ᕼᐆᓯᐊᑉ ᐊᒡᓚᖏᑦ 12 - ᐊᒡᓔᑦ ᐃᑦᔪᕐᖕᓁᑦᑐᑦ1 “ᐃᕗᕅᒥ ᐊᓄᕆᒥᑦ ᓂᕆᕗᖅ, ᒪᓕᒃᐳᕐᓗ ᐊᓄᕆᒥᒃ ᐅᓪᓗᓕᒫᖅ ᓯᕿᓂᐅᑉ ᓄᐃᕕᐊᓂᓐᖔᕐᑐᒥᒃ; ᓴᒡᓗᖃᑦᑕᓕᕐᐸᓪᓕᐊᑐᐃᓐᓇᕐᐳᑦ ᐱᕋᔭᖃᑦᑕᓕᕐᐸᓪᓕᐊᓪᓗᑎᒡᓗ; ᐊᖏᖃᑎᖃᕐᓯᒪᕗᓪᓗ ᐊᓯᕆᐊᒥᐅᓂᒃ, ᐅᕐᓱᐃᓪᓗ ᐂᑦᑑᑕᐅᕗᑦ ᐄᑦᔨᑉᑎᒧᑦ.” 2 ᐊᑕᓂᖅ ᔫᑕᒧᑦ ᐃᖅᑲᕐᑐᐃᑦᔪᑎᒃᓴᖃᕐᐳᖅ, ᔧᑯᓗ ᓱᒋᐊᕐᓂᐊᕐᐹ ᐊᑐᕐᑕᖏᑦ ᒪᓕᒡᓗᒋᑦ, ᐊᑭᓕᕐᓂᐊᕐᐹᓗ ᐱᓂᐊᕐᓂᖏᑦ ᒪᓕᒡᓗᒋᑦ. 3 ᐃᒡᓕᐊᕐᒦᓪᓗᑎᒃ ᓱᓕ ᐊᖓᔪᓂ ᑭᖕᒥᖓᒍᑦ ᑎᒍᓚᐅᕐᐹ, ᐱᕈᕇᕋᒥᓗ ᓲᖑᓂᓂ ᐊᑐᕐᓗᒍ ᒎᑎᒥᒃ ᐊᒃᓱᕈᕐᓗᓂ ᐹᖃᑎᖃᓚᐅᕐᐳᖅ. 4 ᐃᓛᒃ, ᐹᖃᑎᖃᓚᐅᕐᐳᖅ ᐂᖏᓕᒥᒃ ᓵᓚᖃᕐᓗᓂᓗ, ᖁᕝᕕᐅᕐᓗᓂ ᖁᕕᐊᒋᔭᐅᔪᒪᓕᓚᐅᕐᐳᖅ ᑖᑦᓱᒧᖓ. ᐱᑎᓕᒥ ᒎᑎᒥᒃ ᖃᐅᔨᓚᐅᕐᐳᖅ, ᑍᑲᓂᓗ ᒎᑎᐅᑉ ᐅᖃᕐᕕᒋᓚᐅᕐᐹ; 5 ᐊᑕᓂᖅ ᒎᑎ ᖁᑦᓯᖕᓂᕐᐹᖑᔪᖅ, ᐊᑕᓂᕐᒥᒃ ᐊᑎᖃᕐᐳᖅ. 6 ᒎᑎᖕᓄᑦ ᐃᑲᔪᕐᑕᐅᓗᑎᑦ ᑖᑦᓱᒧᖓ ᐅᑎᓕᕆᑦ, ᓇᒡᓕᖕᓂᕐᒥᒃ ᒪᓕᑦᓯᐊᕐᓂᕐᒥᒡᓗ ᑎᒍᒥᐊᑦᓯᐊᓕᕆᑦ, ᐅᑕᖅᑭᑦᓯᐊᕐᓗᑎᓪᓗ ᒎᑎᖕᓂᒃ ᑲᔪᓯᑦᓯᐊᕐᓗᑎᑦ. ᐅᖃᐅᓰᑦ ᐃᖅᑲᕐᑐᐃᒋᐊᓪᓚᖕᓃᑦ 7 “ᑬᓇᓂᒥᐅᑦ ᓯᓔᕐᕆᒃᓯᔨᐅᕗᑦ, ᓱᓕᖏᑦᑐᓂᒃ ᐅᖁᒤᓐᓂᕐᓯᐅᑎᓂᒃ ᑎᒍᒥᐊᕐᐳᑦ, ᕿᒃᓵᒃᑎᑦᓯᔭᕆᐊᒃᓴᖅ ᖁᕕᐊᓱᒃᐳᑦ. 8 ᐃᕗᕅᑎᓕ ᐅᖃᓚᐅᕐᐳᖅ, ‘ᐊᒃᓱᐃᓕᕗᖓ, ᓇᖕᒥᓂᖅ ᐊᔪᕐᓴᕈᓐᓃᕐᑎᑉᐳᖓ; ᖃᐅᔨᔭᐅᓂᐊᓐᖏᓚᖓ ᐱᑦᓯᐊᕐᓯᒪᖏᓐᓂᓐᓂᒃ.’ 9 ᐅᕙᖓᐅᕗᖓ ᐊᑕᓂᖅ ᒎᑏᑦ, ᐄᑦᔨᑉᑎᒥᑦ ᐊᐅᓪᓚᕐᑎᑦᓯᓚᐅᕐᑐᖅ; ᑐᐱᕐᒦᑎᒃᑲᓐᓂᕐᓂᐊᕐᐸᑦᓯ, ᑍᑦᓱᒪᓂ ᐅᓪᓗᓂ ᐋᖅᑭᒃᑕᐅᓯᒪᓪᓗᑎᒃ ᓇᓪᓕᐅᓐᓂᕐᓯᐅᕐᕕᐅᕙᓚᐅᕐᑐᑎᑐᑦ. 10 ᐱᔪᖃᓛᕐᑐᒥᒃ ᐅᖃᕐᑎᓐᓄᑦ ᐅᖃᐅᑦᔨᖃᑦᑕᓚᐅᕐᐳᖓ; ᑕᑯᑎᑕᐅᓃᓪᓗ ᐅᓄᕐᓯᑎᓚᐅᕐᐸᒃᑲ, ᐱᔪᖃᓛᕐᑐᓂᒡᓗ ᐊᑦᔨᐅᔪᑎᒍᑦ ᓇᓗᓁᕐᓯᖃᑦᑕᓚᐅᕐᐳᖓ ᐅᖃᕐᑎᒃᑯᑦ. 11 ᒋᓕᐊᑎᒥ ᐊᔪᕐᑐᓕᓂᕐᑕᖃᕐᐸᑦ ᑕᒪᓐᓇ ᓄᖅᑲᓪᓚᕆᒍᒫᕐᐳᖅ; ᐃᒻᒧᒃᓯᐅᒐᕐᓂᒃ ᒋᐅᓪᒐᐅᓪᒥ. ᑐᓂᕐᕈᓯᕐᕕᖏᑦ ᐅᔭᕋᒃᑎᑐᑦ ᖃᓕᕇᒃᓯᒪᔪᑎᑐᑦ ᑍᒤᑐᐃᓐᓇᕈᒫᕐᐳᑦ ᐱᕈᕐᓰᕕᖕᒥ.” 12 ᔧᑯ ᕿᒫᓚᐅᕐᐳᖅ ᓯᕆᐊᒧᑦ, ᐂᑉᐸᕐᑖᕈᒪᓂᕐᒥᓄᑦ ᐱᔨᐅᓚᐅᕐᐳᖅ, ᓄᓕᐊᕐᑖᒥᓄᑦ ᐊᑭᓕᐅᑦᔨᓪᓗᓂ ᓰᐱᓂᒃ ᐰᕐᓯᔨᐅᓕᓚᐅᕐᐳᖅ. 13 ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓᒍᑦ ᐊᑕᓂᐅᑉ ᐊᐅᓪᓚᐅᑎᓚᐅᕐᐹ ᐃᓴᕆᐊᓕ ᐄᑦᔨᑉᑎᒥᑦ, ᐅᖃᕐᑎᒥᒍᓪᓗ ᐰᕆᓚᐅᕐᐹ. 14 ᐃᕗᕅᒻ ᓂᓐᖓᒃᓴᕐᓗᓂᐅᒃ ᓂᓐᖓᒃᑎᓚᐅᕐᐹ; ᑍᒤᒻᒪᑦ ᐊᑕᓂᐅᑉ ᐸᓯᔭᒃᓴᐅᓂᖏᑦ ᐊᐅᓈᕐᑎᑦᓯᓂᒃᑯᑦ ᑖᑦᓱᒧᖓ ᐱᑎᑦᓱᒫᕐᐰᑦ, ᐊᑭᓂᐊᕈᒫᕐᐹᓗ ᐋᖅᑭᒋᐊᕐᑕᐅᔭᕆᐊᖃᕐᓂᖓ ᒪᓕᒡᓗᒍ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society