ᒨᓯᓯ ᓯᕗᓪᓖᑦ 46 - ᐊᒡᓔᑦ ᐃᑦᔪᕐᖕᓁᑦᑐᑦ

ᔧᑰᑉ ᐃᓚᒋᔭᖏᑕᓗ ᐄᑦᔨᑉᑎᒧᐊᕐᓂᖓᑦ

¹ ᑕᕝᕙ ᐃᓴᕆᐊᓕ ᐊᐅᓪᓚᓕᕐᐳᖅ ᐱᖁᑎᓕᒫᓂ ᓇᒃᓴᕐᓗᒋᑦ, ᐱᐊᕐᓯᐸᒧᓪᓗ ᑎᑭᓐᓇᒥ, ᑕᕝᕙᓂᓗ ᑐᓂᕐᕈᓯᕐᐳᖅ ᐃᑯᐊᓚᑦᓯᓪᓗᓂ ᐊᑖᑕᖓᑕ ᐂᓴᑭᐅᑉ ᒎᑎᖓᓄᑦ.

² ᒎᑎᐅᓪᓗ ᐃᓴᕆᐊᓕ ᐅᖃᓪᓚᒡᕕᒋᕚ ᑕᑯᑎᑦᔪᑎᒃᑯᑦ ᐅᓐᓄᐊᖑᑎᓪᓗᒍ, ᐅᖃᕐᓗᓂ, “ᔧᑰ, ᔧᑰ!” ᑖᓐᓇ ᑭᐅᕗᖅ, “ᐅᕙᓃᑉᐳᖓ.”

³ ᑕᕝᕙ ᐅᖃᕐᐳᖅ, “ᒎᑎᐅᕗᖓ, ᐊᑖᑕᕕᑦ ᒎᑎᒋᕚᖓ; ᓯᕘᕋᓂᐊᕐᓇᒃ ᑕᐅᓄᖓ ᐄᑦᔨᑉᑎᒧᐊᕆᐊᒃᓴᖅ, ᑕᕝᕙᓂ ᐃᓅᖃᑎᒌᒡᔪᐊᓐᖑᕐᑎᓐᓂᐊᕋᒃᑭᑦ.

⁴ ᐅᕙᖓ ᑕᐅᓄᖓ ᐄᑦᔨᑉᑎᒧᐊᖃᑎᒋᓂᐊᕐᐸᒋᑦ, ᐊᒻᒪ ᑕᒪᐅᖓ ᐅᑎᕐᑎᑦᓱᒫᕆᕙᒋᑦ; ᔫᓯᐱᐅᓪᓗ ᐊᒡᒐᖕᒥᓄᑦ ᐃᔩᒃᑭᒃ ᓯᑯᓐᖏᕐᑎᑦᓱᒫᕐᐹᒃ.”

⁵ ᑕᕝᕙ ᔧᑯ ᐱᐊᕐᓯᐸᒥᑦ ᐊᐅᓪᓚᓯᕗᖅ; ᐃᓴᕆᐊᓕᐅᓪᓗ ᐃᕐᓂᖏᑕ ᐊᑖᑕᑎᒃ ᔧᑯ ᐃᑭᑎᑉᐹᑦ, ᕿᑐᕐᖓᑎᒡᓗ ᓄᓕᐊᑎᒡᓗ ᑕᒪᕐᒥᒃ, ᐰᕉᑉ ᓇᒃᓴᕐᑕᐅᑎᓚᐅᕐᑕᖏᓐᓂ ᑲᓕᒐᕐᓂ ᐊᒃᓴᓗᐊᓕᖕᓂ ᐃᑭᒪᕕᒃᓴᖏᓐᓂ.

⁶ ᐃᒻᒧᒃᓯᐅᒐᖁᑎᑎᒡᓗ ᐱᖁᑎᓕᒫᑎᒡᓗ ᓇᒃᓴᓚᐅᕆᕔᑦ, ᑬᓇᓂᐅᑉ ᓄᓇᖓᓂ ᐱᑖᕆᓚᐅᕐᑕᑎᒃ, ᐄᑦᔨᑉᑎᒧᐊᕐᐳᑦ, ᔧᑯᓗ ᑭᖑᕚᓕᒪᓂᓗ ᑕᒪᕐᒥᒃ ᐃᓚᒋᓪᓗᒋᑦ.

⁷ ᐃᕐᓂᖏᑦ, ᐃᕐᖑᑕᖏᓪᓗ ᐊᖑᑎᑦ ᐸᓂᖏᓪᓗ ᐃᕐᖑᑕᖏᓪᓗ ᐊᕐᓁᑦ; ᑭᖑᕚᓕᒫᓂ ᑕᒪᕐᒥᒃ ᐃᓚᒋᓪᓗᒋᑦ ᐄᑦᔨᑉᑎᒧᐊᓚᐅᕐᐳᖅ.

⁸ ᐅᑯᐊ ᑕᕝᕙ ᐃᓴᕆᐊᓕᐅᑉ ᑭᖑᕚᖏᑦ ᐄᑦᔨᑉᑎᒧᐊᓚᐅᕐᑐᑦ, ᔧᑯᓗ ᐃᕐᓂᖏᑕᓗ ᐊᑎᖏᑦ; ᕉᐱᓂ ᔧᑰᑉ ᐊᖓᔪᒃᓯᕐᐹᖁᑎᖓ,

⁹ ᕉᐱᓂᐅᓪᓗ ᐃᕐᓂᖏᑦ: ᕼᐊᓅᒃ, ᐸᓪᓗ, ᕼᐃᔅᕋᓐ, ᑳᕐᒥᓗ.

¹⁰ ᓯᒥᐅᓂᐅᓪᓗ ᐃᕐᓂᖏᑦ: ᔨᒧᐃᐅᓪ, ᔭᒥᓐ, ᐅᕼᐋᑦ, ᔭᑭᓐ, ᔪᕼᐊᕆ, ᓴᐅᓕᓗ, ᐊᕐᓇᐅᑉ ᑬᓇᓂᒥᐅᑉ ᐃᕐᓂᖓ.

¹¹ ᓕᕔᑉ ᐃᕐᓂᖏᑦ: ᒌᕐᓲᓐ, ᑯᕼᐋᑦ, ᒥᕋᕆᓗ.

¹² ᔫᑕᐅᑉ ᐃᕐᓂᖏᑦ: ᐃᕆ, ᐅᓇᓐ, ᓰᓚ, ᐱᕆᔅ, ᔨᕋᓗ (ᐃᕆᓕ ᐅᓇᓐᓗ ᑐᖁᓚᐅᕐᐴᒃ ᑬᓇᓂᐅᑉ ᓄᓇᖓᓂ); ᐱᕆᔨᐅᓪᓗ ᐃᕐᓂᖏᒃ ᕼᐃᔅᕋᓐ ᕼᐊᒧᓪᓗ.

¹³ ᐃᓴᑳᕆᐅᑉ ᐃᕐᓂᖏᑦ: ᑑᓚ, ᐳᕙ, ᔭᓲᑉ ᓯᒻᕌᓐᓗ.

¹⁴ ᓯᐳᓗᓂᐅᑉ ᐃᕐᓂᖏᑦ: ᓯᕆᑦ, ᐃᓛᓐ, ᔮᓕᐅᓕᓗ.

¹⁵ (ᑖᒃᑯᐊ ᑕᕝᕙ ᓕᐊᑉ ᐃᕐᓂᕆᕔᑦ, ᔧᑯᒥᑦ ᐃᕐᓂᕐᑖᕆᓚᐅᕐᑕᖏᑦ ᓄᓇᒥ ᐸᑖᓐ-ᐊᕋᒥ, ᐸᓂᖃᕐᓗᓂᓗ ᑍᓇᒥᒃ; ᑕᒪᕐᒥᒃ ᐃᕐᓂᖏᑦ ᐸᓂᖏᓪᓗ ᑲᑎᓪᓗᒋᑦ 33ᖑᓚᐅᕐᐳᑦ).

¹⁶ ᒑᑎᐅᑉ ᐃᕐᓂᖏᑦ: ᔨᐱᐊᓐ, ᕼᐊᒋ, ᓲᓂ, ᐃᔅᐸᓐ, ᐃᕆ, ᐊᕋᑎ, ᐊᕆᓕᓗ.

¹⁷ ᐋᓱᕆᐅᑉ ᐃᕐᓂᖏᑦ: ᐃᒻᓇ, ᐃᔅᕙ, ᐃᔅᕕ, ᐱᕅᐊ, ᓇᔭᖓᓪᓗ ᓯᕋ. ᐱᕆᐊᓪᓗ ᐃᕐᓂᖏᑦ: ᕼᐃᐸᕐ, ᒪᓪᑬᐅᓪᓗ.

¹⁸ (ᑖᒃᑯᐊ ᑕᕝᕙ ᔨᐅᓪᐸᐅᑉ ᐃᕐᓂᖏᑦ, ᓔᐸᓂᐅᑉ ᓕᐊᒧᑦ ᐸᓂᖕᒥᓄᑦ ᐂᑦᑐᑎᒋᓚᐅᕐᑕᖓᒍᑦ; ᑖᒃᑯᐊ ᔧᑰᑉ ᐃᕐᓂᕆᓚᕐᐰᑦ ᑲᑎᓪᓗᒋᑦ 16ᖑᓚᐅᕐᐳᑦ ᕿᑐᕐᖓᕇᑦ).

¹⁹ ᕅᒋᓕᐅᑉ ᐃᕐᓂᖏᑦ, ᔧᑰᑉ ᓄᓕᐊᖓᑕ: ᐅᑯᐊᖑᕗᑦ ᔫᓯᐱ ᐱᓐᔭᒥᓂᓗ.

²⁰ ᔫᓯᐱᓗ ᐃᕐᓂᕐᑖᓚᐅᕐᐳᖅ ᐄᑦᔨᑉᑎᐅᑉ ᓄᓇᖓᓂ ᒫᓇᓯᒥᒃ ᐃᕗᕅᒥᒥᒡᓗ, ᐊᓯᓇᒃᑯᑦ, ᐸᑎᐱᐊᕋᐅᑉ ᑐᓂᕐᕈᓯᕐᑎᑦᓯᔨᐅᔫᑉ ᐆᓂᒥᐅᑕᐅᑉ ᐸᓂᖓᒍᑦ ᕿᑐᕐᖓᕐᑖᕆᓚᐅᕐᑕᖏᑦ.

²¹ ᐱᓐᔭᒥᓂᐅᓪᓗ ᐃᕐᓂᖏᑦ: ᐲᓚ, ᐱᑲᕐ, ᐊᓯᐱᐅᓪ, ᒋᕋ, ᓈᒪᓐ, ᐃᕼᐃ, ᕉᓴ, ᒧᐱᒻ, ᕼᐅᐱᒻ, ᐋᕐᑎᓗ.

²² (ᑖᒃᑯᐊᒃ ᕅᒋᓕᐅᑉ ᐃᕐᓂᖏᒃᑕ, ᔧᑯᒃᑯᑦ ᐃᕐᓂᕐᑖᕆᓚᐅᕐᑕᖏᑕ ᐃᓚᖏᑦ ᑲᑎᓪᓗᒋᑦ ᑕᒪᕐᒥᒃ 14ᖑᓚᐅᕐᐳᑦ).

²³ ᑖᓂᐅᑉ ᐃᕐᓂᖓ: ᕼᐅᓯᒻ.

²⁴ ᓈᑉᑕᓕᐅᑉ ᐃᕐᓂᖏᑦ: ᔭᔨᐅᓪ, ᒍᓂ, ᔨᔨᕆ, ᓯᓕᒥᓗ.

²⁵ (ᑖᒃᑯᐊ ᐱᓪᕼᐊᐅᑉ ᐃᕐᓂᕆᓚᐅᕐᐰᑦ ᓔᐸᓂᐅᑉ ᑐᓂᓚᐅᕐᑕᖓᑕ ᕅᒋᓕᒧᑦ ᐸᓂᖕᒥᓄᑦ, ᑖᒃᑯᐊᓗ ᐃᕐᓂᕐᑖᕆᓚᐅᕐᐰᑦ ᔧᑯᒥᑦ ᑲᑎᓪᓗᒋᑦ 7ᐅᓚᐅᕐᐳᑦ).

²⁶ ᑖᒃᑯᐊ ᑕᕝᕙ ᔧᑰᑉ ᐃᓚᖏᑦ ᐃᓚᒋᓚᐅᕐᑕᖏᑦ ᐄᑦᔨᑉᑎᒧᐊᕐᑎᓪᓗᒋᑦ, ᑖᒃᑯᐊ ᓇᖕᒥᓂᕆᓪᓗᒋᑦ ᑭᖑᕚᕆᓚᐅᕐᐰᑦ, ᔧᑰᑉ ᐅᑯᐊᖏᑦ ᐃᕐᓂᖏᑦᑕ ᓄᓕᐊᖏᑦ ᐃᓚᐅᑎᓐᓇᒋᑦ, ᑲᑎᓪᓗᒋᑦ ᑕᒪᕐᒥᒃ 66ᐅᓚᐅᕐᐳᑦ;

²⁷ ᔫᓯᐱᐅᓪᓕ ᐃᕐᓂᖏᒃ ᐄᑦᔨᑉᑎᒥ ᐃᕐᓂᕐᑖᕆᓚᐅᕐᑕᖏᒃ, ᒪᕐᕉᓚᐅᕐᐴᒃ; ᔧᑰᑉ ᐃᒡᓗᒥᐅᖃᑎᓕᒫᖏᑦ ᑕᒪᕐᒥᒃ ᑲᑎᓪᓗᒋᑦ ᐄᑦᔨᑉᑎᒧᐊᓚᐅᕐᑐᑦ 70ᐅᓚᐅᕐᐳᑦ.

ᔧᑰᑉ ᐃᓚᒋᔭᖏᑕᓗ ᐄᑦᔨᑉᑎᒦᓐᓂᖓᑦ

²⁸ ᔫᑕᓗ ᑎᓕᕚ ᓯᕗᓂᕐᒥᓂ ᔫᓯᐱᒧᐊᖁᓪᓗᒍ, ᖃᐅᔨᑎᑕᐅᔪᒪᓪᓗᓂ ᒎᓯᓂᓕᐊᕆᐊᑉ ᐊᖅᑯᑎᖓᓂᒃ; ᑕᕝᕙ ᓄᓇᒧᑦ ᒎᓯᓂᒧᑦ ᑎᑭᓚᐅᕐᐳᑦ.

²⁹ ᑕᕝᕙ ᔫᓯᐱ ᐊᒃᓴᓗᐊᓕᖁᑎᒥᓄᑦ ᐸᕐᓇᒃᑲᒥ ᐊᑖᑕᓂ ᐃᓴᕆᐊᓕ ᐅᐸᓕᕐᐹ ᓄᓇᒧᑦ ᒎᓯᓂᒧᑦ; ᑕᕝᕗᖓ ᐸᕐᕆᐊᕈᒪᓪᓗᒍ, ᑲᑎᒐᒥᐅᒡᓗ ᖁᖓᓯᖓᒍᑦ ᐃᕿᑉᐹ, ᕿᐊᓕᕐᐴᒡᓗ ᐃᕿᒻᒥᐅᑎᓪᓗᑎᒃ ᐊᑯᓂ.

³⁰ ᐃᓴᕆᐊᓕᓗ ᐅᖃᕐᐳᖅ ᔫᓯᐱᒧᑦ, “ᒫᓐᓇ ᑐᖁᔪᓐᓇᕐᓯᕗᖓ, ᑮᓁᑦ ᑕᑯᒐᒃᑯ ᖃᐅᔨᓪᓗᖓᓗ ᓱᓕ ᐆᒪᒐᕕᑦ.”

³¹ ᑕᕝᕙ ᔫᓯᐱ ᖃᑕᓐᖑᑎᒥᓄᑦ ᐊᑖᑕᖓᑕᓗ ᐃᒡᓗᒥᐅᖃᑎᖏᓐᓄᑦ ᐅᖃᕐᐳᖅ, “ᐰᕉᒧᐊᕐᓂᐊᕐᐳᖓ ᐅᖃᐅᑎᓗᒍᓗ, ‘ᖃᑕᓐᖑᑎᒃᑲ ᐊᑖᑕᒪᓗ ᐃᒡᓗᒥᐅᖃᑎᖏᑦ, ᓄᓇᒥ ᑬᓇᓂᒦᓚᐅᕐᑐᑦ ᐅᕙᓐᓄᑦ ᑎᑭᓯᒪᓕᕐᐳᑦ;

³² ᑖᒃᑯᐊ ᐊᖑᑏᑦ ᓰᐱᓕᕆᔨᐅᕗᑦ, ᐃᒻᒧᒃᓯᐅᒐᓕᕆᔨᐅᓯᒪᓪᓗᑎᒡᓗ; ᐆᒪᔪᖁᑎᒥᓂᒡᓗ ᐅᓄᕐᑐᓂᒃ, ᐊᓯᖏᓐᓂᒡᓗ ᐆᒪᔪᖁᑎᒥᓂᒃ ᐅᓄᖏᓐᓂᕐᓴᓂᒃ ᑕᒤᓐᓂᒃ ᐱᖁᑎᓕᒫᒥᖕᓂᒃ ᓇᒃᓴᓚᐅᕐᐳᑦ.’

³³ ᐰᕉᓪᓕ ᕾᖁᓕᕐᐸᓯ, ᐊᐱᕆᒃᐸᓯᓗ, ‘ᓱᓇᒥᒃ ᐱᓇᓱᐊᒐᖃᕐᐱᓰ?’

³⁴ ᑭᐅᔪᒃᓴᐅᕗᓯ, ‘ᐱᔨᐅᕗᒍᑦ ᐃᓕᖕᓄᑦ ᐊᑯᓂᓂᑦ ᑍᒪᓐᖓᑦ ᐃᓅᓱᒃᑑᓂᑦᑎᓐᓂᑦ ᒫᓐᓇᒧᑦ ᑎᑭᓪᓗᒍ ᐃᒻᒧᒃᓯᐅᒐᓕᕆᔨᐅᕗᒍᑦ, ᑕᒪᑦᑕ ᓯᕗᓕᕆᓚᐅᕐᑕᕗᓪᓗ,’ ᑍᒫᒃ ᑕᕝᕙᓂ ᓄᓇᒥ ᒎᓯᓂᒥ ᓄᓇᖃᕐᑎᑕᐅᔪᓐᓇᖁᓪᓗᓯ; ᑕᒪᕐᒥᒃ ᓰᐱᓕᕆᔨᓕᒫᑦ ᓇᕐᕈᓇᕐᑑᖕᒪᑕ ᐄᑦᔨᑉᑎᒥᐅᓄᑦ.”