ᕼᐆᓯᐊᑉ ᐊᒡᓚᖏᑦ 8 - ᐊᒡᓔᑦ ᐃᑦᔪᕐᖕᓁᑦᑐᑦ

ᐊᑕᓂᐅᑉ ᐱᐅᒃᓴᖏᓐᓂᖓ ᐃᓴᕆᐊᓕᒥᐅᑦ ᒎᑎᓐᖑᐊᓄᑦ ᑐᒃᓯᐊᖃᑦᑕᕐᓂᖏᓐᓂᒃ

¹ “ᐅᓇᑕᕐᑐᕐᓯᐅᑏᑦ ᑎᑦᑐᓚᐅᑏᑦ ᐊᑐᐃᓐᓇᕈᓕᕐᓯᐅᒃ, ᑎᖕᒥᐊᑦ ᑎᒥᕕᓂᕐᑐᓲᑦ ᐊᐅᕐᓵᓕᕐᒪᑕ ᐊᑕᓂᐅᑉ ᐃᒡᓗᖓᑕ ᖁᓛᓂ, ᐃᓄᖁᑎᒪ ᐊᖏᖃᑎᒌᒍᑎᒃᑲ ᓯᖁᒥᓚᐅᕐᒪᒋᑦ, ᐊᑭᕋᕐᑐᓕᕐᓗᑎᒡᓗ ᐱᖁᔭᓐᓂᒃ.

² ᐅᕙᓐᓄᑦ ᓂᓪᓕᐊᓚᐅᕐᐳᑦ, ‘ᒎᑎᒐ, ᐃᓴᕆᐊᓕᒥᐅᖑᔪᒍᑦ ᖃᐅᔨᒪᕙᑦᑎᒋᑦ.’

³ ᐃᓴᕆᐊᓕ ᐱᐅᔪᒥᒃ ᐊᕕᑦᓯᓚᐅᕐᒪᑦ; ᐊᑭᕋᖏᑕ ᒪᓕᒍᒫᕐᐹᑦ.

⁴ “ᐊᖓᔪᖅᑳᕐᔪᐊᕐᑖᓚᐅᕐᐳᑦ ᐅᕙᒃᑰᖏᑦᑐᖅ. ᐊᖓᔪᖅᑳᖁᑎᑖᓚᐅᕐᐳᑦ ᐅᕙᓐᓂᒃ ᖃᐅᔨᑎᑦᓯᓚᐅᕋᑎᒃ. ᓯᐅᓪᕕᕆᒥᖕᓂᒃ ᒎᓗᒥᖕᓂᒡᓗ ᒎᑎᓐᖑᐊᓕᐅᓚᐅᕐᐳᑦ ᐊᓯᕈᕐᑕᐅᑦᔪᑎᒃᓴᒥᖕᓂᒃ.

⁵ ᓄᕐᕋᐅᔮᕐᑐᓐᖑᐊᖅ ᒎᑎᓐᖑᐊᓯ ᓇᕐᕈᒋᕙᕋ ᓴᒥᐊᕆᐊ. ᓂᓐᖓᐅᒪᓂᕋ ᑖᒃᑯᓄᖓ ᑐᕌᓕᕐᐳᖅ. ᖃᓄᖅ ᐊᑯᓂᐅᑎᒋᔪᖅ ᐃᑦᔪᕐᓁᓐᓂᕐᒧᑦ ᑎᑭᐅᑎᓇᓱᐊᕐᓂᐊᕐᐹᑦ?

⁶ ᐃᓴᕆᐊᓕᒥ: ᓴᓇᔩᑦ ᓴᓇᓯᒪᔭᖓ, ᒎᑎᐅᓐᖏᓚᖅ; ᓴᒥᐊᕆᐊᒥ ᓄᕐᕋᐅᔮᕐᑐᓐᖑᐊᖅ ᓯᖁᒥᑕᐅᔪᒫᕐᐳᖅ.

⁷ ᐊᓄᕆᒥᒃ ᑲᓐᖓᕐᓱᐃᒍᑎᒃ, ᐅᓚᔪᔭᕐᔪᐊᒥᒃ ᑲᑎᕐᓱᐃᔪᒫᕐᐳᑦ. ᓂᐊᖂᔭᒃᓮᑦ ᓂᐊᖁᖃᓐᖏᓚᑦ, ᓂᕆᔭᒃᓴᒥᒃ ᐱᕈᕐᕕᐅᓂᐊᓐᖏᓚᑦ; ᐱᕈᕐᕕᐅᒐᓗᐊᕐᐸᑕ ᓄᓇᖅᑲᑎᒋᓐᖏᑕᖏᑕ ᓂᕆᔪᒫᕐᐰᑦ.

⁸ ᐃᓴᕆᐊᓕ ᐄᔭᐅᓯᒪᕗᖅ; ᒫᓐᓇ ᐃᓅᖃᑎᒌᒡᔪᐊᓃᓕᕐᒪᑕ ᐴᒍᑕᕐᑎᑐᑦ ᐊᑑᑎᖃᖏᑦᑐᑎᑐᑦ ᑍᒤᓕᕐᐳᑦ.

⁹ ᐊᓯᕆᐊᒧᐊᓚᐅᕐᒪᑕ, ᐱᖁᓐᓂᖏᑦᑐᑐᑦ ᓯᐅᑎᖅᑯᕐᑐᔪᑐᑦ ᐃᓄᑐᐊᑎᑐᑦ; ᐃᕗᕅᑎ ᐱᖃᑎᒃᓴᕐᓯᐅᕐᐳᖅ ᓄᓕᐊᕐᑎᓂᒃ.

¹⁰ ᐃᓇᑦᓯᓚᐅᕋᓗᐊᕐᐳᑦ ᐃᓚᑖᕈᒪᓪᓗᑎᒃ ᐃᓅᖃᑎᒌᒡᔪᐊᓂᑦ, ᑲᑎᕐᓱᕐᓂᐊᕐᐸᒃᑲᓕ ᒫᓐᓇᑦᓴᐅᑎᒋᒃᑯᑦ. ᕿᒃᓵᒃᑎᑕᐅᑬᓐᓇᕈᒫᕐᐳᓪᓕ ᐊᖓᔪᖅᑳᕐᔪᐊᕐᒧᑦ ᑎᓕᔭᐅᓯᒪᔪᒧᑦ ᐊᖓᔪᖅᑳᖁᑎᖏᓐᓄᓪᓗ ᐅᖁᒤᒃᓴᕐᑎᑕᐅᓕᕈᑎᒃ.

¹¹ “ᐃᕗᕅᑎ ᐅᓄᕐᑐᓂᒃ ᑐᓂᕐᕈᓯᕐᕕᓕᐅᕐᓯᒪᖕᒪᑦ ᐊᔪᕐᑐᓕᓂᕐᒧᑦ, ᑖᒃᑯᓄᖓᓗ ᑐᓂᕐᕈᓯᕐᕖᑦ ᐊᔪᕐᑐᓕᓂᐅᓕᕐᐳᑦ.

¹² ᑎᑎᕋᕐᕕᒋᓚᐅᕋᓗᐊᕐᐸᒃᑲ ᐱᐅᔪᓂᒃ ᐱᖁᔭᓐᓂᒃ 10,000ᓂᒃ, ᐱᐅᒋᔭᐅᓚᐅᓐᖏᓚᓪᓕ ᑲᒪᓂᐊᕈᑕᐅᓪᓗᑎᒡᓗ.

¹³ ᑐᓂᕐᕈᓯᕆᐊᒥᒃ ᐆᒪᔪᓂᒃ ᖁᕕᐊᒋᔭᖃᕐᐳᑦ; ᑐᓂᕐᕈᑎᕕᓃᓪᓗ ᓂᕆᕙᒡᓗᒋᑦ; ᐊᑕᓂᐅᓪᓕ ᖁᕕᐊᒋᓚᐅᓐᖏᓔᑦ. ᑕᕝᕙ ᐱᐅᖏᑦᑐᓕᓂᖏᑦ ᐃᖅᑲᓚᐅᕐᐰᑦ, ᐊᔪᕐᓂᖏᓪᓗ ᓱᒋᐊᕐᓗᒋᑦ; ᐄᑦᔨᑉᑎᒧᑦ ᐅᑎᕐᓂᐊᕐᐳᑦ.

¹⁴ “ᐃᓴᕆᐊᓕᓕ ᐳᐃᒍᕐᓯᒪᖕᒪᑦ ᐱᓐᖑᕐᑎᑦᓯᔨᒥᓂᒃ, ᐃᒡᓗᕐᔪᐊᓕᐅᕐᓯᒪᓪᓗᓂᓗ ᐊᖓᔪᖅᑳᒃᑯᕕᖕᓂᒃ; ᔫᑕᓗ ᐅᓄᕐᑐᓂᒃ ᓴᐴᓗᑕᓕᖕᓂᒃ ᐃᒡᓗᒐᓴᓕᐅᕐᓯᒪᓕᕐᐳᖅ; ᐃᒡᓗᒐᓴᖏᓪᓕ ᐃᑯᐊᓪᓚᒃᑕᐅᑎᑦᓱᒫᕐᐸᒃᑲ, ᑐᓐᖓᕕᒋᔭᖏᓪᓗ ᓄᖑᑕᐅᔪᒫᕐᐳᑦ.”