐᐸᑕ ᑍᕆᒥᐅᑦ ᐊᖑᓐᓂᐊᕐᑎᒧᑦ ᐱᓯᓕᐊᕆᔭᐅᓯᒪᔪᑎᑐᑦ ᐃᓐᖏᐅᓯᕆᔭᐅᓕᕈᒫᕐᐳᑦ. 16 ᑯᑭᑦᑕᐸᐅᑎᐅᔭᓯ ᑎᒍᓗᒋᑦ, ᐃᒡᓗᒐᓴᒡᔪᐊᑦ ᐊᖅᑯᑎᖏᓐᓂ ᐱᓱᓕᕆᑦᓯ, ᐊᖑᓐᓂᐊᕐᑎᕕᓂᕐᑎᑐᑦ ᐳᐃᒍᕐᑕᐅᔪᓯ! ᐱᓯᖁᑎᓯ ᐃᓐᖏᓕᕐᓯᐅᒃ ᐅᑎᕐᑕᕐᓗᒍ ᐊᖑᑎᓄᑦ ᐅᑎᕐᕕᐅᔪᓐᓇᖁᓪᓗᓯ. 17 ᐊᕐᕌᒍᐃᑦ 70 ᓈᒃᐸᑕ, ᐊᑕᓂᐅᑉ ᑍᕆᒥᐅᑦ ᐱᓇᓱᐊᕐᓂᕆᕙᓚᐅᕐᑕᖏᓐᓄᑦ ᐅᑎᕐᑎᑦᓱᒫᕆᕔᑦ, ᐊᖓᔪᖅᑳᕐᔪᐊᖃᕐᕕᖕᓄᓪᓗ ᓇᓂᑐᐃᓐᓇᖅ ᓂᐅᕕᕋᕐᑎᑦᓯᔨᒋᓕᕈᒫᕆᕚᑦ. 18 ᓂᐅᕕᕋᕐᑎᑦᓯᓂᕐᒧᓪᓗ ᑮᓇᐅᔭᕐᑖᕆᔭᑎᒃ ᐊᑕᓂᕐᒧᑦ ᑐᕌᖓᑎᑦᓱᒫᕐᐰᑦ; ᑮᓇᐅᔭᒃᑯᕕᖕᓄᑦ ᑲᑎᕐᓱᕈᒫᓐᖏᓔᑦ. ᐊᑕᓂᕐᒥᒡᓕ ᐅᐱᒍᓱᒃᑐᑦ ᑮᓇᐅᔭᖏᓐᓂᒃ ᓂᕿᑖᕋᓲᑎᖃᕈᒫᕐᐳᑦ ᐊᓐᓄᕌᒃᓴᕐᑖᕈᑎᒋᓗᒋᓪᓗ ᐱᔭᕆᐊᖃᕐᑕᒥᖕᓂᒃ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society