ᒨᓯᓯ ᓯᕗᓪᓖᑦ 7 - ᐊᒡᓔᑦ ᐃᑦᔪᕐᖕᓁᑦᑐᑦ

ᓄᓇᕐᔪᐊᑉ ᐅᓕᕕᒃᔪᐊᖃᕐᓂᖓ

¹ ᐊᑕᓂᕐᓗ ᓄᐊᕐᒧᑦ ᐅᖃᕐᐳᖅ, “ᐅᒥᐊᕐᔪᐊᒧᑦ ᐃᑭᓕᕆᑦ, ᐃᓚᓕᒫᑎᑦ ᐃᓚᒋᓗᒋᑦ; ᖃᐅᔨᓯᒪᓕᕋᒪ ᓵᓐᓂ ᓯᓚᕐᔪᐊᓕᒫᒥ ᐃᓱᐊᕐᑐᒥᒃ ᐱᓇᓱᐊᕐᑐᑑᒐᕕᑦ ᒫᓐᓇ ᐃᓅᔪᓂ.

² ᓂᕐᔪᑎᓂᒃ ᓴᓗᒪᓂᕋᕐᑕᐅᔪᓂᒃ ᒪᕐᕉᑦᑕᕐᑎᓪᓗᒋᑦ 7ᓂᒃ ᐊᑦᔨᒌᖏᑦᑐᓂᒃ ᓇᒃᓴᕐᓂᐊᕐᐳᑎᑦ, ᐊᖑᑎᓂᒃ ᐊᕐᓇᓂᒡᓗ; ᐊᓯᖏᓐᓂᒡᓗ ᓂᕐᔪᑎᑦ ᒪᕐᕉᓈᕐᑎᕐᓗᒋᑦ ᓴᓗᒤᑦᑑᓂᕋᕐᑕᐅᔪᓂᒃ, ᐊᖑᑎᓂᒃ ᐊᕐᓇᓂᓗ.

³ ᑎᖕᒥᐊᓂᒃᑕᐅᖅ 7ᓂᒃ ᐊᑐᓂᑦ ᐊᑦᔨᒌᖏᑦᑐᓂᒃ ᒪᕐᕉᑦᑕᕐᑎᓪᓗᒋᑦ ᓇᒃᓴᕐᓂᐊᕐᐳᑎᑦ, ᐊᖑᑎᓂᒃ ᐊᕐᓇᓂᒡᓗ, ᑍᒤᓕᐅᕐᓗᑎᑦ ᑕᕝᕙ ᐆᒪᔪᓕᒫᑦ ᐊᑦᔨᒌᖏᑦᑐᑦ ᑎᖕᒥᐊᓪᓗ ᐆᒪᑎᑕᐅᖏᓐᓇᕈᓐᓇᕐᓂᐊᕐᐳᑦ ᐊᑦᔨᒥᖕᓂᒃ ᕿᑐᕐᖏᐅᒃᑲᓐᓂᕈᓐᓇᖁᓪᓗᒋᑦ ᓄᓇᕐᔪᐊᕐᒥ.

⁴ ᐅᓪᓗᑦ 7 ᓈᒃᐸᑕ ᓯᓚᓗᒃᑎᑦᓯᓛᕋᒪ ᓄᓇᒧᑦ ᐅᓪᓗᓂᒃ ᐅᓐᓄᐊᓂᒡᓗ 40ᓂᒃ; ᐆᒪᔪᓕᒪᑦ ᑕᒪᕐᒥᒃ ᓴᓇᓯᒪᔭᒃᑲ ᓄᓇᒦᑦᑐᑦ ᓄᖑᓪᓗᒋᑦ.”

⁵ ᓄᐊᓗ ᐱᓇᓱᐊᓚᐅᕐᐳᖅ ᑕᒤᓐᓂᒃ ᐊᑕᓂᐅᑉ ᑎᓕᓯᑦᔪᑎᒋᓚᐅᕐᑕᖏᑦ ᒪᓕᒡᓗᒋᑦ.

⁶ ᓄᐊ 600ᓂᒃ ᐊᕐᕌᒍᖃᕐᑎᓪᓗᒍ ᓄᓇ ᐅᓕᕕᒃᔪᐊᖃᓚᐅᕐᐳᖅ.

⁷ ᓄᐊᓗ ᓄᓕᐊᖓᓗ, ᐃᕐᓂᖏᑕᓗ ᓄᓕᐊᖏᑦ ᐃᓚᒋᓪᓗᒋᑦ, ᐅᒥᐊᕐᔪᐊᒧᑦ ᐃᑎᓚᐅᕐᐳᑦ, ᐅᓕᕕᒃᔪᐊᒥᑦ ᓴᐳᑎᔭᐅᖁᓪᓗᒋᑦ.

⁸ ᓂᕐᔪᑎᓕᒫᓪᓗ ᓴᓗᒪᓂᕋᕐᑕᐅᔪᑦ, ᓂᕐᔪᑎᓪᓗ ᓴᓗᒤᓐᓂᕋᕐᑕᐅᔪᑦ, ᑎᖕᒥᐊᓪᓗ, ᐹᕐᖑᕐᑐᓕᒫᓪᓗ ᓄᓇᒥ,

⁹ ᒪᕐᕉᓈᕐᑎᕐᓗᑎᒃ, ᐊᖑᑎᑦ ᐊᕐᓁᓪᓗ, ᐅᒥᐊᕐᔪᐊᒧᑦ ᐃᑎᓚᐅᕐᐳᑦ ᓄᐊ ᐃᓚᒋᓪᓗᒍ, ᒎᑎᐅᑉ ᑍᒫᒃ ᐱᖁᓚᐅᕐᒪᒍ.

¹⁰ ᐅᓪᓗᐃᑦ 7 ᓈᖕᒪᑕ ᓄᓇ ᐅᓕᕕᒃᔪᐊᕐᒧᑦ ᑎᑭᑕᐅᓕᕐᐳᖅ.

¹¹ ᓄᐊᓗ 600ᓂᒃ ᐊᕐᕌᒍᖃᓕᕐᑎᓪᓗᒍ, ᑕᖅᑭᐅᑉ ᐂᑉᐸᖓᑕ ᐅᓪᓗᖏᑕ 17ᖓᓐᓂ ᓄᓇᐅᑉ ᐊᑖᓂᑦ ᐃᑎᔪᒥ ᑰᒃᑐᓕᒫᑦ ᓇᐅᒃᑯᑐᐃᓐᓇᖅ ᓱᐱᓕᓚᐅᕐᐳᑦ, ᕿᓚᐅᓪᓗ ᐃᒐᓛᖏᑦ ᑕᒪᕐᒥᒃ ᒪᑐᐃᕐᓱᑎᒃ.

¹² ᓯᓚᓗᓕᓚᐅᕐᐳᕐᓗ ᐅᓪᓗᓂᒃ 40ᓂᒃ ᐅᓐᓄᐊᓂᒡᓗ 40ᓂᒃ.

¹³ ᐅᓪᓗᒥ ᑕᕝᕙᓂᑦᓮᓐᓇᖅ ᓄᐊᓗ ᐃᕐᓂᖏᓪᓗ ᓰᒻ, ᕼᐋᒻ ᔮᐱᑎᓗ, ᓄᐊᓪᓗ ᓄᓕᐊᖓ ᐃᕐᓂᖏᑕᓗ ᓄᓕᐊᖏᑦ ᐱᖓᓱᑦ ᐅᒥᐊᕐᔪᐊᒧᑦ ᐃᑎᕐᐳᑦ.

¹⁴ ᑖᒃᑯᐊ ᐆᒪᔪᐃᓪᓗ ᐊᑦᔨᒌᖏᑦᑐᑦ, ᐆᒪᔪᖁᑎᓪᓗ ᐊᑦᔨᒌᖏᑦᑐᑦ, ᐹᕐᖑᕐᑐᓂᒡᓗ ᑕᒤᓐᓂᒃ ᓄᓇᒥ ᖃᓄᐃᑦᑑᓂᑎᒃ ᒪᓕᒡᓗᒋᑦ, ᑎᖕᒥᐊᓪᓗ ᐊᑐᓂᑦ ᖃᓄᐃᑦᑑᓂᖏᑦ ᒪᓕᒡᓗᒋᑦ, ᑎᖕᒥᐊᑦ ᖃᓄᐃᑦᑐᑐᐃᓐᓁᑦ ᐊᑦᔨᒌᖏᑦᑐᑦ.

¹⁵ ᐅᒥᐊᕐᔪᐊᒧᑦ ᐃᑎᓚᐅᕐᐳᑦ ᓄᐊ ᐃᓚᒋᓪᓗᒍ, ᒪᕐᕉᑦᑕᕐᓗᑎᒃ ᐆᒪᔪᓕᒫᑦ ᐊᓂᕐᓵᕐᑐᕐᑐᑦ.

¹⁶ ᐃᑎᕐᑐᓪᓗ, ᐊᖑᑎᑦ ᐊᕐᓁᓪᓗ ᑎᒥᖃᕐᑐᓕᒫᑦ, ᐃᑎᓚᐅᕐᐳᑦ ᒎᑎᐅᑉ ᑍᒫᒃ ᐱᖁᓚᐅᕐᒪᒍ; ᐊᑕᓂᐅᓪᓗ ᑕᕝᕙ ᒪᑐᑦᔪᑎᕚ.

¹⁷ ᐅᓕᑉᐸᓪᓕᐊᖏᓐᓇᓚᐅᕐᐳᖅ ᓱᓕ ᐅᓪᓗᓂᒃ 40ᓂᒃ ᓄᓇᒥ; ᐃᒪᐅᑉ ᐃᑎᓯᕙᓪᓕᐊᓂᖓᓄᑦ ᐅᒥᐊᕐᔪᐊᖅ ᐳᒃᑕᑎᑕᐅᓕᕐᐳᖅ, ᓄᓇᐅᑉ ᖁᓛᓃᓕᕐᓗᓂ.

¹⁸ ᐃᒪᖅ ᐃᑎᓯᕙᓪᓕᐊᖕᒪᑦ ᐃᑎᔪᕐᔪᐊᖑᓕᓚᐅᕐᐳᖅ ᓄᓇᒥ; ᐅᒥᐊᕐᔪᐊᕐᓗ ᐳᒃᑕᓕᕐᐳᖅ ᐃᒫᓂ.

¹⁹ ᐃᒪᕐᔪᐊᓪᓗ ᐃᑎᓯᓗᐊᕐᓂᖓᓄᑦ ᖃᖅᑳᓗᐃᑦ ᐳᕐᑐᓂᕐᐹᑦ ᐊᒡᓛᑦ ᐅᓗᑦᔭᐅᕗᑦ ᕿᓚᐅᑉ ᐊᑖᓂ;

²⁰ ᐃᑎᓯᕙᓪᓕᐊᖏᓐᓇᓚᐅᕐᐳᕐᓗ ᖃᖅᑳᓗᐃᑦ ᐳᕐᑐᔪᑦ ᖁᓛᑎᒍᑦ, ᐅᓕᒡᓗᒋᑦ ᐆᒃᑐᕋᐅᑎᓂᒃ 15ᓂᒃ ᑭᐅᐱᑦᓯᓂᒃ ᐃᑎᓂᖃᓕᕐᓗᓂ.

²¹ ᑕᒪᕐᒥᒃ ᑎᒥᖃᕐᑐᑦ ᑐᖁᓚᐅᕐᐳᑦ ᓄᓇᕐᔪᐊᕐᒥ ᐊᐅᓚᕙᒃᑐᑦ; ᑎᖕᒥᐊᓪᓗ, ᐆᒪᔪᖁᑏᑦ, ᓄᔪᐊᕐᑐᓪᓗ, ᑲᑎᓐᖓᔪᐊᓘᕙᒃᑐᓪᓗ ᓄᓇᒥ, ᐃᓄᐃᓪᓗ ᑕᒪᕐᒥᒃ.

²² ᑕᒪᕐᒥᒃ ᓄᓇᒥ ᐸᓂᕐᑐᒥ ᕿᖓᕐᒥᒍᑦ ᐊᓂᕐᓵᕐᑐᕐᑐᑦ ᑐᖁᓚᐅᕐᐳᑦ.

²³ ᐊᑕᓂᐅᑉ ᐆᒪᔪᓐᓇᕐᑐᓕᒫᑦ ᓄᓇᕐᔪᐊᕐᒥ, ᐃᓄᐃᑦ, ᐆᒪᔪᑦ, ᐹᕐᖑᕐᑐᓪᓗ, ᑎᖕᒥᐊᓗ ᖃᖓᑕᕙᒃᑐᑦ; ᓄᖑᓚᐅᕐᐰᑦ ᓄᓇᒥ. ᓄᐊ ᐊᒥᐊᒃᑯᑑᓚᐅᕐᐳᖅ, ᐅᒥᐊᕐᔪᐊᕐᒦᖃᑎᖏᓪᓗ.

²⁴ ᐅᓪᓗᐃᓪᓕ 150 ᓈᓚᐅᕐᐳᑦ ᓱᓕ ᑎᓂᑉᐸᓪᓕᐊᓚᐅᕐᑎᓐᓇᒍ.