ᐄᑉᕈᐃᓄᑦ 3 - ᐊᒡᓔᑦ ᐃᑦᔪᕐᖕᓁᑦᑐᑦ

ᔩᓱᓯ ᐱᓪᓚᕆᐅᓂᕐᓴᐅᕗᖅ ᒨᓯᓯᒥᑦ

¹ ᑍᒤᒻᒪᑦ, ᐅᒃᐱᖃᑎᕗᑦ ᐃᑦᔪᕐᓁᑦᑐᓯ, ᒎᑎᒧᑦ ᕾᖁᔭᐅᖃᑕᐅᓯᒪᔪᓯ, ᔩᓱᓯ ᐃᓱᒪᒋᓚᐅᕐᓯᐅᒃ, ᐋᐴᓯᑕᓕᐅᔪᖅ ᑐᓂᕐᕈᓯᕐᑎᑦᓯᔨᓄᓪᓗ ᐊᖓᔪᖅᑳᖑᓪᓗᓂ ᐅᒃᐱᕐᓂᑦᑎᓐᓄᑦ.

² ᓱᖁᓯᔪᐃᑦᑑᓚᐅᕐᐳᖅ ᑎᓕᔨᒋᓯᒪᔭᒥᓄᑦ, ᒨᓯᓯᑕᐅᖅ ᓱᖁᓯᔪᐃᑦᑑᓚᐅᕐᒪᑦ ᐱᓇᓱᐊᕐᑕᒥᓂᒃ ᒎᑎᐅᑉ ᐃᒡᓗᖓᓂ.

³ ᐃᒡᓗᓕᐅᕐᑐᖅ ᐅᐱᒋᔭᐅᓂᕐᓴᐅᓲᖑᕗᖅ ᐃᒡᓗᓕᐊᕆᔭᒥᓂᑦ ᑍᒫᒃᑕᐅᖅ ᔩᓱᓯ ᓂᕐᑐᕐᑕᐅᓂᕐᓴᐅᓚᐅᕐᐳᖅ ᒨᓯᓯᒥᑦ.

⁴ ᐃᒡᓗᓕᒫᑦ ᓴᓇᔨᖃᓲᖑᕗᑦ ᐃᓄᖕᒥᒃ, ᓱᓇᓕᒫᓂᒡᓕ ᓴᓇᓯᒪᔪᖅ ᑕᕝᕙ ᒎᑎ.

⁵ ᒨᓯᓯ ᓱᖁᓯᔪᐃᑦᑑᓚᐅᕐᐳᖅ ᒎᑎᐅᑉ ᐃᒡᓗᖓᓂ ᐱᔨᐅᓪᓗᓂ, ᓇᓗᓁᕐᓯᓪᓗᓂ ᑭᖑᕐᖓᒍᑦ ᐅᖃᐅᓯᕆᔭᐅᔪᒫᕐᑐᓂᒃ,

⁶ ᙭ᔅᑑᓯᓕ ᓱᖁᓯᔪᐃᑦᑑᕗᖅ ᐃᕐᓂᐅᓪᓗᓂ ᐊᖓᔪᖅᑲᐅᔪᖅ ᒎᑎᐅᑉ ᐃᒡᓗᖓᓄᑦ. ᐅᕙᒍᑦ ᑖᑦᓱᒪ ᐃᒡᓗᒋᕚᑎᒍᑦ ᓴᐱᖏᑦᔪᑎᒃᓴᖅ ᓂᕆᐅᖕᓂᕐᓗ ᓂᕐᑐᕐᓇᐅᑎᒋᔭᕗᑦ ᐱᓯᒤᓐᓇᕐᓂᐊᕈᑦᑎᒍᑦ ᐃᓱᐊᓄᑦ.

ᒎᑎᐅᑉ ᐃᓄᖁᑎᖏᑕ ᑕᕾᕐᓯᕐᕕᒃᓴᖓ

⁷ ᑍᒤᒻᒪᑦ, ᐊᓂᕐᓂᖅ ᐃᑦᔪᕐᓁᑦᑐᖅ ᐅᖃᕐᓯᒪᕗᖅ, “ᐅᓪᓗᒥ ᓂᐱᖓ ᑐᓴᕈᑦᓯᐅᒃ,

⁸ ᓯᑎᔫᒐᓱᐊᕐᑍᓕᒋᑦᓯ ᐊᑭᕋᕐᑐᓚᐅᕐᑐᑎᑐᑦ, ᓱᓇᖃᔪᐃᑦᑐᒥ ᐆᒃᑐᐃᓚᐅᕐᑐᑎᑐᓪᓗ ᒎᑎᒥᒃ.

⁹ ᑕᕝᕙᓂ ᓯᕗᓕᕕᓂᑦᓯ ᐆᒃᑐᓚᐅᕐᒪᖓ ᖃᐅᔨᓴᕐᓗᖓᓗ ᐱᓇᓱᐊᕐᓂᑲ ᑕᑯᓚᐅᕐᐰᑦ ᐊᕐᕌᒍᓂᒃ 40ᓂᒃ.

¹⁰ ᑍᒤᒻᒪᑦ ᐃᓅᖃᑎᒌᑦ ᑖᒃᑯᐊ ᓂᓐᖓᐅᑎᓚᐅᕐᐸᒃᑲ, ᐅᖃᕐᓗᖓᓗ, ‘ᐃᓱᒪᖏᑦ ᑕᒻᒪᕐᓯᒤᓐᓇᕐᐳᑦ; ᐱᖁᔭᒃᑲᓗ ᖃᐅᔨᓇᓱᓚᐅᓐᖏᓔᑦ.’

¹¹ ᑍᒤᒻᒪᑦ ᓂᓐᖓᒡᓗᖓ ᐅᖃᕕᓚᐅᕐᐳᖓ, ‘ᑕᕾᕐᓯᕐᕕᐅᖁᔭᓐᓄᑦ ᐃᑎᕐᑐᖃᑦᔮᓐᖏᓚᑦ.’”

¹² ᑲᒪᑦᓯᐊᕆᑦᓯ ᐅᒃᐱᖃᑎᒃᑲ, ᓇᓪᓕᓯ ᐃᓱᒪᖃᕐᑍᓕᓕ ᐱᐅᖏᑦᑐᒥᒃ, ᐅᒃᐱᖏᑦᑐᒥᒡᓗ ᒎᑎ ᑐᖁᓱᐃᑦᑐᖅ ᓈᓚᒍᓐᓃᕐᓗᒍ ᐱᔪᒥᒃ.

¹³ ᖃᐅᑕᒫᓪᓕ ᐃᓕᑦᓯᓐᓄᑦ ᐃᑲᔪᕐᑎᒌᓕᕆᑦᓯ, ᐅᓇ ᐅᖃᐅᓯᐅᓂᖓᓂ, “ᐅᓪᓗᒥ,” ᓇᓪᓕᑦᓯᓐᓂᒃ ᓯᑎᔫᑎᑕᐅᔪᖃᖁᓇᒍ ᐊᔪᕐᓂᐅᑉ ᑕᒻᒪᕐᑎᑦᓯᓂᖓᓄᑦ.

¹⁴ ᙭ᔅᑑᓯ ᐱᓇᓱᐊᖃᑎᒋᒐᑦᑎᒍᑦ, ᐱᒋᐊᓕᕐᓗᑕ ᑕᑎᖃᕐᓂᕆᓚᐅᕐᑕᕗᑦ ᑲᔪᓯᑎᓐᓂᐊᑐᐊᕈᑦᑎᒍᑦ ᐃᓱᐊᓄᑦ.

¹⁵ ᑕᕝᕙ ᐃᒫᒃ ᐅᖃᕐᓯᒪᕗᖅ, “ᐅᓪᓗᒥ ᓂᐱᖓ ᑐᓴᕈᑦᓯᐅᒃ, ᐱᔭᕐᓂᖏᑦᑑᒐᓱᐊᕐᑍᓕᒋᑦᓯ ᐊᑭᕋᕐᑐᓚᐅᕐᑐᑎᑐᑦ.”

¹⁶ ᑭᓇᒃᑰᓚᐅᕐᐸᑦ ᑍᒃᑯᐊ ᑐᓴᓚᐅᕐᑐᑦ ᐊᑭᕋᕐᑐᓚᐅᕐᑐᓪᓗ? ᑖᒃᑯᐊᖑᓐᖏᓛᑦ ᒨᓯᓯᐅᑉ ᐄᑦᔨᑉᑎᒥᑦ ᐊᐅᓪᓚᕈᑎᓚᐅᕐᑕᓕᒫᖏᑦ?

¹⁷ ᑭᓇᒃᑯᓐᓄᓪᓕ ᒎᑎ ᓂᓐᖓᐅᒪᓚᐅᕐᐸ ᐅᑭᐅᓂᒃ 40ᓂᒃ? ᑖᒃᑯᓄᖓᐅᓐᖏᓛᖅ ᐊᔪᕐᑐᓕᓚᐅᕐᑐᓄᑦ, ᑐᖁᑎᑕᐅᓚᐅᕐᑐᓄᑦ ᓱᓇᖃᔪᐃᑦᑐᒥ?

¹⁸ ᑭᓇᒃᑯᓐᓄᓪᓗ ᐅᖃᕕᓚᐅᕐᐸ ᑕᕾᕐᓯᕐᕕᐅᖁᔭᒥᓄᑦ ᐃᑎᕐᑐᖃᑦᔮᖏᓐᓂᕅᓪᓗᓂ, ᑖᒃᑯᓄᖓᐅᓐᖏᓛᖅ ᓈᓚᓚᐅᖏᑦᑐᓄᑦ?

¹⁹ ᑕᕝᕙ ᑕᑯᕗᒍᑦ ᓄᓇᒃᓴᒥᓄᑦ ᐃᑎᕈᓐᓁᓕᓚᐅᕐᒪᑕ ᐅᒃᐱᖏᓐᓂᕐᒧᑦ.