ᐂᓮᐊᓯᐅᑉ ᐊᒡᓚᖏᑦ 19 - ᐊᒡᓔᑦ ᐃᑦᔪᕐᖕᓁᑦᑐᑦ

ᒎᑎᐅᑉ ᐄᑦᔨᑉᑎᒥᐅᓂᒃ ᓱᒋᐊᕐᓯᔪᒫᕐᓂᖓ

¹ ᐅᖃᐅᓰᑦ ᐄᑦᔨᑉᑎᒥᐅᑦ ᐱᓪᓗᒋᑦ, ᑕᑯᓕᕐᓯᐅᒃ ᐊᑕᓂᖅ ᓄᕗᔭᒥ ᓱᒃᑲᓕᔪᒥ ᐃᑭᒪᓗᓂ ᐄᑦᔨᑉᑎᒧᑦ ᑎᑭᓕᕐᑐᖅ; ᐄᑦᔨᑉᑎᒥᐅᑦ ᒎᑎᓐᖑᐊᖏᑦ ᓴᔪᒍᒫᕐᐳᑦ ᑖᑦᓱᒪ ᓇᔪᕐᑕᖓᓂ, ᐄᑦᔨᑉᑎᒥᐅᓪᓗ ᐆᒻᒪᑎᖏᑦ ᐊᐅᒃᑐᑎᑐᑦ ᑍᒤᑦᓱᒫᕐᐳᑦ ᐃᓗᖏᓐᓂ.

² ᐄᑦᔨᑉᑎᒥᐅᑦ ᓵᓐᖓᑎᑦᓱᒫᕐᐸᒃᑲ ᐃᓅᖃᑎᒥᖕᓂᒃ, ᐅᓇᑕᓕᕈᒫᕐᐳᑦ, ᐊᖑᑏᑦ ᓄᑲᕇᑦ ᐃᒻᒥᖕᓄᑦ ᐅᓇᑕᓕᕐᓗᑎᒃ, ᓯᓚᖅᑲᑎᒌᑦ ᓯᓚᖅᑲᑎᒥᖕᓄᑦ ᐅᓇᑕᓕᕐᓗᑎᒃ, ᐃᒡᓗᒐᓴᒡᔪᐊᒥᐅᑦ ᐃᒡᓗᒐᓴᒡᔪᐊᒥᐅᓂᒃ ᐊᓯᒥᖕᓂᒃ ᐅᓇᑕᓕᕐᓗᑎᒃ, ᐊᖓᔪᖅᑳᕐᔪᐊᖃᕐᕖᓪᓗ ᐊᖓᔪᖅᑳᕐᔪᐊᖃᕐᕕᖕᒥᒃ ᐊᓯᒥᖕᓂᒃ ᐅᓇᑕᓕᕐᓗᑎᒃ.

³ ᐄᑦᔨᑉᑎᒥᐅᑦ ᐃᓕᖅᑯᓯᖏᑦ ᐊᑐᕈᓐᓃᕈᒫᕐᐳᑦ ᑖᒃᑯᓇᓂ, ᐱᓇᓱᐊᕈᒪᔭᖏᓐᓂᒡᓗ ᓇᓗᓕᕐᑎᑦᓱᒫᕐᐸᒃᑲ; ᒎᑎᓐᖑᐊᒥᖕᓂᒃ ᐊᖓᒃᑯᓂᒡᓗ ᐃᑲᔪᕐᑎᖃᕋᓱᐊᓕᕈᒫᕐᐳᑦ, ᑐᖁᖓᔪᓪᓗ ᐊᓂᕐᓂᖏᓐᓂᒃ ᐱᓇᓱᐊᖃᑦᑕᕐᑐᓂᒃ ᐊᖓᒃᑰᓇᓱᐊᕐᑐᓂᒡᓗ ᑕᑎᖃᕋᓱᓕᕈᒫᕐᐳᑦ.

⁴ ᐄᑦᔨᑉᑎᒥᐅᑦ ᐊᐅᓚᑕᐅᑎᑦᓱᒫᕐᐸᒃᑲ ᐊᖓᔪᖅᑳᕐᔪᐊᕐᒧᑦ ᐊᒃᓱᕈᕐᓇᕐᑐᒦᑎᑦᓯᔪᒧᑦ; ᐊᖓᔪᖅᑳᕐᔪᐊᕐᒧᓪᓗ ᑲᑉᐱᐊᓱᒃᑎᑦᓯᔪᒧᑦ ᐊᖓᔪᖅᑲᐅᕕᐅᑎᑦᓱᒫᕐᐸᒃᑲ, ᐊᑕᓂᖅ ᐅᖃᕐᐳᖅ, ᕿᓚᖕᒥᐅᒐᓴᒡᔪᐃᑦ ᐊᑕᓂᖓᑦ.

⁵ ᑰᒑᓗᒃ ᓁᓕ ᓴᓗᐊᕈᒫᕐᐳᖅ, ᑰᒃ ᐃᒤᕐᓯᒪᓕᕐᓗᓂ ᐸᓂᕐᓯᒪᓕᕈᒫᕐᐳᖅ.

⁶ ᑰᖕᒥ ᐅᒥᐊᕐᔪᐊᓄᑦ ᐊᖅᑯᑎᓕᐊᕆᓯᒪᔪᑦ ᑎᐱᓗᓕᕈᒫᕐᐳᑦ, ᐄᑦᔨᑉᑎᐅᑉ ᑰᖓᓂ ᓁᓕᒥ ᐊᕙᓚᖓᔪᑦ ᒥᑭᔫᓕᕈᒫᕐᐳᑦ ᓴᓗᐊᕐᓗᑎᒡᓗ, ᐃᒫᓂ ᐱᕈᕐᑐᑦ ᐃᕕᒃᓱᒊᑦ ᓱᓪᓗᓕᕐᔪᐊᓪᓗ ᐸᓂᕐᓂᕐᒧᑦ ᑐᖁᓕᔪᒫᕐᐳᑦ.

⁷ ᑰᒑᓘᑉ ᓁᓕᐅᑉ ᓴᓂᕌᓂ ᓱᓇᖃᕈᓐᓁᕈᒫᕐᐳᖅ, ᓁᓕᐅᑉ ᓯᓈ ᐸᓂᕐᑑᓕᕐᓗᓂ, ᐱᕈᕐᓯᐊᕕᓃᑦ ᓁᓕᐅᑉ ᖃᓂᒋᔭᖓᓃᑦᑐᑦ ᐸᓂᕈᒫᕐᒪᑕ, ᑎᒃᑕᐅᕋᕈᒫᕐᐳᑦ, ᐱᑕᖃᕈᓐᓃᕐᓗᑎᒃ.

⁸ ᐃᖃᓗᒃᓯᐅᕐᑏᑦ ᕿᒃᓵᒍᒫᕐᐳᑦ; ᐃᖃᓘᔭᓂᒡᓗ ᐃᒋᑦᓯᕙᒃᑐᑦ ᓁᓕᒥ ᐅᒡᒍᐊᕈᒫᕆᕗᑦ, ᓄᓗᐊᓂᒡᓗ ᐃᒫᓄᑦ ᐃᓯᕕᑦᓯᕙᒃᑐᑦ ᖁᕕᐊᓱᒍᓐᓃᕐᓗᑎᒃ.

⁹ ᐃᕕᒃᓱᒐᕐᓂᒃ ᖃᓪᓗᓈᕐᑕᓕᐅᕐᑏᑦ ᓴᐱᕐᓇᕐᑐᒦᑦᓱᒫᕐᐳᑦ, ᖃᑯᕐᑕᓂᒡᓗ ᖃᓪᓗᓈᕐᑕᓕᐅᕐᑏᑦ ᑲᓐᖑᓇᕐᑐᒦᓕᕐᓗᑎᒃ.

¹⁰ ᖃᓪᓗᓈᕐᑕᓕᐅᕐᑏᑦ ᑐᓐᖓᕕᖏᑦ ᓯᖁᒥᑕᐅᔪᒫᕐᐳᑦ. ᑍᒤᑦᑐᓂᒡᓗ ᑮᓇᐅᔭᓕᐅᕈᑎᓖᑦ ᖁᕕᐊᓇᖏᑦᑐᒦᓕᕐᓗᑎᒃ.

¹¹ ᔪᐊᓐᒥᐅᑦ ᓯᕗᓕᕐᑎᖏᑦ ᓯᓔᑦᑐᓪᓚᕆᐅᖕᒪᑕ; ᐄᑦᔨᑉᑎᒥᐅᓪᓗ ᐊᖓᔪᖅᑳᕐᔪᐊᖓᑦᑕ ᓯᓚᑐᓂᕐᐹᑦ ᐃᓱᒪᓕᐅᕐᑎᖏᑦ ᑐᑭᖃᖏᑦᑐᓂᒃ ᐅᖃᐅᑦᔪᐃᖃᑦᑕᕐᓱᑎᒃ, ᖃᓄᖅ ᐅᖃᕈᓐᓇᕐᐲᑦ ᐰᕉᒧᑦ, “ᓯᓚᑐᔪᓂᒃ ᓯᕗᓕᖃᕐᑐᖓ, ᐊᖓᔪᖅᑳᕐᔪᐊᕕᓃᓪᓗ ᑭᖑᕚᕆᕚᖓ?”

¹² ᓇᐅᒡᓕ ᑍᒪ ᓯᓚᑐᔪᖁᑎᑎᑦ? ᑍᒃᑯᓇᓐᖓᑦ ᐅᖃᐅᑦᔭᐅᓕᕆᑦ ᓇᓗᔪᓐᓁᕐᑎᑕᐅᓗᑎᓪᓗ ᖃᓄᖅ ᕿᓚᖕᒥᐅᒐᓴᒡᔪᐃᑦ ᐊᑕᓂᖓᑦ ᐄᑦᔨᑉᑎᒥᐅᓂᒃ ᐊᑭᕋᕐᑐᕈᑎᖃᕐᒪᖔᑦ.

¹³ ᔪᐊᓐᒥᐅᑦ ᓯᕗᓕᕐᑎᖏᑦ ᓯᓔᑉᐳᑦ, ᒥᒻᐱᓯᒥᐅᓪᓗ ᓯᕗᓕᕐᑎᖏᑦ ᓇᓗᓪᓗᑎᒃ; ᐃᓅᖃᑎᒌᒡᔪᐊᓂᑦ ᐱᓪᓚᕆᖁᑎᒋᔭᐅᓪᓗᑎᒃ ᐄᑦᔨᑉᑎᒥᐅᓂᒃ ᑕᒻᒪᕐᑎᑦᓯᓯᒪᕗᑦ.

¹⁴ ᐊᑕᓂᐅᑉ ᓇᓗᓕᕐᓇᕐᑐᒥᒃ ᐊᓂᕐᓂᕐᒥᒃ ᑯᕕᓯᕕᒋᓯᒪᖕᒪᒋᑦ; ᑍᒃᑯᐊ ᐄᑦᔨᑉᑎᒥᐅᑦ ᐅᕐᕈᔮᓕᕐᐳᑦ ᖃᓄᐃᓕᐅᕐᓂᓕᒫᒥᒃᑎᒍᑦ ᐋᖓᔮᕐᑐᑎᑐᑦ ᒥᕆᐊᒥᖕᓄᑦ ᖁᐊᔭᕿᑦᑖᕐᑐᑎᑐᑦ.

¹⁵ ᐄᑦᔨᑉᑎᓕᒫᒥ ᓱᓇᒥᒡᓘᓐᓃᑦ ᐱᓪᓚᕆᒃᑕᖃᕈᓐᓃᕈᒫᕐᐳᖅ ᓯᕗᓕᕐᑎᐅᒐᓗᐊᕈᓂ ᐃᓄᑐᐃᓐᓇᐅᒐᓗᐊᕈᓂᓗ, ᓇᐹᕐᑑᑉ ᐹᒥᒥᒃ ᐊᑎᓕᐅᑉ ᐊᕙᓚᖓᔪᖓ ᐅᕝᕙᓗ ᐃᕕᒡᔪᐊᖅ ᐃᑲᔪᕐᓯᕆᐊᕈᑎᒃᓴᖃᕈᒫᓐᖏᓚᖅ.

ᐄᑦᔨᑉᑎᒥᐅᑦ ᐊᑕᓂᕐᒥᒃ ᑐᒃᓯᐊᕐᕕᖃᓕᕈᒫᕐᓂᖓᑦ

¹⁶ ᐅᓪᓗᖅ ᑕᒪᓐᓇ ᓇᓪᓕᐅᑎᒃᐸᑦ ᐄᑦᔨᑉᑎᒥᐅᑦ ᐊᕐᓇᑎᑐᑦ ᑍᒤᓕᕈᒫᕐᐳᑦ, ᓴᔪᒍᒫᕐᐳᑦ ᑲᑉᐱᐊᓱᒡᓗᑎᒃ ᕿᓚᖕᒥᐅᒐᓴᒡᔪᐃᑦ ᐊᑕᓂᖓᑦᑕ ᐊᒡᒐᖕᒥᓄᑦ ᓴᔪᒃᑎᑦᓱᒫᕐᒪᒋᑦ.

¹⁷ ᔫᑕᒥᐅᑦ ᐄᑦᔨᑉᑎᒥᐅᓂᑦ ᑲᑉᐱᐊᒋᔭᐅᓕᕈᒫᕐᐳᑦ; ᓇᓪᓕᐊᓐᓄᑦ ᐅᖃᐅᑎᒋᔭᐅᓕᕈᑎᒃ ᑲᑉᐱᐊᓱᓕᖃᑦᑕᕈᒫᕐᐳᑦ ᕿᓚᖕᒥᐅᒐᓴᒡᔪᐃᑦ ᐊᑕᓂᖓᑦᑕ ᐱᑦᔪᑎᒋᔭᖓᓄᑦ ᐃᓱᒪᓕᐅᕈᑎᒋᔭᐅᓯᒪᖕᒪᑕ.

¹⁸ ᐅᓪᓗᖅ ᑕᒪᓐᓇ ᓇᓪᓕᐅᑎᒃᐸᑦ ᐄᑦᔨᑉᑎᒥᐅᑦ ᓄᓇᓕᒃᔪᐊᖁᑎᖏᓐᓂ ᑕᓪᓕᒤᓂ, ᑬᓇᓂᒥᐅᑎᑐᑦ ᐅᖃᐅᓯᖃᕐᓗᑎᒃ ᐊᖏᖃᑎᒌᒍᒫᕐᐳᑦ ᕿᓚᖕᒥᐅᒐᓴᒡᔪᐃᑦ ᐊᑕᓂᖓᓂᒃ ᒪᓕᒍᒪᓗᑎᒃ; ᓄᓇᓕᒡᔪᐊᓪᓗ ᐃᓚᖓᑦ ᐊᑦᓯᕐᑕᐅᓗᓂ “ᓯᕿᓂᕐᒥᒃ.”

¹⁹ ᐅᓪᓗᖅ ᑕᒪᓐᓇ ᓇᓪᓕᐅᑎᒃᐸᑦ, ᐱᑕᖃᓕᕈᒫᕐᐳᖅ ᐊᑕᓂᕐᒧᑦ ᑐᓂᕐᕈᓯᕐᕕᖕᒥᒃ ᐄᑦᔨᑉᑎᒥᐅᑦ ᓄᓇᖓᑕ ᕿᑎᖓᓂ, ᐅᔭᕌᓗᖕᒥᒡᓗ ᓇᐸᔪᒥᒃ ᓴᓇᓯᒪᔪᕐᑕᖃᕐᒥᓗᓂ ᐄᑦᔨᑉᑎᐅᑉ ᓄᓇᖓᑕ ᑭᒡᓕᖓᓂ ᐊᑕᓂᕐᒥᒃ ᐅᐱᒍᓲᑎᒥᒃ.

²⁰ ᓇᓗᓁᒃᑯᑕᐅᔪᒫᐳᕐᓗ ᖃᐅᔨᑎᑦᓯᑦᔪᑕᐅᓗᓂ ᕿᓚᖕᒥᐅᒐᓴᒡᔪᐃᑦ ᐊᑕᓂᖓᓐᓄᑦ ᐄᑦᔨᑉᑎᒥᐅᑦ ᓄᓇᖓᓂ; ᐃᓄᖏᑦ ᐃᑲᔪᕐᑕᐅᔪᒪᓗᑎᒃ ᐊᑕᓂᕐᒧᑦ ᓂᓪᓕᐊᓕᕌᖓᑕ ᐊᑭᕋᑎᒃ ᐱᓪᓗᒋᑦ ᓴᐳᑦᔨᔨᒃᓴᖓᓐᓂᒃ ᑎᓕᓯᕕᒋᖃᑦᑕᕈᒫᕐᐰᑦ, ᓴᐳᑎᓗᒋᑦ ᐱᐅᓕᓗᒋᓪᓗ ᐊᑭᕋᖏᓐᓂᑦ.

²¹ ᐊᑕᓂᕐᓗ ᐃᒻᒥᓂᒃ ᖃᐅᔨᒪᔭᐅᑎᑦᓱᒫᕐᐳᖅ ᐄᑦᔨᑉᑎᒥᐅᓄᑦ; ᑕᕝᕙ ᐊᑕᓂᕐᒥᒃ ᓇᓗᓁᔧᔪᒫᕐᐳᑦ ᓂᕐᑐᐃᓗᑎᒃ ᑐᓂᕐᕈᓯᕐᐸᓕᕐᓗᑎᒃ ᐃᑯᐊᓚᑎᑦᓯᓂᒃᑯᑦ ᐆᒪᔪᕕᓂᕐᓂᒃ, ᐊᑕᓂᕐᓗ ᐊᖏᕐᕕᒋᔪᒫᕐᐹᑦ ᐊᖏᕈᑎᒋᔭᒥᖕᓂᒡᓗ ᑲᔪᓯᑎᑦᓯᓗᑎᒃ.

²² ᐊᑕᓂᐅᑉ ᓱᒋᐊᕈᒫᕐᐰᑦ ᐄᑦᔨᑉᑎᒥᐅᑦ, ᓱᒋᐊᕐᓗᒋᑦ ᐋᖅᑭᒃᓱᕐᓗᒋᓪᓗ; ᐊᑕᓂᕐᒧᑦ ᐅᑎᕈᒫᕐᐳᑦ, ᑐᒃᓯᐊᕐᓂᖏᓪᓗ ᑐᓴᕐᓗᒋᑦ ᐋᖅᑭᒍᒫᕐᐰᑦ.

²³ ᐅᓪᓗᖅ ᑕᒪᓐᓇ ᓇᓪᓕᐅᑎᒃᐸᑦ ᐊᖅᑯᑎᐊᓗᒃᑕᖃᓕᕈᒫᕐᐳᖅ ᐄᑦᔨᑉᑎᒥᑦ ᐊᓯᕆᐊᒥᐅᑦ ᓄᓇᖓᓐᓄᑦ, ᑖᒃᑯᐊᓗ ᓄᓇᓕᒡᔪᐊᑦ ᒪᕐᕈᐃᑦ ᐊᕙᒻᒧᑦ ᓂᐅᕐᕈᖃᑦᑕᐅᑎᕙᓕᕈᒫᕐᐳᑦ ᑕᒪᕐᒥᒡᓗ ᐊᑕᓂᕐᒥᒃ ᑐᒃᓯᐊᖃᑎᒌᒍᓐᓇᓕᕐᓗᑎᒃ.

²⁴ ᐅᓪᓗᖅ ᑕᒪᓐᓇ ᓇᓪᓕᐅᑎᒃᐸᑦ ᐃᓴᕆᐊᓕᒥᐅᑦ ᐱᖓᔪᒋᔭᐅᓕᕈᒫᕐᐳᑦ ᐄᑦᔨᑉᑎᒥᐅᓄᑦ ᐊᓯᕆᐊᒥᐅᓄᓪᓗ, ᓮᒻᒪᕐᑎᑦᓯᑦᔪᑕᐅᓗᑎᒃ ᓯᓚᕐᔪᐊᕐᒥᐅᓂᒃ.

²⁵ ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᓮᒻᒪᕐᑎᓪᓗᒋᑦ ᐅᖃᕈᒫᕐᐳᖅ, “ᓮᒻᒪᕐᑎᑕᐅᒋᑦᓯ ᐃᓄᖁᑎᒃᑲ ᐄᑦᔨᑉᑎᒥᐅᑦ, ᐃᓕᑦᓯᓗ ᐊᓯᕆᐊᒥᐅᑦ ᐱᓐᖑᕐᑎᓚᐅᕐᑕᒃᑲ, ᐃᓴᕆᐊᓕᒥᐅᓪᓗ ᓂᕈᐊᕐᓯᒪᓪᓗᓯ ᐃᓄᖁᑎᒋᔭᒃᑲ.”