ᒨᓯᓯ ᓯᕗᓪᓖᑦ 9 - ᐊᒡᓔᑦ ᐃᑦᔪᕐᖕᓁᑦᑐᑦ

ᒎᑎᐅᑉ ᐊᖏᖃᑎᖃᕐᓂᖓ ᓄᐊᒥᒃ

¹ ᒎᑎᐅᓪᓗ ᓄᐊ ᐃᕐᓂᖏᓪᓗ ᓮᒻᒪᕐᑎᑉᐰᑦ, ᐅᖃᕐᓗᓂ, “ᕿᑐᕐᖏᐅᕆᑦᑎ ᐅᓄᕐᑐᓂᒃ, ᓄᓇᓗ ᐃᓄᒋᐊᒃᓯᑎᓕᕐᓯᐅᒃ.

² ᑲᑉᐱᐊᒋᔭᐅᓂᐊᕐᐳᓯ ᐃᕐᓯᒋᔭᐅᓗᓯᓗ ᐆᒪᔪᓕᒫᓄᑦ ᓄᓇᒥ, ᑎᖕᒥᐊᓄᓪᓗ ᖃᖓᑕᕙᒃᑐᓄᑦ, ᐹᕐᖑᕐᑐᓕᒫᓄᓪᓗ ᒪᓂᖅᑲᒥ ᐃᒪᕐᒥᐅᑕᓕᒫᓄᓪᓗ; ᑕᒪᒃᑯᐊ ᐱᔪᓐᓇᕐᓂᑦᓯᓐᓄᑦ ᑐᓂᔭᐅᖕᒪᑕ.

³ ᐊᐅᓚᔪᓐᓇᕐᑐᓕᒫᑦ ᐆᒪᔪᑦ ᓂᕿᒃᓴᕆᓂᐊᕐᐸᓯ; ᐱᕈᕐᑐᓪᓗ ᑐᖑᔪᕐᑍᑦ ᑐᓂᒋᕙᒃᑲ, ᑐᓂᓯᕕᒋᕙᑦᓯ ᑕᒤᓐᓂᒃ.

⁴ ᓂᕆᔭᕆᐊᖃᓐᖏᓚᓯᓕ ᓂᕿᒥᒃ ᐃᓅᓯᖓᓂᒃ ᐃᓚᖃᕐᑐᒥᒃ, ᑕᕝᕙ ᐊᐅᖓᓂᒃ.

⁵ ᐊᐅᒃ ᐃᓅᑦᔪᑎᓯ ᑯᕕᔭᐅᒃᐸᑦ ᐊᑭᓕᒐᒃᓴᐅᖁᕙᕋ; ᐆᒪᔪᐃᓪᓗ ᐊᐅᖓ ᐊᑭᓕᒐᒃᓴᐅᖁᕙᕋ; ᐃᓅᓪᓗ ᐊᐅᖓ; ᐃᓄᒃ ᐃᓅᖃᑎᖓᑕ ᐊᐅᖓᓂᒃ ᑯᕕᓯᒃᐸᑦ ᐃᓅᑉ ᐃᓅᓯᖓᓂᒃ ᐊᑭᖃᖁᕙᕋ.

⁶ ᐃᓄᒃ ᓇᓪᓕᐊᑦ ᐃᓅᖃᑎᖓᑕ ᐊᐅᖓᓂᒃ ᑯᕕᓯᒃᐸᑦ, ᐃᓄᖕᒧᑦᑕᐅᖅ ᐊᐅᖓ ᑯᕕᔭᐅᔪᒃᓴᐅᕗᖅ; ᒎᑎ ᓴᓇᓚᐅᕐᒪᑦ ᐃᓄᖕᒥᒃ ᐃᒻᒥᓂᒃ ᐊᑦᔨᖃᕐᑎᓪᓗᒍ.

⁷ “ᐃᓕᑦᓯᓕ ᕿᑐᕐᖓᕐᑖᕐᑐᕆᑦᓯ ᐅᓄᕐᓯᓗᓯᓗ, ᐃᓄᒋᐊᒃᓯᒋᑦᓯ ᓄᓇᕐᔪᐊᕐᒥ ᐅᓄᕐᓯᕙᓪᓕᐊᓗᓯᓗ ᑕᒫᓂ.”

⁸ ᒎᑎᓗ ᐅᖃᕆᕗᖅ ᓄᐊᕐᒧᑦ ᐃᕐᓂᖏᓐᓄᓪᓗ,

⁹ “ᑕᑯᒋᑦ, ᐊᖏᖃᑎᒌᒍᑎᓕᐅᕐᐳᖓ ᐃᓕᖕᓄᑦ ᑭᖑᕚᒃᓴᕐᓄᓪᓗ,

¹⁰ ᐊᓂᕐᓂᖃᕐᑐᓕᒫᓄᓪᓗ, ᓇᔪᕐᑕᕐᓃᑦᑐᓄᑦ, ᑎᖕᒥᐊᓄᑦ, ᐆᒪᔪᖁᑎᓄᓪᓗ, ᐆᒪᔪᓄᓪᓗ ᓄᓇᒥ ᓇᔪᕐᑕᕐᓃᑦᑐᓄᑦ, ᑕᒤᓐᓄᑦ ᐅᒥᐊᕐᔪᐊᕐᒥᑦ ᐊᓂᓚᐅᕐᑐᓄᑦ.

¹¹ ᐃᓕᖕᓄᑦ ᐊᖏᖃᑎᒌᒍᑎᓕᐅᕐᐳᖓ, ᐅᓕᕕᒃᔪᐊᕐᒧᑦ ᐆᒪᔪᓕᒫᑦ ᐊᓯᕈᕐᑕᐅᓚᐅᕐᓯᒪᓂᐊᕈᓐᓃᕐᐳᑦ; ᐅᓕᕕᒃᔪᐊᕐᒧᓪᓗ ᓄᓇᕐᔪᐊᖅ ᐊᓯᕈᕐᑕᐅᒃᑲᓐᓂᕐᓂᐊᕈᓐᓃᕐᓗᓂ.”

¹² ᒎᑎᓗ ᐅᖃᕐᐳᖅ: “ᑕᒪᓐᓇ ᓇᓗᓁᒃᑯᑕᖃᕐᑎᓐᓂᐊᕐᐸᕋ ᐊᖏᖃᑎᒌᒍᑦ ᐋᖅᑭᒃᑕᕋ ᐅᕙᓐᓄᑦ ᐃᓕᑦᓯᓐᓄᓪᓗ ᐆᒪᔪᓕᒫᓄᓪᓗ ᐃᓕᑦᓯᓐᓃᑦᑐᓄᑦ, ᓯᕗᓂᒃᓴᒥᓗ ᑭᖑᕚᕇᖑᔪᒫᕐᑐᓄᑦ.

¹³ ᐊᔭᒍᑕᖁᑎᒐ ᐃᓕᕙᕋ ᓄᕗᔭᓄᑦ, ᓇᓗᓁᒃᑯᑕᐅᖁᓪᓗᒍ ᐊᖏᖃᑎᒌᒍᑎᓕᐅᕐᓯᒪᓂᓐᓄᑦ ᓄᓇᕐᔪᐊᕐᒥᐅᓄᑦ.

¹⁴ ᓄᓇ ᓄᕗᔭᓄᑦ ᐅᓕᒑᖓᒃᑯ, ᐊᔭᒍᑕᖅ ᑕᑯᒃᓴᐅᕙᖕᓂᐊᕐᐳᖅ ᓄᕗᔭᓂ,

¹⁵ ᐃᖅᑬᕙᖕᓂᐊᕐᐳᖓᓗ ᐊᖏᖃᑎᒌᒍᑎᒋᓚᐅᕐᑕᓐᓂᒃ ᐊᑯᓐᓇᑦᑎᓐᓂ ᐅᕙᓂᑦ ᐃᓕᑦᓯᓐᓄᑦ ᐆᒪᔪᓕᒫᓄᓪᓗ ᖃᓄᐃᑦᑐᑐᐃᓐᓇᕐᓄᑦ; ᐃᒪᕐᔪᐃᑦ ᐅᓕᕕᒡᔪᐊᓚᐅᕐᓯᒪᓂᐊᕈᓐᓃᕐᐳᑦ ᐆᒪᔪᓐᓇᕐᑐᓕᒫᓂᒃ ᐊᓯᕈᐃᓂᐊᕐᑐᒥᒃ.

¹⁶ ᓄᕗᔭᑎᒍᑦ ᐊᔭᒍᑕᖅ ᓴᖅᑭᑦᑕᕌᖓ, ᑕᑯᓐᓇᕐᓗᒍ ᐃᖅᑬᑦᔪᑎᒋᖃᑦᑕᕐᓂᐊᕐᐸᕋ ᐊᖏᖃᑎᒌᒍᑎᒥᒃ ᐃᓱᖃᖏᑦᑐᒧᑦ ᒎᑎᒥᑦ ᐆᒪᔪᓕᒫᓄᓪᓗ ᑎᒥᖃᕐᑐᓄᑦ ᓄᓇᒥ.”

¹⁷ ᒎᑎᓗ ᓄᐊᕐᒧᑦ ᐅᖃᕐᐳᖅ, “ᑕᒪᑦᔭ ᓇᓗᓁᒃᑯᑕᓕᐊᕋ ᐊᖏᖃᑎᒌᖕᓂᕐᒧᑦ ᐋᖅᑭᓚᐅᕐᑕᕋ ᐅᕙᓐᓄᑦ ᑎᒥᖃᕐᑐᓄᓪᓗ ᑕᒤᓐᓄᑦ ᓄᓇᒦᑦᑐᓄᑦ.”

ᓄᐊᓗ ᐃᕐᓂᖏᓪᓗ

¹⁸ ᓄᐊᑉ ᐃᕐᓂᖏᑦ ᐅᒥᐊᕐᔪᐊᒥᑦ ᐊᓂᓚᐅᕐᑐᑦ ᐅᑯᐊᖑᕗᑦ ᓰᒥ, ᕼᐋᒥ, ᔮᐱᑎᓗ. ᕼᐋᒥ ᑬᓇᓂᐅᑉ ᐊᑖᑕᒋᓚᐅᕐᐹ.

¹⁹ ᑖᒃᑯᐊ ᑕᕝᕙ ᓄᐊᑉ ᐃᕐᓂᖏᑦ ᐱᖓᓱᑦ; ᑖᒃᑯᓇᓐᖓᑦ ᓄᓇᕐᔪᐊᓕᒫᖅ ᐃᓄᖃᓕᕐᑎᑕᐅᓚᐅᕐᐳᖅ.

²⁰ ᓄᐊ ᓯᕗᓪᓕᕐᐸᐅᓪᓗᓂ ᐱᕈᕐᓰᕕᓕᕆᕗᖅ, ᐱᕈᕐᓰᕕᖕᒥᒃ ᕔᓂᓕᒃᓴᒥᒃ ᓴᓇᓚᐅᕐᐳᖅ.

²¹ ᕔᓂᒥᒡᓕ ᐃᒥᓚᐅᕐᓗᓂ, ᑭᖑᓂᖓᒍᑦ ᐋᖓᔮᓕᓚᐅᕐᐳᖅ, ᐊᓐᓄᕌᖃᕋᓂᓗ ᑐᐱᕐᒥᓂ ᓇᓚᓪᓗᓂ ᓯᓂᓕᓚᐅᕐᐳᖅ.

²² ᕼᐋᒥᐅᓪᓕ, ᑬᓇᓂᐅᑉ ᐊᑖᑕᖓᑕ, ᐊᑖᑕᓂ ᑕᑯᒐᒥᐅᒃ ᐊᓐᓄᕌᖃᖏᑦᑐᖅ, ᐊᓂᓪᓗᓂ ᑕᕝᕙᓐᖓᑦ ᖃᑕᓐᖑᑏᖕᓂ ᐅᖃᐅᑎᔭᕐᑐᕐᐹᒃ ᓯᓚᒦᑦᑑᒃ.

²³ ᑕᕝᕙ ᓰᒥᐅᑉ ᔮᐱᑎᐅᓪᓗ ᐅᓕᒡᔪᐊᒥᒃ ᓇᒃᓴᕐᓗᑎᒃ, ᑐᓄᒥᓃᑎᓪᓗᒍ, ᑭᖑᑉᐱᐊᕐᑐᕐᓗᑎᒃ ᐊᑖᑕᑎᒃ ᐊᓐᓄᕌᖃᖏᑦᑐᖅ ᐅᓕᒋᐊᕐᑐᕐᐹᒃ; ᓵᖓᓇᒍ, ᐊᑖᑕᑎᒃ ᐊᓐᓄᕌᖃᖏᓐᓂᖓ ᑕᑯᓚᐅᓐᖏᓛᑦ.

²⁴ ᓄᐊᓕ ᐋᖓᔮᕈᓐᓃᕋᒥ ᖃᐅᔨᓕᕋᒥᓗ ᓄᑲᕐᓕᕐᐹᖁᑎᖓᑕ ᖃᓄᐃᓕᐅᓚᐅᕐᓂᖓᓂᒃ,

²⁵ ᐅᖃᕐᐳᖅ, “ᑬᓇᓂ ᐅᖃᕕᒃᓗᖓ ᐃᓱᒪᓂᕐᓗᒡᕕᒋᕙᕋ; ᐊᖓᔪᒥᓄᑦ ᓱᓇᐅᒋᔭᐅᖏᓪᓗᓂ ᐱᔨᒋᔭᐅᔪᒫᓕᕐᐳᖅ.”

²⁶ ᐅᖃᕆᓪᓗᓂᓗ: “ᐊᑕᓂᕐᒧᑦ ᒎᑎᓐᓄᑦ ᓰᒥ ᓮᒻᒪᕐᑎᑕᐅᓕ; ᑬᓇᓂ ᓰᒥᒧᑦ ᐱᔨᒋᔭᐅᓕᕐᓕ.

²⁷ ᒎᑎᐅᓪᓕ ᔮᐱᑎ ᐃᓄᒋᐊᒃᓯᕙᓪᓕᐊᑎᓪᓕᐅᒃ, ᑖᑦᓱᒪᓗ ᑭᖑᕚᖏᑦ ᓄᓇᖃᑎᖃᕐᓕᑦ ᓰᒥᐅᑉ ᑭᖑᕚᖏᑕ ᐃᓄᖏᓐᓂᒃ, ᑬᓇᓂᓕ ᐱᔨᒋᔭᐅᔪᒫᕐᐳᖅ ᔧᐱᑎᒧᑦ.”

²⁸ ᐅᓕᕕᒃᔪᐊᓪᓕ ᑭᖑᓂᖓᒍᑦ ᓄᐊ ᐊᕐᕌᒍᓂᒃ 350ᓂᒃ ᐃᓅᓚᐅᕐᐳᖅ.

²⁹ ᐅᓪᓗᐃᑦ ᓄᐊᑉ ᐃᓅᓚᐅᕐᑕᖏᑦ ᐊᕐᕌᒍᑦ 950ᐅᓚᐅᕐᐳᑦ; ᑐᖁᓚᐅᕐᐳᕐᓗ.