ᐂᓮᐊᓯᐅᑉ ᐊᒡᓚᖏᑦ 13 - ᐊᒡᓔᑦ ᐃᑦᔪᕐᖕᓁᑦᑐᑦ

ᒎᑎᐅᑉ ᓱᒋᐊᕐᓯᔪᒫᕐᓂᖓ ᐹᐱᓘᓂᒥᒃ

¹ ᐅᑯᐊ ᐅᖃᐅᓰᑦ ᐹᐱᓘᓂᒧᑦ ᑐᕌᖓᔪᑦ, ᐂᓮᐊᓯᐅᑉ ᐂᒨᓯᐅᑉ ᐃᕐᓂᖓᑕ ᑕᑯᓚᐅᕐᑕᖏᑦ.

² “ᖃᖅᑲᐅᑉ ᐳᕐᑐᔫᑉ ᐱᕈᕐᑐᖃᖏᑦᑑᑉ ᖄᖓᓂ ᓇᓗᓁᒃᑯᑦᓯᓕᕆᑦᓯ, ᓂᐱᖅᑯᕐᑐᓗᓯ ᓂᓪᓕᐊᕕᒋᓕᕐᓯᐅᒃ; ᑕᓕᑦᓯᓐᓄᓪᓗ ᓄᓗᕋᕐᓗᒋᑦ, ᐃᑎᕈᓐᓇᖁᓪᓗᒋᑦ ᐊᖓᔪᖅᑳᑦ ᐃᑎᕐᑕᕐᕕᖓᒍᑦ.

³ ᐃᑦᔪᕐᓁᑎᑕᒃᑲ ᐱᖁᓯᒪᕙᒃᑲ; ᕾᖁᓪᓗᒋᓪᓗ ᐊᔪᖏᑦᑐᕐᔪᐊᖁᑎᒃᑲ ᓂᓐᖓᐅᑎᓯᒪᔭᓐᓂᒃ ᐱᓇᓱᐊᖁᓪᓗᒋᑦ, ᑖᒃᑯᐊ ᐊᖏᔪᕈᕐᑎᑕᐅᓂᓐᓂᒃ ᖁᕕᐊᓲᑎᖃᕐᑐᑦ.

⁴ “ᐃᓄᒐᓴᒡᔪᐊᑦ ᖃᖅᑲᓃᑦᑐᑦ ᓂᐱᕐᔪᐊᖏᑦ ᑐᓴᕐᓴᐅᕗᑦ, ᓲᕐᓗ ᐃᓄᒋᐊᒃᑐᕐᔪᐊᓂᑦ ᐱᔪᑎᑐᑦ! ᓂᐱᕐᔪᐊᖃᕐᐳᖅ ᐊᖓᔪᖅᑳᕐᔪᐊᖃᕐᕕᖕᓂᑦ ᐱᔪᓂᒃ, ᐃᓅᖃᑎᒌᒡᔪᐊᑦ ᐊᖓᔪᖅᑲᐅᕕᖏᑦ ᑲᑎᒪᓕᕐᒪᑕ! ᕿᓚᖕᒥᐅᒐᓴᒡᔪᐃᑦ ᐊᑕᓂᖓᑦ ᑲᔪᖏᕐᓮᓕᕐᒪᑦ ᐃᓄᒋᐊᒃᑐᕐᔪᐊᓂᒃ ᐅᓇᑕᕐᓂᕐᒧᑦ.

⁵ ᑖᒃᑯᐊ ᓄᓇᒥᑦ ᐅᖓᓯᒃᑐᒥᑦ ᐱᕗᑦ, ᕿᓔᑦ ᐃᓱᐊᓂᑦ, ᐊᑕᓂᐅᑉ ᐅᓇᑕᐅᑏᓪᓗ ᓂᓐᖓᐅᑦᔨᓯᒪᓂᕐᒥᓄᑦ ᐱᓇᓱᐊᕐᓂᕆᕔᑦ, ᓄᓇᕐᔪᐊᖅ ᐃᓘᓐᓈᑦ ᐊᓯᕈᕈᒪᓪᓗᒍ.

⁶ “ᓂᐱᖅᑯᕐᑐᓗᓯ ᕿᐊᒋᑦᓯ, ᐊᑕᓂᐅᑉ ᐅᓪᓗᖓ ᖃᒡᓕᓕᕐᒪᑦ; ᐊᔪᒐᖃᖏᑦᑐᕐᔪᐊᑉ ᐊᓯᕈᐃᕕᒃᓴᖓ ᑎᑭᓕᕐᒪᑦ!

⁷ ᑍᒤᒻᒪᑦ ᐊᒡᒐᓕᒫᑦ ᓄᑮᕈᑎᔪᒫᕐᐳᑦ, ᐃᓄᓕᒫᓪᓗ ᐆᒻᒪᑎᖏᑦ ᓴᐱᓕᕈᒫᕐᐳᑦ,

⁸ ᑲᑉᐱᐊᓱᓕᕈᒫᕐᐳᓪᓗ. ᐋᓐᓂᕐᓇᕐᑐᕐᔪᐊᕐᒧᑦ ᓂᐹᓂᕐᒧᓪᓗ ᑎᑭᑕᐅᔪᒫᕐᐳᑦ; ᐋᓐᓂᐊᔪᐊᓘᔪᒫᕐᐳᑦ ᐊᕐᓇᑐᑦ ᐃᕐᓂᓱᒃᑐᑐᑦ; ᐃᕐᓯᓂᕐᒧᑦ ᐃᒻᒥᖕᓄᑦ ᑕᑯᓐᓇᖃᑦᑕᐅᑎᑐᐃᓐᓇᕈᒫᕐᐳᑦ; ᑮᓇᖏᓪᓗ ᑕᑯᒥᓁᓕᔪᒫᕐᐳᑦ ᐃᑯᒪᔪᑐᑦ.

⁹ ᑕᑯᒋᑦ, ᐊᑕᓂᐅᑉ ᐅᓪᓗᖓ ᑎᑭᓕᕐᐳᖅ, ᓂᑲᓱᖏᓪᓗᓂ, ᓂᓐᖓᐅᒪᒻᒪᕆᒡᓗᓂ ᓂᓐᖓᐅᑦᔨᓯᒪᓗᓂᓗ, ᓄᓇ ᓱᓁᕈᑦᓯᐊᕈᒫᕐᐹ ᐊᔪᕐᑐᓕᔪᓪᓗ ᑕᕝᕙᓃᑦᑐᑦ ᓄᖑᓪᓗᒋᑦ.

¹⁰ ᐅᓪᓗᕆᐊᑦ ᕿᓚᖕᒦᑦᑐᑦ ᐋᖅᑭᒃᓯᒪᓂᖏᓪᓗ ᖃᐅᒪᔪᓐᓃᕈᒫᕐᐳᑦ, ᓯᕿᓂᖅ ᑖᕐᓯᔪᒫᕐᐳᖅ ᓄᐃᓕᕈᓂ, ᑕᖅᑭᕐᓗ ᖃᐅᒪᔪᓐᓃᕈᒫᕐᐳᖅ.

¹¹ “ᓄᓇᕐᔪᐊᖅ ᓱᒋᐊᕈᒫᕐᐸᕋ ᐊᔪᕐᑐᓕᓃᑦ ᐱᓪᓗᒋᑦ, ᐱᐅᖏᑦᑐᓕᔪᓪᓗ ᐱᐅᖏᑦᑐᓕᓂᖏᑦ ᐱᓪᓗᒋᑦ; ᐱᐅᔪᕆᔪᑦ ᑲᑉᐱᐊᒋᔭᐅᔪᒪᓂᖏᑦ ᐃᓱᓕᑎᑦᓱᒫᕐᐸᒃᑲ, ᒥᑭᒡᓕᑎᓪᓗᒋᓪᓗ ᐊᔪᖏᓐᓇᓱᒋᔪᑦ ᓂᑲᒍᓱᖃᖏᓐᓂᖏᑦ.

¹² ᐃᓄᐃᑦ ᐅᓄᖏᓐᓂᕐᓴᐅᓕᕐᑎᑦᓱᒫᕐᐸᒃᑲ ᒎᓗᑦᓯᐊᕙᖕᓂᑦ, ᐃᓄᒡᓗ ᐅᐱᕼᐃᒦᑦᑐᓂᑦ ᒎᓗᓕᕆᐅᑎᓂᑦ.

¹³ ᑍᒤᒻᒪᑦ ᕿᓔᑦ ᓴᔪᒃᑎᑦᓱᒪᕙᒃᑲ, ᓄᓇᕐᔪᐊᕐᓗ ᐊᐅᓚᓂᕐᒥᓄᑦ ᐃᓂᒥᓂᑦ ᓅᑦᓱᒫᕐᐳᖅ, ᕿᓚᖕᒥᐅᒐᓴᒡᔪᐃᑦ ᐊᑕᓂᖓᑦᑕ ᓂᓐᖓᐅᓯᖓᓂ ᐅᓪᓗᒥᓗ ᓂᓐᖓᐅᑦᔨᕕᖓᓂ.

¹⁴ “ᕿᒫᔪᒫᕐᐳᑦ ᒐᔨᐊᓕᑎᑐᑦ ᐆᒪᔪᕐᓯᐅᕐᑐᒥᑦ ᕿᒫᔪᑎᑐᑦ, ᓰᐱᑎᑐᓪᓗ ᐰᕐᓯᔨᖃᖏᑦᑐᑎᑐᑦ; ᐃᓄᓕᒫᑦ ᓵᓐᖓᓕᕈᒫᕐᐳᑦ ᐃᓅᖃᑎᒥᖕᓄᑦ, ᐃᓄᓕᒫᓪᓗ ᓇᖕᒥᓂᖅ ᓄᓇᒥᖕᓄᑦ ᕿᒫᔪᒫᕐᐳᑦ.

¹⁵ ᓇᓪᓕᐊᑦ ᓇᓂᔭᐅᔪᑦ ᑲᐱᔭᐅᓗᑎᒃ ᑐᖁᑕᐅᔪᒫᕐᐳᑦ, ᐊᖑᔭᐅᔪᓪᓗ ᓴᕕᒡᔪᐊᒧᑦ ᑐᖁᑕᐅᔪᒫᕐᐳᑦ.

¹⁶ ᕿᑐᕐᖓᓛᖏᑦ ᐃᒋᑕᐅᓗᑎᒃ ᑐᖁᕋᕐᑕᐅᔪᒫᕐᐳᑦ ᑕᑯᓐᓈᕐᑎᓪᓗᒋᑦ; ᐃᒡᓗᖏᓪᓗ ᐃᓵᕐᓴᕐᑕᐅᓗᑎᒃ ᑎᒍᓚᕕᐅᔪᒫᕐᐳᑦ, ᓄᓕᐊᖏᓪᓗ ᖁᓄᔪᕐᓂᐊᕐᑕᐅᓗᑎᒃ ᐱᖃᑎᒋᔭᐅᔪᒫᕐᐳᑦ.

¹⁷ “ᑕᑯᒋᑦ, ᒥᑏᔅᒥᐅᓂᒃ ᑲᔪᖏᕐᓮᓕᕐᐳᖓ ᑖᒃᑯᓂᖓ ᐅᓇᑕᕆᐊᕈᒪᓕᖁᓪᓗᒋᑦ. ᓯᐅᓪᕕᕆᒥᒃ ᓱᓇᐅᔪᕆᒃᓯᖏᑦᑐᓂᒃ ᒎᓗᒥᒡᓗ ᖁᕕᐊᒋᔭᖃᕋᑎᒃ.

¹⁸ ᐱᑎᒃᓯᒥᖕᓄᑦ ᑐᖁᕅᔪᒫᕐᐳᑦ ᐃᓅᓱᒃᑐᓂᒃ; ᓂᑲᒍᓱᖃᓐᖏᓚᑦ ᐃᒡᓕᐊᕐᒥᑦ ᐊᓂᓯᒪᔪᓂᒃ; ᓄᑕᖅᑲᓂᒡᓗ ᓇᒡᓕᒍᓱᒐᑎᒃ.

¹⁹ ᐹᐱᓘᓂ ᐊᖓᔪᖅᑲᐅᕕᓕᒫᓂᑦ ᑕᑯᒥᓇᕐᓂᕐᐹᖑᔪᖅ, ᐅᐱᓐᓇᕐᓗᓂᓗ ᐃᓄᖏᓐᓄᑦ ᑲᐅᓪᑎᐊᒥᐅᓄᑦ, ᐊᑦᔨᖃᕈᒫᕐᐳᖅ ᓱᑑᒪᒥᒃ ᒍᒨᕋᒥᒡᓗ.

²⁰ ᐃᓄᖃᓚᐅᕐᓯᒪᔪᓐᓃᕈᒫᕐᐳᖅ ᓄᓇᒋᔭᐅᕙᒍᓐᓃᕐᓗᓂᓗ ᑭᖑᕚᕇᓕᒫᓄᑦ, ᐋᕋᑉᒥᐅᓄᑦ ᑐᐱᖃᕐᕕᐅᔪᓐᓇᕈᒫᓐᖏᓚᖅ, ᓰᐱᓕᕆᔩᓪᓗ ᓰᐱᖁᑎᑎᒃ ᑕᒫᓃᑎᑦᓱᓐᓇᕈᒫᓐᖏᓔᑦ.

²¹ ᐆᒪᔪᓄᓪᓕ ᓄᔪᐊᕐᑐᓄᑦ ᐃᓂᒋᔭᐅᔪᒫᕐᐳᖅ, ᐃᒡᓗᕕᓂᖏᑦ ᑕᑕᑦᓱᒫᕐᐳᑦ ᐆᒪᔪᓂᒃ ᓂᓪᓕᐊᔪᓂᒃ; ᑎᖕᒥᐊᕐᔪᐊᓄᓪᓗ ᐋᔅᑐᕆᑦᓯᓄᑦ ᖃᖓᑕᔪᓐᓇᖏᑦᑐᓄᑦ ᓇᔪᒐᐅᓗᓂ, ᑕᕝᕙᓂᓗ ᓴᑍᕇᑦ ᑖᓂᓯᖃᑦᑕᕈᒫᕐᐳᑦ.

²² ᕿᒻᒥᖓᔪᑦ ᕼᐋᐄᓁᑦ ᒥᐊᒡᒎᕈᒫᕐᐳᑦ ᓄᕗᒐᓴᒡᔪᐊᕕᓂᕐᓂ ᑎᕆᒐᓂᐊᖓᔪᓪᓗ ᔮᑯᐃᑦ ᐊᖓᔪᖅᑳᕐᔪᐊᑦ ᐃᒡᓗᕐᔪᐊᕕᓂᖏᓐᓂ ᑕᑯᒥᓇᕐᑐᒦᓪᓗᑎᒃ; ᐃᓱᓕᕝᕕᒃᓴᖓᑦ ᖃᒡᓕᕗᖅ, ᐅᓪᓗᐃᓪᓗ ᐊᑯᓂᐅᓂᐊᕈᓐᓃᕐᓗᑎᒃ.”