ᕼᐆᓯᐊᑉ ᐊᒡᓚᖏᑦ 1 - ᐊᒡᓔᑦ ᐃᑦᔪᕐᖕᓁᑦᑐᑦ

¹ ᐊᑕᓂᐅᑉ ᐅᖃᐅᓯᖓ ᕼᐆᓯᐊᒧᑦ ᑎᑭᑉᐳᖅ ᐲᕆᐅᑉ ᐃᕐᓂᖓᓄᑦ, ᐅᑯᐊ ᔫᑕᒥ ᑭᖑᓕᕇᒃᓗᑎᒃ ᐊᖓᔪᖅᑳᕐᔪᐊᖑᑎᓪᓗᒋᑦ ᐅᓮᐊ, ᔫᑕᒻ, ᐂᕼᐊᔅ, ᕼᐃᓯᑬᐊᓗ, ᐊᖓᔪᖅᑳᕐᔪᐊᖑᑎᓪᓗᒋᑦ ᔫᑕᒥ, ᔨᕈᐳᐊᒻᓗ ᔪᐊᓯᐅᑉ ᐃᕐᓂᖓ, ᐊᖓᔪᖅᑳᕐᔪᐊᖑᑎᓪᓗᒍ ᐃᓴᕆᐊᓕᒥ.

ᕼᐆᓯᐊᑉ ᓄᓕᐊᖓ ᕿᑐᕐᖓᖏᓪᓗ

² ᐊᑕᓂᖅ ᓯᕗᓪᓕᕐᐹᒥᒃ ᐅᖃᕐᑎᓪᓗᒍ ᕼᐆᓯᐊᒃᑯᑦ, ᐊᑕᓂᖅ ᐅᖃᕐᐳᖅ ᕼᐆᓯᐊᒧᑦ, “ᓄᓕᐊᓂᒋᐊᕐᑐᓕᕆᑦ ᐊᖑᓐᓂᐊᕐᑎᒥᒃ ᕿᑐᕐᖏᐅᕐᓗᑎᓪᓗ ᐊᖑᓐᓂᐊᕐᑎᒃᑯᑦ, ᓄᓇ ᑕᒪᓐᓇ ᐊᓯᓐᓂᐊᕐᓯᒪᔪᕐᔪᐊᖑᖕᒪᑦ ᐊᑕᓂᕐᒥᒃ ᕿᒤᓯᒪᓂᕐᒥᒍᑦ.”

³ ᑕᕝᕙ ᕼᐆᓯᐊ ᐂᕗᖅ ᓄᓕᐊᓂᒡᓗᓂᓗ ᒎᒪᒥᒃ ᑎᑉᓔᒥᐅᑉ ᐸᓂᖓᓂᒃ, ᑖᓐᓇᓗ ᕿᑐᕐᖓᒃᓴᖃᓕᕐᐳᖅ ᐃᕐᓂᕐᑖᕐᓗᑎᒡᓗ.

⁴ ᐊᑕᓂᕐᓗ ᐅᖃᕐᐳᖅ ᕼᐆᓯᐊᒧᑦ, “ᐊᑦᓯᕈᒃ ᔨᔭᕆᐅᓪᒥᒃ; ᐊᑯᓂᐅᑦᔮᔪᓐᓁᕐᒪᑦ, ᓱᒋᐊᕐᓯᓂᕆᓂᐊᕐᑕᕋ ᔨᕼᐆᑉ ᑭᖑᕚᖏᓐᓂᒃ ᔨᔭᕆᐅᑉ ᑐᖁᕋᕐᑕᐅᓯᒪᓂᖓᓄᑦ, ᐃᓴᕆᐊᓕᒥ ᐊᖓᔪᖅᑳᕐᔪᐊᖃᕐᓂᖅ ᓄᖅᑲᕐᑎᓐᓂᐊᓕᕋᒃᑯ.

⁵ ᔨᔭᕆᐅᓪᓗ ᓇᕐᓴᖓᓂ ᑕᒪᓐᓇ ᐅᓪᓗᖅ ᓇᓪᓕᐅᑎᒃᐸᑦ, ᐃᓴᕆᐊᓕᒥᐅᑦ ᐅᓇᑕᕐᑐᒃᓴᖁᑎᖏᑕ ᐱᑎᒃᓯᖏᑦ ᓇᐱᔪᒫᕐᐸᒃᑲ.”

⁶ ᒎᒪᓗ ᕿᑐᕐᖓᕐᑖᒃᑲᓐᓂᕐᐳᖅ ᐸᓂᒃᑖᕐᓗᓂᓗ. ᐊᑕᓂᕐᓗ ᐅᖃᕐᐳᖅ ᕼᐆᓯᐊᒧᑦ, “ᐊᑦᓯᕈᒃ ‘ᓘ-ᕈᕼᐊᒪᒥᒃ,’ ᓂᑲᒋᓂᐊᕈᓐᓃᕋᒃᑭᑦ ᐃᓴᕆᐊᓕᒥᐅᑦ ᑭᖑᕚᖏᑦ, ᐃᓱᒪᒋᔪᓐᓁᕐᕕᒋᓂᐊᕈᓐᓃᕐᓗᒋᓪᓗ.

⁷ ᔫᑕᐅᓪᓕ ᑭᖑᕚᖏᑦ ᓂᑲᒋᓂᐊᕐᐸᒃᑲ, ᐱᐅᓕᔪᒫᕐᓗᒋᓪᓗ ᐊᑕᓂᒃᑯᑦ ᒎᑎᖓᑦᑎᒍᑦ; ᐱᐅᓕᓂᐊᓐᖏᓚᒃᑲᓕ ᐱᑎᒃᓯᒧᑦ ᓴᕕᒡᔪᐊᒧᓪᓘᓐᓃᑦ, ᐅᓇᑕᕐᓂᒃᑯᓪᓘᓐᓃᑦ, ᕿᒻᒥᕐᔪᐊᑎᒍᓪᓘᓐᓃᑦ, ᕿᒻᒥᕐᔪᐊᒥ ᐃᑭᒪᔪᑎᒍᓪᓘᓐᓃᑦ.”

⁸ ᒎᒪ ᐊᒫᒪᒃᑎᑦᓯᔪᓐᓃᕋᒥ ᐸᓂᖕᒥᓂᒃ ᓘ-ᕈᕼᐊᒪᒥᒃ, ᓄᑕᕋᒃᓴᑖᕆᕗᖅ ᐃᕐᓂᕐᑖᕐᓗᓂᓗ.

⁹ ᐊᑕᓂᕐᓗ ᐅᖃᕐᐳᖅ ᕼᐆᓯᐊᒧᑦ, “ᐊᑦᓯᕈᒃ ‘ᓘ-ᐋᒥᒥᒃ,’ ᐃᓴᕆᐊᓕᒥᐅᑦ ᐃᓄᖁᑎᒋᖏᓐᓇᒃᑭᑦ ᑖᒃᑯᓄᖓᓗ ᒎᑎᒋᔭᐅᓇᖓ.”

ᐃᓴᕆᐊᓕᒥᐅᑦ ᐅᑎᕐᑎᑕᐅᔪᒫᕐᓂᖏᑦ

¹⁰ ᐃᓴᕆᐊᓕᒥᐅᓪᓕ ᐃᓄᖏᑦ ᓯᐅᕋᕐᑎᑐᑦ ᐃᒪᐅᑉ ᓯᓈᓃᑦᑐᑎᑐᑦ ᐅᓄᕐᑎᒋᔪᒫᕐᐳᑦ, ᐆᒃᑐᕋᕐᑕᐅᔪᓐᓇᖏᓪᓗᑎᒃ ᓈᓴᕐᑕᐅᔪᓐᓇᖏᓪᓗᑎᒡᓗ; ᑕᕝᕙᓂ ᐅᖃᐅᑦᔭᐅᔪᒫᕐᐳᑦ, “ᐃᓄᖁᑎᒋᓐᖏᓚᑦᓯ,” ᐅᖃᕐᕕᐅᓕᕈᒫᕆᕗᑦ, “ᒎᑎᐅᑉ ᐆᒪᔫᑉ ᕿᑐᕐᖓᖏᑦ.”

¹¹ ᔫᑕᐅᑉ ᐃᓄᖏᑦ ᐃᓴᕆᐊᓕᒥᐅᓪᓗ ᐃᓄᖏᑦ ᑲᑎᒃᑲᓐᓂᕈᒫᕆᕗᑦ, ᓇᖕᒥᓂᕐᓗ ᓂᕈᐊᕈᒫᕐᐳᑦ ᓯᕗᓕᕐᑎᒃᓴᒥᖕᓂᒃ ᐊᑕᐅᓯᕐᒥᒃ; ᓄᓇᒥᖕᓂᓗ ᒪᑭᑦᓱᒫᕐᐳᑦ, ᔨᔭᕆᐅᓪᓗ ᐅᓪᓗᖓ ᐊᖏᔪᕐᔪᐊᖑᓕᕈᒫᕐᐳᖅ.