ᕼᐊᒊᑉ ᐊᒡᓚᖏᑦ 2 - ᐊᒡᓔᑦ ᐃᑦᔪᕐᖕᓁᑦᑐᑦ

ᑐᒃᓯᐊᕐᕕᒡᔪᐊᑉ ᓄᑖᑉ ᑕᑯᒥᓇᕐᑐᐊᓘᓕᕐᓂᖓ

¹ ᐅᓪᓗᐃᑦ 21ᖓᓂ ᑕᖅᑮᑦ 7ᖓᓂ, ᐊᑕᓂᐅᑉ ᐅᖃᐅᓯᖓ ᑎᑭᑉᐳᖅ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓᒍᑦ ᕼᐊᒊᒃᑯᑦ, ᐅᖃᕐᓗᓂ,

² “ᐅᑯᐊ ᐅᖃᐅᓰᑦ ᐅᖃᐅᓯᕆᒃᑭᑦ ᔨᕈᐸᐱᐅᓪᒧᑦ ᓯᐅᓪᑎᐅᑉ ᐃᕐᓂᖓᓄᑦ, ᐊᐅᓚᑦᓯᔨᒧᑦ ᔫᑕᒥ, ᔮᓱᐊᒧᓪᓗ ᔨᕼᐅᔭᑕᐅᑉ ᐃᕐᓂᖓᓄᑦ ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖓᓄᑦ, ᐃᓄᖕᓄᓪᓗ ᐊᒥᐊᒃᑰᔪᓄᑦ ᐅᖃᐅᑎᓗᒋᓪᓗ:

³ ‘ᓇᓕᕐᓯ ᐊᒥᐊᒃᑰᔪᓯ ᑕᑯᓚᐅᕐᓯᒪᕚᑦ ᑐᒃᓯᐊᕐᕕᒡᔪᐊᑉ ᐱᓐᓇᕐᓇᕐᓂᕆᓚᐅᕐᓯᒪᔭᖓᓂᒃ? ᖃᓄᕐᓕ ᒫᓐᓇ ᑕᑯᓐᓇᓕᕐᐱᓯᐅᒃ? ᓱᓇᐅᖏᑦᑐᑐᑦ ᑕᑯᓐᓇᓕᓐᖏᓚᓯᐅᒃ?

⁴ ᐊᑕᓂᖅ ᐅᖃᕐᐳᖅ, ᒫᓐᓇ ᓴᐱᕐᑍᓕᒋᑦ ᔨᕈᐸᐱᐅᓪ, ᓴᐱᕐᑍᓕᒋᓪᓗ ᔮᓱᐊ ᔨᕼᐅᔭᑕᐅᑉ ᐃᕐᓂᖓ, ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖓᑦ; ᓴᐱᕐᑍᓕᒋᑦᓯ ᐃᓅᖃᑎᒌᓕᒫᖑᔪᓯ ᑕᒫᓂ ᓄᓇᖃᕐᑐᓯ, ᐱᓇᓱᐊᑦᓯᐊᕆᑦᓯ ᐃᓚᒋᕙᑦᓯ,’ ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐅᖃᕐᐳᖅ.

⁵ ‘ᑕᒪᓐᓇ ᐊᖏᕈᑎᒋᓚᐅᕋᒃᑯ ᐃᓕᑦᓯᓐᓄᑦ ᐄᑦᔨᑉᑎᒥᑦ ᐊᐅᓪᓚᕐᑎᓪᓗᓯ, ᐊᓂᕐᓂᕋ ᓱᓕ ᐃᓕᑦᓯᓐᓃᒻᒪᑦ; ᑍᒤᒻᒪᑦ ᑲᑉᐱᐊᓱᒃᑍᓕᒋᑦᓯ!’

⁶ “ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐃᒫᒃ ᐅᖃᕐᐳᖅ: ‘ᐊᑕᐅᓯᐊᕐᓗᖓ ᓱᓕ ᖃᖓᑦᓯᐊᒃᑯᑦ ᕿᓚᒃ ᓄᓇᕐᔪᐊᕐᓗ, ᐃᒪᕕᒡᓗ, ᓄᓇᓗ ᓴᔪᒃᑎᑦᓱᒫᕐᐸᒃᑲ;

⁷ ᐃᓅᖃᑎᒌᒡᔪᐊᓕᒫᓪᓗ ᓴᔪᒃᑎᑦᓱᒫᕐᐸᒃᑲ, ᐊᑭᑐᔪᖁᑎᓕᒫᒥᖕᓂᒃ ᑕᕝᕗᓐᖓᐅᔨᖁᓪᓗᒋᑦ, ᑖᓐᓇᓗ ᐃᒡᓗ ᐱᓐᓇᕐᓇᕐᓂᕐᒥᒃ ᑕᑕᑎᑦᓱᒫᕐᐸᕋ,’ ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐅᖃᕐᐳᖅ.

⁸ ‘ᓯᐅᓪᕕᕇᑦ ᐱᒋᕙᒃᑲ, ᒎᓗᐃᓪᓗ ᐱᒋᒋᕙᒃᑲ,’ ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐅᖃᕐᐳᖅ.

⁹ ‘ᑐᒃᓯᐊᕐᕕᒡᔪᐊᖅ ᑭᖑᓪᓕᖅ ᐱᓐᓇᕐᓇᕐᓂᕐᓴᐅᔪᒫᕐᐳᖅ ᓯᕗᓪᓕᐅᓚᐅᕐᑐᒥᑦ,’ ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐅᖃᕐᐳᖅ; ‘ᑖᓐᓇᓗ ᐃᒡᓗ ᐊᔪᕐᓴᕈᓐᓁᕐᑎᑦᓯᑦᔪᑎᒋᔪᕐᐸᕋ ᓮᒻᒪᓇᕐᑎᑦᓯᓗᓂᓗ. ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐅᖃᕐᐳᖅ.’”

ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓᑕ ᐊᐱᕐᓱᕐᓂᖓ ᑐᓂᕐᕈᓯᕐᑎᑦᓯᔨᓂᒃ

¹⁰ ᐅᓪᓗᐃᑦ 24ᖓᓂ ᑕᖅᑮᑦ 9ᖓᓂ, ᐊᕐᕌᒎᑉ ᐂᑉᐸᕆᓕᕐᑕᖓᓂ ᑍᕉᓯ ᐊᖓᔪᖅᑳᕐᔪᐊᖑᑎᓪᓗᒍ, ᐊᑕᓂᐅᑉ ᐅᖃᐅᓯᖓ ᑎᑭᑉᐳᖅ ᕼᐊᒊᒃᑯᑦ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓᓄᑦ, ᐃᒫᒃ ᐅᖃᕐᓗᓂ,

¹¹ “ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐅᖃᕐᐳᖅ; ᑐᓂᕐᕈᓯᕐᑎᑦᓯᔩᑦ ᐊᐱᕐᓱᓚᐅᒃᑭᑦ ᐱᖁᔧᑦ ᐅᖃᕐᓯᒪᓂᖏᓐᓂᒃ ᐃᒤᓕᔪᓂᒃ,

¹² ‘ᓇᓪᓕᐊᑐᐃᓐᓇᖅ ᓂᕿᒥᒃ ᐃᑦᔪᕐᓁᑦᑐᒥᒃ ᐊᒡᔭᕐᓯᒍᓂ ᐊᓐᓄᕌᒥᓄᑦ ᐃᒻᒧᓯᕐᓯᒪᓗᒍ, ᐊᓐᓄᕌᖏᑕᓗ ᓯᓈᓄᑦ ᐊᒃᑐᐃᒃᐸᑦ ᓂᐊᖂᔭᒥᒃ, ᐊᓗᒐᒃᓴᓕᐊᕆᓯᒪᔪᒥᒡᓘᓐᓃᑦ, ᕔᓂᒥᒡᓘᓐᓃᑦ, ᐅᕐᓱᒥᒡᓘᓐᓃᑦ, ᓂᕿᒥᒡᓘᓐᓃᑦ, ᑖᒃᑯᐊ ᐊᒃᑐᕐᑕᖏᑦ ᐃᑦᔪᕐᓁᓕᕋᔭᕐᐹᑦ?’” ᑕᕝᕙ ᑐᓂᕐᕈᓯᕐᑎᑦᓯᔩᑦ ᑭᐅᕗᑦ ᐅᖃᕐᓗᑎᒃ, “ᑍᒤᒍᓐᓇᓐᖏᓚᖅ.”

¹³ ᕼᐊᒊ ᐅᖃᕐᐳᖅ, “ᓇᓪᓕᐊᑦ ᐃᑦᔪᕐᓇᕐᓯᑎᑕᐅᒃᐸᑦ ᐊᒃᑐᕐᓯᓂᕐᒥᓄᑦ ᑐᖁᖓᔪᒥᒃ, ᐃᑦᔪᕐᓇᕐᓯᒐᔭᕐᐹ?” ᑕᕝᕙ ᑐᓂᕐᕈᓯᕐᑎᑦᓯᔩᑦ ᑭᐅᕗᑦ ᐅᖃᕐᓗᑎᒃ, “ᐃᑦᔪᕐᓇᕐᓯᒐᔭᕐᐳᖅ.”

¹⁴ ᑕᕝᕙ ᕼᐊᒊ ᑭᐅᓪᓗᓂ ᐅᖃᕐᐳᖅ, “ᑍᒤᒃᑭᕗᑦ ᐃᓄᐃᑦ ᐃᓅᖃᑎᒌᒡᔪᐊᓪᓗ ᓵᓐᓂ,” ᐊᑕᓂᖅ ᐅᖃᕐᐳᖅ, “ᑍᒫᒃᑕᐅᖅ ᐊᒡᒐᖏᑕ ᐱᓂᐊᕐᓂᖏᑦ, ᑐᓂᕐᕈᑎᖏᓪᓗ ᐃᑦᔪᕐᓇᕆᕗᑦ.”

ᐊᑕᓂᐅᑉ ᐊᖏᕈᑎᖓ ᓮᒻᒪᕐᑎᑦᓯᓂᐊᕐᓂᕐᒥᓂᒃ

¹⁵ “ᒫᓐᓇ, ᐃᓱᒪᒃᓴᕐᓯᐅᑦᓯᐊᕐᓗᓯ ᖃᐅᔨᓴᓕᕆᑦᓯ ᐅᓪᓗᒥᒥᑦ ᐱᒋᐊᕐᓗᒍ: ᐅᔭᕋᖕᒥᒃ ᐃᓕᔭᐅᔪᖅᑲᓚᐅᕐᑎᓐᓇᒍ ᐅᔭᕋᐅᑉ ᖄᖓᓄᑦ ᐊᑕᓂᐅᑉ ᑐᒃᓯᐊᕐᕕᒡᔪᐊᖓᓂ,

¹⁶ ᑍᑦᓱᒪᓂᐅᑎᓪᓗᒍ, ᓇᓪᓕᐊᑦ ᖃᓕᕇᒃᓯᑎᑦᓯᔭᕐᑐᕐᑎᓪᓗᒍ ᐆᒃᑑᑎᓂᒃ 20ᓂᒃ, ᖃᓕᕇᒃᓯᔪᒃᓮᑦ ᖁᓕᑐᐃᓐᓇᐅᓚᐅᕐᐳᑦ; ᓇᓪᓕᐊᓪᓗ ᕔᓂᖃᐅᑎᓂᒃ 50ᓂᒃ ᐃᒻᒥᕐᓯᔭᕐᑐᕐᑎᓪᓗᒍ, 20ᑐᐃᓐᓇᐅᓚᐅᕐᐳᑦ.

¹⁷ ᓱᒋᐊᓚᐅᕐᐸᑦᓯ ᐱᕈᕐᓯᐊᓯᓗ ᑕᒪᕐᒥᒃ ᑐᖁᓕᓇᕐᑐᓄᑦ ᐅᖁᖕᒧᓪᓗ ᓇᑕᖅᑯᕐᓇᓄᓪᓗ, ᐅᕙᓐᓄᓪᓕ ᓱᓕ ᐅᑎᓚᐅᓐᖏᓚᓯ, ᐊᑕᓂᖅ ᐅᖃᕐᐳᖅ.

¹⁸ ᒫᓐᓇ ᐃᓱᒪᒃᓴᕐᓯᐅᓕᕆᑦᓯ ᐅᓪᓗᒥᒥᑦ ᐱᒋᐊᕐᓗᒍ, ᐅᓪᓘᑉ 24ᖓᓂ ᑕᖅᑭᐅᑉ 9ᖓᓂ, ᐊᑕᓂᐅᑉ ᑐᒃᓯᐊᕐᕕᒡᔪᐊᖁᑎᖓᑕ ᑐᓐᖓᕕᓕᕐᑕᐅᓕᕐᓂᖓᓂᑦ ᐱᒋᐊᕐᓗᒍ ᐃᓱᒪᒃᓴᕐᓯᐅᓕᕆᑦᓯ:

¹⁹ ᐱᕈᕐᓯᐊᒃᓴᓯ ᓱᓕ ᓯᕐᓗᐊᑦᓯᓐᓃᑉᐹᑦ? ᕔᓂᒃᓮᑦ ᓇᐹᕐᑐᐃᓪᓗ ᐸᐅᕐᖓᓖᑦ ᓴᐅᓂᓕᖕᓂᒃ, ᐹᒪᒍᕌᓃᓪᓗ ᐱᕈᕐᑐᐃᑦ, ᓇᐹᕐᑐᐃᓪᓗ ᐅᕐᓱᒃᓴᓖᑦ ᐱᕈᕈᓐᓇᓚᐅᓐᖏᓛᑦ? ᐅᓪᓗᒥᒥᓪᓕ ᐱᒋᐊᕐᓗᒍ ᓮᒻᒪᕐᑎᓐᓂᐊᓕᕐᐸᑦᓯ.”

ᐊᑕᓂᐅᑉ ᐊᖏᕈᑎᖓ ᔨᕈᐸᐱᐅᓪᒧᑦ

²⁰ ᓱᓕ ᑭᖑᓪᓕᕐᒥᒃ ᐊᑕᓂᐅᑉ ᐅᖃᐅᓯᖓ ᕼᐊᒊᒧᐊᕆᕗᖅ ᑕᖅᑭᐅᑉ ᐅᓪᓗᖓᑕ 24ᖓᓂ, ᐅᖃᕐᓗᓂ,

²¹ “ᔨᕈᐸᐱᐅᓪ ᐅᖃᐅᑎᒍᒃ, ᐊᐅᓚᑦᓯᔨᐅᔪᖅ ᔫᑕᒧᑦ ᐅᖃᕐᓗᑎᑦ, ᕿᓚᒡᓗ ᓄᓇᕐᔪᐊᕐᓗ ᓴᔪᒃᑎᓐᓂᐊᓕᕋᒃᑭᒃ,

²² ᐊᖓᔪᖅᑲᐅᕖᑦ ᐃᒃᓯᕙᐅᑕᕐᔪᐊᖏᑦ ᐅᕐᕈᑎᓐᓂᐊᕐᐸᒃᑲ; ᐃᓅᖃᑎᒌᒡᔪᐊᓪᓗ ᐊᖓᔪᖅᑲᐅᕕᖏᑕ ᐱᔪᓐᓇᕐᓂᖏᑦ ᐊᓯᕈᕐᓂᐊᓕᕐᐸᒃᑲ, ᐅᓇᑕᐅᑏᓪᓗ ᐊᒃᓴᓗᐊᓖᑦ ᐅᕐᕈᑎᓐᓂᐊᕆᕙᒃᑲ ᐃᑭᒪᔪᓪᓗ ᐱᖃᓯᐅᑎᓗᒋᑦ; ᕿᒻᒥᕐᔪᐊᓪᓗ ᐃᑭᒪᔪᓪᓗ ᑲᑕᒃᑎᓐᓂᐊᕐᐸᒃᑲ, ᖃᑕᓐᖑᑎᒌᓕᒫᑦ ᓴᕕᒡᔪᐊᒧᑦ ᑐᖁᖃᑦᑕᐅᑎᓂᐊᕐᐳᑦ.

²³ ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐅᖃᕐᐳᖅ, ‘ᐅᓪᓗᖅ ᑕᒪᓐᓇ ᓇᓪᓕᐅᑎᒃᐸᑦ ᑎᒍᔪᒫᕐᐸᒋᑦ ᔨᕈᐸᐱᐅᓪ ᐱᔨᒋᒐᒃᑭᑦ, ᓯᐅᓪᑎᐅᑉ ᐃᕐᓂᖓ,’ ᐊᑕᓂᖅ ᐅᖃᕐᐳᖅ, ‘ᓇᕿᑦᑎᑦᔪᑎᐅᑎᑦᓱᒫᕐᐸᒋᑦ ᓇᒡᒍᐊᕐᒥᒃᑎᑐᑦ; ᓂᕈᐊᕐᓯᒪᒐᒃᑭᑦ,’ ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐅᖃᕐᐳᖅ.”