ᕼᐆᓯᐊᑉ ᐊᒡᓚᖏᑦ 10 - ᐊᒡᓔᑦ ᐃᑦᔪᕐᖕᓁᑦᑐᑦ

¹ ᐃᓴᕆᐊᓕ ᓯᐊᒻᒪᖓᑦᓯᐊᕐᑑᓪᓗᓂ ᕔᓂᓕᒃᓴᐅᕗᖅ; ᐱᕈᕐᑎᑦᓯᒐᒥ ᐃᒻᒥᓄᑐᐊᖅ ᐊᑐᕐᐳᖅ. ᐱᕈᕐᑐᖏᑦ ᐅᓄᕐᓯᕙᓪᓕᐊᖕᒪᑕ ᑐᓂᕐᕈᓯᕐᕕᓕᐅᕐᐸᓪᓕᐊᕗᖅ ᐅᓄᕐᑐᓂᒃ; ᓄᓇᖓᓗ ᐊᔪᕐᓴᕈᓐᓁᕐᐸᓪᓕᐊᖕᒪᑦ, ᓇᐸᔪᓂᒃ ᒎᑎᓐᖑᐊᓂᒃ ᐋᖅᑭᒃᓱᐃᕙᓪᓕᐊᕗᖅ.

² ᐆᒻᒪᑎᖏᑦ ᑕᒻᒪᕐᑎᑦᓯᕗᑦ; ᒫᓐᓇ ᐸᓯᔭᒃᓴᐅᓂᒃᑯᑦ ᐃᓅᓂᐊᓕᕐᐳᑦ. ᑐᓂᕐᕈᓯᕐᕕᖁᑎᖏᑦ ᐊᑕᓂᐅᑉ ᓯᖁᑦᑎᕐᓂᐊᕐᐰᑦ, ᐅᔭᕅᓪᓗ ᓇᐸᔪᑦ ᒎᑎᓐᖑᐊᑦ ᐊᓯᕈᕐᓗᒋᑦ.

³ ᑖᒃᑯᐊᓕ ᐅᖃᕐᓂᐊᕐᐳᑦ: “ᐊᖓᔪᖅᑳᕐᔪᐊᖃᖏᓐᓇᑦᑕ, ᐊᑕᓂᕐᓗ ᓯᕘᕋᒋᓐᖏᓚᕗᑦ, ᐊᖓᔪᖅᑳᕐᔪᐊᖃᕈᑦᑕᓕ ᐅᕙᑦᑎᓐᓄᑦ ᖃᓄᐃᓕᐅᕋᔭᕐᒪᑦ?”

⁴ ᐅᖃᐅᓯᑐᐃᓐᓇᕐᓄᑦ ᐅᖃᓪᓚᐅᕐᐳᑦ; ᐊᖏᖃᑎᒌᒍᑎᓕᐅᕐᓗᑎᒡᓗ ᐊᑐᖏᑦᑐᓂᒃ; ᑍᒤᒻᒪᑦ ᐃᖅᑲᕐᑐᕐᑕᐅᑦᔪᑎᒃᓴᖏᑦ ᓴᖅᑭᓐᓂᐊᕐᐳᑦ ᑐᖁᓐᓇᕐᑐᑐᑦ ᐱᕈᕐᓂᕐᓗᒃᑐᑎᑐᑦ ᐱᕈᕐᓰᕕᖕᒥ ᓄᓇᓕᕆᐊᖑᓯᒪᔪᒥ.

⁵ ᓴᒥᐊᕆᐊᕐᒥᐅᑦ ᓴᔪᒍᒫᕐᐳᑦ ᓄᕐᕋᓐᖑᐊᒥᒃ ᐱᑦᐂᕕᓐᒦᑦᑐᒥᒃ ᐅᒡᒍᐊᕐᓗᑎᒃ. ᐃᓄᖏᑦ ᕿᒃᓵᒍᑎᖃᕈᒫᕐᐳᑦ ᑖᑦᓱᒥᖓ, ᒎᑎᓐᖑᐊᒧᓪᓗ ᑐᓂᕐᕈᓯᕐᑎᑦᓯᔩᑦ ᕿᒃᓵᒍᑎᖃᕈᒫᕐᐳᑦ ᑖᑦᓱᒥᖓ, ᐱᓐᓇᕐᓇᕐᑐᖁᑎᖓᑕ ᕿᒪᖕᒪᒋᑦ.

⁶ ᒎᑎᓐᖑᐊᖅ ᐊᐅᓪᓚᕈᑦᔭᐅᔪᒫᕐᐳᖅ ᐊᓯᕆᐊᒧᑦ, ᐂᑦᑑᑎᒋᔭᐅᔪᑎᑐᑦ ᐊᖓᔪᖅᑳᕐᔪᐊᒧᑦ ᐊᔪᖏᑦᑐᕐᔪᐊᕐᒧᑦ. ᐃᕗᕅᒥᓕ ᑲᓐᖑᓱᒃᑎᑕᐅᔪᒫᕐᐳᖅ, ᐃᓴᕆᐊᓕᓗ ᑲᓐᖑᓱᒃᑎᑕᐅᔪᒫᕆᕗᖅ ᒎᑎᓐᖑᐊᒥᓄᑦ.

⁷ ᓴᒥᐊᕆᐊᑉ ᐊᖓᔪᖅᑳᕐᔪᐊᖓ ᐲᕐᑕᐅᔪᒫᕐᐳᖅ, ᕿᔪᒃᑐᑦ ᐅᓕᒻᒪᑯᑐᑦ ᐃᒫᓂ ᓴᕐᕙᐅᔪᑎᑐᑦ.

⁸ ᐂᕙᓐᒥᐅᑦ ᐱᒻᒪᕆᖁᑎᖏᑕ ᐃᓂᖏᑦ, ᐃᓴᕆᐊᓕᐅᓪᓗ ᐊᔪᕐᓂᖏᑦ, ᐊᓯᕈᕐᑕᐅᔪᒫᕐᐳᑦ. ᐅᕐᐲᑦ ᑲᑭᓐᓇᕐᑐᓖᑦ ᐱᕈᕐᓂᕐᓗᒃᑐᓪᓗ ᐱᕈᕈᒫᕐᐳᑦ ᑐᓂᕐᕈᓯᕐᕕᖏᓐᓂ; ᖃᖅᑲᓄᓪᓗ ᐅᖃᕈᒫᕐᐳᑦ, “ᐅᓕᒃᑎᒍᑦ!” ᐱᖑᕐᓄᓪᓗ, “ᑲᑕᒡᕕᒋᑎᒍᑦ!”

ᐊᑕᓂᐅᑉ ᓇᓗᓁᕐᓯᓂᖓ ᐃᖅᑲᕐᑐᐃᓂᒃᓴᒥᓂᒃ ᐃᓴᕆᐊᓕᒥᒃ

⁹ “ᐃᓴᕆᐊᓕ, ᐊᔪᕐᑐᓕᓯᒪᕗᑎᑦ ᒋᐱᐊᑉ ᐅᓪᓗᖏᓐᓂᑦ ᐱᒋᐊᕐᓗᑎᑦ, ᑕᕝᕙᓂᓗ ᑲᔪᓯᕗᑦ ᓱᓕ. ᐅᓇᑕᕐᓂᒃᑯᑦ ᒋᐱᐊᒻ ᓵᓚᐅᓂᐊᓐᖏᓛᑦ?

¹⁰ ᐱᒋᐊᕈᒪᓕᕈᒃᑭᑦ ᓱᒋᐊᕈᒫᕐᐸᒃᑲ; ᐃᓄᐃᓪᓗ ᑲᑎᔪᒫᕐᐳᑦ ᓵᓐᖓᔪᒪᓗᑎᒃ ᑖᒃᑯᓄᖓ ᓱᒋᐊᕐᑕᐅᓕᕐᐸᑕ ᒪᕐᕈᐃᕐᓲᑎᓪᓗᐊᒥᒃ ᐊᔪᕐᑐᓕᓂᖏᑦ ᐱᓪᓗᒋᑦ.

¹¹ “ᐃᕗᕅᒥᓕ ᐱᔭᕆᐅᕐᓴᔭᐅᓯᒪᕗᖅ ᐃᒻᒧᒃᓯᐅᒐᕐᑐᑦ, ᖁᕕᐊᒋᔭᖃᕐᑐᑐᑦ ᑐᓪᓕᕋᕐᓂᕐᒥᒃ ᓂᐊᖂᔭᒃᓴᒥᒃ, ᖁᖓᓯᑦᓯᐊᖓ ᖁᖓᓯᕈᓯᓚᐅᕐᐸᕋ ᐅᓂᐊᕈᑎᒃᓴᖓᓂᒃ; ᐃᕗᕅᒥ ᐅᓂᐊᕐᑎᓐᓂᐊᕐᐸᕋ, ᔫᑕᓗ ᐱᕈᕐᓰᕕᒃᓴᓂᒃ ᐃᑎᕐᓴᓕᐅᕆᔪᒫᕐᐳᖅ, ᔧᑰᓪᓗ ᓄᓇ ᐊᑐᐃᓐᓇᕈᕐᑎᑦᓱᒫᕐᐹ.

¹² ᑲᓐᖓᕐᓱᐃᒋᑦᓯ ᓇᖕᒥᓂᑦᓯᓐᓄᑦ ᐃᓱᐊᕐᓂᕐᒥᒃ, ᑲᑎᕐᓱᐃᓗᓯᓗ ᓇᒡᓕᖕᓂᐅᑉ ᓱᖁᓯᔪᐃᑦᑑᑉ ᐱᕈᕐᑎᑕᖏᓐᓂᒃ; ᓄᓇᓯᓗ ᓱᕐᕋᒃᓯᒪᖏᑦᑐᖅ ᐃᑎᕐᓴᓕᐅᕐᓯᐅᒃ, ᐊᑕᓂᕐᒥᒃ ᕿᓂᕐᓂᖅ ᓇᓪᓕᐅᑎᕗᖅ, ᑖᓐᓇ ᕾᒍᓂ ᑯᕝᕕᓯᖁᓪᓗᒍ ᐱᐅᓕᔭᐅᓂᕐᒥᒃ.

¹³ ᐃᑎᕐᓴᓕᐅᕆᓚᐅᕐᐳᓯ ᐱᕈᕐᓰᕕᒃᓴᓂᒃ ᐱᐅᖏᑦᑐᓂᒃ, ᑲᑎᕐᓱᐃᓪᓗᓯᓗ ᓈᒻᒪᖏᑦᑐᓕᓂᕐᒥᒃ, ᓂᕆᓚᐅᕋᑦᓯ ᓴᒡᓗᓂᒃᑯᑦ ᐱᕈᕐᑐᓂᒃ. ᑕᑎᖃᓚᐅᕋᑦᓯ ᓇᖕᒥᓂᖅ ᐱᔪᓐᓇᕐᑐᖁᑎᑦᓯᓐᓂᒃ ᐅᓄᕐᑐᕐᔪᐊᓂᒡᓗ ᐅᓇᑕᕐᓂᕐᒧᑦ ᐱᔪᓐᓇᕐᑐᐊᓗᖕᓂᒃ.

¹⁴ ᑍᒤᒻᒪᑦ ᐅᓇᑕᕐᓂᕐᒥᒃ ᓴᖅᑭᑦᑐᖃᕈᒫᕐᐳᖅ ᐃᓅᖃᑎᑦᓯᓐᓂ, ᓴᐴᓗᑕᓕᖁᑎᓕᒫᓯᓗ ᐊᓯᕈᕐᑕᐅᔪᒫᕐᐳᑦ, ᓵᓪᒪᓂᐅᑉ ᐅᓇᑕᕐᑎᓪᓗᒋᑦ ᐊᓯᕈᐃᓚᐅᕐᓯᒪᓂᖓᑐᑦ ᐱᑦ-ᐊᕐᐱᐅᓪᒥᒃ; ᐊᓈᓇᐅᔪᑦ ᒪᓂᖅᑲᒦᑦᑐᑦ ᑐᖁᑕᐅᓚᐅᕐᐳᑦ ᕿᑐᕐᖓᑎᒃ ᐃᓚᒋᓪᓗᒋᑦ.

¹⁵ ᑍᒤᑦᓱᒫᕆᕗᓯᑦᑕᐅᖅ, ᐱᑎᓕᒥᐅᖑᔪᓯ, ᐱᐅᖏᑦᑐᓕᓂᕐᔪᐊᑎᑦ ᐱᓪᓗᒋᑦ. ᐊᓄᕆᕐᔪᐊᕐᒧᑦ ᐃᓴᕆᐊᓕᐅᑉ ᐊᖓᔪᖅᑳᕐᔪᐊᖓ ᐊᓯᕈᕐᑕᐅᒻᒪᕆᒍᒫᕐᐳᖅ.”