ᐂᓮᐊᓯᐅᑉ ᐊᒡᓚᖏᑦ 17 - ᐊᒡᓔᑦ ᐃᑦᔪᕐᖕᓁᑦᑐᑦ

ᒎᑎᐅᑉ ᓱᒋᐊᕐᓯᔪᒫᕐᓂᖓ ᓯᕆᐊᒥᐅᓂᒃ ᐃᓴᕆᐊᓕᒥᐅᓂᒡᓗ

¹ ᐅᖁᒤᒃᓴᐅᑎᖃᕐᓂᖅ ᑕᒫᓯᑰᓯ ᐱᓪᓗᒍ, “ᑕᑯᒋᑦ, ᑕᒫᓯᑰᓯ ᐃᒡᓗᒐᓴᒡᔪᐊᕕᓂᑐᐃᓐᓇᐅᓕᕈᒫᕐᐳᖅ, ᓯᖁᑦᑎᕐᓯᒪᓗᑎᒃ.

² ᐃᒡᓗᒐᓴᒡᔪᐊᖏᑦ ᐃᓄᐃᕈᑎᔪᒫᕐᐳᑦ ᕿᒤᓐᓇᕐᑕᐅᓗᑎᒃ; ᓰᐱᓄᑦ ᓂᕆᓇᓱᒡᕕᑐᐃᓐᓇᐅᓕᕈᒫᕐᐳᑦ, ᐊᖁᐱᕕᐅᓗᑎᒃ, ᕿᒫᑎᑦᓯᔨᒃᓴᖃᕋᑎᒡᓗ.

³ ᐊᕙᓗᕐᔪᐊᕐᑕᐅᖅ ᐃᕗᕅᑎᒦᑦᑐᖅ ᐱᑕᖃᕈᓐᓃᕈᒫᕐᐳᖅ, ᐊᖓᔪᖅᑳᕐᔪᐊᖃᕐᕕᒡᓗ ᑕᒫᓯᑰᓯᒥ ᐱᑕᖃᕈᓐᓃᕐᓗᓂ; ᓯᕆᐊᒥᐅᑦ ᐊᒥᐊᒃᑯᖏᑦ ᐃᓴᕆᐊᓕᒥᐅᑎᑐᑦ ᑍᒤᓕᕈᒫᕐᐳᑦ ᐊᔪᖏᑦᑐᕐᔪᐊᓐᖑᕐᓗᑎᒃ. ᕿᓚᖕᒥᐅᒐᓴᒡᔪᐃᑦ ᐊᑕᓂᖓᑦ ᐅᖃᕐᐳᖅ.

⁴ ᑕᒪᓐᓇ ᐅᓪᓗᖅ ᓇᓪᓕᐅᑎᒃᐸᑦ ᔧᑰᑉ ᑭᖑᕚᖏᑦ ᓂᕐᑐᕐᓇᕈᓐᓃᕐᑎᑕᐅᔪᒫᕐᐳᑦ, ᐅᕕᓂᖏᑕ ᖁᐃᓂᓂᖓ ᓴᓗᒃᑎᑎᑕᐅᔪᒫᕐᒪᑦ.

⁵ ᐊᑦᔨᖃᕈᒫᕐᐳᑦ ᓂᐊᖂᔭᒃᓴᓂᒃ ᓇᐸᔪᓂᒃ ᓇᑲᑎᕆᔨᒧᑦ ᓇᑲᑎᕐᑕᐅᔪᓂᒃ, ᑕᓕᕐᒥᖕᓄᓪᓗ ᓂᐊᖂᔭᒃᓮᑦ ᓄᕗᖏᓐᓂᒃ ᐲᔭᕐᑕᐅᔪᓂᒃ, ᐊᒥᐊᒃᑯᕐᓗᑯᑎᑐᓪᓗ ᐊᔪᕐᓴᕐᑐᓂᑦ ᓄᐊᑕᐅᔪᓂᒃ ᕆᐰᒥᐅᑦ ᓇᕐᓴᖓᓂ.

⁶ ᐅᓄᖏᑦᑐᓂᒃ ᐊᒥᐊᒃᑯᔪᒫᕐᐳᑦ ᐊᔪᕐᓴᕐᑐᓄᑦ ᐱᔭᐅᖏᑦᑐᑎᑐᑦ, ᓇᐹᕐᑐᑦ ᐅᕐᓱᒃᓴᓖᑦ ᐊᓇᐅᓕᕐᑕᐅᓪᓗᑎᒃ ᐸᐅᕐᖓᖏᑦ ᑲᑕᒐᕐᑎᑕᐅᔪᑎᑐᑦ ᐸᐅᕐᖔᖕᓂᒃ ᒪᕐᕉᖕᓂᒃ ᐱᖓᓱᓂᒡᓘᓐᓃᑦ ᐊᒥᐊᒃᑯᔭᐅᔪᑎᑐᑦ, ᓇᐹᕐᑐᑎᑐᓪᓗ ᖁᑦᓯᖕᓂᕐᐹᒥᑦ ᐸᐅᕐᖓᓂᒃ ᑲᑕᒐᕐᑎᑕᐅᔪᑎᑐᑦ, ᓯᑕᒪᓂᒃ ᑕᓪᓕᒪᓂᒡᓘᓐᓃᑦ ᐊᒥᐊᒃᑯᔪᑎᑐᑦ, ᐊᑕᓂᖅ ᐃᓴᕆᐊᓕᒥᐅᑦ ᒎᑎᖓᑦ ᐅᖃᕐᐳᖅ.”

⁷ ᐅᓪᓗᖅ ᑕᒪᓐᓇ ᓇᓪᓕᐅᑎᒃᐸᑦ, ᐃᓄᐃᑦ ᐱᓐᖑᕐᑎᑦᓯᔨᒋᓚᐅᕐᑕᒥᖕᓂᒃ ᑕᑯᓇᓱᓕᕈᒫᕐᐳᑦ, ᐃᔨᒥᖕᓄᓪᓗ ᐃᒃᐱᒍᓱᑦᓯᐊᕐᓗᑎᒃ ᕿᓂᓕᕈᒫᕐᐳᑦ ᐃᓴᕆᐊᓕᒥᐅᑦ ᐃᑦᔪᕐᓁᑦᑐᖁᑎᖓᓐᓂᒃ.

⁸ ᑐᓂᕐᕈᓯᕐᕕᖕᓂᒃ ᓴᓇᓚᐅᕐᑕᒥᖕᓂᒃ ᑕᑎᖃᕈᓐᓃᕈᒫᕐᐳᑦ, ᐊᒡᒐᒥᖕᓄᑦ ᓴᓇᓚᐅᕐᑕᒥᖕᓂᒃ, ᑕᑎᖃᕈᓐᓃᕐᓗᑎᒡᓗ ᓇᖕᒥᓂᖅ ᓴᓇᓯᒪᔭᒥᖕᓂᒃ ᒎᑎᓐᖑᐊᒥᒃ ᐊᓯᕋᒥᒃ ᑐᓂᕐᕈᓯᕐᕕᖕᓂᒡᓗ ᐃᓯᕐᓗᐊᕐᓂᑎᑦᓯᕕᖕᓂᒃ.

⁹ ᐅᓪᓗᖅ ᑕᒪᓐᓇ ᓇᓪᓕᐅᑎᒃᐸᑦ, ᐃᒡᓗᒐᓴᒡᔪᐊᑦ ᐱᔭᐅᔪᓐᓇᖏᑦᑐᐊᓗᐃᑦ ᐃᓄᐃᕈᑎᔪᒫᕐᐳᑦ ᓯᖁᑦᑎᕐᓂᑯᑐᐃᓐᓇᐅᓕᕐᓗᑎᒡᓗ, ᕼᐃᕔᑎᑦ ᐊᒧᕅᑎᓪᓗ ᐃᒡᓗᒐᓴᒡᔪᐊᒥᖕᓂᒃ ᕿᒤᕙᖕᓂᕆᓚᐅᕐᑕᖏᑎᑐᑦ ᐃᓴᕆᐊᓕᒥᐅᓂᒃ ᕿᒫᓇᓱᐊᕐᓗᑎᒃ, ᐃᓄᖃᕐᑐᕕᓂᐅᔮᕈᓐᓃᕈᒫᕐᒪᑦ.

¹⁰ ᐳᐃᒍᓚᐅᕋᑦᓯ ᒎᑎᒥᒃ ᐱᐅᓕᔨᑦᓯᓐᓂᒃ, ᐃᖅᑲᐅᒪᓇᓯᓗ ᕾᕐᑐᒥᒃ ᕿᒫᕕᒃᓴᑦᓯᓐᓂᒃ; ᑍᒤᒻᒪᑦ, ᐱᕈᕐᓰᒐᓗᐊᕈᑦᓯ ᐱᕈᕐᑐᓂᒃ ᑕᑯᒥᓇᕐᑐᓂᒃ ᑕᕝᕙᓐᖓᓪᓗ ᐃᓕᐅᖅᑬᓗᓯ ᐊᓯᑦᓯ ᒎᑎᓐᖑᐊᖏᓐᓄᑦ.

¹¹ ᐱᕈᕐᑎᑦᓯᕙᒃᑲᓗᐊᕐᑐᓯ ᐅᓪᓗᒥᑦᓮᓐᓇᖅ ᓄᓇᒧᑦ ᐃᓕᔭᑦᓯᓐᓂᒃ, ᓄᓇᕋᖃᓕᕐᓗᑎᒃ ᐅᓪᓛᓐᖑᕐᒪᑦ ᓄᓇᒧᑦ ᐃᓕᓚᐅᕐᑕᓯ; ᑭᓯᐊᓂ ᑲᑎᕐᓱᐃᓂᖃᕈᓐᓃᓛᕐᐳᖅ ᐅᓪᓗᒥ ᕿᒃᓵᒡᕕᖕᒥ ᐋᓐᓂᐊᓇᕐᑐᒥ ᐋᓐᓂᐊᕈᓐᓃᕐᓇᖏᑦᑐᒥᒡᓗ.

ᐊᑭᕋᕐᑐᕐᑏᑦ ᓵᓚᒋᔭᐅᓂᖏᑦ

¹² ᐃᓅᖃᑎᒌᒡᔪᐊᑦ ᐅᓄᕐᑐᑦ ᑲᓪᓕᕐᑐᑐᑦ ᑐᓴᕐᓴᐅᓕᕐᐳᑦ, ᑕᕆᐅᑉ ᐃᒃᑑᓕᔮᕐᓂᖓᑐᑦ! ᐃᓅᖃᑎᒌᒡᔪᐊᑦ ᓂᐱᕐᔪᐊᖏᑦ ᒪᓕᒃᔪᐊᑎᑐᑦ ᓄᓇᒧᑦ ᐊᑭᓐᖓᖃᑦᑕᕐᑐᑎᑐᑦ ᓂᐱᖃᓕᕐᐳᑦ.

¹³ ᐃᓄᒋᐊᒃᑐᕐᔪᐊᑦ ᓂᓪᓕᐊᔪᕐᔪᐊᖑᓕᕐᐳᑦ ᐃᒪᕐᔪᐃᑦ ᓂᐱᕐᔪᐊᖏᑎᑐᑦ, ᑖᑦᓱᒪᓕ ᐃᓂᕐᑎᕈᒫᕐᐰᑦ, ᕿᒫᓕᕈᒫᕐᐳᑦ ᐅᖓᓯᒃᑐᒧᑦ, ᓂᐊᖂᔭᒃᓴᐅᑉ ᓄᕗᖏᑕ ᐴᖓᑐᑦ ᐃᓗᓕᖃᖏᑦᑐᑐᑦ ᖃᖅᑲᐅᑉ ᖄᖏᑎᒍᑦ ᑎᒃᑕᐅᔪᑎᑐᑦ ᐊᓄᕆᒧᑦ, ᐃᕕᒐᕐᑎᑐᓪᓗ ᐅᓚᓗᔨᕋᕐᑐᒧᑦ ᖃᖓᑕᕋᕐᑎᑕᐅᔪᑎᑐᑦ.

¹⁴ ᐅᓐᓄᒃᑯᑦ ᑕᑯᒋᑦ, ᑲᑉᐱᐊᓇᕐᑐᖃᓕᕐᐳᖅ! ᐅᓪᓛᓐᖑᓛᐅᕐᑎᓐᓇᒍ ᓱᓇᑕᖃᕈᓐᓃᕐᐳᖅ! ᑍᒫᒃ ᑕᕝᕙ ᑭᒃᑯᑐᐃᓐᓁᑦ ᓄᓇᑦᑎᓐᓂᒃ ᓄᓁᕈᑦᔨᓇᓱᒃᑐᑦ ᐱᔪᒫᕐᐳᑦ, ᐅᕙᑦᑎᓐᓂᒡᓗ ᓱᓁᕈᑦᔨᓇᓱᐊᕐᑐᑦ ᓇᓚᐅᑦᑖᕈᑎᒃᑯᑦ ᐱᕖᕈᑦᔭᐅᓗᑎᒃ.