ᒨᓯᓯ ᓯᕗᓪᓖᑦ 50 - ᐊᒡᓔᑦ ᐃᑦᔪᕐᖕᓁᑦᑐᑦ

¹ ᑕᕝᕙ ᔫᓯᐱ ᐊᑖᑕᖓᑕ ᑮᓇᖓᓄᑦ ᐳᓪᓗᓂ, ᕿᐊᕕᒋᓕᕐᐹ, ᑯᓂᒃᓗᒍᓗ.

² ᔫᓯᐱᓗ ᐱᔨᒥᓂᒃ ᐋᓐᓂᐊᓯᐅᑎᓂᒃ ᑎᓕᓯᕗᖅ ᑐᖁᖓᔪᕐᓯᐅᑎᒥᒃ ᐊᑖᑕᓂ ᒥᖑᐊᕐᑕᐅᖁᓪᓗᓂᐅᒃ. ᑕᕝᕙ ᐋᓐᓂᐊᓯᐅᑏᑦ ᐃᓴᕆᐊᓕ ᑐᖁᖓᔪᕐᓯᐅᑎᒥᒃ ᒥᖑᐊᕐᐹᑦ;

³ ᐅᓪᓗᓂᒃ 40ᓂᒃ ᐅᑕᖅᑭᔭᕆᐊᖃᓚᐅᕐᐳᑦ, ᑕᒪᒃᑯᐊ ᑐᖁᖓᔪᕐᓯᐅᑎᒥᒃ ᒥᖑᐊᕐᑕᐅᔪᑦ ᐅᓪᓗᓂᒃ ᑍᒤᓪᓗᐊᕐᑐᓂᒃ ᐅᑕᖅᑭᔭᕆᐊᖃᕐᐸᖕᒪᑕ. ᐄᑦᔨᑉᑎᒥᐅᓪᓗ ᕿᒃᓵᒍᑎᒋᕚᑦ ᐅᓪᓗᓂᒃ 70ᓂᒃ.

⁴ ᐅᓪᓗᐃᓪᓕ ᕿᒃᓵᒡᕕᐅᔪᑦ ᐃᓱᓕᒻᒪᑕ, ᔫᓯᐱ ᐰᕉᑉ ᐊᖓᔪᖅᑳᖁᑎᖏᓐᓄᑦ ᐅᖃᕐᐳᖅ, “ᐃᓕᑦᓯᓐᓄᑦ ᖁᕕᐊᒋᔭᐅᒍᒪ, ᐊᖓᔪᖅᑳᑦᑎᓐᓄᑦ ᐰᕉᒧᑦ ᐅᖃᕆᐊᕐᑐᕆᑦᓯ, ᐅᖃᐅᑎᓗᒍᓗ,

⁵ ᐊᑖᑕᒪ ᐊᖏᒻᒪᕆᒃᑎᓚᐅᕐᒪᖓ, ᐅᖃᐅᑎᓪᓗᓂᖓ, ‘ᑐᖁᔭᕆᐊᒃᓯᒐᒪ: ᐃᓗᕕᕐᑕᐅᔪᒪᔪᖓ ᐃᓗᕕᖃᕐᕕᓕᐊᕆᓯᒪᔭᓐᓂ ᓄᓇᒥ ᑬᓇᓂᒥ, ᑍᑲᓂ ᐃᓗᕕᕐᑕᒃᓴᕆᕙᕐᒪ.’ ᒫᓐᓇ ᑍᒤᒻᒪᑦ ᐱᔪᓐᓇᕐᑎᓚᐅᓐᖓ, ᑕᑉᐸᐅᖓ ᐊᑖᑕᒐ ᐃᓗᕕᕆᐊᕐᑐᕐᓂᐊᕋᒃᑯ; ᑕᒪᐅᖓᓗ ᐅᑎᓛᕆᕗᖓ.”

⁶ ᐰᕉᑉ ᑭᐅᕚ, “ᑕᑉᐸᐅᖓ ᒪᔪᐊᓕᕆᑦ, ᐊᑖᑍᑦ ᐃᓗᕕᕆᐊᕐᑐᕐᓗᒍ, ᑍᒫᒃ ᐊᖏᒻᒪᕆᒃᑎᓯᒪᖕᒪᑎᑦ.”

⁷ ᑕᕝᕙ ᔫᓯᐱ ᒪᔪᐊᓕᕐᐳᖅ ᐊᑖᑕᓂ ᐃᓗᕕᕆᐊᕐᑐᕐᓗᒍ; ᐃᓚᖃᓚᐅᕐᐳᕐᓗ ᐰᕉᑉ ᐱᔨᖏᓐᓂᒃ ᑕᒤᓐᓂᒃ, ᐊᖓᔪᖅᑳᖁᑎᖏᓐᓂᒡᓗ ᐃᒡᓗᒥᐅᑕᖏᓐᓂᒃ, ᐄᑦᔨᑉᑎᐅᓪᓗ ᓄᓇᖓᑕ ᐊᖓᔪᖅᑳᖁᑎᓕᒫᖏᓐᓂᒃ ᑕᒤᓐᓂᒃ,

⁸ ᔫᓯᐱᐅᓪᓗ ᐃᒡᓗᒥᐅᖃᑎᓕᒫᖏᑦ ᑕᒪᕐᒥᒃ, ᖃᑕᓐᖑᑎᖏᓪᓗ, ᐊᑖᑕᖓᑕᓗ ᐃᒡᓗᒥᐅᖃᑎᓕᒫᖏᑦ ᐱᖃᑕᐅᓚᐅᕐᐳᑦ; ᕿᑐᕐᖓᖏᑕᓕ ᒥᑭᔫᑕᐅᓂᖏᑦ, ᓰᐱᖁᑎᖏᓪᓗ, ᐆᒪᔪᖁᑎᖏᓪᓗ ᕿᒪᒃᑕᐅᓚᐅᕐᐳᑦ ᓄᓇᒧᑦ ᒎᓯᓂᒧᑦ.

⁹ ᑕᑉᐸᐅᖓ ᒪᔪᐊᖃᑕᐅᓚᐅᕆᕗᑦ ᐊᖓᔪᖅᑳᕐᓯᐅᑏᑦ ᐊᒃᓴᓗᐊᓖᑦ ᕿᒻᒥᕐᔪᐊᕐᒦᑦᑐᓪᓗ; ᐃᖏᕐᕋᖃᑎᓕᒫᖏᑦ ᑲᑎᓪᓗᒋᑦ ᐃᓄᒐᓴᒡᔪᐊᖑᓚᐅᕐᐳᑦ.

¹⁰ ᓇᑎᕐᓇᒧᓪᓕ ᑎᑭᓐᓇᒥᒃ ᑍᔭᐅᔪᒧᑦ ᐊᑖᑎᐅᑉ ᓂᐊᖂᔭᒃᓴᓕᐅᕐᕕᖓᓂᒃ, ᔪᐊᕐᑕᓂᐅᑉ ᐅᖓᑖᓃᑦᑐᒧᑦ, ᑕᕝᕙᓂ ᕿᐊᔪᐊᓘᕗᑦ ᕿᒃᓵᖕᓂᕐᒧᓪᓗ ᐅᒡᒍᐊᕐᑐᐊᓘᓪᓗᑎᒃ; ᑕᕝᕙᓂᓗ ᔫᓯᐱ ᐅᓪᓗᓂᒃ 7ᓂᒃ ᓄᖅᑲᖓᑎᑦᓯᓚᐅᕐᐳᖅ ᕿᒃᓵᒍᑎᖃᕐᓗᑎᒃ ᐊᑖᑕᒥᖕᓂᒃ.

¹¹ ᑬᓇᓂᒥᐅᓪᓕ ᓄᓇᖃᕐᑐᑦ, ᑕᑯᒐᒥᒃ ᕿᒃᓵᒃᑐᓂᒃ ᓇᑎᕐᓇᒥ ᑍᔭᐅᔪᒥ ᐊᑖᑎᐅᑉ ᓂᐊᖂᔭᒃᓴᓕᐅᕐᕕᖓᓂ, ᐅᖃᕐᐳᑦ, “ᑕᕝᕙᓂ ᐄᑦᔨᑉᑎᒥᐅᓄᑦ ᕿᒃᓵᕕᒡᔪᐊᕐᕕᐅᕗᖅ.” ᑍᒤᒻᒪᑦ ᓄᓇ ᐊᑦᓯᕐᑕᐅᕗᖅ ᐊᐱᐅᓪ-ᒥᔅᕅᒥᒥᒃ; ᑖᓐᓇ ᔪᐊᕐᑕᓂᐅᑉ ᐅᖓᑖᓃᑦᑐᖅ.

¹² ᑕᕝᕙᓂ ᔧᑰᑉ ᐃᕐᓂᖏᑦ ᐱᓇᓱᐊᓚᐅᕐᐳᑦ ᐊᑖᑕᖓᑕ ᐱᓇᓱᐊᕐᑕᐅᖁᓚᐅᕐᑕᖏᓐᓂᒃ ᑖᑦᓱᒧᖓ;

¹³ ᐃᕐᓂᖏᑕᓗ ᐊᒡᔭᕐᐹᑦ ᓄᓇᒧᑦ ᑬᓇᓂᒧᑦ, ᐃᓗᕕᕐᓗᒍᓗ ᕾᕈᓱᖕᒧᑦ ᓇᑎᕐᓇᒥ ᒪᒃ-ᐲᓚᒦᑦᑐᒧᑦ, ᒪᒻᕆᐅᑉ ᐅᖓᑖᓃᑦᑐᒧᑦ, ᑖᓐᓇ ᐂᑉᕋᕼᐋᒻ ᓂᐅᕕᐊᕆᓚᐅᕐᑕᖓ ᐱᕈᕐᓰᕕᒃ ᐱᖃᓯᐅᑎᓪᓗᒍ ᐃᐸᕋᓐᒥᑦ ᕼᐃᑍᑎᒥᐅᑕᕐᒥᑦ, ᐃᓗᕕᕐᓯᕕᒃᓴᐅᖁᓪᓗᒍ.

¹⁴ ᔫᓯᐱᐅᑉ ᐊᑖᑕᓂ ᐃᓗᕕᕇᕋᒥᐅᒃ, ᐅᑎᓚᐅᕐᐳᖅ ᐄᑦᔨᑉᑎᒧᑦ ᖃᑕᓐᖑᑎᓂ ᐃᓚᒋᓪᓗᒋᑦ ᑕᒪᕐᒥᒡᓗ ᐃᓗᕕᕐᓯᔭᕐᑐᕐᑎᓪᓗᒋᑦ ᐊᑖᑕᒥᓂᒃ ᒪᓕᓚᐅᕐᑐᓕᒫᑦ ᐃᓚᒋᓪᓗᒋᑦ.

ᔫᓯᐱᐅᑉ ᖃᑕᓐᖑᑎᒥᓂᒃ ᐃᓱᒫᓗᖁᔨᖏᓐᓂᖓ

¹⁵ ᔫᓯᐱᐅᓪᓕ ᖃᑕᓐᖑᑎᖏᑦ ᖃᐅᔨᒪᓕᕋᒥᒃ ᐊᑖᑕᖓ ᑐᖁᖓᓕᕐᒪᑦ, ᐅᖃᕐᐳᑦ, “ᔫᓯᐱᐅᑉ ᐆᒥᒋᓂᐊᓕᕐᐹᑎᒍᑦ ᐊᑭᒋᐊᕐᓂᐊᓕᕐᐹᑎᒍᓪᓗ ᐱᐅᖏᑦᑐᒥᒃ ᐱᓂᐊᕐᓂᕆᓚᐅᕐᑕᕗᑦ ᒪᓕᒡᓗᒍ.”

¹⁶ ᑍᒤᒻᒪᑦ ᔫᓯᐱᒧᑦ ᑎᓕᓯᓚᐅᕐᐳᑦ ᐅᖃᐅᑦᔭᐅᖁᓪᓗᒍ, ᐅᖃᕐᓗᑎᒃ, “ᐊᑖᑕᕕᑦ ᑐᖁᓚᐅᖅᑳᕋᓂ ᐱᖁᓚᐅᕐᐹᑎᒍᑦ, ᐅᖃᕐᓗᓂ,

¹⁷ ‘ᔫᓯᐱ ᐅᖃᐅᑦᔭᐅᔪᒫᕐᐳᖅ, ᕿᓄᕕᒋᕙᒋᑦ ᐃᓱᒪᒋᔪᓐᓁᕕᖃᖁᓪᓗᑎᑦ ᐊᖓᔪᕕᑦ ᐊᔪᕐᑐᓕᓂᕆᓚᐅᕐᑕᖏᓐᓂᒃ, ᐃᓕᖕᓄᑦ ᐱᐅᖏᑦᑐᒥᒃ ᐱᓇᓱᐊᓚᐅᕐᒪᑕ.’ ᒫᓐᓇᓗ ᕿᓄᕕᒋᕙᑦᑎᒋᑦ, ᐃᓱᒪᒋᔪᓐᓁᕐᕕᒋᓚᐅᒃᑭᑦ ᐊᔪᕐᑐᓕᓂᕆᓚᐅᕐᑕᖏᓐᓂᒃ ᐊᑖᑕᕕᑦ ᒎᑎᖓᑕ ᐱᔨᖏᑦ.” ᔫᓯᐱᓗ ᕿᐊᕗᖅ ᑖᑦᓱᒧᖓ ᐅᖃᓪᓚᒃᑎᓪᓗᒋᑦ.

¹⁸ ᐊᖓᔪᖏᑕᑦᑕᐅᖅ ᐅᐸᒃᓗᒍ ᓵᖓᓄᑦ ᐹᒻᒪᒡᕕᒋᕚᑦ, ᐅᖃᕐᓗᑎᒡᓗ, “ᑕᑯᒋᑦ ᐃᓕᖕᓄᑦ ᐱᔨᐅᕗᒍᑦ.”

¹⁹ ᔫᓯᐱᐅᓪᓕ ᐅᖃᐅᑎᕔᑦ, “ᓯᕘᕋᖏᓪᓗᓯ ᐅᕙᓐᓂᒃ, ᒎᑎᐅᑉ ᐃᓂᖓᓃᓐᖏᓐᓇᒪ,

²⁰ ᐃᓕᑦᓯᓕ ᐃᓱᒪᖃᓚᐅᕋᓗᐊᕐᐳᓯ ᐱᐅᖏᑦᑐᒥᒃ ᐅᕙᓐᓄᑦ ᐱᓇᓱᐊᕈᒪᓪᓗᓯ; ᒎᑎᐅᓪᓕ ᑕᒪᓐᓇ ᐱᐅᔪᒧᑦ ᐋᖅᑭᒃᓯᒪᓚᐅᕐᐹ, ᐃᓄᐃᑦ ᐅᓄᕐᑐᕐᔪᐊᑦ ᐃᓅᑎᑕᐅᖁᓪᓗᒋᑦ, ᓲᕐᓗ ᐅᓪᓗᒥ ᑍᒤᒻᒪᑦ.

²¹ ᑍᒤᒻᒪᑦ, ᓯᕘᕋᖏᓪᓗᓯ; ᐅᕙᖓ ᓂᕿᒃᓴᖃᕐᑎᓐᓂᐊᕐᐸᑦᓯ ᕿᑐᕐᖓᓯᓗ.” ᑍᒤᓕᐅᕐᓗᓂ ᑐᓐᖓᓇᕐᑐᒥᒃ ᐅᖃᐅᑎᒃᑲᓐᓂᕐᐰᑦ ᒪᓂᒍᕐᑎᓪᓗᒋᓪᓗ.

ᔫᓯᐱᐅᑉ ᑐᖁᓂᖓ

²² ᔫᓯᐱ ᐄᑦᔨᑉᑎᒦᖏᓐᓇᓚᐅᕐᐳᖅ, ᐃᓚᓂ ᐊᑖᑕᖓᑕᓗ ᐃᒡᓗᒥᐅᖃᑎᖏᑦ; ᔫᓯᐱᓗ ᐊᕐᕌᒍᓂᒃ 110ᓂᒃ ᐃᓅᓚᐅᕐᐳᖅ.

²³ ᔫᓯᐱᓗ ᑕᑯᓚᐅᕐᐳᖅ ᐃᕗᕅᒥᐅᑉ ᕿᑐᕐᖓᖏᓐᓂᒃ ᐃᕐᖑᑕᒥᓂᒃ; ᒫᓇᓯᐅᓪᓗ ᐃᕐᓂᖓᑕ ᒪᑬᕆᐅᑉ ᕿᑐᕐᖓᖏᓐᓂᒃ ᐃᕐᓂᐊᖑᑎᓪᓗᒋᑦ ᑕᑯᓚᐅᕆᕗᖅ.

²⁴ ᔫᓯᐱᓗ ᖃᑕᓐᖑᑎᒥᓄᑦ ᐅᖃᕐᐳᖅ, “ᑐᖁᔭᕆᐊᒃᓯᒐᒪ; ᒎᑎᐅᓪᓕ ᑎᑭᕝᕕᒋᔪᒫᕐᐹᓯ, ᑕᕝᕙᓐᖓᓪᓗ ᓄᓇᒥᑦ ᐊᐅᓪᓚᕐᑎᑦᓱᒫᕐᐹᓯ ᓄᓇᒧᑦ ᐂᑉᕋᕼᐋᒧᑦ, ᐂᓴᑭᒧᓪᓗ, ᔧᑯᒧᓪᓗ ᐊᖏᕈᑎᒋᓚᐅᕐᑕᖓᓂ ᓄᓇᑖᖁᓪᓗᓯ.”

²⁵ ᑕᕝᕙ ᔫᓯᐱ ᐅᖃᕕᖁᔨᕗᖅ ᐃᓴᕆᐊᓕᐅᑉ ᑭᖑᕚᖏᓐᓂᒃ, ᐅᖃᕐᓗᓂ, “ᒎᑎᐅᑉ ᑎᑭᕝᕕᒋᔪᒫᕐᒪᓯ, ᑕᕝᕙ ᓴᐅᓂᒃᑲ ᓇᒃᓴᕆᐊᖃᕈᒫᕐᐸᓯ ᑕᒫᓐᖓᑦ ᐊᐅᓪᓚᓕᕈᑦᓯ.”

²⁶ ᑕᕝᕙ ᔫᓯᐱ ᑐᖁᕗᖅ, ᐊᕐᕌᒍᖃᓕᕐᓗᓂ 110ᓂᒃ; ᑐᖁᖓᔪᕐᓯᐅᑎᒧᓪᓗ ᒥᖑᐊᕐᐹᑦ, ᐃᒃᓕᕐᕕᖕᒧᓪᓗ ᐃᓕᓪᓗᒍ ᐄᑦᔨᑉᑎᒥ.