ᐂᓮᐊᓯᐅᑉ ᐊᒡᓚᖏᑦ 11 - ᐊᒡᓔᑦ ᐃᑦᔪᕐᖕᓁᑦᑐᑦ

ᔨᓯᐅᑉ ᑭᖑᕚᖓᑕ ᐊᖓᔪᖅᑳᕐᔪᐊᖑᓂᒃᓴᖓ

¹ ᐱᕈᓕᕐᑐᖃᕈᒫᕐᐳᖅ ᔨᓯᐅᑉ ᓇᐹᕐᑐᕕᓂᖓᑕ ᑭᐱᔭᐅᓂᖓᓂᑦ, ᐊᕙᓚᖓᔪᒥᒃ ᐱᕈᕐᑐᖃᕈᒫᕐᐳᖅ ᐊᒫᖓᓂᑦ ᓴᖅᑭᑦᑐᒥᒃ.

² ᐊᑕᓂᐅᑉ ᐊᓂᕐᓂᖓᑕ ᐃᓂᒋᔪᒫᕐᐹ ᐊᓂᕐᓂᐅᑉ ᓯᓚᑐᓂᖃᕐᑎᑦᓯᔫᑉ ᑐᑭᓯᓂᖃᕐᑎᑦᓯᔫᓪᓗ, ᐊᓂᕐᓂᐅᑉ ᑕᓯᐅᕐᓯᓂᖃᕐᑎᑦᓯᔫᑉ ᐱᔪᓐᓇᕐᓂᕐᔪᐊᖃᕐᑎᑦᓯᔫᓪᓗ ᐊᓂᕐᓂᐅᑉ ᖃᐅᔨᒪᓂᖃᕐᑎᑦᓯᔫᑉ ᐊᑕᓂᕐᒥᒡᓗ ᓯᕘᕋᓂᖃᕐᑎᑦᓯᔫᑉ.

³ ᐊᑕᓂᕐᒥᒃ ᓯᕘᕋᓂᖅ ᖁᕕᐊᒋᔪᒫᕐᐹ, ᐃᖅᑲᕐᑐᐃᔪᒫᓐᖏᓚᖅ ᑕᑯᔭᒥᒍᑦ ᑐᓴᕐᑕᒥᒍᓪᓘᓐᓃᑦ;

⁴ ᐃᓱᐊᕐᑐᓕᓂᒃᑯᑦ ᐊᔪᕐᓴᕐᑐᑦ ᐊᑦᔨᒌᒃᑎᑦᓱᒫᕐᐰᑦ ᐊᑦᔨᒌᒃᑎᑦᓯᓂᕐᒥᒍᓪᓗ ᐱᓇᓱᐊᕐᕕᖃᕈᒫᕐᐳᖅ ᓄᓇᒥ ᒥᑭᒡᓕᑎᕐᓯᒪᔪᓂᒃ; ᓄᓇ ᐊᓇᐅᔪᒫᕐᐹ ᐊᓇᐅᑕᕐᒧᑦ ᖃᓂᕐᒥᓂᑦ ᐱᔪᒧᑦ, ᖃᓂᖓᑕᓗ ᓱᐱᓯᓂᖓᓄᑦ ᐊᔪᕐᑐᓕᔪᑦ ᑐᖁᑦᓱᒫᕐᐰᑦ.

⁵ ᐃᓱᐊᕐᑐᓕᓂᖅ ᕿᑎᕐᒥᓂ ᑕᑦᓯᕈᑎᒋᔪᒫᕐᐹ ᓱᖁᓯᔪᐃᑦᑑᓂᕐᓗ ᕿᑎᕐᒥᒍᑦ ᑕᑦᓯᒋᓗᒍ.

⁶ ᐊᒪᕈᐃᑦ ᓰᐲᓪᓗ ᐃᓂᖃᖃᑎᒌᒍᒫᕐᐳᑦ, ᓕᐅᐰᓪᓗ ᐊᖁᐱᖃᑎᖃᕈᒫᕐᐳᑦ ᒎᑦᓰᑦ ᓄᕐᕋᖏᓐᓂᒃ, ᐃᒻᒧᒃᓯᐅᒊᓪᓗ ᓄᕐᕋᖏᑦ ᓔᔧᓪᓗ ᖁᐃᒃᓯᑦᓯᐊᖑᔪᓪᓗ ᓄᕐᕅᑦ ᑲᑎᓐᖓᔪᒫᕐᐳᑦ, ᓄᑕᕋᑯᓗᒡᓗ ᑖᒃᑯᓂᖓ ᑕᓯᐅᕐᓯᔪᒫᕐᐳᑦ.

⁷ ᐃᒻᒧᒃᓯᐅᒊᓪᓗ ᓇᓄᐃᓪᓗ ᓂᕆᖃᑎᒌᒍᒫᕐᐳᑦ, ᐃᒻᒧᒃᓯᐅᒊᑦ ᓄᕐᕋᖏᑦ ᐊᒃᓮᓪᓗ ᓇᓄᐃᑦ ᐊᑎᕐᑕᖏᑦ ᐊᖁᐱᖃᑎᒌᒍᒫᕐᐳᑦ; ᓛᔭᓪᓗ ᐃᕕᒐᕐᓂᒃ ᐃᒻᒧᒃᓯᐊᒐᕐᑎᑐᑦ ᓂᕆᖃᑕᐅᖃᑦᑕᕈᒫᕐᐳᑦ.

⁸ ᓄᑕᕋᓛᕐᓗ ᐱᓐᖑᐊᕈᒫᕐᐳᖅ ᖁᒡᓗᒋᐊᑉ ᑐᖁᓐᓇᕐᑐᓕᐅᑉ ᓯᑎᖓᑕ ᓴᓂᐊᓂ, ᓄᑕᕈᑯᓘᓪᓗ ᐱᓱᒍᓐᓇᓕᕐᑑᑉ ᐊᒡᒐᖕᒥᓄᑦ ᑯᒡᓗᒋᐊᑉ ᓯᑎᖓ ᑲᐅᔪᒫᕐᐹ.

⁹ ᐋᓐᓂᕐᑕᐅᔪᖃᕈᒫᓐᖏᓚᖅ ᑐᖁᑕᐅᔪᖃᖏᓪᓗᓂᓗ, ᐃᓘᓐᓇᖏᓐᓂᒃ ᖃᖅᑲᖁᑎᓐᓂ ᐃᑦᔪᕐᓁᑦᑐᒥ; ᓄᓇᓗ ᑕᑕᑦᓱᒫᕐᐳᖅ ᐊᑕᓂᕐᒥᒃ ᖃᐅᔨᒪᔭᖃᑦᓯᐊᕐᓂᕐᒥᒃ ᓲᕐᓗ ᑕᕆᐅᕌᓗᐃᑦ ᐃᒪᕐᐱᖕᒥ ᐅᓕᒃᓯᓯᒪᓂᖓᑐᑦ.

ᐃᓄᐃᑦ ᐊᐅᓪᓚᕈᑦᔭᐅᓯᒪᓚᐅᕐᑐᑦ ᐅᑎᕈᒫᕐᓂᖓᑦ

¹⁰ ᐅᓪᓗᖅ ᑕᒪᓐᓇ ᓇᓪᓕᐅᑎᒃᐸᑦ ᔨᓯᐅᑉ ᑭᖑᕚᖓ, ᓂᑯᕕᑦᓱᒫᕐᐳᖅ ᐃᓄᖕᓄᑦ ᓇᓗᓁᒃᑯᑕᐅᓗᓂ; ᔫᑎᐅᖏᑦᑐᑦ ᐃᓅᖃᑎᒌᒡᔪᐊᑦ ᑖᑦᓱᒥᖓ ᕿᓂᕈᒫᕐᐳᑦ, ᓇᔪᒐᖓᓗ ᐱᓐᓇᕐᓇᕐᑐᕐᔪᐊᖑᔪᒫᕐᐳᖅ.

¹¹ ᐅᓪᓗᖅ ᑕᒪᓐᓇ ᓇᓪᓕᐅᑎᒃᐸᑦ ᐊᑕᓂᐅᑉ ᐊᒡᒐᓂ ᐃᓴᒍᒫᕐᐰᑦ ᐃᓄᖁᑎᓂ ᐊᒥᐊᒃᑰᔪᑦ ᐅᑎᕐᑎᑦᓱᒪᓗᒋᑦ, ᐊᓯᕆᐊᒥᑦ ᐄᑦᔨᑉᑎᒥᓪᓗ, ᐹᑐᕉᓯᒥᑦ ᐃᑎᐅᐱᐊᒥᓪᓗ, ᐃᓛᒻᒥᑦ ᓯᓇᕆᒥᓪᓗ, ᕼᐊᒫᑎᒥᑦ ᕿᑭᕐᑕᓂᓪᓗ ᐃᒪᕕᖕᒦᑦᑐᓂᑦ.

¹² ᐃᓅᖃᑎᒌᒡᔪᐊᓄᓪᓗ ᓇᓗᓁᒃᑯᑕᕐᒥᒃ ᓴᖅᑭᑎᑦᓯᔪᒫᕐᐳᖅ, ᓇᕐᕈᒋᔭᐅᔪᓪᓗ ᐃᓴᕆᐊᓕᒥᐅᓂᑦ ᑲᑎᑎᑦᓱᒫᕐᐰᑦ, ᓇᒧᑐᐃᓐᓇᕐᓗ ᓯᐊᒻᒪᒃᓯᒪᔪᑦ ᔫᑕᐅᑉ ᑭᖑᕚᖏᑦ ᑲᑎᕐᓱᕈᒫᕐᐰᑦ ᓄᓇᕐᔪᐊᑉ ᓯᑕᒪᐅᓕᖅᑲᖓᓂᖓᓂᑦ ᐱᓯᒪᔪᑦ.

¹³ ᐃᕗᕅᒥᐅᓪᓗ ᐱᔭᑑᔪᒪᓂᖓ ᓄᖅᑲᕈᒫᕐᐳᖅ, ᔫᑕᐅᓪᓗ ᑭᖑᕚᖏᑕ ᓲᖑᓴᖕᓂᖓ ᓇᑲᑕᐅᔪᒫᕐᐳᖅ; ᐃᕗᕅᒥᐅᑉ ᑭᖑᕚᖏᑦ ᔫᑕᐅᑉ ᑭᖑᕚᖏᓐᓂᒃ ᓯᖕᓇᕕᖃᕈᓐᓃᕈᒫᕐᐳᑦ, ᔫᑕᐅᓪᓗ ᑭᖑᕚᖏᑕ ᐃᕗᕅᒥᐅᑉ ᑭᖑᕚᖏᑦ ᓲᖑᓴᒡᕕᒋᔪᓐᓃᕈᒫᕐᐹᑦ.

¹⁴ ᐊᐅᕐᓵᕐᑐᑎᑐᓪᓕ ᐊᒻᒧᐊᒍᒫᕐᐴᒃ ᐱᓕᔅᑍᓂᒥᐅᓄᑦ ᐅᓇᑕᕆᐊᕐᓗᑎᒃ; ᑐᓄᐊᓐᓂᑦ ᓯᕿᓂᐅᑉ ᓄᐃᕕᐊᑕ ᓇᓛᓃᑦᑐᓄᑦ; ᑲᑐᑦᔨᓗᑎᒃ ᐊᕐᓵᕐᓂᔪᒫᕐᐳᑦ ᓯᕿᓂᐅᑉ ᓄᐃᕕᐊᓂᒥᐅᓂᒃ; ᐱᔪᓐᓇᕐᓂᖃᕐᓗᑎᒃ ᐅᓇᑕᕆᐊᕈᒫᕐᐳᑦ ᐄᑐᒥᒥᐅᓂᒃ ᒧᐊᐱᒥᐅᓂᒡᓗ, ᐊᒧᓁᑎᒥᐅᓪᓗ ᑖᒃᑯᓂᖓ ᓈᓚᓕᕈᒫᕐᐳᑦ.

¹⁵ ᐊᑕᓂᐅᓪᓗ ᐊᓯᕈᑦᓯᐊᕈᒫᕐᐹ ᐄᑦᔨᑉᑎᐅᑉ ᐃᒪᖓᑕ ᑲᖏᕐᓱᐊ; ᐊᓄᕆᕐᔪᐊᖃᕐᑎᑦᓯᓗᓂ ᐆᓇᕐᑐᒥᒃ ᐃᕗᕅᑎᐅᑉ ᑰᒡᔪᐊᖓ ᓵᓐᖓᔪᒫᕐᐹ, ᐊᓇᐅᔪᒫᕐᐹ 7ᐅᓕᖅᑲᖓᔪᓂᒃ ᑰᖃᓕᕐᑎᓪᓗᒍ, ᐃᓄᐃᓪᓗ ᐃᑳᖃᑦᑕᓕᕈᒫᕐᐳᑦ ᐱᓱᒡᓗᑎᒃ.

¹⁶ ᐊᓯᕆᐊᒥᓪᓗ ᐱᔪᒥᒃ ᐊᖅᑯᑎᕐᔪᐊᕐᑕᖃᓕᕈᒫᕐᐳᖅ ᐃᓄᖁᑎᖏᑕ ᐊᒥᐊᒃᑰᔪᑦ ᐃᖏᕐᕋᕕᒃᓴᖓᓂᒃ ᑕᕝᕙᓐᖓᑦ, ᓲᕐᓗ ᐃᓴᕆᐊᓕᒥᐅᑦ ᐊᐅᓪᓚᓚᐅᕐᓂᖏᑎᑐᑦ ᐄᑦᔨᑉᑎᐅᑉ ᓄᓇᖓᓂᑦ.