ᐄᑉᕈᐃᓄᑦ 4 - ᐊᒡᓔᑦ ᐃᑦᔪᕐᖕᓁᑦᑐᑦ

¹ ᑍᒤᒻᒪᑦ, ᒎᑎᐅᑉ ᐊᖏᕐᕕᒋᓯᒪᕚᑎᒍᑦ ᑕᕾᕐᓯᕐᕕᒃᓴᖃᖁᓪᓗᑕ, ᐊᑏ ᑲᒪᑦᓯᐊᓕᕐᑕ ᐊᖏᕈᑕᐅᓯᒪᔪᒧᑦ ᓇᓪᓕᑦᓯᓐᓂᒃ ᐃᑎᕐᑎᑕᐅᔪᓐᓁᓪᓕᔪᖃᖁᓇᒍ.

² ᐅᕙᒍᑦᑕᐅᖅ ᐅᖃᐅᓯᕐᓂᒃ ᑐᓴᕈᒥᓇᕐᑐᓂᒃ ᑐᓴᕐᑎᑕᐅᓯᒪᒐᑦᑕ ᑍᒃᑯᑎᑐᓇᖅ; ᑍᒃᑯᐊᓕ ᑐᓴᕐᑕᒥᖕᓂᒃ ᐱᕙᓪᓕᕈᑎᖃᓚᐅᓐᖏᓚᑦ, ᑐᓴᕐᑎᓪᓗᒋᑦ ᐃᓚᓕᐅᕐᓯᓚᐅᖏᒻᒪᑕ ᐅᒃᐱᕐᓂᑯᑦ.

³ ᐅᕙᒍᓪᓕ ᐅᒃᐱᓚᐅᕐᑐᒍᑦ ᑕᕾᕐᓯᕐᕕᒃᓴᒧᑦ ᑕᕝᕗᖓ ᐃᑎᕐᓯᒪᕗᒍᑦ, ᐅᖃᕐᓯᒪᖕᒪᑦ, “ᓂᓐᖓᒡᓗᖓ ᐅᖃᕕᓚᐅᕐᐳᖓ, ‘ᑖᒃᑯᐊ ᑕᕾᕐᓯᕐᕕᐅᖁᔭᓐᓄᑦ ᐃᑎᕐᑐᖃᑦᔮᓐᖏᓚᑦ,’” ᑍᒫᒃ ᐅᖃᓚᐅᕐᐳᖅ ᐱᓇᓱᐊᕐᓂᖓ ᐱᔭᕇᕐᓯᒪᒐᓗᐊᕐᑎᓪᓗᒍ ᑍᒪᓐᖓᓂᑦ ᓯᓚᕐᔪᐊᑉ ᐱᓐᖑᕐᑎᑕᐅᓕᕐᓂᖓᓂᑦ.

⁴ ᐅᖃᕐᓯᒪᖕᒪᑦ ᐅᓪᓗᐃᑦ 7ᖓᓐᓂᒃ ᐱᑦᔪᑎᓕᖕᒥᒃ, “ᒎᑎᓗ ᑕᕾᕐᓯᓚᐅᕐᐳᖅ ᐅᓪᓗᐃᑦ 7ᖓᓐᓂ ᓴᓇᔭᒥᓂᑦ ᑕᒤᓐᓂᑦ.”

⁵ ᑕᕝᕙᓂᑦᑕᐅᖅ ᐅᖃᓯᒪᒋᕗᖅ, “ᑕᕾᕐᓯᕐᕕᐅᖁᔭᓐᓄᑦ ᐃᑎᕐᑐᖃᑦᔮᓐᖏᓚᖅ.”

⁶ ᑖᒃᑯᐊ ᑐᓴᕐᑎᑕᐅᖅᑳᓚᐅᕐᑐᑦ ᐅᖃᐅᓯᕐᓂᒃ ᑐᓴᕈᒥᓇᕐᑐᓂᒃ ᐃᑎᖁᔭᐅᓚᐅᓐᖏᓚᑦ ᑕᕾᕐᓯᕐᕕᖕᒧᑦ ᓈᓚᓚᐅᖏᒻᒪᑕ, ᐊᓯᖏᓪᓕ ᓱᓕ ᐃᑎᕐᕕᒃᓴᖃᕐᑎᑕᐅᕗᑦ.

⁷ ᓱᓕᓕ ᐱᕕᒃᓴᖃᕐᑎᑦᓯᒃᑲᓐᓂᓚᐅᕐᐳᖅ ᐅᓪᓘᑉ ᐊᓯᐊᓂᒃ ᑍᔭᐅᔪᒥᒃ “ᐅᓪᓗᒥ,” ᐅᖃᓚᐅᕐᐳᖅ ᑍᕕᑎᒃᑯᑦ ᐊᑯᓂᐅᓕᕐᑎᓪᓗᒍ, ᐅᖃᐅᓯᐅᔭᕇᕐᓯᒪᔪᖅ: “ᐅᓪᓗᒥ ᓂᐱᖓ ᑐᓴᕈᑦᓯᐅᒃ, ᐱᔭᕐᓂᖏᑦᑑᒐᓱᐊᕐᑍᓕᒋᑦᓯ.”

⁸ ᔮᓱᐊᓪᓕ ᐃᓄᐃᑦ ᑕᕾᕐᓯᕐᕕᖕᒧᐊᕐᑎᓚᐅᕐᐸᒋᑦ, ᒎᑎ ᐅᖃᒃᑲᓐᓂᕋᔭᓚᐅᓐᖏᓚᖅ ᐅᓪᓗᒃᑲᓐᓂᐅᔪᒫᕐᑐᒥᒃ.

⁹ ᑍᒤᒻᒪᑦ, ᓱᓕ ᑕᕾᕐᓯᕐᕕᒃᓴᕐᑕᖃᕐᐳᖅ ᓴᐸᑎᑎᑐᑦ ᒎᑎᐅᑉ ᐃᓄᖁᑎᖏᓐᓄᑦ.

¹⁰ ᓇᓪᓕᐊᑦ ᒎᑎᐅᑉ ᑕᕾᕐᓯᕐᕕᐅᖁᔭᖓᓄᑦ ᐃᑎᕐᑐᖅ ᑕᕾᕐᓯᕐᓂᐊᕐᐳᖅ ᐱᓇᓱᐊᕐᓂᕐᒥᓂᑦ ᒎᑎᑦᑕᐅᖅ ᑕᕾᕐᓯᓚᐅᕐᒪᑦ ᐱᓇᓱᐊᕐᓂᕐᒥᓂᑦ.

¹¹ ᑍᒤᒻᒪᑦ ᐱᓇᓱᐊᒻᒪᕆᓕᕐᑕ ᑕᕾᕐᓯᕐᕕᖕᒧᑦ ᑕᕝᕗᖓ ᐃᑎᕈᓐᓇᖁᓪᓗᑕ, ᓇᓪᓕᐊᓐᓂᒃ ᐃᑎᕈᓐᓁᓕᔪᖃᖁᓇᒍ ᓈᓚᖏᓐᓂᕐᒧᑦ ᑍᒃᑯᑎᑐᓇᖅ.

¹² ᒎᑎᐅᑉ ᐅᖃᐅᓯᖓ ᐆᒪᖕᒪᑦ ᐱᓇᓱᐊᕐᓗᓂᓗ, ᐃᒡᓗᒃᑐᑦ ᑮᓇᓕᖕᒥᑦ ᓴᕕᒡᔪᐊᒥᑦ ᐃᐱᖕᓂᕐᓴᐅᓪᓗᓂ, ᑭᓪᓕᒍᑎᔪᓐᓇᕐᐳᖅ ᑕᕐᓂᖅ ᐊᓂᕐᓂᕐᓗ ᑎᑭᓪᓗᒋᒃ, ᓇᒡᒍᐊᓪᓗ ᐸᑎᕐᓗ ᑎᑭᓪᓗᒋᒃ, ᓴᖅᑭᑎᑦᓯᔪᓐᓇᕐᓗᓂᓗ ᐃᓅᑉ ᐃᓱᒪᖓᓂᒃ ᐱᔪᒪᔭᖏᓐᓂᒡᓗ.

¹³ ᑖᑦᓱᒪ ᓵᖓᓂ ᐱᓐᖑᕐᑎᑕᐅᓯᒪᔪᒥᒃ ᐃᔨᕐᓯᒪᔪᖃᓐᖏᓚᖅ, ᑕᒪᕐᒥᒃ ᓴᖅᑭᔮᑦᓯᐊᕐᐳᑦ ᑕᑯᒃᓴᐅᑦᓯᐊᕐᓗᑎᒃᓗ ᑖᑦᓱᒪ ᐃᔨᖏᒃᑕ ᓵᖓᓂ. ᑖᑦᓱᒧᖓ ᐅᕙᑦᑎᓐᓂᒃ ᐅᖃᐅᓯᕆᔭᕆᐊᖃᕐᐳᒍᑦ.

ᔩᓱᓯᐅᑉ ᑐᓂᕐᕈᓯᕐᑎᑦᓯᔨᓄᑦ ᐊᖓᔪᖅᑳᕐᔪᐊᖑᓂᖓ

¹⁴ ᑐᓂᕐᕈᓯᕐᑎᑦᓯᔨᓄᑦ ᐊᖓᔪᖅᑳᕐᔪᐊᖃᕋᑦᑕ ᒎᑎᐅᑉ ᓇᔪᒐᖓᓄᑦ ᐂᓯᒪᔪᒥᒃ ᔩᓱᓯᒥᒃ, ᒎᑎᐅᑉ ᐃᕐᓂᖓᓂᒃ, ᐅᒃᐱᕐᓂᕗᑦ ᑎᒍᒥᐊᑦᓯᐊᕐᓚᕗᑦ.

¹⁵ ᑐᓂᕐᕈᓯᕐᑎᑦᓯᔨᓄᑦ ᐊᖓᔪᖅᑳᖃᖏᓐᓇᑦᑕ ᐃᓚᑦᓱᒍᓱᒍᓐᓇᖏᑦᑐᒥᒃ ᓴᓐᖐᓐᓂᑦᑎᓐᓂᒃ, ᐃᓘᓐᓈᒍᓪᓕ ᖃᓄᑐᐃᓐᓇᖅ ᐱᐅᓐᖏᑦᑐᒧᑦ ᐱᔪᒥᓵᕐᑕᐅᓯᒪᕗᖅ ᐅᕙᑦᑎᑐᑦ, ᐊᔪᕐᑐᓕᓚᐅᕋᓂᓕ.

¹⁶ ᑍᒤᒻᒪᑦ ᓯᕘᕋᖏᓪᓗᑕ ᐃᒃᓯᕙᐅᑕᕐᔪᐊᖅ ᖃᒡᓕᓕᕐᓚᕗᑦ ᐱᑦᓯᐊᕐᕕᐅᓂᖅ, ᑕᕝᕙᓂ ᓂᑲᒋᔭᐅᖁᓪᓗᑕ ᐱᑦᓯᐊᕐᓂᖓᑕ ᐱᔪᓐᓇᕐᑎᑦᓯᓂᖓᓄᓪᓗ ᐃᑲᔪᕐᑕᐅᖁᓪᓗᑕ ᐃᑲᔪᕐᑕᐅᔭᕆᐊᖃᕐᓂᕗᑦ ᒪᓕᒡᓗᒍ.