ᐄᑉᕈᐃᓄᑦ 11 - ᐊᒡᓔᑦ ᐃᑦᔪᕐᖕᓁᑦᑐᑦ

ᐅᒃᐱᕐᓂᖃᕐᓂᖅ

¹ ᐅᒃᐱᕐᓂᖅ ᖁᓚᖏᓐᓂᐅᕗᖅ ᓂᕆᐅᒋᔭᒃᓴᓂᒃ, ᓱᓕᔪᕐᓴᕐᓂᐅᓪᓗᓂᓗ ᑕᑯᒃᓴᐅᖏᑦᑐᓂᒃ.

² ᐅᒃᐱᕐᓂᑯᑦ ᓯᕗᓪᓕᐅᓚᐅᕐᑐᑦ ᒎᑎᒧᑦ ᓈᒻᒪᒋᔭᐅᔪᒥᒃ ᐃᓅᓯᖃᕐᓂᕋᕐᑕᐅᕗᑦ.

³ ᐅᒃᐱᕐᓂᑯᑦ ᑐᑭᓯᕗᒍᑦ ᓯᓚᕐᔪᐊᖅ ᐱᓐᖑᕐᑎᑕᐅᓯᒪᖕᒪᑦ ᒎᑎᐅᑉ ᐅᖃᐅᓯᖓᓄᑦ, ᑕᑯᒃᓴᐅᔪᑦ ᐱᓐᖑᕐᑎᑕᐅᓯᒪᖕᒪᑕ ᑕᑯᒃᓴᐅᖏᑦᑐᒥᑦ.

⁴ ᐅᒃᐱᕐᓂᑯᑦ ᐂᐱᓕ ᒎᑎᒧᑦ ᑐᓂᕐᕈᓯᓚᐅᕐᐳᖅ ᑐᓂᕐᕈᓯᐅᑎᒃᓴᒥᒃ ᐱᐅᒋᔭᐅᓂᕐᓴᒥᒃ ᑬᓂᐅᑉ ᑐᓂᕐᕈᑎᖓᓂᑦ, ᐅᒃᐱᕐᓂᖓᓄᑦ ᐃᓗᐊᕐᑑᓂᕋᕐᑕᐅᕗᖅ, ᒎᑎᐅᓪᓗ ᓈᒻᒪᒋᓚᐅᕐᐹ ᐂᐱᓕᐅᑉ ᑐᓂᕐᕈᑎᖓ; ᐅᒃᐱᕋᒥᓗ ᓱᓕ ᐅᖃᓪᓚᒃᐳᖅ, ᑐᖁᖓᓕᕋᓗᐊᕐᓗᓂ.

⁵ ᐅᒃᐱᕐᓂᑯᑦ ᐃᓅᑭ ᕿᓚᓕᐊᕐᑎᑕᐅᓚᐅᕐᐳᖅ ᑐᖁᒥᒃ ᖃᐅᔨᓇᓂ; ᓇᓂᔭᐅᓚᐅᓐᖏᓚᕐᓗ, ᒎᑎᐅᑉ ᐊᐅᓪᓚᕈᑎᓚᐅᕐᒪᒍ. ᕿᓚᓕᐊᕐᑎᑕᐅᓚᐅᕐᑎᓐᓇᒍ ᓇᓗᓁᕐᑕᐅᓯᒪᕗᖅ ᒎᑎᒧᑦ ᖁᕕᐊᒋᔭᐅᓂᖓᓂᒃ.

⁶ ᐅᒃᐱᕐᓂᖃᖏᓪᓗᓂ ᒎᑎᒧᑦ ᖁᕕᐊᒋᔭᐅᓂᖅ ᐊᔪᕐᓇᕕᒃᐳᖅ. ᒎᑎᒧᐊᕈᒪᔪᖅ ᒎᑎᖃᕐᑐᒥᒃ ᐅᒃᐱᕐᑐᒃᓴᐅᕗᖅ ᑖᓐᓇ ᕿᓂᕐᑎᒥᓄᑦ ᐊᑭᓖᔪᓐᓇᕐᒪᑦ.

⁷ ᐅᒃᐱᕐᓂᑯᑦ ᓄᐊ, ᒎᑎᒧᑦ ᖃᐅᔨᑎᑕᐅᓕᕋᒥ ᓯᕗᓂᒃᓴᒥᒃ ᓱᓕ ᑕᑯᒃᓴᐅᖏᑦᑐᓂᒃ, ᒎᑎᒥᒃ ᓈᓚᒡᓗᓂ ᐅᒥᐊᕐᔪᐊᕐᒥᒃ ᓴᓇᓚᐅᕐᐳᖅ ᐃᒡᓗᒥᐅᖃᑎᖏᑕ ᐱᐅᓕᔭᐅᕕᒃᓴᖓᓂᒃ; ᑕᒪᑐᒨᓇᓗ ᓯᓚᕐᔪᐊᕐᒥᐅᑦ ᐃᖅᑲᕐᑐᕐᐰᑦ ᑭᖑᕐᖑᑦᔨᑎᑕᐅᓪᓗᓂᓗ ᐃᓗᐊᕐᓯᑎᑕᐅᓂᕐᒥᒃ ᐅᒃᐱᕐᓂᒥᑦ ᐱᔪᒥᒃ.

⁸ ᐅᒃᐱᕐᓂᑯᑦ ᐂᑉᕋᕼᐋᒻ ᓈᓚᓚᐅᕐᐳᖅ ᐊᐅᓪᓚᖁᔭᐅᓕᕋᒥ ᓄᓇᒃᓴᒧᑦ ᑭᖑᕐᖑᑎᔭᒃᓴᒥᓄᑦ; ᐊᐅᓪᓚᓚᐅᕐᐳᖅ ᓇᒧᓐᖓᐅᓂᐊᕐᓂᕐᒥᓂᒃ ᖃᐅᔨᒪᖏᒃᑲᓗᐊᕐᓗᓂ.

⁹ ᐅᒃᐱᕐᓂᑯᑦ ᓄᓇᖃᓚᐅᕐᐳᖅ ᐊᖏᕈᑕᐅᓯᒪᔪᒥ, ᓄᓇᑐᖃᖃᖏᒃᑲᓗᐊᕐᓗᓂ, ᑐᐱᑐᐃᓐᓇᕐᒥ ᐊᖏᕐᕋᖃᕐᓗᓂ ᐂᓴᑭᓗ ᔧᑯᓗ ᑍᒫᒃ ᐱᓚᐅᕆᕘᒃ, ᑖᒃᑯᐊᒃ ᐊᖏᕈᑕᐅᓯᒪᔪᒥᒃ ᑭᖑᕐᖑᑦᔨᖃᑕᐅᔫᒃ.

¹⁰ ᐃᒡᓗᒐᓴᖕᓂᒃ ᐅᑕᖅᑭᓚᐅᕐᐳᖅ ᑐᓐᖓᕕᖃᕐᑐᓂᒃ ᐊᐅᓚᑦᔭᒃᑕᐅᔪᓐᓇᖏᑦᑐᓂᒃ ᐃᓪᓗᒃᓴᓕᐊᖑᓯᒪᔪᑦ ᒎᑎᐅᑉ ᐃᓱᒪᒋᔭᖓᓂᒃ ᓴᓇᔭᐅᓯᒪᓪᓗᑎᒃ.

¹¹ ᓵᕋᑦᑕᐅᖅ ᐅᒃᐱᕋᒥ ᓄᑕᕋᒃᓴᕐᑖᕈᓐᓇᕐᓯᓚᐅᕐᐳᖅ, ᓄᑕᕋᕐᑖᕈᓐᓇᕐᓂᖓ ᐊᓂᒍᕐᓯᒪᓕᕋᓗᐊᕐᑎᓪᓗᒍ, ᑖᑦᓱᒪ ᐊᖏᕈᑎᖃᕐᑑᑉ ᐅᒃᐱᕆᔭᒃᓴᐅᓂᖓᓂᒃ ᐃᓱᒪᖃᓚᐅᕋᒥ.

¹² ᑍᒤᒻᒪᑦ ᐊᖑᒻᒥᑦ ᐊᑕᐅᓯᕐᒥᑦ ᑭᑐᕐᖓᕐᑖᑎᑦᓯᔪᓐᓇᕐᓂᖓ ᑐᖁᖓᓕᕐᑐᒥᒃ, ᑭᖑᕚᕐᑖᕈᓐᓇᕐᓯᓯᒪᕗᖅ ᐅᓄᕐᑐᕐᔪᐊᓂᒃ ᐅᓪᓗᕆᐊᑎᑐᑦ ᕿᓚᖕᒥ ᐅᓄᕐᑎᒋᔪᓂᒃ ᓯᐅᖅᑲᑎᑐᓪᓗ ᐃᒪᐅᑉ ᓯᓈᓂᑦᑐᑎᑐᑦ ᓈᓴᒐᒃᓴᐅᓐᖏᑎᒋᔪᓂᒃ.

¹³ ᑍᒃᑯᐊᓕᒫᑦ ᐅᒃᐱᕐᓂᒃᑰᕐᓗᑎᒃ ᑐᖁᓚᐅᕐᐳᑦ, ᐊᖏᕈᑕᐅᓯᒪᔪᒥᒃ ᐱᓚᐅᕋᑎᒃ, ᐅᖓᓯᒋᔮᓂᓪᓕ ᑭᓯᐊᓂ ᑕᑯᓐᓇᓚᐅᕐᐹᑦ ᖁᕕᐊᓲᑎᒋᓪᓗᒍᓗ, ᓇᓗᓁᕐᓯᓚᐅᕐᐳᓪᓗ ᑕᒫᓂᒥᐅᑕᐅᖏᓐᓂᕐᒥᖕᓂᒃ ᓄᓇᒋᓐᖏᑕᒥᓃᓐᓂᕐᒥᓂᒡᓗ ᑕᕝᕙᓂ ᓄᓇᕐᔪᐊᕐᒥ.

¹⁴ ᑖᒃᑯᐊ ᑍᒤᑦᑐᒥᒃ ᐅᖃᕐᑐᑦ ᓇᓗᓁᕐᓯᑦᓯᐊᕐᐳᑦ ᓇᖕᒥᓂᖅ ᓄᓇᒋᓪᓚᕆᖕᓂᐊᕐᑕᒥᓂᒃ ᕿᓂᓚᐅᕐᒪᑕ.

¹⁵ ᓄᓇᒥᖕᓂᒃ ᕿᒪᓚᐅᕐᑕᒥᖕᓂᒃ ᐃᓱᒪᖃᓚᐅᕈᑎᒃ, ᐱᕕᒃᓴᖃᕈᓐᓇᓚᐅᕐᐳᑦ ᐅᑎᕈᓐᓇᕐᓗᑎᒃ.

¹⁶ ᓄᓇᒥᒡᓕ ᐱᐅᓂᕐᓴᒥᒃ ᐅᐸᒍᒪᔭᖃᓚᐅᕋᒥᒃ, ᑕᕝᕙ ᕿᓚᖕᒦᑦᑐᒥᒃ. ᑍᒤᒻᒪᑦ ᒎᑎᐅᑉ ᑲᓐᖑᓲᑎᒋᓚᐅᓐᖏᓛ, ᐋᖅᑭᒃᓱᐃᓯᒪᒐᒥ ᐃᒡᓗᒐᓴᒡᔪᐊᒃᓴᖏᓐᓂᒃ.

¹⁷ ᐅᒃᐱᕐᓂᑯᑦ ᐂᑉᕋᕼᐋᒻ, ᐃᕐᓂᕐᒥᓂᒃ ᐂᓴᑭᒥᒃ ᑐᓂᕐᕈᓯᕋᓱᐊᓚᐅᕐᐳᖅ, ᒎᑎᒧᑦ ᖃᐅᔨᓴᕐᑕᐅᓪᓗᓂ, ᐊᖏᕐᕕᐅᓯᒪᒐᓗᐊᕐᓗᓂ ᐃᕐᓂᑐᐊᓂ ᑐᓂᕐᕈᓯᐅᑎᑐᐃᓐᓇᕆᐊᖃᓕᓚᐅᕐᐹ.

¹⁸ ᐅᖃᐅᑦᔭᐅᓯᒪᒐᓗᐊᕐᓗᓂ, “ᐂᓴᑭᒃᑯᑦ ᑭᖑᕚᒃᓴᑎᑦ ᐱᔪᒫᕐᐳᑦ.”

¹⁹ ᐃᓱᒪᖃᓚᐅᕋᒥ ᒎᑎ ᑐᖁᖓᔪᓂᑦ ᐊᒡᓛᑦ ᒪᑭᑎᑦᓯᔪᓐᓇᕆᕗᖅ; ᑍᒤᒻᒪᑦ ᐅᖃᐅᓯᕆᔪᓐᓇᕐᐸᕗᑦ, ᑐᖁᒥᑦ ᐃᓛᒃ ᐅᑎᕐᑎᓚᐅᕐᐹ.

²⁰ ᐂᓴᑭᑦᑕᐅᖅ ᐅᒃᐱᕐᓂᑯᑦ ᐊᖏᕈᑎᖃᓚᐅᕐᐳᖅ ᔧᑰᓪᓗ ᐄᓴᐅᓪᓗ ᓮᒻᒪᕐᑎᑕᐅᓛᕐᓂᖏᖕᓂᒃ.

²¹ ᔧᑯ ᐅᒃᐱᕐᓂᑯᑦ, ᓮᒻᒪᕐᑎᑦᓯᓚᐅᕐᐳᖅ ᔫᓯᐱᐅᑉ ᐃᕐᓂᖏᖕᓂᒃ ᒪᕐᕉᖕᓂᒃ ᑐᖁᑐᐃᓐᓇᕆᐊᖃᓕᕐᓗᓂ, ᐊᔭᐅᑉᐱᐊᓂ ᐊᔭᑉᐸᒡᕕᒋᓪᓗᓂᐅᒃ ᐅᑯᓪᓗᓂ ᑐᒃᓯᐊᓚᐅᕐᐳᖅ.

²² ᔫᓯᐱᑦᑕᐅᖅ ᐅᒃᐱᕐᓂᑯᑦ, ᐃᓅᔪᓐᓃᕆᐊᕕᓕᕐᓗᓂ ᐅᖃᐅᑦᔨᓚᐅᕐᐳᖅ ᐃᓴᕆᐊᓕᒥᐅᑦ ᐊᐅᓪᓚᕈᒫᕐᓂᖏᓐᓂᒃ ᐄᑦᔨᑉᑎᒥᑦ, ᐅᖃᐅᑦᔨᓚᐅᕐᐳᕐᓗ ᐃᓗᕕᕐᑕᐅᕕᒋᓛᕈᒪᔭᒥᓂᒃ.

²³ ᒨᓯᓯᑕᐅᖅ ᐅᒃᐱᕐᓂᑯᑦ, ᐊᖓᔪᖅᑳᖏᓐᓂᑦ ᐃᕐᓂᐊᖑᕋᑖᕐᑎᓪᓗᒍ ᐃᔨᕐᑐᐊᖑᓚᐅᕐᐳᖅ ᑕᖅᑭᓂᒃ ᐱᖓᓱᓂᒃ, ᑕᑯᓪᓗᒍ ᐱᐅᒋᓗᐊᕋᒥᑦᔪᒃ; ᐊᖓᔪᖅᑳᕐᔪᐊᑉ ᐱᖁᔭᖓᓂᒃ ᒪᓕᖏᒃᑲᓗᐊᕈᑎᒃ ᓯᕘᕋᔪᓐᓃᓚᐅᕐᐴᒃ.

²⁴ ᒨᓯᓯ ᐃᓄᒻᒪᕆᐅᓕᕋᒥ ᐅᒃᐱᕐᓂᑯᑦ, ᐊᖓᔪᖅᑳᕐᔪᐊᑉ ᐰᕉᑉ ᐸᓂᖓᑕ ᐃᕐᓂᖓᓂᒃ ᑍᔭᐅᔪᒪᔪᓐᓃᓚᐅᕐᐳᖅ,

²⁵ ᒎᑎᐅᓪᓕ ᐃᓄᖁᑎᖏᑦᑕ ᐱᑦᓯᐊᕐᑕᐅᖏᓐᓂᖏᓐᓄᑦ ᐃᓚᐅᖔᕈᒪᓚᐅᕐᐳᖅ, ᐊᓐᓂᕆᓂᕐᓴᕆᓪᓗᒍ ᐊᔪᕐᓂᕐᒥᒃ ᖁᕕᐊᓲᑎᖃᕋᓱᐊᕐᓂᕐᒥᑦ ᐊᓂᒍᕐᓴᕅᑦᑐᒥᑦ.

²⁶ ᐃᓱᒪᖃᓚᐅᕋᒥ ᐱᑦᓯᐊᕐᑕᐅᖏᓐᓂᖅ ᒥᑕᐅᑕᐅᓂᕐᓗ ᙭ᔅᑑᓯ ᐱᑦᔪᑎᒋᓪᓗᒍ ᐊᖏᓂᕐᓴᒥᒃ ᐊᔪᕐᓴᖏᑦᔪᑎᒃᓴᐅᓇᓱᒋᓪᓗᒍ ᐄᑦᔨᑉᑎᒥᐅᑦ ᐱᖁᑎᕐᔪᐊᖏᓐᓂᑦ, ᓯᕗᓂᒃᓴᒥ ᐊᑭᓕᐅᑕᐅᔪᒫᕐᓂᖅ ᐃᓱᒪᒋᓪᓗᓂᐅᒃ.

²⁷ ᐅᒃᐱᕐᓂᑯᑦ ᐄᑦᔨᑉᑎ ᕿᒪᓚᐅᕐᐹ, ᐊᖓᔪᖅᑳᕐᔪᐊᑉ ᓂᓐᖓᐅᒪᓂᖓ ᓯᕘᕋᒋᓇᓂᐅᒃ; ᑕᑯᒃᓴᐅᖏᑦᑐᖅ ᒎᑎ ᑕᑯᓐᓇᕐᑕᒥᑐᑦ ᑍᒤᓪᓗᓂᐅᒃ ᐅᑎᕈᒪᔪᓐᓃᓚᐅᕐᐳᖅ.

²⁸ ᐅᒃᐱᕐᓂᑯᑦ ᖄᖏᕐᑕᐅᕕᖕᒥᒃ ᐱᒋᐊᕐᑎᑦᓯᓚᐅᕐᐳᖅ; ᐃᒡᓘᓪᓗ ᐅᒃᑯᐊᖏᑦ ᐊᐅᒃᑎᕐᑕᐅᖁᓪᓗᓂᒋᑦ, ᐃᕐᓂᐊᖑᖅᑳᕐᓯᒪᔪᑦ ᐊᖑᑎᑦ ᑐᖁᑕᐅᖁᓇᒋᑦ ᐃᓴᕆᐊᓕᒥᐅᓂ, ᑐᖁᕅᔭᕐᑐᕐᑐᒧᑦ.

²⁹ ᐅᒃᐱᕐᓂᑯᑦ ᐃᓴᕆᐊᓕᒥᐅᑦ ᐃᑳᕈᓐᓇᓚᐅᕐᐳᑦ ᐃᒪᒃᑯᑦ ᐊᐅᐸᓗᒃᑕᒃᑯᑦ ᓄᓇᑐᑦ ᐸᓂᕐᑐᒃᑯᑦ ᐃᖏᕐᕋᔪᑎᑐᑦ; ᐄᑦᔨᑉᑎᒥᐅᑦᑕᐅᖅ ᐆᒃᑐᕋᓱᐊᓚᐅᕋᓗᐊᕐᐳᑦ, ᐃᒪᕐᔪᐊᕐᒥᓕ ᐃᐱᓚᐅᕐᐳᑦ.

³⁰ ᐅᒃᐱᕐᓂᑯᑦ ᔨᕆᑰᑉ ᐊᕙᓗᕐᔪᐊᖏᑦ ᐅᕐᕈᓚᐅᕐᐳᑦ ᐊᕙᑖᒍᑦ ᑬᕙᑕᐅᓚᐅᖅᑳᕐᓗᑎᒃ ᐅᓪᓗᓂᒃ 7ᓂᒃ.

³¹ ᐅᒃᐱᕐᓂᑯᑦ ᕅᕼᐋᐱ ᐊᖑᓐᓂᐊᕐᑎ ᑐᖁᑕᐅᖃᑕᐅᓚᐅᓐᖏᓚᖅ ᒎᑎᒥᒃ ᓈᓚᖏᑦᑐᑦ ᑐᖁᑕᐅᓕᕐᑎᓪᓗᒋᑦ, ᐃᓴᕆᐊᓕᒥᐅᑦ ᐃᔨᕋᕐᑐᕐᓗᑎᒃ ᖃᐅᔨᓴᕆᐊᕐᓯᒪᔪᖁᑎᖏᓐᓂᒃ ᑐᓐᖓᓱᒃᑎᑦᓯᓚᐅᕐᓂᖓᓄᑦ.

³² ᖃᓄᖅ ᓱᓕ ᐅᖃᒃᑲᓐᓂᕆᐊᖃᕐᐳᖔ? ᐱᕕᒃᓴᑭᓗᐊᕐᐳᖓ ᐅᖃᐅᓯᖃᕋᓱᐊᕋᔭᕈᒪ ᒋᑎᐅᓂᒥᒃ, ᐸᕌᒃᒥᒃ, ᓵᒻᓲᓂᒥᒃ, ᔨᑉᑕᒥᒃ, ᑍᕕᑎᒥᒃ ᓴᒧᐃᓕᒥᒡᓗ ᓇᓚᐅᑦᑍᔪᓂᒃᓗ

³³ ᐅᒃᐱᕐᓂᑯᑦ ᓵᓚᖃᓚᐅᕐᐳᑦ ᐊᖓᔪᖅᑲᐅᕕᖕᓂᒃ, ᐃᓗᐊᕐᑐᒥᒡᓗ ᐱᓂᐊᕐᓂᖃᓚᐅᕐᐳᑦ, ᐊᖏᕈᑕᐅᓯᒪᔪᓂᒡᓗ ᐱᓚᐅᕐᐳᑦ, ᓔᔧᓪᓗ ᐃᕐᓯᓇᕐᑐᑦ ᖃᓂᖏᑦ ᐃᑦᔭᕈᓯᓚᐅᕐᐰᑦ,

³⁴ ᐃᑯᐊᓚᔪᕐᔪᐊᓂᒡᓗ ᖃᒥᑦᓯᓚᐅᕐᐳᑦ, ᓴᕕᒡᔪᐊᒥᑦ ᐊᓐᓇᓚᐅᕐᐳᑦ, ᓴᓐᖐᓐᓂᕐᒥᑦ ᐱᔪᓐᓇᕐᓂᕐᑖᓚᐅᕐᐳᑦ; ᐅᓇᑕᕐᓂᕐᒥ ᐊᔪᖏᑦᑐᕐᔪᐊᖑᓚᐅᕐᐳᑦ, ᓄᓇᑐᖃᖃᖏᑦᑐᑦ ᐅᓇᑕᕐᑐᒃᓴᖏᑦ ᕿᒫᑎᓪᓗᒋᑦ.

³⁵ ᐊᕐᓁᑦ ᑐᖁᔨᐊᒥᖕᓂᒃ ᐅᑎᕐᑎᑦᓯᕕᐅᓚᐅᕐᐳᑦ ᒪᑭᑎᑕᐅᓪᓗᑎᒃ. ᐊᓯᖏᓪᓕ ᒪᓂᑐᐃᓐᓇᓚᐅᕐᐳᑦ ᐊᓐᓇᒋᐊᕐᕕᒃᓴᒥᒃ ᕿᓂᕋᑎᒃ, ᒪᑭᕝᕕᒃᓴᒥᒃ ᐱᐅᓂᕐᓴᒥᒃ ᓂᕆᐅᒋᔭᖃᕋᒥᒃ.

³⁶ ᐃᓚᖏᓪᓕ ᒥᑕᐅᑎᒋᔭᐅᓚᐅᕐᐳᑦ ᑏᒐᕐᑐᕐᑕᐅᓪᓗᑎᒡᓗ, ᐃᓚᖏᓪᓗ ᐊᕐᓵᕐᑑᔭᓄᑦ ᐊᑦᓱᖏᐅᓯᕐᑕᐅᓚᐅᕐᐳᑦ ᑎᒍᔭᐅᓯᒪᕕᖕᒧᐊᕐᑕᐅᓪᓗᑎᒡᓗ.

³⁷ ᐅᔭᖅᑲᓄᑦ ᒥᓪᓗᕐᑕᐅᓚᐅᕐᐳᑦ, ᑭᓪᓘᑎᓄᓪᓗ ᑭᓪᓗᕐᑕᐅᓚᐅᕐᐳᑦ ᒪᕐᕉᓕᔭᐅᓪᓗᑎᒃ, ᓴᕕᒡᔪᐊᒧᓪᓗ ᑐᖁᑕᐅᓚᐅᕐᐳᑦ; ᓇᒧᑐᐃᓐᓈᕐᑎᑕᐅᓚᐅᕐᐳᑦ ᓰᐲᑦ ᒎᑦᓰᓪᓗ ᐊᒥᖏᓐᓂᒃ ᐊᓐᓄᕌᕐᑎᑕᐅᓪᓗᑎᒃ, ᐊᔪᕐᓴᕐᓗᑎᒃ ᐊᑭᕋᕐᑐᕐᑕᐅᓪᓗᑎᒃ, ᐱᑦᓯᐊᕐᑕᐅᓇᑎᒡᓗ;

³⁸ ᓄᓇ ᓇᔪᕆᐊᖓ ᐱᐅᒋᔭᐅᖏᓐᓂᕐᓴᐅᓚᐅᕐᐳᖅ; ᑍᒤᒻᒪᑦ ᓄᓇᖃᖏᑦᑐᑎᑐᑦ ᓇᓂᑐᐃᓐᓈᖃᑦᑕᓚᐅᕐᐳᑦ ᓱᓇᖃᔪᐃᑦᑐᒥ ᖃᖅᑲᓂᓗ, ᕾᕈᓱᖕᓂᓗ ᓄᓇᐅᓪᓗ ᖁᖕᓈᖏᓐᓂ ᐃᓂᖃᖃᑦᑕᓚᐅᕐᐳᑦ.

³⁹ ᑖᒃᑯᐊᓗ ᑕᒪᕐᒥᒃ, ᐅᒃᐱᕐᓂᑯᑦ ᓵᓚᖃᓚᐅᕐᑐᑦ ᐅᓂᒃᑲᐅᓯᐅᕗᑦ, ᒎᑎᐅᓪᓕ ᐊᖏᕈᑎᒋᓯᒪᔭᖓᓂᒃ ᐱᔪᖃᓚᐅᓐᖏᓚᑦ,

⁴⁰ ᒎᑎᐅᑉ ᐱᐅᓂᕐᓴᒥᒃ ᓯᕗᓂᖓᒍᑦ ᐋᖅᑭᒃᓱᐃᑦᔪᑎᓚᐅᕐᒪᑎᒍᑦ, ᐱᑦᔪᑎᒃᓴᖃᓚᐅᕐᒪᑦ ᐅᕙᒍᑦ ᐃᓚᒋᔭᐅᑎᓪᓗᑕ ᑭᓯᐊᓂ ᑖᒃᑯᐊ ᓈᒻᒪᒃᓯᑎᑕᐅᖁᓪᓗᒋᑦ.