ᒨᓯᓯ ᓯᕗᓪᓖᑦ 48 - ᐊᒡᓔᑦ ᐃᑦᔪᕐᖕᓁᑦᑐᑦ

ᔧᑰᑉ ᓮᒻᒪᕐᑎᑦᓯᓂᖓ ᐃᕗᕅᒥᒥᒃ ᒫᓇᓯᒥᒡᓗ

¹ ᑕᒪᑐᒪ ᑭᖑᓂᖓᒍᑦ ᔫᓯᐱ ᐅᖃᐅᑦᔭᐅᕗᖅ, “ᑕᑯᒋᑦ, ᐊᑖᑍᑦ ᖃᓂᒪᓕᕐᐳᖅ”; ᑕᕝᕙ ᐃᕐᓃᖕᓂ ᒪᕐᕉᒃ ᐃᓚᒋᓪᓗᒋᒃ, ᒫᓇᓯ ᐃᕗᕅᒥᓗ ᐅᐸᒍᑎᕗᑦ.

² ᔧᑯᓗ ᐅᖃᐅᑦᔭᐅᕗᖅ, “ᑕᑯᒋᑦ ᐃᕐᓃᑦ ᔫᓯᐱ ᕾᓕᕐᐳᖅ ᐃᓕᖕᓄᑦ”; ᐃᓴᕆᐊᓕᓗ ᐊᒃᓱᕈᕐᓗᓂ ᒪᑭᓐᓇᓱᒃᑲᒥ ᐃᒃᓯᕙᓕᕐᐳᖅ ᐃᒡᓕᕐᒥ.

³ ᔧᑰᓪᓗ ᔫᓯᐱ ᐅᖃᐅᑎᕚ, “ᒎᑎ ᐊᔪᒐᖃᖏᑦᑐᖅ ᐅᕙᓐᓄᑦ ᓴᖅᑭᓚᐅᕐᒪᑦ ᓄᓇᒥ ᓚᔾᒥ ᑬᓇᓂᐅᑉ ᓄᓇᖓᓂ ᓮᒻᒪᕐᑎᓚᐅᕐᐹᖓᓗ,

⁴ ᐅᖃᐅᑎᓪᓗᖓᓗ, ‘ᑕᑯᒋᑦ, ᑭᖑᕚᒃᓴᖃᕐᑎᓐᓂᐊᕐᐸᒋᑦ ᐃᓄᒋᐊᒃᓯᕙᓪᓕᐊᑎᓪᓗᑎᓪᓗ, ᐃᓄᒐᓴᒃᔪᐊᓐᖑᕐᑎᑦᓱᒫᕐᐸᒃᑲ, ᓄᓇᓗ ᑕᒪᓐᓇ ᐃᓕᖕᓄᑦ ᓄᓇᑖᕆᔭᐅᑎᓐᓂᐊᕐᐸᕋ ᑭᖑᓂᕐᓂᓗ ᑭᖑᕚᕐᓄᑦ ᓄᓇᒋᔭᐅᔪᒫᕐᐳᖅ ᐃᓱᖃᖏᑦᑐᒧᑦ.’

⁵ “ᒫᓐᓇᓗ ᐃᕐᓃᒃᑭᒃ ᒪᕐᕉᒃ, ᐄᑦᔨᑉᑎᐅᑉ ᓄᓇᖓᓂ ᐃᕐᓂᕐᑖᕆᓚᐅᕐᑖᒃᑭᑦ ᑕᒪᐅᓐᖓᓚᐅᕐᑎᓐᓇᖓ, ᓇᖕᒥᓂᕆᓕᕐᐹᒃᑲᒃ; ᐃᕗᕅᒥ ᒫᓇᓯᓗ ᓇᖕᒥᓂᕆᓂᐊᓕᕐᐹᒃᑲᒃ, ᕉᐱᓂᑐᑦ ᓯᒥᐅᓂᑐᓪᓗ.

⁶ ᐃᕐᓂᕐᑖᕆᔪᒫᕐᑕᑎᓪᓕ ᑖᒃᑯᐊᒃ ᑭᖑᕐᖓᓂ ᓇᖕᒥᓂᕐᑖᕆᔪᒫᕐᐸᑎᑦ; ᑍᔭᐅᔪᒫᕐᐳᓪᓗ ᖃᑕᓐᖑᑎᖏᑎᑐᑦ ᑭᖑᕐᖑᑦᔨᔪᒃᓴᐅᖁᓪᓗᒋᑦ ᑖᒃᑯᖕᓇᓐᖓᑦ.

⁷ ᓄᓇᒥᓪᓕ ᐸᑖᓐᒥᑦ ᑎᑭᓐᓇᒪ, ᕅᒋᓕ ᑐᖁᓚᐅᕐᐳᖅ ᓴᓂᐊᓂ ᓇᔫᑎᑎᓪᓗᖓ ᓄᓇᒥ ᑬᓇᓂᒥ, ᐃᖏᕐᕋᑎᓪᓗᑕ ᓄᓇ ᐃᐸᕋᑕ ᓱᓕ ᐅᖓᓯᒋᓪᓗᑎᒍ ᑍᑯᓐᖓᕐᐸᓪᓕᐊᓕᕐᓗᑕ; ᑕᕝᕙᓂᓗ ᐃᓗᕕᓚᐅᕐᐸᕋ ᐃᐸᕋᑕᓕᐊᕆᐊᒥ ᐊᖅᑯᒻᒥ (ᑕᕝᕙ ᐱᑦᓕᐊᒥ).”

⁸ ᐃᓴᕆᐊᓕᐅᓪᓕ ᔫᓯᐱᐅᑉ ᐃᕐᓂᖏᒃ ᑕᑯᒐᒥᒋᒃ, ᐅᖃᕐᐳᖅ, “ᐅᑯᐊᒃ ᑭᓇᒃᑯᒃ?”

⁹ ᔫᓯᐱ ᐅᖃᕐᐳᖅ ᐊᑖᑕᒥᓄᑦ, “ᐅᑯᐊᒃ ᐃᕐᓃᒃᑲᒃ, ᒎᑎᐅᑉ ᑐᓂᓚᐅᕐᑕᖏᒃ ᑕᒫᓃᑎᓪᓗᖓ.” ᑖᓐᓇᓗ ᐅᖃᕐᐳᖅ, “ᕾᑎᓚᐅᒃᑭᒃ ᐅᕙᓐᓄᑦ, ᓮᒻᒪᕐᑎᓐᓂᐊᕋᒃᑭᒃ.”

¹⁰ ᐃᓴᕆᐊᓕᐅᓪᓕ ᐃᔨᖏᒃ ᑕᒃᐲᓕᓚᐅᕐᒪᑎᒃ ᐃᓄᑐᖃᐅᓂᕐᒧᑦ, ᑕᑯᑦᓯᐊᕈᓐᓁᓪᓕᕗᖅ. ᑕᕝᕙ ᔫᓯᐱᐅᑉ ᑖᑦᓱᒧᖓᕐᑎᑉᐰᒃ; ᑖᑦᓱᒪᓗ ᑯᓂᒃᓗᒋᒃ ᐃᕿᑉᐰᒃ.

¹¹ ᐃᓴᕆᐊᓕᓗ ᔫᓯᐱᒧᑦ ᐅᖃᕐᐳᖅ, “ᐃᓕᖕᓂᒃ ᑕᑯᓂᐊᕋᓱᒋᔪᓐᓃᓚᐅᕐᐳᖓ; ᑕᑯᒋᓪᓕ ᒎᑎᐅᑉ ᕿᑐᕐᖓᕐᓂᒃ ᐊᒡᓛᑦ ᑕᑯᑎᑉᐹᖓ.”

¹² ᑕᕝᕙ ᔫᓯᐱᐅᑉ ᔧᑰᑉ ᓵᖓᓂᑦ ᐲᕐᑎᓪᓗᓂᒋᒃ, ᐅᑯᓪᓗᓂ ᐹᒻᒪᒃᐳᖅ ᓇᑎᕐᒧᑦ ᑖᑦᓱᒪ ᓵᖓᓂ.

¹³ ᔫᓯᐱᐅᓪᓗ ᐃᕐᓃᖕᓂ ᐅᐸᒍᑎᑎᑉᐹᒃ, ᐃᕗᕅᒥ ᐃᓴᕆᐊᓕᐅᑉ ᓴᐅᒥᖓᓄᐊᕐᑎᑉᐹ, ᒫᓇᓯᓕ ᑕᓕᕐᐱᖓᓄᐊᕐᑎᓪᓗᒍ ᖃᓂᒋᔭᖓᓄᐊᕐᑎᑉᐹᒃ ᑖᑦᓱᒧᖓ.

¹⁴ ᐃᓴᕆᐊᓕᐅᓪᓕ ᑕᓖᖕᓂ ᐃᓴᒡᓗᒋᒃ ᑕᓕᕐᐱᖕᒥᓄᑦ ᓄᑲᕐᓯᐅᑉ ᐃᕗᕅᒥᐅᑉ ᓂᐊᖁᖓ ᐸᑎᒻᒥᓕᕐᐹ, ᓴᐅᒥᖕᒥᓄᓪᓗ ᐊᖓᔪᒃᓯᐅᑉ ᒫᓇᓯᐅᑉ ᓂᐊᖁᐊ ᐸᑎᒻᒥᓕᕐᓗᒍ, ᑕᓖᖕᓂ ᑭᐳᒃᑎᓪᓗᒋᒃ.

¹⁵ ᔫᓯᐱᓗ ᓮᒻᒪᕐᑎᑉᐹ, ᐅᖃᕐᓗᓂ, “ᒎᑎᐅᑉ ᐊᑖᑕᒪ ᐂᑉᕋᕼᐋᒻ ᐂᓴᑭᐅᓪᓗ ᒪᓕᓚᐅᕐᑕᖓᑕ, ᑖᓐᓇ ᒎᑎ ᐰᕐᓯᔨᒋᓚᐅᕋᒃᑯ ᐃᓅᓯᓕᒫᓐᓂ ᐅᓪᓗᒥᒧᑦ ᑎᑭᓪᓗᒍ,

¹⁶ ᐂᖏᓕᐅᓪᓗ ᓴᐳᑦᔨᔨᒋᓯᒪᔭᒪ ᐱᐅᖏᑦᑐᓂᑦ ᑕᒤᓐᓂᑦ, ᐅᑯᐊᒃ ᐃᓅᓱᒃᑑᒃ ᓮᒻᒪᕐᑎᓪᓕᒋᒃ! ᑖᒃᑯᓇᓂᓗ ᐊᑎᕋ ᑲᔪᓯᑎᑕᐅᓕ, ᓯᕗᓕᕐᒪᓗ ᐂᑉᕋᕼᐋᒻ ᐂᓴᑭᐅᓪᓗ ᐊᑎᖏᒃ; ᐅᓄᕐᓯᕙᓪᓕᐊᑎᒃᑭᑦ ᐃᓄᒐᓴᒡᔪᐊᓐᖑᓕᖁᓪᓗᒋᑦ ᑕᒫᓂ ᓄᓇᒥ.”

¹⁷ ᔫᓯᐱᓕ ᑕᑯᒐᒥ ᐊᑖᑕᖓᑕ ᑕᓕᕐᐱᖕᒥᓄᑦ ᐃᕗᕅᒥᐅᑉ ᓂᐊᖁᖓ ᐸᑎᒻᒥᖕᒪᒍ, ᐃᓱᐊᕐᓴᓐᖏᓚᖅ; ᐊᑖᑕᖓᑕᓗ ᑕᓕᕐᐱᐊ ᑎᒍᓪᓗᓂᐅᒃ, ᐃᕗᕅᒥᐅᑉ ᓂᐊᖁᖓᓂᑦ ᐲᕐᑎᑉᐹ ᐃᓕᖔᕐᓗᒍᓗ ᒫᓇᓯᐅᑉ ᓂᐊᖁᐊᓄᑦ.

¹⁸ ᔫᓯᐱᐅᓪᓗ ᐊᑖᑕᓂ ᐅᖃᐅᑎᕚ, “ᐊᑖᑖᒃ ᑍᒫᖑᖏᒻᒪᑦ; ᐅᓇ ᐊᖓᔪᒃᓯᐅᖔᕐᐳᖅ; ᑕᓕᕐᐱᖕᓄᑦ ᐸᑎᒻᒥᖔᓚᐅᕈᒃ.”

¹⁹ ᐊᑖᑕᖓᓕ ᑍᒫᒃ ᐱᔪᒪᓐᖏᓚᖅ, ᐅᖃᕐᓗᓂᓗ, “ᖃᐅᔨᒪᕗᖓ ᐃᕐᓃᒃ, ᖃᐅᔨᒪᕗᖓ; ᑖᑦᓱᒪᓐᖓᑦᑕᐅᖅ ᐃᓄᒋᐊᒃᑐᕐᔪᐊᑦ ᐱᔪᒫᕐᒪᑕ, ᐃᓄᒐᓴᒡᔪᐊᓐᖑᕈᒫᕐᓗᑎᒡᓗ; ᑭᓯᐊᓂᓕ ᐅᓇ ᓄᑲᖓ ᑖᑦᓱᒪᓐᖓᑦ ᐃᓄᒋᐊᖕᓂᕐᓴᐅᔪᒫᕐᐳᖅ, ᑭᖑᕚᖏᓪᓗ ᐃᓅᖃᑎᒌᒡᔪᐊᓐᖑᕈᒫᕐᓗᑎᒃ.”

²⁰ ᑕᕝᕙ ᐅᓪᓗᒥ ᑕᕝᕙᓂ ᑖᒃᑯᐊᒃ ᓮᒻᒪᕐᑎᓚᐅᕐᐰᑦ, ᐅᖃᕐᓗᓂ, “ᐃᓕᑦᓯᑎᒍᑦ ᐃᓴᕆᐊᓕ ᓮᒻᒪᕐᑎᑕᐅᓂᕋᕐᑕᐅᔪᒫᕐᐳᖅ, ᐅᖃᕐᓗᑎᒃ, ‘ᒎᑎᐅᑉ ᐃᕗᕅᒥᑐᑦ ᒫᓇᓯᑐᓪᓗ ᑍᒤᑎᓪᓕᓯ’”; ᑍᒫᒃ ᑕᕝᕙ ᔧᑰᑉ ᐃᕗᕅᒥ ᓯᕗᓪᓕᐅᑎᓚᐅᕐᐹ ᒫᓇᓯᒥᑦ.

²¹ ᑕᕝᕙ ᐃᓴᕆᐊᓕ ᐅᖃᕐᐳᖅ ᔫᓯᐱᒧᑦ, “ᑕᑯᒋᑦ ᑐᖁᔭᕆᐊᒃᓯᕗᖓ, ᒎᑎᐅᓪᓕ ᐃᓚᒋᓂᐊᕐᐹᑎᑦ, ᐅᑎᕐᑎᑦᓱᒫᕐᐹᑎᓪᓗ ᓯᕗᓕᕕᓂᕐᐱᑦ ᓄᓇᖓᓄᑦ.

²² ᓱᓕᓗ ᑐᓂᓯᕕᒋᕙᒋᑦ ᐊᖓᔪᑎᑦ ᑐᓂᓯᕕᒋᓇᒋᑦ ᖃᖅᑲᐅᑉ ᐊᑭᓐᓇᖓ ᐃᓕᖕᓄᑦ ᑐᓂᕙᕋ, ᐱᑖᕆᓚᐅᕐᑕᕋ ᐊᕐᓵᕐᓯᑦᔪᑎᒋᓪᓗᒍ ᐊᒧᕅᑎᑦ ᑭᖑᕚᖏᓐᓂᑦ ᓴᕕᒡᔪᐊᓐᓄᑦ ᐱᑎᒃᓯᓐᓄᓪᓗ.”