ᐂᓮᐊᓯᐅᑉ ᐊᒡᓚᖏᑦ 22 - ᐊᒡᓔᑦ ᐃᑦᔪᕐᖕᓁᑦᑐᑦ

ᐅᖃᐅᓰᑦ ᔨᕉᓴᓕᒥᐅᓂᒃ ᐃᓂᕐᑎᕆᔪᑦ

¹ ᐅᖃᐅᓰᑦ ᑖᒃᑯᐊ ᐃᓂᕐᑎᕆᔪᑦ ᐱᑦᔪᑎᖃᕐᐳᑦ ᓇᕐᓴᕐᒥᒃ ᑕᑯᑎᑕᐅᕕᖕᒥᒃ, ᖃᓄᐃᒻᒪᑦ ᒪᔪᕐᓯᒪᕕᓯ, ᐃᓘᓐᓇᓕᒫᓯ ᐃᒡᓗᐃᑦ ᖄᖏᓐᓄᑦ?

² ᓂᐱᖅᑯᕐᑐᔪᐊᓘᓕᕋᑦᓯ, ᐅᐃᒪᔮᕐᑐᑦ ᐃᒡᓗᒐᓴᒡᔪᐊᕐᒥᐅᑦ ᓂᐱᖏᑎᑐᑦ, ᖁᕕᐊᓱᕕᒡᔪᐊᕐᑐᑎᑐᑦ ᓄᓇᓕᒡᔪᐊᒥ, ᑐᖁᑕᐅᓯᒪᔪᑦ ᐃᓕᑦᓯᓐᓂᑦ ᓴᕕᒡᔪᐊᒧᑦ ᑐᖁᕋᕐᑕᐅᓐᖏᓚᑦ ᐅᓇᑕᕐᓂᕐᒧᓪᓘᓐᓃᑦ ᑐᖁᕋᕐᑕᐅᓐᓂᓐᖏᓚᑦ.

³ ᐊᖓᔪᖅᑳᓯ ᑲᑎᓐᖓᓪᓗᑎᒃ ᕿᒫᓯᒪᕗᑦ, ᐱᑎᒃᓯᓕᔭᖏᑦᑐᓄᓪᓗ ᑎᒍᔭᐅᓯᒪᓪᓗᑎᒃ, ᐃᓘᓐᓇᑎᒃ ᓇᓂᔭᐅᓪᓗᑎᒃ ᑎᒍᔭᐅᓚᐅᕐᐳᑦ, ᐅᖓᓯᒃᑐᒧᑦ ᕿᒫᓯᒪᒐᓗᐊᕐᑎᓪᓗᒋᑦ.

⁴ ᑍᒤᒻᒪᑦ ᐃᒫᒃ ᐅᖃᓚᐅᕐᐳᖓ: “ᐊᓚᕆᑦᓯ ᐅᕙᓐᓂᒃ, ᐃᓱᒪᕐᓱᕐᓗᖓ ᕿᐊᓚᖓ; ᓮᒻᒪᕐᓴᕐᑕᐅᓇᓱᐊᕈᒪᓐᖏᓚᖓ ᐃᓅᖃᑎᒃᑲ ᑐᖁᑕᐅᓚᐅᕐᑐᑦ ᐱᓪᓗᒋᑦ.”

⁵ ᐊᑕᓂᖅ ᕿᓚᖕᒥᐅᒐᓴᒡᔪᐃᑦ ᒎᑎᖓᑦ ᐅᓪᓗᖃᕐᑎᑦᓯᖕᒪᑦ ᐅᐃᒻᒪᒃᓯᒪᓂᕐᒥᒃ ᑐᓪᓕᕋᖃᑦᑕᐅᑎᓂᕐᒥᒡᓗ ᓇᓗᓕᕐᓯᒪᓂᕐᒥᒡᓗ ᓇᕐᓴᒥ ᑕᑯᑎᑕᐅᕕᖕᒥ, ᐃᒡᓗᒐᓴᒡᔪᐊᑦ ᐊᕙᓗᕐᔪᐊᖏᓐᓂᒃ ᓯᖁᑦᑎᕆᓂᕐᒥᒃ, ᕾᒐᓛᕐᓂᕐᒥᒡᓗ ᐃᑲᔪᕐᑕᐅᔪᒪᓂᕐᒥᒃ ᖃᖅᑲᓄᑦ.

⁶ ᐃᓛᒻᒥᒥᐅᑦ ᖃᕐᔪᐃᑦ ᐴᖓᓂᒃ ᓇᒃᓴᕐᓯᕗᑦ ᕿᒻᒥᕐᔪᐊᓪᓗ ᐃᑭᒪᕕᖏᓐᓂᒃ ᐊᒃᓴᓗᐊᓕᖕᓂᒃ ᕿᒻᒥᕐᔪᐊᒥᓗ ᐃᑭᒪᔪᓂᒃ, ᑭᕆᒥᐅᑦ ᓴᐴᓗᑍᑦ ᓴᖅᑭᑎᑉᐰᑦ.

⁷ ᓇᕐᓮᑦ ᓂᕈᐊᕐᓯᒪᔭᓯ ᕿᒧᒃᓯᐅᑎᓂᒃ ᐊᒃᓴᓗᐊᓕᖕᓂᒃ ᐅᓂᐊᕐᑐᓂᒃ ᑕᑕᓚᐅᕐᐳᑦ, ᐅᓇᑕᕐᑐᒃᓮᓪᓗ ᕿᒻᒥᕐᔪᐊᒃᑰᕐᑐᑦ ᓇᖏᓕᕐᓗᑎᒃ ᐃᑎᕐᑕᕐᕕᑦᓯᓐᓂ.

⁸ ᔫᑕᒥᐅᑦ ᐱᔭᐅᑦᔧᕐᓯᒪᑦᔪᑎᒋᓇᓱᒃᑕᓕᒫᖏᑦ ᓯᖁᒥᑦᓱᒫᕐᐰᑦ. ᐅᓪᓗᖅ ᑕᒪᓐᓇ ᓇᓪᓕᐅᑎᒃᐸᑦ ᕿᕕᐊᓕᕈᒫᕐᐳᓯ ᐅᓇᑕᐅᑎᑖᕋᓱᐊᓕᕐᓗᓯ ᓇᐹᕐᑐᓕᖕᒥᐅᑦ ᑭᖑᕚᖑᖃᑎᒌᖏᓐᓄᑦ.

⁹ ᑕᑯᓚᐅᕐᐳᓯ ᑍᕕᑎᐅᑉ ᐃᒡᓗᒐᓴᒡᔪᐊᖏᑦ ᐅᓄᕐᑐᓂᒃ ᑭᓪᓚᖃᕐᒪᑕ, ᑲᑎᕐᓱᐃᓚᐅᕐᐳᓯ ᐃᒥᕐᑕᕐᕕᐅᑉ ᐊᒃᐸᓯᖕᓂᕐᓴᐅᑉ ᐃᒪᖓᓂᒃ.

¹⁰ ᔨᕉᓴᓕᐅᓪᓗ ᐃᒡᓗᖏᑦ ᓈᓴᓚᐅᕐᐸᓯ, ᐃᒡᓗᓂᒃ ᓯᖁᑦᑎᕆᔭᕆᐊᖃᓚᐅᕐᐳᓯ ᐊᕙᓗᕐᔪᐊᒧᑦ ᐃᓛᕐᑑᑎᒋᔪᒪᓪᓗᒋᑦ.

¹¹ ᐃᒥᕐᑕᕐᕕᒡᔪᐊᓕᐅᕐᐳᓯ ᐊᕙᓗᕐᔪᐊᑉ ᐃᑭᐊᖓᒍᑦ ᐃᒥᕐᑕᕐᕕᑐᖃᕐᒥᑦ ᐃᒻᒥᕐᐸᓪᓕᐊᔪᓐᓇᖁᓪᓗᒍ, ᐃᓱᒪᖃᓚᐅᓐᖏᓚᓯᓕ ᐱᓇᓱᐊᕐᑎᑦᓯᓚᐅᕐᑐᒥᒃ, ᑕᑯᓴᓚᐅᓐᖏᓚᓯᓘᓐᓃᑦ ᐃᓱᒪᓕᐅᕆᓚᐅᕐᑐᒥᒃ ᓯᕗᓂᑐᖃᖓᓂᑦ ᑍᒤᓕᖓᖁᓪᓗᒍ.

¹² ᑕᒪᓐᓇ ᐅᓪᓗᖅ ᓇᓪᓕᐅᑎᒃᐸᑦ ᐊᑕᓂᖅ ᕿᓚᖕᒥᐅᒐᓴᒡᔪᐃᑦ ᒎᑎᖓᑦ ᕿᐊᔪᒃᓴᐅᓂᕅᓛᕐᐳᖅ ᐃᓕᑦᓯᓐᓂᒃ ᕿᒃᓵᒃᑐᒃᓴᐅᓂᕅᓪᓗᓂᓗ, ᓄᔧᔭᕐᓯᒪᔪᒃᓴᐅᓂᕅᓛᕐᐳᖅ ᐊᓐᓄᕌᕐᓯᒪᔪᒃᓴᐅᓂᕅᓪᓗᓂᓗ ᕿᒃᓵᒃᑐᕐᓯᐅᑎᓂᒃ.

¹³ ᖁᕕᐊᓱᒡᓗᓯᓕ ᐊᓕᐊᓁᒍᓱᓚᐅᕐᐳᓯ, ᓂᕆᕕᒡᔪᐊᕐᓂᐊᕐᑕᑦᓯᓐᓂᒃ ᓰᐱᓂᒃ ᐃᒻᒧᒃᓯᐅᒐᕐᓂᒡᓗ ᑐᖁᑦᓯᓚᐅᕐᐳᓯ, ᓂᕆᓪᓗᓯ ᐃᒥᕐᓗᓯᓗ ᕔᓂᒥᒃ: ᐅᖃᕐᓗᓯ, “ᓂᕆᓚᐅᕐᑕ ᐃᒥᕐᓗᑕᓗ, ᖃᐅᒃᐸᑦ ᑐᖁᓂᐊᓕᕋᑦᑕ!”

¹⁴ ᑕᕝᕙ ᕿᓚᖕᒥᐅᒐᓴᒡᔪᐃᑦ ᐊᑕᓂᖓᑦᑕ ᐅᖃᐅᑎᓚᐅᕐᐹᖓ, “ᑕᒪᓐᓇ ᐊᔪᕐᑐᓕᓂᖅ ᐃᓱᒪᒋᔪᓐᓁᕐᑕᐅᑦᔪᑎᒋᓂᐊᓐᖏᓛᑦ ᐃᓅᓂᓕᒫᖏᓐᓂ,” ᐊᑕᓂᖅ ᕿᓚᖕᒥᐅᒐᓴᒡᔪᐃᑦ ᒎᑎᖓᑦ ᐅᖃᕐᐳᖅ.

ᓯᑉᓇᐅᑉ ᐃᓂᕐᑎᕐᑕᐅᓂᖓ

¹⁵ ᐊᑕᓂᖅ ᕿᓚᖕᒥᐅᒐᓴᒡᔪᐃᑦ ᒎᑎᖓᑦᑕ ᐅᖃᐅᑎᓚᐅᕐᐹᖓ, “ᓯᑉᓇᓕᐊᖁᓪᓗᖓ, ᐊᖓᔪᖅᑳᕐᔪᐊᑉ ᐃᒡᓗᒥᐅᖃᑎᖏᓐᓄᑦ ᑲᒪᔨᒻᒪᕆᐅᑎᑕᐅᔪᖅ ᐅᖃᐅᑎᔭᕐᑐᓗᒍ,

¹⁶ ‘ᖃᓄᖅ ᐃᓕᖕᓂᒃ ᐃᓱᒪᒋᕖᑦ? ᑭᓇᒧᑦ ᐱᔪᓐᓇᕐᑎᑕᐅᓪᓗᑎᑦ ᖃᖅᑲᐅᑉ ᐊᑭᓐᓇᖓᒍᑦ ᕾᕈᓱᓕᐅᓚᐅᕐᐱᑦ ᐃᓗᕕᕐᑕᐅᕕᒃᓴᕐᓂᒃ?

¹⁷ ᐱᓪᓚᕆᐊᓘᒐᓗᐊᕐᑎᓪᓗᑎᑦ, ᐊᑕᓂᐅᑉ ᑭᕕᒡᓗᓂᑎᑦ ᐃᒋᑦᓱᒫᕐᐹᑎᑦ.

¹⁸ ᑭᕕᒡᓗᓂᑎᑦ ᐊᕐᓴᕐᑎᑐᑦ ᐃᒋᑦᓱᒫᕐᐹᑎᑦ ᓄᓇᒧᑦ ᓄᓇᖃᕐᕕᒋᔭᑦᓯᓐᓂᑦ ᐊᖏᓂᕐᓴᒧᑦ; ᑍᑲᓂᓗ ᑐᖁᔪᒫᕐᐳᑎᑦ ᐊᒃᓴᓗᐊᓕᖁᑎᕕᑦ ᕿᒧᒃᓯᐅᑎᓄᑦ ᐅᓂᐊᕐᑕᐅᓲᑦ ᐅᐱᒋᓂᕐᐹᕆᔭᕕᑦ ᓴᓂᐊᓂ, ᐊᖓᔪᖅᑳᕕᑦ ᐃᒡᓗᖓᓂ ᑕᓗᕈᒃᑯᓐᓇᕐᓯᒐᕕᑦ.

¹⁹ ᐊᑕᓂᐅᑉ ᑲᒪᔨᒻᒪᕆᐅᓂᕆᔭᕐᓂᑦ ᐲᕐᑎᑦᓱᒫᕐᐹᑎᑦ ᐱᒻᒪᕆᐅᑎᕐᕕᒋᔭᕐᓂᑦ ᐊᓂᑕᐅᑎᑦᓱᒫᕐᐹᑎᑦ.

²⁰ ᐊᑕᓂᐅᑉ ᓯᑉᓇ ᐅᖃᐅᑎᕚ, ᑍᒤᑕᐅᕕᒃᓮᑦ ᓇᓪᓕᐅᑎᒃᐸᑦ, ᑭᒡᒐᕋ ᐃᓔᐊᑭᒻ ᕼᐃᓪᑬᐊᐅᑉ ᐃᕐᓂᖓ ᑎᓕᔪᒫᕐᐸᕋ.

²¹ ᐊᓐᓄᕌᕐᓂᒃ ᐊᓐᓄᕌᕐᑎᑦᓱᒫᕐᐸᕋ, ᑕᑦᓯᕈᑎᖕᓂᒡᓗ ᐊᑎᑎᓪᓗᒍ, ᐱᔪᓐᓇᕐᓂᕆᕙᓚᐅᕐᑕᕐᓂᒡᓗ ᐱᔪᓐᓇᕐᓂᕐᑖᕐᑎᓪᓗᒍ, ᔨᕉᓴᓕᒥᐅᓄᑦ ᔫᑕᒥᐅᓄᓪᓗ ᐊᑖᑕᒋᔭᐅᔪᑎᑐᑦ ᑍᒤᑎᑦᓱᒫᕐᐸᕋ.

²² ᐱᔪᓐᓇᕐᓂᕆᔭᕆᐊᖃᕐᑕᓕᒫᖏᓐᓂᒃ ᐱᑎᑦᓱᒫᕐᑕᕋ ᐊᖓᔪᖅᑳᕐᔪᐊᑦ ᐊᑖᓂ ᑍᕕᑎᐅᑉ ᑭᖑᕚᖓ, ᑲᒪᔨᓪᓚᕆᐅᓂᕐᒥᓄᑦ ᐱᔪᓐᓇᐅᑎᖃᕐᓂᐊᕐᐳᖅ ᑕᒤᓐᓄᑦ ᐅᒃᑯᐃᕐᑕᖏᑦ ᐊᓯᐊᓄᑦ ᐅᒃᑯᐊᕐᑕᐅᔪᓐᓇᕐᓂᐊᓐᖏᓚᑦ, ᐅᒃᑯᐊᕐᑕᖏᓪᓗ ᐊᓯᐊᓄᑦ ᐅᒃᑯᐃᕐᑕᐅᔪᓐᓇᖏᓪᓗᑎᒃ.

²³ ᐲᒐᒃᓴᐅᔪᓐᓃᕐᑎᓐᓂᐊᕐᐸᕋ ᐃᓂᒋᔭᖓᓂᑦ ᐸᐅᒍᐊᕐᑎᑐᑦ ᒪᖒᒪᔪᑎᑐᑦ, ᐃᒡᓗᒥᐅᖃᑎᖏᑕᓗ ᐅᐱᒋᔭᐅᔪᑎᒃᓴᕆᓂᐊᕐᐹᑦ.

²⁴ ᑭᓯᐊᓂ ᐃᓚᒋᔭᓂ ᑲᒪᒋᔭᓂᓗ ᐅᖁᒤᒃᓴᕈᑎᒋᕙᒍᒫᕐᐰᑦ, ᐃᓚᒋᔭᒥᓄᑦ ᐊᑕᕕᐅᓪᓚᕆᒍᒫᕐᒪᑦ ᓲᕐᓗ ᖃᑦᑍᑦ ᐃᐳᐊᓖᓪᓗ ᓂᕕᖓᕕᖕᒥᖕᓂ ᓂᕕᖓᕙᖕᒪᑕ!

²⁵ ᐅᓪᓗᖅ ᑕᒪᓐᓇ ᓇᓪᓕᐅᑎᒃᐸᑦ, ᕿᓚᖕᒥᐅᒐᓴᒡᔪᐃᑦ ᐊᑕᓂᖓᑦ ᐅᖃᕐᐳᖅ, ᓂᕕᓐᖓᕕᒃ ᐊᑦᓱᖏᕐᓯᒪᓚᐅᕐᑐᖅ ᐸᓚᓐᖓᒃᑯᓂ ᑲᑕᒍᒫᕐᐳᖅ, ᑖᑦᓱᒧᖓᓗ ᓂᕕᖓᓚᐅᕐᑐᑦ ᓂᕕᓐᖓᕕᒃᓮᕈᑎᔪᒫᕐᐳᑦ. ᐊᑕᓂᖅ ᐅᖃᕐᐳᖅ.’”