ᐄᑉᕈᐃᓄᑦ 10 - ᐊᒡᓔᑦ ᐃᑦᔪᕐᖕᓁᑦᑐᑦ

¹ ᐱᖁᔭᓪᓕ ᑕᕐᕋᑐᐃᓐᓇᐅᕗᑦ ᐱᖁᑎᓄᑦ ᐱᐅᔪᓄᑦ ᐱᔪᒫᕐᑐᓄᑦ, ᑕᒪᒃᑯᐊᓪᓚᕆᐅᓇᑎᒃ, ᐊᕐᕌᒍᑕᒫᑦ ᑖᒃᑯᐊᑦᓮᓐᓁᑦ ᑐᓂᕐᕈᑕᐅᕙᓚᐅᕐᐳᑦ, ᓈᒻᒪᑦᓯᐊᕐᑐᒥᒡᓕ ᐃᓅᓯᖃᓕᕐᑎᑦᓯᔪᓐᓇᕋᑎᒃ ᒎᑎᒧᑦ ᖃᒡᓕᒋᐊᕐᑐᓂᒃ.

² ᓈᒻᒪᒃᓯᑎᑕᐅᔪᓐᓇᕈᑎᒃ ᓴᓪᓗᒻᒪᕐᑕᐅᔪᓐᓇᕈᑎᒡᓗ ᐊᔪᕐᓂᕐᒥᖕᓂᑦ ᐃᓗᒥᒍᑦ ᐃᒃᐱᒋᔪᓐᓃᕋᔭᕐᐳᑦ ᐊᔪᕐᓂᕐᒥᖕᓂᒃ, ᑐᓂᕐᕈᓯᖃᑦᑕᕐᓂᖏᓪᓗ ᓄᖅᑲᕋᔭᓚᐅᕐᐳᑦ.

³ ᑐᓂᕐᕈᓯᕐᓂᒃᑯᓪᓕ ᐊᔪᕐᓂᕐᒥᒃ ᐃᖅᑬᑎᑕᐅᖃᑦᑕᓚᐅᕐᐳᑦ ᐊᕐᕌᒍᑕᒫᑦ.

⁴ ᐃᒻᒧᓕᐅᕐᑏᓪᓕ ᐊᖑᓴᓪᓗᖏᑕ ᒎᑦᓰᓪᓗ ᐊᐅᖏᓐᓄᑦ ᐊᔪᕐᓃᑦ ᐲᔭᕐᑕᐅᔭᕆᐊᖏᑦ ᐊᔪᕐᓇᒻᒪᕆᒃᐳᑦ.

⁵ ᑍᒤᒻᒪᑦ, ᙭ᔅᑑᓯ ᓯᓚᕐᔪᐊᕐᒧᑦ ᑎᑭᓐᓇᒥ, ᐅᖃᓚᐅᕐᐳᖅ: “ᐆᒪᔪᐃᑦ ᑐᖁᑕᐅᓂᖏᓐᓂᒃ ᑐᓂᕐᕈᓯᕐᓂᕐᒥᒡᓗ ᐱᔪᒪᓐᖏᓚᑎᑦ, ᑎᒥᒥᒡᓕ ᐊᑐᐃᓐᓇᕈᐃᓚᐅᕐᐳᑎᑦ ᐅᕙᓐᓄᑦ;

⁶ ᑐᓂᕐᕈᑎᓂᒃ ᐃᑯᐊᓚᔭᒃᓴᓂᒃ ᑐᓂᕐᕈᑎᓂᒡᓗ ᐊᔪᕐᓂᕐᓂᒃ ᐲᔧᑦᔪᑎᒃᓴᓂᒃ ᖁᕕᐊᓲᑎᖃᓐᖏᓚᑎᑦ.

⁷ ᑕᕝᕙ ᐅᖃᕐᐳᖓ, ‘ᒎᑏᒃ ᑕᑯᒋᑦ, ᕾᓚᐅᕐᐳᖓ ᐱᓂᐊᕐᑕᐅᖁᔭᕐᓂᒃ ᐱᓇᓱᐊᕆᐊᕐᑐᕐᓗᖓ,’ ᐊᒡᓚᖕᓂ ᑍᒫᒃ ᑎᑎᕋᕈᑕᐅᓯᒪᒐᒪ.”

⁸ ᓯᕗᓪᓕᕐᒥᒃ ᐅᖃᕋᒥ, “ᑐᓂᕐᕈᑎᓂᒃ ᐃᑯᐊᓚᔭᒃᓴᓂᒃ ᑐᓂᕐᕈᓯᕐᓂᕐᒥᒡᓗ, ᐆᒪᔪᓂᒡᓗ ᐃᑯᐊᓚᒐᒃᓴᓂᒃ, ᑐᓂᕐᕈᓯᕐᓂᕐᒥᒡᓗ ᐊᔪᕐᓂᕐᓂᒃ ᐲᔧᑦᔪᑎᒃᓴᓂᒃ, ᐱᔪᒪᓐᖏᓚᑎᑦ ᖁᕕᐊᒋᓐᖏᓚᑎᓪᓘᓐᓃᑦ.” ᑕᒪᒃᑯᐊ ᑐᓂᕐᕈᓯᕐᓃᑦ ᒪᓕᒃᑕᐅᑐᐃᓐᓇᕋᓗᐊᕐᑎᓪᓗᒋᑦ ᐱᖁᔭᑎᒍᑦ,

⁹ ᓱᓕ ᐅᖃᒃᑲᓐᓂᕐᐳᖅ, “ᑕᑯᒋᑦ ᕾᓚᐅᕐᐳᖓ ᐱᓂᐊᕐᑕᐅᖁᔭᕐᓂᒃ ᐱᓇᓱᐊᕆᐊᕐᑐᕐᓗᖓ.” ᑕᕝᕙ ᓯᕗᓪᓕᖅ ᐊᑐᕈᓐᓃᕐᑎᓚᐅᕐᐹ ᑭᖑᓪᓕᖅ ᐊᑐᖔᓕᖁᓪᓗᒍ.

¹⁰ ᑕᕝᕙ ᑖᑦᓱᒪ ᐱᓂᐊᕐᑕᐅᖁᔭᖓᓄᑦ ᓴᓗᒻᒪᕐᑕᐅᕗᒍᑦ ᔩᓱᓯᐅᑉ ᙭ᔅᑑᓯᐅᑉ ᑎᒥᖓᑕ ᑐᓂᕐᕈᑕᐅᓂᖓᓄᑦ ᐊᑕᐅᓯᐊᕐᓗᓂ ᐱᒃᑲᓐᓂᕆᐊᖃᖏᑦᑐᒥᒃ.

¹¹ ᑕᒪᕐᒥᒡᓗ ᑐᓂᕐᕈᓯᕐᑎᑦᓯᔩᑦ ᖃᐅᑕᒫᑦ ᐱᖁᔭᐅᓚᐅᕐᐳᑦ ᐱᓇᓱᐊᕆᐊᓕᖕᒥᓂᒃ ᐱᓇᓱᐊᖁᓪᓗᒋᑦ, ᑐᓂᕐᕈᓯᕐᑎᑦᓯᓂᕐᒥᒃ ᑍᒫᑦᓮᓐᓇᖅ ᐱᓇᓱᐊᕐᓗᑎᒃ, ᑖᒃᑯᐊᓕ ᐊᔪᕐᓂᕐᓂᒃ ᐲᕐᓯᔪᓐᓇᖏᒻᒪᕆᒃᐳᑦ.

¹² ᙭ᔅᑑᓯᓕ ᐊᑕᐅᓯᐊᕐᓗᓂ ᑐᓂᕐᕈᓯᐅᑎᓚᐅᕐᐳᖅ ᑐᖁᑕᐅᖁᓪᓗᒍ ᐊᔪᕐᓃᑦ ᐱᓪᓗᒋᑦ, ᒫᓐᓇᓕ ᐃᒃᓯᕙᓕᕐᐳᖅ ᒎᑎᐅᑉ ᑕᓕᕐᐱᐊᓂ,

¹³ ᑕᕝᕙᓂ ᐅᑕᖅᑭᓕᕐᐳᖅ ᐆᒥᒋᔨᖏᑕ ᐃᓕᔭᐅᓂᒃᓴᖏᓐᓂᒃ ᐃᑎᒐᖏᓐᓄᑦ ᐃᑯᕐᕋᓕᐅᑦᔭᐅᓗᑎᒃ.

¹⁴ ᑐᓂᕐᕈᓯᕐᓂᕐᒧᑦ ᐊᑕᐅᓯᕐᒧᑦ ᐃᑦᔪᕐᓁᑎᑕᐅᓂᐊᕐᑐᑦ ᑕᐅᕗᖓᓕᒫᖅ ᓈᒻᒪᒃᓯᑎᓚᐅᕐᐰᑦ.

¹⁵ ᑕᒪᑐᒥᖓᑦᑕᐅᖅ ᐊᓂᕐᓂᐅᑉ ᐃᑦᔪᕐᓁᑦᑑᑉ ᓇᓗᓁᕐᓯᕕᒋᕚᑎᒍᑦ; ᓯᕗᓪᓕᕐᒥᒃ ᐅᖃᕋᒥ,

¹⁶ “ᑕᒪᑦᔭ ᐊᖏᖃᑎᒌᒍᑎᒋᔪᒫᕐᑕᕋ ᑖᒃᑯᓄᖓ ᐅᓪᓗᐃᑦ ᑕᒪᒃᑯᐊ ᑭᖑᕐᖓᑦᑎᒍᑦ, ᐊᑕᓂᖅ ᐅᖃᕐᐳᖅ: ᐱᖁᔭᒃᑲ ᐆᒻᒪᑎᖏᓐᓄᑦ ᐱᑎᑦᓱᒪᕙᒃᑲ, ᐃᓱᒪᖏᓐᓄᓪᓗ ᑎᑎᕋᕈᒪᓪᓗᒋᑦ.”

¹⁷ ᐊᒻᒪ ᐅᖃᒃᑲᓐᓂᕐᐳᖅ, “ᐊᔪᕐᓂᖏᑦ ᑕᒻᒪᕐᓂᖏᓪᓗ ᐃᓱᒪᒋᓂᐊᕈᓐᓃᕐᐸᒃᑲ.”

¹⁸ ᑍᒤᒻᒪᑦ ᑖᒃᑯᐊ ᐊᔪᕐᓂᖏᓐᓂᒃ ᐃᓱᒪᒋᔭᐅᔪᓐᓁᕐᑐᑦ, ᑐᓂᕐᕈᓯᕐᓂᕐᒥᒃ ᐊᔪᕐᓃᑦ ᐲᔭᕐᑕᐅᑦᔪᑎᒃᓴᖏᓐᓄᑦ ᐊᑐᕆᐊᖃᕈᓐᓁᕐᐳᑦ.

ᒎᑎᒧᑦ ᖃᒡᓕᓕᕐᑕ

¹⁹ ᑍᒤᒻᒪᑦ ᐅᒃᐱᖃᑎᒃᑲ, ᓯᕘᕋᖏᓪᓗᑕ ᐃᑎᕈᓐᓇᓕᕐᐳᒍᑦ ᐃᑦᔪᕐᓁᑦᑐᕕᖕᒧᑦ ᔩᓱᓯᐅᑉ ᐊᐅᖓ ᐊᖅᑯᑎᒋᓗᒍ.

²⁰ ᓄᑖᒥᒃ ᐊᖅᑯᓯᓚᐅᕐᒪᑎᒍᑦ ᐃᓅᓯᖃᕐᓇᕐᑐᒥᒡᓗ ᐅᒃᑯᐃᕈᑎᓚᐅᕐᒪᑎᒍᑦ ᑖᓗᑕᕐᔪᐊᒃᑯᑦ, ᑕᕝᕙ ᓇᖕᒥᓂᖅ ᑎᒥᒥᒍᑦ,

²¹ ᑐᓂᕐᕈᓯᕐᑎᑦᓯᔨᓄᑦ ᐊᖓᔪᖅᑳᕐᔪᐊᖃᕋᑦᑕ ᒎᑎᐅᑉ ᐃᒡᓗᖓᓂ,

²² ᑍᒤᒻᒪᑦ ᒎᑎᒧᑦ ᖃᒡᓕᓕᕐᑕ ᐆᒻᒪᑎᑦᑎᒍᑦ ᓱᓕᓂᖃᑦᓯᐊᕐᓗᑕ ᐅᒃᐱᕐᓂᖃᑦᓯᐊᕐᓗᑕ, ᐆᒻᒪᑎᕗᑦ ᓯᕐᐸᕐᓴᕐᕕᐅᓗᑎᒃ ᓴᓗᒻᒪᕐᑕᐅᖁᓪᓗᒋᑦ ᐃᓱᒪᒃᑯᑦ ᐱᐅᖏᑦᑐᒥᑦ ᐸᓯᔭᐅᓂᖃᕐᓂᕐᒥᑦ ᑎᒥᕗᓪᓗ ᐅᐊᓴᕐᑕᐅᓗᑎᒃ ᐃᒥᕐᒧᑦ ᓴᓗᒪᑦᓯᐊᕐᑐᒧᑦ.

²³ ᑍᒫᒃᑕᐅᖅ ᓂᕆᐅᖕᓂᕆᔭᑦᑎᓐᓂᒃ ᐅᖃᕆᒃᓴᐅᑦᔨᓂᕆᔭᕗᑦ ᐊᑕᕕᒌᓐᓇᕐᓚᕗᑦ ᒪᕐᕈᒍᓯᕈᑎᒋᖏᓪᓗᒍ, ᑖᓐᓇ ᐊᖏᕈᑎᒋᓯᒪᔭᒥᓂᒃ ᓴᖑᑎᑦᓯᓂᐅᓴᖏᒻᒪᑦ.

²⁴ ᐅᕙᑦᑎᓐᓄᓪᓗ ᑲᒪᒋᑦᓯᐊᖃᑦᑕᐅᑎᓚᐅᕐᑕ ᐃᑲᔪᖃᑦᑕᐅᑎᓗᑕᓗ ᓇᒡᓕᖕᓂᑦᑎᓐᓂᒃ ᓴᖅᑭᑎᑦᓯᖃᑦᑕᐅᑎᓗᑕ ᐱᐅᔪᒥᒡᓗ ᐱᓇᓱᐊᑦᓯᐊᕐᓗᑕ.

²⁵ ᑲᑎᒪᖃᑦᑕᕐᓂᕗᑦ ᓄᖅᑲᐅᑎᓂᐊᕐᓇᒋᑦ, ᓄᖅᑲᐅᑦᔨᕙᒃᑐᑎᑐᑦ, ᐅᕙᑦᑎᓐᓄᓪᓕ ᑲᔪᖏᕐᓴᕐᑎᒌᓕᕐᑕ, ᑍᒫᒡᓗ ᐱᔭᕆᐊᖃᓗᐊᓕᕐᐳᒍᑦ ᖃᐅᔨᒪᒐᑦᓯ ᐅᓪᓗᕐᔪᐊᖅ ᖃᒡᓕᓕᕐᒪᑦ.

²⁶ ᓱᓕᓂᕐᒥᒃ ᖃᐅᔨᓯᒪᓕᕐᓗᑕ ᐱᔮᕆᓗᑕ ᐊᔪᕐᑐᓕᒍᑦᑕ, ᑕᕝᕙ ᑐᓂᕐᕈᑎᒃᓴᖃᕈᓐᓃᕐᐳᒍᑦ ᐊᔪᕐᓃᑦ ᐲᔭᕐᑕᐅᑦᔪᑎᒃᓴᖏᓐᓄᑦ.

²⁷ ᓯᕘᕋᓇᕐᑐᕐᔪᐊᒥᒡᓕ ᓯᕗᓂᒃᓴᖃᓕᕐᐳᒍᑦ ᐃᖅᑲᕐᑐᕐᑕᐅᕕᖕᒥᒃ, ᐃᑯᒪᒥᒡᓗ ᑲᑉᐱᐊᓇᕐᑐᕐᔪᐊᒥᒃ ᐊᓯᕈᐃᓂᐊᕐᑐᒥᒃ ᐊᑭᕋᕐᑐᕐᑐᓂᒃ.

²⁸ ᓇᓪᓕᐊᑦ ᒨᓯᓯᐅᑉ ᐱᖁᔭᖏᓐᓂᒃ ᒪᓕᖏᑦᑐᖅ ᓂᑲᒋᔭᐅᓇᓂ ᑐᖁᑕᐅᖁᔭᐅᕗᖅ ᖃᐅᔨᓯᒪᔫᒃ ᒪᕐᕉᒃ ᐱᖓᓱᓪᓘᓐᓃᑦ ᓇᓗᓁᕐᓯᓂᖏᑦ ᒪᓕᒡᓗᒋᑦ.

²⁹ ᖃᓄᖅ ᓱᒋᐊᕐᑕᐅᔭᕆᐊᖃᕐᓂᕐᓴᐅᓇᓱᒋᕕᓯᐅᒃ? ᒎᑎᐅᑉ ᐃᕐᓂᖓᓂᒃ ᑐᓪᓕᕋᕐᑐᖅ, ᐊᖏᕈᑕᐅᓯᒪᔫᓪᓗ ᐊᐅᖓᓂᒃ ᓇᕐᕈᓇᕐᓯᑎᑦᓯᔪᖅ ᐃᑦᔪᕐᓁᑎᑕᐅᑦᔪᑎᒋᓚᐅᕐᑕᒥᓂᒃ, ᒥᑕᐅᑎᖃᕐᑐᕐᓗ ᐊᓂᕐᓂᐅᑉ ᐱᔪᓐᓇᕐᓯᑎᑦᓯᓂᖓᓂᒃ?

³⁰ ᖃᐅᔨᒪᒐᑦᑎᒍᑦ ᑖᓐᓇ ᐅᖃᓚᐅᕐᑐᖅ, “ᐊᑭᓂᐊᕐᓂᖅ ᐱᒋᕙᕋ, ᐅᕙᖓ ᐊᑭᓂᐊᕈᒫᕐᐳᖓ.” ᐊᒻᒪ ᐅᖃᕐᒥᔪᖅ, “ᐊᑕᓂᐅᑉ ᐃᓄᖁᑎᓂ ᐃᖅᑲᕐᑐᕈᒫᕐᐰᑦ.”

³¹ ᑲᑉᐱᐊᓇᕐᑐᐊᓘᕗᖅ ᒎᑎᐅᑉ ᑐᖁᓱᐃᑦᑑᑉ ᐊᒡᒐᖏᓐᓄᑦ ᐅᕐᕈᓗᓂ.

³² ᐃᖅᑬᓚᐅᕆᑦᓯ ᐊᑐᓚᐅᕐᑕᑦᓯᓐᓂᒃ, ᑍᑦᓱᒪᓂ ᒎᑎᐅᑉ ᖃᐅᒪᓂᖓᓄᑦ ᑐᑭᓯᑎᑕᐅᓯᒪᓕᕐᑎᓪᓗᓯ, ᖃᓄᑐᐃᓐᓈᓗᒃ ᐅᖁᒤᒃᓴᕐᑎᑕᐅᓚᐅᕋᑦᓯ ᐋᓐᓂᐊᑎᑕᐅᓪᓗᓯᓗ,

³³ ᐃᓚᖓᒍᑦ ᑲᑎᒪᔪᓂ ᒥᑕᐅᑎᒋᔭᐅᖃᑦᑕᓚᐅᕋᑦᓯ ᐱᑦᓯᐊᕐᑕᐅᓇᓯᓗ, ᐃᓛᓯᒍᓪᓗ ᐃᓚᐅᓚᐅᕋᑦᓯ ᑍᒤᑦᑐᑎᒍᑦ ᐊᒃᓱᕈᕐᑎᑕᐅᔪᓄᑦ.

³⁴ ᐃᓚᑦᓱᒍᓱᓚᐅᕐᐳᓯᓗ ᑎᒍᔭᐅᓯᒪᕕᖕᒦᑦᑐᓂᒃ, ᐱᖁᑎᑦᓯᓐᓂᒡᓗ ᐊᕐᓵᕐᑕᐅᒐᓗᐊᕋᑦᓯ ᖁᕕᐊᓱᒡᓗᓯ ᐊᑐᕈᓐᓇᓚᐅᕐᐸᓯ, ᖃᐅᔨᒪᒐᑦᓯ ᓇᖕᒥᓂᖅ ᐱᖁᑎᖃᕋᑦᓯ ᐱᐅᓂᕐᓴᒥᒃ ᓄᖑᓐᓂᐊᖏᑦᑐᒥᒡᓗ.

³⁵ ᑍᒤᒻᒪᑦ ᓴᐱᓕᕐᑍᓕᒋᑦᓯ ᑕᑎᖃᕐᓂᑦᓯᓐᓂᒃ, ᑕᒪᓐᓇ ᐊᖏᔪᒥᒃ ᐊᑭᓕᕐᑕᐅᓂᒃᓴᖃᕐᒪᑦ.

³⁶ ᕿᓄᐃᓵᕆᐊᖃᕐᐳᓯᓕ, ᒎᑎᐅᑉ ᐱᔪᒪᔭᖓᓂᒃ ᐊᑐᕈᓐᓇᖁᓪᓗᓯ ᐊᖏᕈᑕᐅᓯᒪᔪᒥᒡᓗ ᐃᓚᖏᐅᑎᑎᑕᐅᔪᓐᓇᖁᓪᓗᓯ.

³⁷ ᐊᒡᓔᑦ ᐅᖃᕐᒪᑕ, “ᐊᑯᓂᐅᖏᑦᑐᖅ, ᑎᑭᑦᑐᒃᓴᖅ ᑎᑭᓐᓂᐊᕐᒪᑦ ᑭᖑᕙᕐᓂᐊᕋᓂᓗ;

³⁸ ᐃᓗᐊᕐᑐᓕᔪᖁᑎᒐ ᐃᓅᔪᒫᕐᐳᖅ ᐅᒃᐱᕐᓂᕐᒥᓄᑦ, ᓴᐱᓕᕐᓂᐊᕐᑐᕐᓗ ᑖᓐᓇ, ᑕᕐᓂᕐᒪ ᖁᕕᐊᓲᑎᒋᓂᐊᓐᖏᓛ.”

³⁹ ᐅᕙᒍᓪᓕ ᐃᓚᒋᓐᖏᓚᕗᑦ ᓴᐱᓕᖃᑦᑕᕐᑐᑦ ᓱᒋᐊᕐᑕᐅᔪᒫᓕᕐᑐᓪᓗ, ᐃᓚᒋᕙᕗᓪᓕ ᐅᒃᐱᕐᓂᖃᕐᑐᑦ ᑕᕐᓂᖏᑕ ᐱᐅᓕᔭᐅᑦᔪᑎᒋᔭᖓᓂᒃ.