ᒨᓯᓯ ᓯᕗᓪᓖᑦ 8 - ᐊᒡᓔᑦ ᐃᑦᔪᕐᖕᓁᑦᑐᑦ

ᐅᓕᕕᒡᔪᐊᑉ ᐃᓱᓕᓐᓂᖓ

¹ ᒎᑎᐅᓪᓕ ᐃᖅᑲᐅᒪᓚᐅᕐᐰᑦ ᓄᐊᒃᑯᑦ ᐆᒪᔪᓪᓗ ᐆᒪᔪᖁᑏᓪᓗ ᐅᒥᐊᕐᔪᐊᕐᒦᖃᑎᖏᑦ. ᒎᑎᓗ ᐊᓄᕌᓕᕐᑎᑦᓯᕗᖅ ᓄᓇᕐᔪᐊᕐᒥ, ᐃᒪᕐᓗ ᑎᓂᑉᐸᓪᓕᐊᓯᓪᓗᓂ.

² ᐃᒪᐅᓪᓗ ᐊᓂᐊᕕᖏᑦ ᓄᓇᕐᔪᐊᑉ ᐊᑖᓂᑦ ᕿᓚᐅᓪᓗ ᑰᒡᕕᖏᑦ ᒪᑐᔭᐅᓚᐅᕐᐳᑦ, ᓯᓚᓗᒡᓗ ᕿᓚᖕᒥᑦ ᓄᖅᑲᕐᑎᑕᐅᓪᓗᓂ.

³ ᐃᒪᕐᓗ ᑎᓂᑉᐸᓪᓕᐊᖏᓐᓇᓕᓚᐅᕐᐳᖅ. ᐅᓪᓗᐃᑦ 150 ᓈᖕᒪᑕ ᐃᒪᖅ ᓄᖑᑉᐸᓪᓕᐊᓕᕐᐳᖅ.

⁴ ᑕᖅᑮᑦ 7ᖓᓐᓂ, ᐅᓪᓗᖏᑕ 17ᖓᓐᓂ, ᐅᒥᐊᕐᔪᐊᖅ ᐃᒃᑐᕐᐳᖅ ᐊᕋᕌᑦ ᖃᖅᑲᖏᓐᓄᑦ ᓄᖅᑲᕐᓗᓂ.

⁵ ᐃᒪᖅ ᑍᒪᓐᖓᑦ ᑎᓂᑉᐸᓪᓕᐊᖏᓐᓇᓕᕋᒥ ᑕᖅᑮᑦ 10ᖓᑦ ᑎᑭᓪᓗᒍ; ᑕᖅᑮᑦ 10ᖓᓐᓂ, ᐅᓪᓗᖓᓂ ᓯᕗᓪᓕᕐᐹᒥ, ᖃᖅᑳᓗᐃᑦ ᖄᖏᑦ ᓴᖅᑭᑉᐳᑦ.

⁶ ᐅᓪᓗᐃᑦ 40 ᐊᓂᒍᕐᑎᓪᓗᒋᑦ, ᓄᐊ ᐃᒐᓛᒥᒃ ᒪᑐᐃᕐᓯᕗᖅ ᓴᓇᓯᒪᔭᒥᓂᒃ.

⁷ ᑐᓗᒐᕐᒥᒡᓗ ᑎᖏᑎᑦᓯᕗᖅ; ᑖᓐᓇ ᖃᖓᑕᑲᑕᑐᐃᓐᓇᓚᐅᕐᐳᖅ ᓇᒧᑐᐃᓐᓈᖃᑕᒃᓗᓂ ᐃᒪᐅᑉ ᓴᓗᐊᓚᐅᖏᓐᓂᓕᒫᖓᓂ ᓄᓇᒥ.

⁸ ᐊᒻᒪ ᓄᐊ ᑑᕕᒥᒃ ᑎᖏᑎᑦᓯᒋᕗᖅ ᑕᕝᕙᓐᖓᑦ, ᖃᐅᔨᑦᔪᑎᒋᔪᒪᓪᓗᒍ ᐃᒪᖅ ᓴᓗᐊᓕᕐᒪᖔᑦ ᓄᓇᒥ.

⁹ ᓱᓕᓕ ᒥᕝᕕᒃᓴᕐᓯᖏᓐᓇᒥ, ᐅᒥᐊᕐᔪᐊᒧᑦ ᐅᑎᕐᐳᖅ. ᓄᐊᓪᓗ ᐱᓪᓗᓂᐅᒃ ᐃᑎᕐᑎᒃᑭᕚ, ᓱᓕ ᐃᒪᐅᑉ ᓄᓇ ᐅᓕᒃᓯᒪᓚᐅᕐᒪᒍ.

¹⁰ ᐅᓪᓗᓂᒡᓗ 7ᓂᒃ ᐅᑕᖅᑭᓚᐅᕐᓗᓂ, ᓱᓕ ᑑᕕᒃ ᑎᖏᑎᒃᑭᕚ ᐅᒥᐊᕐᔪᐊᒥᑦ;

¹¹ ᑑᕕᓗ ᐅᑎᕐᐳᖅ ᐅᓐᓄᒃᑎᓪᓗᒍ, ᑭᖕᒥᐊᕐᓗᓂ ᓇᐹᕐᑑᑉ ᐅᕐᓱᒃᓴᓕᖕᓂᒃ ᐱᕈᕐᑐᓕᐅᑉ ᐅᖃᐅᔭᕐᖓᓂᒃ ᐲᕋᑖᕐᓯᒪᔪᒥᒃ; ᓄᐊᓗ ᓇᓗᔪᓐᓃᕐᐳᖅ ᐃᒪᐅᑉ ᑎᓂᑉᐸᓪᓕᐊᓕᕐᓂᖓᓂᒃ ᓄᓇᒥᑦ.

¹² ᓱᓕ ᐅᓪᓗᓂᒃ 7ᓂᒃ ᓄᐊ ᐅᑕᖅᑭᒃᑲᓐᓂᓚᐅᕐᓗᓂ, ᐊᒻᒪ ᑑᕕᒃ ᑎᖏᑎᒃᑭᕚ; ᑕᒪᑐᒪᓂ ᑖᑦᓱᒧᖓ ᐅᑎᒃᑲᓐᓂᕈᓐᓃᕐᐳᖅ.

¹³ ᓄᐊ 601ᓂᒃ ᐊᕐᕌᒍᖃᓕᕐᑎᓪᓗᒍ, ᑕᖅᑭᐅᑉ ᓯᕗᓪᓕᕐᐹᖓᓂ, ᐅᓪᓗᖓᑕᓗ ᓯᕗᓪᓕᕐᐹᖓᓐᓂ, ᐃᒪᖅ ᓴᓗᐊᑦᓯᐊᓚᐅᕐᐳᖅ ᓄᓇᒥ; ᓄᐊᓪᓗ ᐅᒥᐊᕐᔪᐊᑉ ᖁᓕᖓ ᒪᑐᐃᕐᓗᒍ ᑕᑯᓇᓱᐊᕋᒥ, ᑕᑯᒋᑦ ᒪᓂᕋᖅ ᓴᓗᐊᕐᑐᖅ ᑕᑯᓕᕐᐹ.

¹⁴ ᑕᖅᑭᐅᓪᓗ ᐂᑉᐸᖓᓂ, ᐅᓪᓗᖏᑕ 27ᖓᓐᓂ, ᓄᓇ ᐸᓂᓚᐅᕐᐳᖅ.

¹⁵ ᒎᑎᓗ ᓄᐊᕐᒧᑦ ᐅᖃᕐᐳᖅ,

¹⁶ “ᓄᓕᐊᓪᓗ ᐅᒥᐊᕐᔪᐊᕐᒥᑦ ᐊᓂᓕᕆᑦᑎᒃ, ᐃᕐᓂᑎᓪᓗ ᐃᕐᓂᕕᓪᓗ ᓄᓕᐊᖏᑦ ᐃᓚᒋᓗᒋᑦ.

¹⁷ ᐆᒪᔪᓕᒫᓪᓗ ᐊᓂᑎᖃᓯᐅᑎᓗᒋᑦ ᓇᒃᓴᕐᓯᒪᔭᑎᑦ ᑎᒥᖃᕐᑐᑦ ᑎᖕᒥᐊᓪᓗ, ᓂᕐᔪᑎᓪᓗ ᐹᕐᖑᕐᑐᓪᓗ ᓄᓇᒥ ᑕᒪᕐᒥᒃ ᐅᓄᕐᑐᓂᒃ ᕿᑐᕐᖏᐅᕐᐸᓪᓕᐊᓕᖁᓪᓗᒋᑦ ᓄᓇᒥ, ᐅᓄᕐᓯᔪᕐᔪᐊᖑᓕᖁᓪᓗᒋᑦ ᓄᓇᕐᔪᐊᓕᒫᒥ.”

¹⁸ ᑕᕝᕙ ᓄᐊ ᓄᓕᐊᖓᓗ ᐅᒥᐊᕐᔪᐊᕐᒥᑦ ᐊᓂᕗᑦ, ᐃᕐᓂᓂ ᐃᕐᓂᖏᑕᓗ ᓄᓕᐊᖏᑦ ᐃᓚᒋᓪᓗᒋᑦ.

¹⁹ ᐆᒪᔪᓕᒫᓪᓗᑦᑕᐅᖅ, ᐹᕐᖑᕐᑐᓪᓗ ᑕᒪᕐᒥᒃ, ᑎᖕᒥᐊᓕᒫᓪᓗ, ᓄᓇᒥᓗ ᐆᒪᔪᑦ ᐊᑐᓂᑦ ᐃᓚᒌᒃᓴᔭᐅᓂᑎᒃ ᒪᓕᒡᓗᒋᑦ ᐊᓂᒋᕗᑦ ᐅᒥᐊᕐᔪᐊᕐᒥᑦ.

ᓄᐊᑉ ᑐᓂᕐᕈᓯᕐᓂᖓ ᒎᑎᒧᑦ

²⁰ ᑕᕝᕙ ᓄᐊ ᑐᓂᕐᕈᓯᕐᕕᓂᐅᕐᐳᖅ ᐊᑕᓂᕐᒧᑦ, ᐆᒪᔪᓪᓗ ᑕᒪᕐᒥᒃ ᓴᓗᒪᓂᕋᕐᑕᐅᔪᑦ ᐱᕝᕕᒋᓪᓗᒋᑦ ᑎᖕᒥᐊᓂᓪᓗ ᓴᓗᒪᓂᕋᕐᑕᐅᔪᓂᒃ, ᑐᓂᕐᕈᓯᕐᐳᖅ ᐃᑯᐊᓚᑎᑦᓯᓪᓗᓂ ᑐᓂᕐᕈᓯᕐᕕᖕᒥ.

²¹ ᐊᑕᓂᐅᓪᓗ ᓁᒐᒥᒋᑦ ᑐᓂᕐᕈᑏᑦ ᑎᐱᑦᓯᐊᕆᒃᑐᑦ, ᐆᒻᒪᑎᒥᒍᑦ ᐃᓱᒪᓕᕐᐳᖅ, “ᓄᓇᕐᔪᐊᖅ ᓇᕐᕈᓇᕐᑎᓯᑎᓚᐅᕐᓯᒪᓂᐊᕈᓐᓃᕐᐸᕋ ᐃᓄᒃ ᐱᑦᔪᑎᒋᓗᒍ, ᐃᓅᑉ ᐆᒻᒪᑎᒥᒍᑦ ᐃᓱᒪᓕᐅᕈᑎᖏᑦ ᐃᓅᓱᖕᓂᕐᒥᓂᑦ ᐱᒋᐊᕐᓗᒋᑦ ᐱᐅᖏᑦᑐᐊᓘᒐᓗᐊᕐᒪᑕ; ᐊᓯᕈᐃᓚᐅᕐᓯᒪᓂᐊᕈᓐᓃᕐᐳᖓ ᐆᒪᔪᓕᒫᓂᒃ ᑍᒫᒃ ᐊᓯᕈᐃᓚᐅᕐᓂᑦᑐᑦ.

²² ᓄᓇᕐᔪᐊᖃᕐᓂᓕᒫᖓᓂ, ᐱᕈᕐᓰᓐᓇᕐᓂᐊᕐᐳᖅ ᑲᑎᑦᓯᕕᖃᕐᓗᓂᓗ, ᓂᒡᓚᓱᒃᐸᒡᓗᓂ ᐅᖅᑰᕙᒡᓗᓂᓗ, ᐊᐅᔭᖃᕐᓗᓂ ᐅᑭᐅᖃᕐᓗᓂᓗ, ᐅᓪᓗᖃᕐᓗᓂ ᐅᓐᓄᐊᖃᕐᓗᓂᓗ, ᑕᒪᒃᑯᐊ ᓄᖅᑲᕐᓂᐊᓐᖏᓚᑦ.”