ᐄᑉᕈᐃᓄᑦ 12 - ᐊᒡᓔᑦ ᐃᑦᔪᕐᖕᓁᑦᑐᑦ

ᒎᑎ ᐊᑖᑕᕗᑦ

¹ ᑍᒤᒻᒪᑦ, ᐅᓄᕐᑐᕐᔪᐊᓂᒃ ᐅᒃᐱᕐᓂᑯᑦ ᐃᓅᓯᒪᔪᓂᒃ ᐊᕙᑕᖏᕐᑕᐅᓯᒪᒐᑦᑕ, ᐅᕙᑦᑎᓐᓄᑦ ᐊᒡᕕᐊᕐᑐᑦ ᐲᔭᓚᐅᕐᓚᕗᑦ, ᐊᔪᕐᓃᑦ ᐅᕙᑦᑎᓐᓄᑦ ᓂᐱᓐᖓᔪᑦ, ᐅᖁᒤᒃᓴᐅᑎᒋᔭᕗᓪᓗ; ᕿᓄᐃᓵᕐᓗᑕ ᐅᓪᓚᖃᑕᐅᓚᐅᕐᑕ ᑲᔪᓯᓗᑕ ᐅᐸᒐᓱᐊᕐᑕᕗᑦ ᓯᕗᓂᑦᑎᓐᓃᒻᒪᑦ,

² ᔩᓱᓯ ᑕᑯᓐᓈᕐᓗᒍ ᐅᒃᐱᕐᓂᑦᑎᓐᓂᒃ ᐱᒋᐊᕐᑎᑦᓯᔨᐅᓪᓗᓂᓗ ᓈᒻᒪᒃᓯᑎᑦᓯᔪᖅ, ᑖᓐᓇ ᖁᕕᐊᓱᖕᓂᒃᓴᒥᓂᒃ ᑕᑯᓐᓈᕋᒥ ᓴᓐᓂᖓᔪᓕᒃ ᕿᓄᐃᓵᕐᓗᓂ ᐊᑐᓚᐅᕐᐹ, ᑲᓐᖑᓇᕐᓂᖓ ᑲᒪᒋᓇᒍ, ᒫᓐᓇᓗ ᐃᒃᓯᕙᓕᕐᐳᖅ ᒎᑎᐅᑉ ᐃᒃᓯᕙᐅᑕᕐᔪᐊᖓᑕ ᑕᓕᕐᐱᐊᓂ.

³ ᐃᓱᒪᒋᓚᐅᕐᓯᐅᒃ ᑖᑦᓱᒪ ᐊᑐᓚᐅᕐᑕᖓ ᐊᖏᔪᒥᒃ ᕿᓄᐃᓵᓚᐅᕐᐳᖅ ᐊᔪᕐᑐᓕᔪᓄᑦ ᐊᑭᕋᕐᑐᕐᑕᐅᒐᓗᐊᕋᒥ, ᓴᓐᖐᓕᖁᓇᓯ ᓴᐱᓕᖁᓇᓯᓗ.

⁴ ᐊᔪᕐᑐᓕᓂᕐᒥᒃ ᓵᓚᖃᕋᓱᐊᕐᑎᓪᓗᓯ ᑐᖁᑕᐅᑐᐃᓐᓇᕆᐊᖃᓕᕐᓗᓯ ᓱᓕ ᐱᓚᐅᖏᓐᓇᑦᓯ.

⁵ ᐳᐃᒍᕐᐱᓯᐅᒃ ᐅᖃᐅᓰᑦ ᐱᕙᓪᓕᕐᓇᕐᑐᑦ ᐃᓕᑦᓯᓐᓄᑦ ᐅᖃᐅᓯᐅᓯᒪᔪᑦ ᕿᑐᕐᖓᖃᕐᓂᕋᕐᑐᑦ? “ᐃᕐᓃᒃ, ᐊᑕᓂᐅᑉ ᐋᖅᑭᒋᐊᕐᓯᓂᖓᓂᒃ ᓇᕐᕈᑦᑍᓕᒋᑦ, ᓴᐱᓕᕐᑍᓕᒋᓪᓗ ᑖᑦᓱᒧᖓ ᓱᐊᖓᔭᐅᒍᕕᑦ.

⁶ ᐊᑕᓂᐅᑉ ᓇᒡᓕᒋᔭᓂ ᐋᖅᑭᒋᐊᕐᐸᖕᒪᒋᑦ, ᕿᑐᕐᖓᕆᓕᕐᑕᓂᓗ ᑕᒪᕐᒥᒃ ᓱᒋᐊᕐᐸᒃᖢᓂᒋᑦ.”

⁷ ᐋᖅᑭᒋᐊᕐᑕᐅᓂᐅᓪᓕ ᐅᖁᒤᓐᓂᖓᓂᒃ ᕿᓄᐃᓵᕈᑎᖃᕆᐊᖃᕐᐳᓯ. ᑕᒪᑐᒨᓇ ᒎᑎᐅᑉ ᓴᖅᑭᑎᑦᓯᕕᒋᕚᓯ ᕿᑐᕐᖓᖃᕐᓂᕐᒥᓂᒃ; ᓇᓪᓕᐊᓐᓂᒃ ᕿᑐᕐᖓᕆᔭᐅᔪᒥᒃ ᐊᑖᑕᒥᓄᑦ ᐋᖅᑭᒋᐊᕐᑕᐅᓚᐅᕐᓯᒪᖏᑦᑐᖃᕐᐹ?

⁸ ᐋᖅᑭᒋᐊᕐᑕᐅᕙᖏᒃᑯᑦᓯᓕ, ᐊᓯᓕᒫᓯ ᐋᖅᑭᒋᐊᕐᑕᐅᕙᒃᑎᓪᓗᒋᑦ, ᑕᕝᕙ ᑖᑦᓱᒧᖓ ᕿᑐᕐᖓᕆᔭᐅᓐᖏᓚᓯ ᑕᒫᓐᖕᒊᓐᓇᕐᓕ ᐃᓅᓯᒪᕗᓯ.

⁹ ᑎᒥᑦᑎᒍᑦ ᐊᑖᑕᒋᔭᕗᑦ ᓱᒋᐊᕐᑎᒋᕙᓚᐅᕋᑦᑎᒋᑦ ᑍᒤᓕᐅᓚᐅᕐᓂᖏᑦ ᐅᐱᒋᕙᕗᑦ. ᑕᕝᕙᓕ ᐊᓂᕐᓂᒃᑯᑦ ᐊᑖᑕᒋᔭᕗᑦ ᓈᓚᒐᒃᓴᕆᓐᖏᓚᕘᑦ ᐃᓅᖁᓪᓗᑕ?

¹⁰ ᑎᒥᑦᑎᒍᑦ ᐊᑖᑕᑦᑕ ᐋᖅᑭᒋᐊᕐᐸᓚᐅᕐᐹᑎᒍᑦ ᓯᕕᑭᑦᑐᒥᒃ ᓈᒻᒪᒐᓱᒋᔭᒥᖕᓄᑦ, ᒎᑎᐅᓪᓕ ᐋᖅᑭᒋᐊᕐᐸᒃᐹᑎᒍᑦ ᐅᕙᑦᑎᓐᓄᑦ ᐱᕙᓪᓕᕐᓇᕐᑐᒥᒃ, ᐃᑦᔪᕐᓁᓐᓂᖓᓂᒃ ᐃᓚᖏᐅᑎᖃᑕᐅᖁᓪᓗᑕ.

¹¹ ᐋᖅᑭᒋᐊᕐᑕᐅᑎᓪᓗᑕ ᐃᓱᒪᒋᕙᕗᑦ ᖁᕕᐊᓱᖏᑦᔪᑎᒃᓴᐅᓇᓱᒋᓪᓗᒍ ᕿᒃᓴᐅᑎᒋᕙᕗᑦ; ᐋᖅᑭᒋᐊᕐᑕᐅᕙᒃᑐᓪᓕ ᐱᕈᕐᓴᑎᓪᓗᒋᑦ ᑭᖑᓂᖓᒍ ᓮᒪᓇᕐᑐᒥᒃ ᐃᓗᐊᕐᑐᒥᒡᓗ ᐃᓅᓯᖃᕈᑕᐅᓂᕐᓴᐅᕗᖅ ᑍᒤᑦᑐᒃᑯᑦ ᐱᒋᐅᕐᓴᕐᑕᐅᓯᒪᔪᓄᑦ.

ᖃᐅᔨᒪᔭᐅᔪᒃᓮᑦ ᐅᓗᕆᐊᒋᔭᒃᓮᓪᓗ

¹² ᑍᒤᒻᒪᑦ ᐊᒡᒐᓯ ᓄᑮᕈᑎᓯᒪᔪᑦ ᖁᒻᒧᐊᒃᑎᓕᕐᓯᒋᒃ ᓰᖅᑯᓯᓗ ᓴᓐᖐᓕᓯᒪᔪᑦ ᓴᓐᖏᒃᑎᓴᓕᕐᓯᒋᒃ,

¹³ ᐊᖅᑯᑦ ᑐᑭᓕᐊᕐᑐᖅ ᐊᑐᓕᕐᓯᐅᒃ ᐃᑎᒐᓯ ᑐᓯᐊᑦᑐᑦ ᐊᔪᓕᖁᓇᒋᑦ ᐋᖅᑭᒃᑕᐅᖁᓪᓗᒋᓪᓕ.

¹⁴ ᐃᓅᖃᑎᓕᒫᑦᓯᓐᓂᒃ ᐃᓅᖃᑎᖃᑦᓯᐊᕋᓱᐊᕆᑦᓯ, ᐃᓅᓯᖃᕐᓗᓯᓗ ᐃᑦᔪᕐᓁᑦᑐᒥᒃ ᑍᒫᒃ ᐃᓅᓯᖃᖏᑦᑐᑦ ᐊᑕᓂᖅ ᑕᑯᓂᐊᖏᒻᒪᑦᔪᒃ.

¹⁵ ᖃᐅᔨᓴᕆᑦᓯ ᒎᑎᐅᑉ ᐱᑦᓯᐊᕐᓂᖓᑕ ᐱᔪᓐᓇᕐᑎᑦᓯᓂᖓᓂᒃ ᐊᓐᓁᔪᖃᖁᓇᒍ; ᐱᕈᕐᑐᑎᑐᑦ ᒪᒤᓕᔪᑎᑐᑦ ᑍᒤᓕᔪᖃᕐᑍᓕᓕ ᐊᑭᕋᕐᑐᕐᑎᒌᖕᓂᕐᒥᒃ ᓴᖅᑭᑎᑦᓯᔪᒥᒃ, ᐅᓄᕐᑐᓪᓗ ᑕᒪᑐᒧᖓ ᓱᒃᑯᑎᕐᑕᐅᖁᓇᒋᑦ.

¹⁶ ᐊᕐᓇᕐᓂᐊᕐᓂᕐᒧᑦ ᐊᖑᓐᓂᐊᕐᓂᕐᒧᓪᓗ ᐊᔪᓕᕈᑎᖃᕐᑐᖃᕐᑍᓕᓕ ᓈᒻᒪᖏᑦᑐᓂᒃᓘᓪᓃᑦ ᐃᓕᖅᑯᓯᖃᕋᓱᐊᕐᑐᖃᕐᑍᓕᓕ ᐃᑦᔪᕐᓇᕐᑐᒥᒃ ᐄᓴᑐᑦ ᑍᒤᑦᑐᒥᒃ, ᑖᑦᓱᒪ ᐊᑕᐅᓯᐊᕐᓗᓂ ᓂᕆᔭᒃᓴᒥᓄᑦ ᐃᕐᓂᐊᖑᖅᑳᕐᓯᒪᓂᓂ ᑐᓐᓂᖅᑯᑎᒋᓚᐅᕐᒪᒍ.

¹⁷ ᑭᖑᓂᖓᒍᑦ ᖃᐅᔨᒪᒐᑦᓯ, ᑭᖑᕐᖑᑎᔭᒃᓴᒥᒃ ᐱᔪᒪᓪᓗᓂ ᓮᒻᒪᕐᑎᑕᐅᔪᒪᓚᐅᕋᓗᐊᕐᒪᑦ ᐊᑖᑕᒥᓄᑦ, ᐊᔪᓕᕐᑎᑕᐅᓚᐅᕐᐳᕐᓕ, ᐱᓂᐊᕐᓂᕆᔭᖓ ᐊᓯᑦᔨᕐᑕᐅᔪᓐᓁᓪᓕᓚᐅᕐᒪᑦ, ᐊᒡᓛᑦ ᕿᐊᓪᓗᓂ ᐱᔪᒪᓇᓱᐊᓕᕋᓗᐊᕐᒪᑦ.

¹⁸ ᖃᖅᑲᒧᑦ ᐊᒃᑐᕐᑕᐅᔪᓐᓇᕐᑐᒧᑦ ᑎᑭᖏᓐᓇᑦᓯ, ᐃᑯᐊᓚᔪᖃᕐᑐᒧᑦ, ᑕᒃᓯᕐᑐᒧᓪᓗ, ᑖᕐᑐᕐᔪᐊᒧᓪᓗ, ᐊᓄᕆᕐᔪᐊᕐᑐᒧᓪᓗ,

¹⁹ ᑎᑦᑐᓚᐅᑎᐅᓪᓗ ᓂᐱᖓᓂᒃ, ᐅᖃᓪᓚᒃᑑᓪᓗ ᓂᐱᖓᓂᒃ ᐃᓄᐃᑦ ᑐᓴᕋᒥᒃ ᕿᓄᓕᓚᐅᕐᐳᑦ ᑍᒤᑦᑐᒥᒃ ᑐᓴᒃᑲᓐᓂᕈᒪᔪᓐᓃᕐᓗᑎᒃ.

²⁰ ᐅᖃᓪᓚᒃᑑᑉ ᐱᖁᔨᓂᖓᓂᒃ ᓲᖑᓗᐊᕐᓴᕋᒥᒃ ᐃᒤᓕᔪᒥᒃ, “ᐊᒡᓛᑦ ᓂᕐᔪᑏᑦ ᓇᓪᓕᐊᓐᓄᑦ ᖃᖅᑲᖅ ᐊᒃᑐᕐᑕᐅᒃᐸᑦ, ᑖᓐᓇ ᒥᓪᓗᕐᑕᐅᓗᓂ ᑐᖁᑕᐅᔪᒃᓴᐅᕗᖅ.”

²¹ ᑕᑯᔭᖏᓪᓗ ᑲᑉᐱᐊᓇᕐᑐᐊᓘᖕᒪᑕ ᒨᓯᓯ ᐅᖃᓚᐅᕐᐳᖅ, “ᑲᑉᐱᐊᓱᖕᓂᕐᒧᑦ ᓴᔪᓕᕐᐳᖓ.”

²² ᐃᓕᑦᓯᓕ ᖃᖅᑲᒧᑦ ᓮᐅᓂᒧᑦ ᑎᑭᓯᒪᕗᓯ ᒎᑎᐅᑉ ᑐᖁᓱᐃᑦᑑᑉ ᐃᒡᓗᒐᓴᒡᔪᐊᖁᑎᖏᓐᓄᑦ, ᔨᕉᓴᓕᒧᑦ ᕿᓚᖕᒦᑦᑐᒧᑦ, ᐂᖏᓕᒐᓴᒡᔪᐊᓄᑦ ᓈᓴᕐᑕᐅᔪᓐᓇᖏᑦᑐᓄᑦ ᖁᕕᐊᓱᖃᑎᒌᒡᓗᑎᒃ ᑲᑎᒪᔪᓄᑦ,

²³ ᑕᒪᓐᓇ ᐅᐸᒃᑕᓯ ᒎᑎᐅᑉ ᐊᖓᔪᒃᓕᕐᐹᖁᑎᖏᑕ ᑲᑎᒪᕕᖓ, ᑕᕝᕙᓃᑦᑐᓪᓗ ᐊᑎᖏᑦ ᑎᑎᕋᕐᓯᒪᕗᑦ ᕿᓚᖕᒥ, ᒎᑎᒧᓪᓗ ᑎᑭᑉᐳᓯ, ᑕᒤᓐᓂᒃ ᐃᖅᑲᕐᑐᐃᔪᒧᑦ, ᐃᓄᐃᓪᓗ ᓇᓛᒎᕐᑐᑦ ᐊᓂᕐᓂᖏᑕ ᓈᒻᒪᒃᓯᑎᑕᐅᕕᖏᓐᓄᑦ,

²⁴ ᔩᓱᓯᓗ ᐅᐸᒃᐸᓯ, ᐊᖏᖃᑎᒌᖕᓂᕐᒥᒃ ᓄᑖᒥᒃ ᐱᔨᑦᓯᕐᑐᖅ, ᐊᐅᖕᒧᓪᓗ ᓯᕐᐸᕐᓴᕐᑕᐅᓯᒪᔪᒧᑦ ᐂᐱᓕᐅᑉ ᐊᐅᖓᓂᑦ ᐱᐅᓂᕐᓴᒥᒃ ᐅᖃᐅᓯᖃᕐᑐᒧᑦ.

²⁵ ᐃᒃᐱᒍᓱᑦᓯᐊᕆᑦᓯ ᐅᖃᓪᓚᒃᑐᖅ ᓈᓚᒍᒪᖏᓪᓗᒍ ᐱᖁᓇᓯ. ᑍᒃᑯᐊ ᓄᓇᕐᔪᐊᕐᒦᓪᓗᓂ ᐅᖃᓪᓚᒃᑎᓪᓗᒍ ᓈᓚᒍᒪᓚᐅᖏᑦᑐᑦ ᕿᒫᕕᒃᓮᕈᑎᓚᐅᕐᒪᑕ, ᐅᕙᒍᓪᓕ ᐊᖏᓂᕐᓴᒥᒃ ᕿᒫᔪᓐᓇᕐᓂᐊᓐᖏᓚᒍᑦ ᕿᓚᖕᒦᑦᑑᑉ ᐅᖃᐅᓯᖏᓐᓂᒃ ᓈᓚᒍᒪᓂᐊᖏᒃᑯᑦᑕ.

²⁶ ᑍᑦᓱᒪᓂ ᓂᐱᖓᑕ ᓄᓇᕐᔪᐊᖅ ᓴᔪᒃᑎᓚᐅᕐᐹ; ᒫᓐᓇᓕ ᐊᖏᕈᑎᖃᕐᓗᓂ ᐅᖃᕐᓯᒪᕗᖅ, “ᓱᓕ ᐊᑕᐅᓯᐊᕐᓗᖓ ᓴᔪᒃᑎᑦᓯᒃᑲᓐᓂᕐᓂᐊᕐᐳᖓ ᓄᓇᕐᔪᐊᕐᒥ ᑭᓯᐊᓂᐅᖏᑦᑐᖅ ᕿᓚᖕᒥᓕᑦᑕᐅᖅ.”

²⁷ ᐅᓇ ᐅᖃᐅᓯᖅ, “ᓱᓕ ᐊᑕᐅᓯᐊᕐᓗᖓ,” ᓇᓗᓇᖏᑦᑐᒥᒃ ᓴᖅᑭᑎᑦᓯᕗᖅ ᐱᓐᖑᕐᑎᑕᐅᓯᒪᔪᑦ ᐊᐅᓚᑎᑕᐅᓂᐊᕐᒪᑕ ᐲᕐᑕᐅᓗᑎᒡᓗ, ᑖᒃᑯᐊ ᐊᐅᓚᑎᑕᐅᔪᓐᓇᖏᑦᑐᑦ ᑍᒤᓕᖕᒊᓐᓇᓕᖁᓪᓗᒋᑦ.

²⁸ ᑍᒤᒻᒪᑦ ᖁᔭᓕᓚᐅᕐᑕ ᐊᑕᓂᐅᕕᖕᒥᒃ ᐊᐅᓚᑎᑕᐅᔪᓐᓇᖏᑦᑐᒥᒃ ᐱᑎᑕᐅᓯᒪᓕᕋᑦᑕ, ᖁᔭᓕᓗᑕ ᒎᑎ ᑐᒃᓯᐊᕐᕕᒋᓚᐅᕐᓚᕗᑦ ᑖᑦᓱᒪ ᖁᕕᐊᒋᔭᖓᒍᑦ, ᐃᒃᐱᒋᑦᓯᐊᕐᓗᒍ ᐃᓕᕋᒋᓗᒍᓗ;

²⁹ ᒎᑎᕗᑦ ᐃᑯᒪᐅᖕᒪᑦ ᓄᖒᑦᓯᔪᕐᔪᐊᖅ.