ᐂᓮᐊᓯᐅᑉ ᐊᒡᓚᖏᑦ 16 - ᐊᒡᓔᑦ ᐃᑦᔪᕐᖕᓁᑦᑐᑦ

ᒧᐊᐱᒥᐅᑦ ᓂᕆᐅᒋᔭᒃᓴᖃᕈᓐᓃᕐᓂᖓᑦ

¹ ᓰᐱᐅᑉ ᓄᕐᕋᖏᓐᓂᒃ ᑎᓕᓯᓯᒪᕗᑦ ᓄᓇᒥᒃ ᐊᐅᓚᑦᓯᖁᓪᓗᒋᑦ, ᓄᓇᓕᖕᓂᑦ ᓯᓚᒥᐅᓂᑦ, ᐃᓄᖃᖏᑦᑑᑉ ᑭᒡᓕᖓᓃᑦᑐᓂᑦ, ᓮᐅᓂᐅᑉ ᐸᓂᖓᑕ ᖃᖅᑲᖓ ᑎᑭᓪᓗᒍ.

² ᑎᖕᒥᐊᑎᑐᑦ ᐃᕙᕕᖕᒥᖕᓂᑦ ᑎᖏᑎᑕᐅᓯᒪᔪᑎᑐᑦ ᑍᒤᑦᓱᒫᕐᐳᑦ, ᒧᐊᐱᐅᑉ ᐸᓂᖏᑦ ᑰᖕᒥ ᐋᕐᓄᓂᒥ ᐅᑕᖅᑭᓗᑎᒃ ᐃᑳᕐᕕᖕᓂ.

³ ᔫᑕᒥᐅᓄᑦ ᐅᖃᕐᓗᑎᒃ, “ᖃᓄᐃᓕᐅᕐᑐᒃᓴᐅᖕᒪᖔᑦᑕ ᐅᖃᐅᑎᓚᐅᕐᑎᒍᑦ, ᓴᐳᑦᔭᐅᔪᒪᒐᑦᑕ, ᓇᐹᕐᑑᑉ ᑕᕐᕋᓕᓂᖓᓂ ᓂᒡᓚᕐᓯᕐᑐᑎᑐᑦ ᐅᓪᓗᓪᓗᐊᒥ ᑭᐊᒃᓯᐅᕐᑐᑎᑐᑦ. ᓇᕐᕈᒋᔭᐅᓯᒪᔪᑦ ᐃᔨᕐᓯᒪᓚᐅᕐᓯᐅᒃ, ᐅᖃᐅᓯᕆᓂᐊᕐᓇᒋᓪᓗ ᕿᒫᓂᑯᐃᑦ.

⁴ ᒧᐊᐱᒥᑦ ᐊᓂᑎᑕᐅᓯᒪᔪᒍᑦ ᐃᓕᑦᓯᓐᓂ ᑐᔪᕐᒥᐊᖑᑎᓚᐅᕐᑎᒍᑦ; ᓴᐳᑎᓚᐅᕐᑎᒍᑦ ᐊᓯᕈᐃᔨᒥᑦ.” ᐊᒃᓱᕈᕐᓇᕐᑐᖅ ᐊᓯᕈᕐᑕᐅᓇᕐᑐᓪᓗ ᐃᓱᓕᑦᓱᒫᕐᐳᑦ, ᓄᓇᓂᒡᓗ ᓱᓁᕈᑦᔨᓚᐅᕐᑐᑦ ᓄᖑᑦᓱᒫᕐᐳᑦ ᓄᓇᒥᑦ.

⁵ ᑕᕝᕙ ᑍᕕᑎᐅᑉ ᑭᖑᕚᖏᓐᓂᑦ ᐱᓯᒪᔪᒥᒃ ᐊᖓᔪᖅᑳᕐᔪᐊᕐᑖᕈᒪᕐᐳᑦ, ᐃᓄᖁᑎᓂᓗ ᐊᐅᓚᑦᓱᒫᕐᐰᑦ ᓱᕐᕋᔪᐃᑦᑐᒥᒃ ᓇᒡᓕᖕᓂᕐᒧᑦ, ᐃᓱᐊᕐᑐᒥᒃ ᐱᓇᓱᐊᕈᒫᕐᐳᖅ ᑕᒪᕐᒥᒡᓗ ᐊᑦᔨᒌᑦᓯᐊᕐᑐᒥᒃ ᐱᓇᓱᐊᕐᕕᐅᑎᑦᓱᒫᕐᐰᑦ.

⁶ ᑐᓴᐅᒪᕗᒍᑦ ᒧᐊᐱᒥᐅᑦ ᐱᐅᔪᕆᔪᕐᔪᐊᖑᓂᕋᕐᑕᐅᑎᓪᓗᒋᑦ, ᐱᐅᔪᕆᔪᕐᔪᐊᖑᓚᐅᕐᒪᑦ; ᓲᖑᓴᒃᑐᕐᔪᐊᖑᓪᓗᓂ, ᓇᖕᒥᓂᕐᓯᐅᕐᓗᑎᒡᓗ, ᐱᔪᓐᓇᕐᓂᕋᕐᓂᖏᓪᓕ ᐃᓗᓕᖃᓐᖏᓚᑦ.

⁷ ᑍᒤᒻᒪᑦ ᒧᐊᐱᒥᐅᑦ ᓂᐱᖃᕐᓗᑎᒃ ᕿᐊᓕᕐᓕᑦ, ᒧᐊᐱᒥᒃ ᕿᐊᑦᔪᑎᖃᓕᕐᓕᑦ, ᐅᒡᒍᐊᕐᓕᑦ ᐊᒃᑐᕐᑕᐅᓯᒪᓗᑎᒃ, ᓂᐊᖂᔧᓪᓗ ᐸᐅᕐᖓᐅᔭᓖᑦ ᓂᕆᕙᓚᐅᕐᑕᑎᒃ ᐱᓪᓗᒋᑦ ᑭᕆ-ᕼᐃᕆᑎᒥ.

⁸ ᕼᐃᓴᐸᓂᐅᑉ ᖃᓂᒋᔭᖓᓂ ᐆᒪᔪᒃᑯᕖᑦ ᕔᓂᒃᓴᓂᒡᓗ ᐱᕈᕐᓰᕖᑦ ᓄᓇᒥ ᓯᑉᒪᒦᑦᑐᑦ ᑕᒪᕐᒥᒃ ᐊᓯᕈᕐᑕᐅᔪᒫᕐᐳᑦ, ᕔᓂᒃᓴᓂᒃ ᑖᒃᑯᓇᓐᖓᑦ ᐱᓯᒪᔪᓂᑦ ᐃᓅᖃᑎᒌᒡᔪᐊᑦ ᐊᖓᔪᖅᑳᕐᔪᐊᖏᑦ ᐋᖓᔮᓚᕿᕙᓚᐅᕐᐳᑦ ᕔᓂᒃᓴᓂᒃ ᐱᕈᕐᓰᕖᑦ ᐅᖓᓯᒃᑐᒧᑦ ᑎᑭᐅᑎᓯᒪᕙᓚᐅᕐᐳᑦ ᔧᔨᕆᐅᑉ ᐃᒡᓗᒐᓴᒡᔪᐊᖏᑦ ᑎᑭᓪᓗᒋᑦ, ᓯᕿᓂᐅᑉ ᓄᐃᕕᐊᑕ ᓇᓛᓄᐊᖓᓂᖓ ᓱᓇᖃᔪᐃᑦᑐᒧᑦ ᑎᑭᐅᓯᒪᓪᓗᓂ, ᐊᒻᒪ ᓯᕿᓂᐅᑉ ᓂᐱᕕᐊᑕ ᓇᓛᓄᐊᖓᓂᖓ ᑕᓯᐅᑉ ᑐᖁᖓᔪᒥᒃ ᐊᑎᓕᐅᑉ ᐊᑭᐊᓄᑦ ᑎᑭᐅᓯᒪᓪᓗᑎᒃ.

⁹ ᔧᔨᕆᒥᐅᑦ ᖁᕝᕕᐅᕐᑎᓪᓗᒋᑦ ᖁᕝᕕᐅᖃᑎᒋᔪᒪᕙᒃᑲ ᓯᑉᒪᐅᑉ ᕔᓂᒃᓴᓂᒃ ᐱᕈᕐᓰᕕᖏᑦ ᐱᓪᓗᒋᑦ; ᖁᕝᕕᓐᓄᑦ ᖃᐅᓯᓕᕐᑎᑦᓱᒪᕙᑦᓯ ᕼᐃᓴᐸᓂᒥᐅᑦ ᐃᓕᐊᓚᒥᐅᓪᓗ; ᑲᑎᕐᓱᐃᑎᓪᓗᓯ ᖁᕕᐊᓱᖕᓂᕐᒧᑦ ᓂᓪᓕᐊᓂᕆᕙᓚᐅᕐᑕᓯ ᓂᐸᖏᕐᒪᑦ.

¹⁰ ᖁᕕᐊᓱᖕᓂᖅ ᐊᓕᐊᓁᒍᓱᖕᓂᕐᓗ ᐲᕐᑕᐅᓯᒪᖕᒪᑎᒃ ᐱᕈᕐᓰᕕᖕᒥᑦ ᐱᕈᑦᓯᐊᕐᕕᐅᕙᓚᐅᕐᑐᒥᑦ; ᐱᕈᕐᓰᕕᖕᓂ ᕔᓂᒃᓴᓕᐅᕐᕕᖕᓂ ᐃᓐᖏᕐᑐᖃᕈᓐᓃᕐᒪᑦ, ᕾᒐᓛᕐᓂᖃᕈᓐᓃᕐᓗᓂᓗ; ᕔᓂᒃᓴᓂᒃ ᐃᑦᑏᔧᔪᖃᕈᓐᓃᕆᕗᖅ ᕔᓂᓕᐅᕐᕕᖕᓂ; ᖁᕕᐊᓱᒡᕙᓗᒃᑐᓂᖅ ᑐᓴᕐᓴᐅᔪᖃᕈᓐᓃᕐᐳᖅ ᕔᓂᓕᐅᕐᕕᖕᓂ.

¹¹ ᑍᒤᒻᒪᑦ ᑕᕐᓂᕋ ᕿᒃᓵᖕᓂᕐᒧᑦ ᓂᓪᓕᐊᓕᕐᐳᖅ ᑭᕆ-ᕼᐃᕆᑐᑦ ᒧᐊᐱ ᐱᓪᓗᒍ.

¹² ᒧᐊᐱᒥᐅᑦ ᐅᐸᒍᑎᒃᐸᑕ ᒎᑎᒥᖕᓄᑦ, ᑕᖃᑐᐃᓐᓇᕐᓂᐊᓕᕐᐳᑦ ᒎᑎᓐᖑᐊᖃᕐᕕᖕᓂ ᖃᖅᑲᐅᑉ ᖃᖓᓃᑦᑐᒥ, ᑐᒃᓯᐊᕐᕕᖕᒥᖕᓄᑦ ᑐᒃᓯᐊᕆᐊᕐᑐᕐᐸᑕ ᐃᑲᔪᕐᑕᐅᕚᓪᓕᕐᓂᐊᓐᖏᓚᑦ.

¹³ ᐊᑕᓂᖅ ᐃᒫᒃ ᐅᖃᓚᐅᕐᐳᖅ ᒧᐊᐱᒥᐅᑦ ᐱᓪᓗᒋᑦ ᑍᑦᓱᒪᓂ.

¹⁴ ᒫᓐᓇᓕ ᐊᑕᓂᖅ ᐃᒫᒃ ᐅᖃᓕᕐᐳᖅ, “ᐊᕐᕌᒍᐃᑦ ᐱᖓᓱᑦ ᓈᒃᐸᑕ ᐃᖅᑲᓁᔭᕐᑎᑎᑐᑦ ᐊᕐᕌᒍᒥ ᐱᓇᓱᐊᕐᑐᑎᑐᑦ ᒧᐊᐱᒥᐅᑦ ᐱᔪᓐᓇᕐᓂᐊᓗᖏᑦ ᓄᖑᑦᓱᒫᕐᐳᑦ, ᐅᓄᕐᑐᓂᒃ ᐃᓄᖃᕋᓗᐊᕐᐳᖅ, ᐅᓄᖏᑦᑐᓂᒡᓕ ᐊᒥᐊᒃᑯᔪᒫᕐᐳᑦ, ᐊᒥᐊᒃᑰᔪᓪᓗ ᓄᑭᑭᑦᑑᓪᓗᑎᒃ.”