ᕼᐊᐸᑲᐅᑉ ᐊᒡᓚᖏᑦ 3 - ᐊᒡᓔᑦ ᐃᑦᔪᕐᖕᓁᑦᑐᑦ

ᕼᐊᐸᑲᐅᑉ ᑐᒃᓯᐊᕐᓂᖓ

¹ ᐅᑯᐊ ᑕᕝᕙ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓᑕ ᕼᐊᐸᑲᐅᑉ ᑐᒃᓯᐊᕈᑎᒋᓚᐅᕐᑕᖏᑦ:

² ᐊᑕᓃᖅ, ᑐᓴᕐᓯᒪᕗᖓ ᐅᓂᒃᑲᐅᓯᐅᓯᒪᓂᕐᓂᒃ, ᐱᓇᓱᐊᕐᓂᕆᓯᒪᔭᑎᓪᓗ ᐊᑕᓃᖅ, ᓯᕘᕋᒋᕙᒃᑲ. ᐱᓂᐊᕐᓂᕆᕙᓚᐅᕐᑕᑎᑦ ᐅᓪᓗᒥ ᓄᑕᐅᓯᓕᕐᓗᒋᑦ; ᐱᓂᐊᕐᓂᕆᕙᓚᐅᕐᑕᑎᓪᓗ ᐅᓪᓗᒥ ᖃᐅᔨᔭᐅᑎᓪᓗᒋᑦ; ᓂᓐᖓᐅᒪᓗᑎᑦ ᐃᖅᑬᓚᐅᕆᑦ ᓂᑲᒍᓱᖕᓂᕐᒥᒃ.

³ ᒎᑎ ᑎᑭᑉᐳᖅ ᑏᒪᓂᒥᑦ; ᐃᑦᔪᕐᓁᑦᑐᖅ ᐸᕌᓂᐅᑉ ᖃᖅᑲᖓᓂᑦ. ᑖᑦᓱᒪ ᓂᕐᑐᕐᓇᕐᓂᖓᑕ ᕿᓚᒃ ᐅᓕᒃᓯᒪᕚ, ᓄᓇᕐᔪᐊᓕᒫᕐᓗ ᑕᑕᑉᐳᖅ ᑖᑦᓱᒥᖓ ᓂᕐᑐᐃᓂᕐᒥᒃ. ᓰᓚ

⁴ ᑖᑦᓱᒪ ᖃᐅᒻᒪᕆᖕᓂᖓ ᖃᐅᒻᒪᓚᒃᑎᑐᑦ ᑍᒤᑉᐳᖅ, ᐊᒡᒐᖏᓐᓂᑦ ᖃᐅᒪᔪᖅ ᓇᓂᕈᐊᕐᑐᑎᑐᑦ ᑍᒤᑉᐳᖅ; ᑕᕝᕙᓂᓗ ᐱᔪᓐᓇᕐᓂᖓ ᐃᔨᕐᓯᒪᕗᖅ.

⁵ ᓯᕗᓂᖓᓂ ᖃᓂᒪᓇᕐᑐᑦ ᐃᖏᕐᕋᕗᑦ, ᑭᖑᓂᑦᓯᐊᖓᓂᓗ ᑐᖁᓐᓇᕐᑐᑦ ᒪᓕᒡᓗᑎᒃ.

⁶ ᓄᖅᑲᕐᒪᑦ, ᓄᓇᕐᔪᐊᖅ ᐊᐅᓚᓕᕐᐳᖅ; ᑕᑯᓴᕐᒪᑦ ᐃᓅᖃᑎᒌᒡᔪᐊᑦ ᓴᔪᓕᕐᐳᑦ. ᖃᖅᑬᑦ ᐃᓱᖃᖏᑦᑐᒥᑦ ᓯᐊᒻᒪᓕᕐᐳᑦ; ᐱᖑᐊᕐᔪᐃᓪᓗ ᓄᖑᓱᐃᑦᑐᑦ ᑭᕕᓕᕐᐳᑦ, ᑍᑦᓱᒪᓂᐊᓗᒃ ᑖᑦᓱᒪ ᐱᓱᒡᕕᒋᕙᓚᐅᕐᑕᖏᑦ.

⁷ ᑯᓵᓐᒥᐅᑦ ᐃᓄᖏᑦ ᑕᑯᕙᒃᑲ ᑲᑉᐱᐊᓱᓕᕐᑐᑦ; ᒥᑎᐊᓂᒥᐅᓪᓗ ᐃᓄᖏᑦ ᓴᔪᓕᕐᑐᑦ.

⁸ ᐊᑕᓃᖅ, ᑰᖕᒧᑦ ᓂᓐᖓᒃᑎᑕᐅᕖᑦ? ᐃᒪᕕᖕᒧᑦ ᓂᓐᖓᕕᒡᔪᐊᕐᑎᑕᐅᕖᑦ? ᓄᕗᔧᑦ ᖄᖏᑎᒍᑦ ᐃᑭᒪᒐᕕᑦ; ᓯᓚᕐᓂᕐᓗᐃᓪᓗ ᓄᕗᔭᑦ ᕿᒧᒃᓯᐅᑎᒋᕙᑎᑦ ᐊᒃᓴᓗᐊᓕᒃᑎᑐᑦ, ᑕᒪᒃᑯᑎᒎᓇᕐᓗ ᓵᓚᖃᕐᑎᑦᓯᓪᓗᑎᑦ ᐃᓄᖁᑎᖕᓂᒃ.

⁹ ᐱᑎᒃᓰᑦ ᕿᓗᓯᒪᓕᓚᐅᕐᐸᑦ ᐱᒋᐊᑐᐃᓐᓇᕆᐊᖃᓕᕐᓗᑎᑦ, ᖃᕐᔪᐃᓪᓗ ᐱᑎᒃᓯᖕᓂ ᓄᕿᒻᒥᓕᓚᐅᕐᐸᑦ ᐱᓯᒋᐊᑐᐃᓐᓇᕆᐊᖃᓕᕐᓗᑎᑦ. ᖃᐅᒻᒫᓪᓚᖁᑎᕕᓪᓗ ᓄᓇᕐᔪᐊᖅ ᖁᐱᑎᓚᐅᕐᐹ.

¹⁰ ᖃᖅᑬᓪᓗ ᐃᓕᖕᓂᒃ ᑕᑯᒐᒥᒃ ᓴᔪᓕᕐᐳᑦ; ᐃᒦᓪᓗ ᐃᒃᑑᓕᔮᕐᓗᑎᒃ ᖁᕕᓕᕐᐳᑦ ᕿᓚᖕᒥᑦ. ᐃᒪᕐᔪᐊᕐᓗ ᐃᒃᑑᓕᔮᓕᕐᐳᖅ ᓄᓇᐅᑉ ᐊᑖᓂᑦ, ᐃᒪᐅᓪᓗ ᐃᖏᐅᓕᖕᓂᖓ ᐳᕐᑐᓯᓪᓗᓂ.

¹¹ ᖃᕐᔪᕕᑦ ᓱᒃᑲᓕᓂᕐᒧᑦ ᖃᐅᒻᒪᓪᓚᖕᓂᖏᓐᓂ ᖃᓗᒋᐊᕐᐱᓪᓗ ᓱᒃᑲᓂᖏᑕ ᕿᓪᓛᒋᕐᓂᖏᓐᓂ, ᓯᕿᓂᖅ ᑕᖅᑭᕐᓗ ᐃᓂᒥᖕᓂ ᓄᖅᑲᖓᓚᐅᕐᐴᒃ.

¹² ᓄᓇᕐᔪᐊᒃᑯᑦ ᐱᓱᒃᐳᑎᑦ ᓂᓐᖓᐅᒪᓪᓗᑎᑦ; ᓂᓐᖓᕕᒃᔪᐊᕐᓯᒪᓪᓗᑎᓪᓗ ᐃᓅᖃᑎᒌᒡᔪᐊᑦ ᑐᓪᓕᕋᕐᐸᑎᑦ.

¹³ ᐊᓂᓚᐅᕐᐳᑎᑦ ᐃᓄᖁᑎᑎᑦ ᐱᐅᓕᔭᕐᑐᕐᓗᒋᑦ, ᐊᖓᔪᖅᑳᕐᔪᐊᖑᖁᓪᓗᒍ ᓂᕈᐊᕐᓯᒪᔧᑦ ᐱᐅᓕᔭᕐᑐᕐᓗᒍ. ᐱᐅᖏᑦᑐᓕᔪᑦ ᐊᖓᔪᖅᑳᖓᑦ ᐅᕐᕈᑎᓚᐅᕐᐸᑦ ᒪᓕᒃᑎᖏᓪᓗ ᓄᖑᑦᓯᐊᓚᐅᕐᐸᑎᑦ.

¹⁴ ᖃᕐᔪᕕᑦ ᑲᐱᓚᐅᕐᐹ ᐅᓇᑕᕐᑐᒃᓴᖁᑎᖏᑕ ᐊᖓᔪᖅᑳᖓᑦ, ᐅᓚᔪᔭᕐᑎᑐᑦ ᕾᓕᕐᑎᓪᓗᒍ ᐅᕙᑦᑎᓐᓂᒃ ᓯᐊᒻᒪᕐᑎᑦᓯᔪᒪᓪᓗᓂ, ᖁᕕᐊᓲᑎᖃᑐᐃᓐᓇᓚᐅᕐᐳᑦ ᐊᔪᕐᓴᕐᑐᓂᒃ ᐄᓯᔪᑎᑐᑦ ᐱᔪᒪᓪᓗᑎᒃ ᖃᐅᔨᔭᐅᖏᓪᓗᑎᒃ.

¹⁵ ᐃᒪᕐᔪᐊᖅ ᑐᓪᓕᕋᓚᐅᕐᐸᑦ ᕿᒻᒥᕐᔪᐊᖁᑎᖕᓄᑦ, ᑕᕝᕙ ᐃᒪᕐᔪᐊᑉ ᐱᔪᓐᓇᕐᓂᖓ ᑍᒫᒃ ᓴᖅᑭᑎᓚᐅᕐᐸᑦ.

¹⁶ ᑕᒪᓐᓇᓗ ᑐᓴᕋᒃᑯ, ᐃᓗᒐ ᓴᔪᓕᕐᐳᖅ; ᖃᓂᕐᒪᓗ ᓯᓈ ᐆᓕᒃᑐᑎᑐᑦ ᑍᒤᓕᕐᐳᖅ ᑲᑉᐱᐊᓱᖕᓂᕐᒧᑦ. ᓴᐅᓂᒃᑲᓗ ᓴᐅᓂᓐᖑᔪᑎᑐᑦ ᑍᒤᓕᕐᐳᑦ, ᐃᑎᒐᒃᑲᓗ ᖁᐂᔭᕿᑦᑖᓕᕐᐳᑦ ᑐᖕᒪᕐᑕᒃᑯᑦ. ᓂᐱᖃᖏᓪᓗᖓ ᐅᑕᖅᑭᑐᐃᓐᓇᕐᓂᐊᓕᕐᐳᖓ ᑎᑭᓛᕐᑐᒥᒃ ᒎᑎᐅᑉ ᓱᒋᐊᕐᓯᓂᒃᓴᖓᓂᒃ ᐅᕙᑦᑎᓐᓂᒃ ᓱᒃᑯᔨᐊᖃᕐᑐᓂᒃ.

¹⁷ ᓇᐹᕐᑐᐃᑦ ᐱᒋᓕᖕᓂᒃ ᐸᐅᕐᖓᖃᕐᐸᒃᑐᑦ ᐱᕈᕐᕕᐅᖏᒃᑲᓗᐊᕐᐸᑕ ᐸᐅᕐᖓᓂᒡᓗ ᕔᓂᒃᓴᓂᒃ ᐱᕈᕐᑐᖃᖏᒃᑲᓗᐊᕐᐸᑦ, ᓇᐹᕐᑐᓪᓗ ᐅᕐᓱᒃᓴᓖᑦ ᐱᕈᕐᕕᐅᖏᒃᑲᓗᐊᕐᐸᑕ ᐱᕈᕐᓰᕖᓪᓗ ᓂᐊᖂᔭᒃᓴᓂᒃ ᐱᕈᕐᕕᐅᖏᒃᑲᓗᐊᕐᐸᑕ, ᓰᐱᓕᒫᓪᓗ ᑐᖁᒐᓗᐊᕐᐸᑕ ᐃᒻᒧᒃᓯᐅᒊᓪᓗ ᐃᓂᒋᕙᒃᑕᖏᑦ ᐆᒪᔪᕐᑕᖃᕈᓐᓁᕋᓗᐊᕐᐸᑕ,

¹⁸ ᓱᓕ ᖁᕕᐊᓱᒡᓗᖓ ᐊᑕᓂᖅ ᓂᕐᑐᕈᒪᕙᕋ, ᒎᑎᓗ ᖁᕕᐊᓲᑎᒋᔪᒪᕙᕋ ᐱᐅᓕᔨᒋᒐᒃᑯ.

¹⁹ ᐊᑕᓂᖅ ᒎᑎ, ᐱᔪᓐᓇᕐᓂᖃᕐᕕᒋᒐᒃᑯ; ᐃᑎᒐᒃᑲ ᑐᒃᑐᖓᔫᑉ ᐃᑎᒐᖏᑎᑐᑦ ᑍᒤᑎᒻᒪᒋᑦ, ᖃᖅᑲᓂ ᐃᓐᓈᕈᕐᓂᓗ ᖁᐂᑦᑖᖁᓇᖓ ᖃᓄᐃᓕᖁᓇᖓᓗ.