ᐄᑉᕈᐃᓄᑦ 9 - ᐊᒡᓔᑦ ᐃᑦᔪᕐᖕᓁᑦᑐᑦ

ᐱᔨᑦᓯᕐᓂᖅ ᓄᓇᒦᑦᑐᒥᒃ ᕿᓚᖕᒦᑦᑐᒥᒡᓗ

¹ ᐊᖏᖃᑎᒌᖕᓂᖅ ᓯᕗᓪᓕᖅ ᐱᖁᔭᖃᓚᐅᕐᐳᖅ ᐱᔨᑦᓯᕐᓂᕐᒧᑦ ᓴᓇᔭᐅᓯᒪᔪᒥᒡᓗ ᐃᑦᔪᕐᓁᑦᑐᕕᖕᒥ ᐱᔨᑦᓯᕐᕕᒃᑕᖃᕐᓗᓂ.

² ᑐᐱᖅ ᓇᑉᐸᕐᑕᐅᓚᐅᕐᐳᖅ. ᓯᓚᓪᓕᕐᒥᓗ ᓇᓂᕈᐊᖃᕐᕕᖃᕐᓗᓂ, ᓵᑕᖃᕐᖢᓂᓗ ᓂᐊᖂᔭᓄᑦ ᐃᑦᔪᕐᓁᑎᑕᐅᓯᒪᔪᓄᑦ ᐃᓂᒃᓴᒥᒃ; ᑕᒪᓐᓇᓗ ᑍᔭᐅᕗᖅ ᐃᑦᔪᕐᓁᑦᑐᕕᖕᒥᒃ.

³ ᑐᐱᐅᓪᓗ ᐃᓗᐊᓂ ᑖᓗᑕᕐᔪᐊᑉ ᐂᑉᐸᖓᑕ ᐅᖓᑖᓃᑦᑐᖅ ᐃᒡᓗᕈᓯᖅ ᑍᔭᐅᓪᓗᓂ ᐃᑦᔪᕐᓁᓐᓂᕐᐹᒥᒃ.

⁴ ᑕᕝᕙᓂ ᒎᓗᒥᒃ ᑐᓂᕐᕈᓯᕐᕕᒃᑕᖃᕐᐳᖅ ᐃᓯᕐᓗᐊᕐᓂᑎᑦᓯᕕᖕᒥᒃ ᑎᐱᑦᓯᐊᕆᒃᓴᐅᒥᒃ; ᐊᖏᖃᑎᒌᒍᑏᓪᓗ ᐃᓂᖓ ᐃᒃᖠᕐᕕᒃ ᓯᓚᑎᓕᕐᓯᒪᔪᖅ ᒎᓗᒥᒃ. ᐃᓗᐊᓂ ᒎᓗᒥᒃ ᐃᒥᖃᐅᑎᑕᖃᕐᐳᖅ ᒫᓇᒥᒃ ᐃᓗᓕᓕᖕᒥᒃ, ᐂᕉᓂᐅᓪᓗ ᐊᔭᐅᑉᐱᐊᖓ ᐱᕈᕐᕕᐅᓯᒪᔪᖅ ᐅᖃᐅᔭᕐᓂᒃ, ᐅᔭᕌᒡᓗ ᓵᑦᑐᔮᖅ ᐊᖏᖃᑎᒌᒍᑎᖕᓂᒃ ᑎᑎᕋᕐᕕᒋᓯᒪᔫᒃ ᐃᓗᐊᓃᒃᑭᕗᑦ.

⁵ ᐃᒃᖠᕐᕕᐅᓪᓗ ᖄᖓᓂ ᒪᕐᕉᓂᒃ ᓯᕈᐱᓐᖑᐊᖃᕐᐳᖅ ᐊᑐᓂ ᐃᓴᕈᓖᖕᓂᒃ ᓂᕐᑐᕐᓇᕐᑑᑉ ᓇᓗᓁᒃᑯᑕᖏᖕᓂᒃ, ᐃᓴᕈᖏᒃ ᐃᓵᖓᓪᓗᑎᒃ ᐃᒃᖠᕐᕕᐅᑉ ᒪᑐᖓᑕ ᖄᖓᓂ, ᓴᖅᑭᑎᑦᓯᔫᒃ ᐊᔪᕐᓃᑦ ᐃᓱᒪᒋᔭᐅᔪᓐᓁᕐᑕᐅᓂᖏᓐᓂᒃ. ᒫᓐᓇᓕ ᑕᒪᒃᑯᐊ ᐊᑐᓂᑦ ᐅᖃᐅᓯᕆᑦᓯᐊᕐᓗᒋ ᓇᓗᓁᕈᓐᓇᖏᑲᓚᐅᕐᑕᕗᑦ.

⁶ ᑕᒪᒃᑯᐊ ᑍᒫᒃ ᐋᖅᑭᒃᑕᐅᓯᒪᓚᐅᕐᐳᑦ, ᖃᐅᑕᒫᑦ ᑐᓂᕐᕈᓯᕐᑎᑦᓯᔩᑦ ᑐᐱᕐᒧᐊᕐᐸᓚᐅᕐᐳᑦ ᓯᓚᑖᓃᓐᓂᕐᓴᒧᑦ ᐱᓇᓱᐊᒐᒃᓴᒥᖕᓂᒃ ᐱᓇᓱᐊᕐᓗᑎᒃ,

⁷ ᑐᓂᕐᕈᓯᕐᑎᑦᓯᔩᓪᓕ ᐊᖓᔪᖅᑳᖓᑦ ᑭᓯᒥ ᑐᐱᐅᑉ ᐃᓗᐊᓃᓐᓂᕐᐹᒧᐊᕐᐸᓚᐅᕐᐳᑦ, ᐊᕐᕌᒍᒥ ᐊᑕᐅᓯᐊᕐᓗᓂ, ᐊᐅᖕᒥᒃ ᓇᒃᓴᕐᓗᓂ, ᒎᑎᒧᑦ ᑐᓂᕐᕈᑎᒋᓪᓗᒋᑦ ᐃᒻᒥᓂᒃ ᐱᑦᔪᑎᒋᓪᓗᓂ ᐃᓄᐃᓪᓗ ᖃᐅᔨᒪᓇᑎᒃ ᐊᔪᕐᑐᓕᓂᖏᑦ ᐱᓪᓗᒋᑦ.

⁸ ᐊᓂᕐᓂᖅ ᐃᑦᔪᕐᓁᑦᑐᖅ ᑐᑭᓯᓇᑦᓯᐊᕐᑐᒥᒃ ᓇᓗᓁᕐᓯᕗᖅ ᐃᑦᔪᕐᓁᓐᓂᕐᐹᒧᑦ ᓱᓕ ᐊᖅᑯᑎᒃᓴᖅ ᐊᖕᒪᕐᑕᐅᓯᒪᓚᐅᖏᒻᒪᑦ, ᑐᐱᐅᑉ ᓯᓚᑖᓂ ᐊᕙᓗᓕᐅᕐᓯᒪᔪᖅ ᓱᓕ ᐊᑐᕐᑕᐅᑎᓪᓗᒍ.

⁹ ᑕᒪᓐᓇᓗ ᓇᓗᓁᒃᑯᑕᐅᕗᖅ ᐅᓪᓗᒥᒧᑦ, ᑐᓂᕐᕈᑕᐅᖁᔭᐅᔪᓂᒃ ᑐᓂᕐᕈᓯᕐᓂᕐᓗ ᐆᒪᔪᕕᓂᕐᓂᒃ ᓈᒻᒪᑦᓯᐊᓕᕐᑎᑦᓯᔪᓐᓇᖏᒻᒪᑕ ᐱᔨᑦᓯᕐᑐᑦ ᐃᓱᒪᖏᓐᓂᒃ.

¹⁰ ᓂᕿᓄᑦ ᑍᒤᓕᐅᕆᐊᖃᓚᐅᕐᐳᑦ ᐃᒥᒃᓴᒧᓪᓗ ᓱᓇᑐᐃᓐᓇᕐᓂᒡᓗ ᐊᑦᔨᒌᖏᑦᑐᓂᒃ ᓴᓗᒻᒪᕐᑕᐅᑦᔪᑎᒃᓴᒧᑦ ᐱᐅᓯᕆᔭᐅᔪᑦ ᒪᓕᒃᑕᐅᓚᐅᕐᐳᑦ ᓄᑖᖅ ᐋᖅᑭᒋᐊᕐᑕᐅᔪᒫᕐᑐᖅ ᐊᑐᓕᓚᐅᖏᓐᓂᖓᓂ.

¹¹ ᙭ᔅᑑᓯᓕ ᑎᑭᑦᑕᕇᕐᓯᒪᕗᖅ ᑐᓂᕐᕈᓯᕐᑎᑦᓯᔨᓄᑦ ᐊᖓᔪᖅᑲᐅᓪᓗᓂ ᓈᒻᒪᑦᓯᐊᕐᑐᒥᒃ ᐱᐅᓯᐅᔭᕆᐊᖃᕐᑐᑦ ᑎᑭᐅᑎᓪᓗᓂᒋᑦ ᑐᐱᐅᓕᕐᐳᖅ ᐱᓇᓱᐊᕐᓂᖓ ᓈᒻᒪᖕᓂᕐᓴᐅᓪᓗᓂ ᐋᖅᑭᑦᓯᐊᕐᓯᒪᓂᕐᓴᐅᕗᖅ ᑐᐱᐅᓂᖓ ᑖᓐᓇ ᐃᓄᖕᒧᑦ ᓴᓇᔭᐅᓯᒪᓐᖏᓚᖅ, ᐃᒫᒃ, ᑕᒫᓃᑦᑐᓄᑦ ᐊᑦᔨᒋᔭᐅᓐᖏᓚᖅ.

¹² ᙭ᔅᑑᓯᓕ ᐃᑦᔪᕐᓁᓐᓂᕐᐹᒧᑦ ᐃᓯᓚᐅᕐᐳᖅ ᐊᑕᐅᓯᐊᕐᓗᓂ ᑕᒤᓐᓄᑦ ᓈᒻᒪᒃᓯᑦᔪᑕᐅᓂᐊᓕᕐᑐᒥᒃ ᐃᓯᐅᑦᔨᓪᓗᓂ; ᒎᑦᓯᓪᓗ ᓄᕐᕋᐅᔮᕐᑑᓪᓘᓐᓃᑦ ᐊᐅᖓᓂᒃ ᓇᒃᓴᓚᐅᓐᖏᓚᖅ ᓇᖕᒥᓂᕐᓕ ᐊᐅᖕᒥᓂᒃ ᓇᒃᓴᓚᐅᕐᐳᖅ, ᐃᓱᖃᖏᑦᑐᒧᑦ ᐱᐅᓕᔭᐅᕕᒃᓴᒥᒃ ᐱᓂᐊᕈᑦᔨᓪᓗᓂ.

¹³ ᒎᑦᓯᐅᑉ ᐃᒻᒧᓯᐅᒊᓪᓗ ᐊᖑᓴᓪᓗᖏᑕ ᐊᐅᖏᓐᓄᑦ ᓄᕋᐅᔮᕐᑑᓪᓗ ᐊᕐᔭᓕᐅᕐᓂᖏᓐᓄᑦ ᐃᓄᐃᑦ ᐅᒃᐱᕐᓂᒃᑯᑦ ᐃᑦᔪᕐᓇᕐᑐᑦ ᑲᓐᖔᑎᕆᕕᐅᕙᓚᐅᕐᐳᑦ ᐃᑦᔪᕐᓁᑎᑕᐅᓪᓗᑎᒃ ᑕᑯᒃᓴᐅᔪᒃᑯᑦ ᓴᓗᒻᒪᕐᓴᕐᑕᐅᓂᕐᒥᒍᑦ.

¹⁴ ᐊᖏᓂᕐᓴᒻᒪᕆᐊᓗᖕᒥᒡᓕ ᑕᕝᕙ, ᙭ᔅᑑᓯᐅᑉ ᐊᐅᖓ, ᐊᓂᕐᓂᒃᑯᑦ ᐃᓱᖃᖏᑦᑐᒃᑯᑦ ᐃᒻᒥᓂᒃ ᑐᓂᕐᕈᑕᐅᑎᓚᐅᕐᐳᖅ ᐸᓯᔭᒃᓴᐅᓂᖃᖏᑦᑐᖅ ᒎᑎᒧᑦ, ᑖᑦᓱᒪ ᐃᓱᒪᕗᑦ ᓴᓗᒻᒪᕐᐰᑦ ᐱᓂᐊᕐᓂᕐᓂᑦ ᑐᖁᖓᔪᓂᑦ, ᒎᑎᒥᒃ ᐆᒪᔪᒥᒃ ᐱᔨᑦᓯᕈᓐᓇᖁᓪᓗᒋᑦ.

¹⁵ ᑕᒪᓐᓇ ᐱᑦᔪᑎᒋᓪᓗᒍ ᙭ᔅᑑᓯ ᐱᑦᔪᑦᔨᔨᐅᕗᖅ ᐊᖏᖃᑎᒌᒍᑎᒧᑦ ᓄᑖᒧᑦ, ᑖᒃᑯᐊ ᕾᖁᔭᐅᔪᑦ ᐊᖏᕈᑕᐅᒪᔪᒥᒃ ᐃᓱᖃᖏᑦᑐᒧᑦ ᑭᖑᕐᖑᑦᔨᖁᓪᓗᒋᑦ; ᒫᓐᓇᓕ ᑐᖁᒥᒍᑦ ᐱᐅᓕᔭᐅᑦᔪᑎᒃᓴᐅᓕᕐᐳᖅ ᐊᔪᕐᓂᕐᒥᑦ ᕿᓚᕈᑦᔮᕐᓯᖅᑯᓪᓗᒍ ᐊᑐᓚᐅᕐᑕᖏᓐᓂᑦ ᐊᖏᖃᑎᒌᖕᓂᕐᒥ ᓯᕗᓪᓕᕐᒥ.

¹⁶ ᑐᖁᔪᑉ ᐱᔭᐅᔪᒃᓴᓕᐊᕆᓯᒪᔭᖏᑦ ᐃᓚᒥᓄᑦ, ᐱᔭᐅᔪᓐᓇᖁᓪᓗᒋᑦ ᐋᖅᑭᒃᓯᔪᕕᓂᐅᑉ ᑐᖁᓪᓚᕆᖕᓂᖓ ᓴᖅᑭᑎᑕᐅᔭᕆᐊᖃᕐᐳᖅ,

¹⁷ ᑐᖁᔪᑉ ᐱᔭᐅᔪᒃᓴᓕᐊᕕᓂᖏᑦ ᐃᓚᒥᓄᑦ ᐱᔭᐅᔪᓐᓇᕐᓯᔪᓐᓇᕐᒪᑕ ᑭᓯᐊᓂ ᐃᓅᔪᓐᓃᕐᓯᒪᓕᕐᐸᑦ, ᐃᓅᑎᓪᓗᒍ ᐱᔭᐅᔪᓐᓇᖏᒻᒪᑕ.

¹⁸ ᑍᒤᒻᒪᑦ ᐊᖏᖃᑎᒌᖕᓂᖅ ᓯᕗᓪᓕᖅ ᐊᒡᓛᑦ ᐊᑐᓕᕈᓐᓇᓚᐅᓐᖏᓚᖅ ᐊᐅᖕᒥᒃ ᐊᑐᓐᖏᑐᐊᕈᓂ.

¹⁹ ᒨᓯᓯᐅᑉ ᐱᖁᔭᑦ ᑕᒪᕐᒥᒃ ᐃᓄᖕᓄᑦ ᐊᑐᐊᕇᕋᒥᒋᑦ ᓄᕐᕋᐅᔭᐅᑉ ᒎᑦᓯᐅᓪᓗ ᐊᐅᖏᓐᓂᒃ ᐱᓪᓗᓂ, ᐃᒪᕐᒥᒃ ᐃᓚᓪᓗᒋᑦ ᑖᒃᑯᐊ ᐱᖁᔧᑦ ᑎᑎᕋᕐᓯᒪᔪᑦ ᓯᕐᐸᕐᓴᓚᐅᕐᐰᑦ ᐃᓄᐃᓪᓗ ᑕᒪᕐᒥᒃ, ᕼᐃᓴᑉᓂᒃ ᓰᐱᑦ ᒥᖅᑯᖏᓐᓂᒃ ᐊᐅᖕᒥᒃ ᐃᑦᓴᒃᑎᕐᓯᒪᔪᑦ ᐊᑐᕐᓗᒋᑦ.

²⁰ ᐅᖃᕐᓗᓂ, “ᐅᓇ ᑕᕝᕙ ᐊᐅᒃ ᐊᖏᖃᑎᒌᖕᓂᕐᒥᒃ ᓇᓗᓁᕐᓯᔪᖅ ᒎᑎᐅᑉ ᐊᑐᕐᑕᐅᖁᔭᖏᓐᓂᒃ ᐃᓕᑦᓯᓐᓄᑦ.”

²¹ ᑍᒫᑦᓮᓐᓇᕐᑕᐅᖅ ᐊᐅᖕᒧᑦ ᓯᕐᐸᕐᓴᓚᐅᕐᐰᑦ ᑐᐱᖅ ᑐᒃᓯᐊᕐᑎᓪᓗᒋᓪᓗ ᐱᖁᑏᑦ ᐊᑐᕐᑕᐅᕙᒃᑐᓕᒫᑦ.

²² ᐃᓛᒃ, ᐱᖁᔭᖅ ᒪᓕᒡᓗᒍ ᑕᒪᑦᓯᐊᑲᓵᖏᑦ ᐊᐅᖕᒧᑦ ᓴᓗᒻᒪᕐᑕᐅᕗᑦ, ᐊᐅᒡᓗ ᑯᕕᔭᐅᓐᖏᑉᐸᑦ ᐊᔪᕐᓃᑦ ᐃᓱᒪᒋᔭᐅᔪᓐᓃᕈᓐᓇᓐᖏᓚᑦ.

᙭ᔅᑑᓯᐅᑉ ᑐᓂᕐᕈᑕᐅᓂᖓᑕ ᐊᔪᕐᓃᑦ ᐲᔭᕐᐰᑦ

²³ ᑕᒪᒃᑯᐊ ᕿᓚᖕᒦᑦᑐᓄᑦ ᐊᑦᔨᒋᔭᐅᔪᑦ ᓴᓗᒻᒪᕐᑕᐅᔭᕆᐊᖃᓚᐅᕐᐳᑦ ᑕᒪᒃᑯᑎᒎᓇᖅ, ᕿᓚᖕᒦᑦᑐᓪᓕ ᑐᓂᕐᕈᓯᕈᑕᐅᔭᕆᐊᖃᕐᐳᑦ ᐱᐅᓂᕐᓴᒥᒃ ᑕᒪᒃᑯᓇᖓᑦ ᑐᓂᕐᕈᑕᐅᕙᒃᑐᓂᑦ.

²⁴ ᙭ᔅᑑᓯ ᐃᑎᓚᐅᕐᐳᖅ, ᐃᑦᔪᕐᓁᑦᑐᕕᖕᒧᑦ ᐊᒡᒐᓄᑦ ᓴᓇᔭᐅᓯᒪᖏᑦᑐᒧᑦ, ᕿᓚᖕᒦᑦᑐᒧᑦ ᑕᕝᕗᖓ ᐊᑦᔨᐅᑎᑕᐅᓯᒪᔪᒧᑦ, ᓇᖕᒥᓂᕐᓗ ᕿᓚᖕᒧᐊᓚᐅᕐᐳᖅ ᒎᑎᐅᑉ ᓵᖓᓄᑦ ᓴᖅᑭᑦᓱᒪᓪᓗᓂ ᐱᑦᔪᑎᒋᓪᓗᑕ.

²⁵ ᔫᑎᑦ ᑐᓂᕐᕈᓯᕐᑎᑦᓯᔨᖏᑕ ᐊᖓᔪᖅᑳᖏᑦ ᐃᑎᖃᑦᑕᓚᐅᕐᐳᑦ ᐃᑦᔪᕐᓁᓐᓂᕐᐹᒧᑦ ᐊᕐᕌᒍᑕᒫᑦ ᐆᒪᔫᑉ ᐊᐅᖓᓂᒃ ᓇᒃᓴᕐᓗᑎᒃ, ᙭ᔅᑑᓯᓕ ᐅᓄᕐᑐᐃᓱᕐᓗᓂ ᐃᑎᕐᓯᒪᓐᖏᓚᖅ ᐃᒻᒥᓂᒃ ᑐᓂᕐᕈᑎᒋᔭᕐᑐᕐᓗᓂ;

²⁶ ᑍᒤᒃᑯᓂ ᐋᓐᓂᐊᑎᑕᐅᖃᑦᑕᕋᔭᓚᐅᕐᐳᖅ ᐅᓄᕐᑐᐃᓱᕐᓗᓂ ᑍᒪᓐᖓᑦ ᓯᓚᕐᔪᐊᑉ ᐱᓐᖑᕐᑎᑕᐅᓂᖓᓂᑦ. ᑭᓯᐊᓂᓕ, ᒫᓐᓇ ᓴᖅᑭᓯᒪᕗᖅ ᐊᑕᐅᓯᐊᑐᐃᓐᓇᕐᓗᓂ, ᓯᓚᕐᔫᑉ ᓇᒡᒐᑖ ᖃᒡᓕᓕᕐᑎᓪᓗᒍ, ᐊᔪᕐᓂᕐᒥᒃ ᐲᕐᓯᖁᓪᓗᒍ ᓇᖕᒥᓂᖅ ᑐᓂᕐᕈᑎᒋᓂᕐᒥᒍᑦ.

²⁷ ᐃᓄᐃᓪᓗ ᐊᑕᐅᓯᐊᕐᓗᑎᒃ ᑐᖁᔭᕆᐊᖃᕐᒪᑕ, ᑭᖑᓂᖓᒍᓪᓕ ᐃᖅᑲᕐᑐᕐᑕᐅᕕᒃᓴᖃᕐᐳᑦ.

²⁸ ᑍᒫᒃᑕᐅᖅ ᙭ᔅᑑᓯ, ᐊᑕᐅᓯᐊᕐᓗᓂ ᑐᓂᕐᕈᑎᒋᔭᐅᓚᐅᕐᐳᖅ ᐊᒥᓱᑦ ᐊᔪᕐᓂᖏᑦ ᐲᔭᕐᑕᐅᖁᓪᓗᒋᑦ, ᑭᖑᓪᓕᕐᒥᒡᓕ ᓴᖅᑭᑦᓱᒫᕆᕗᖅ, ᐊᔪᕐᓂᕐᒥᒃ ᐱᑦᔪᑎᖃᕈᓐᓁᕐᓗᓂ ᐱᐅᓕᓯᔭᕐᑐᓕᕐᓗᓂᓕ ᐅᑕᖅᑭᔪᓂᒃ ᑖᑦᓱᒥᖓ.