ᒨᓯᓯ ᓯᕗᓪᓖᑦ 45 - ᐊᒡᓔᑦ ᐃᑦᔪᕐᖕᓁᑦᑐᑦ

ᔫᓯᐱᐅᑉ ᑭᓇᐅᓂᕐᒥᓂᒃ ᐅᖃᐅᑦᔨᓂᖓ ᐊᖓᔪᒥᓂᒃ

¹ ᑕᕝᕙ ᔫᓯᐱ ᐃᒻᒥᓂᒃ ᐱᓯᒪᔪᓐᓁᓪᓕᕗᖅ ᑕᕝᕙᓂ ᓇᔫᑎᔪᑦ ᑕᒪᕐᒥᒃ ᓵᖏᓐᓂ; ᐅᖃᕐᐳᖅ, “ᑕᕝᕙᓃᑦᑐᓕᒫᑦ ᐊᓂᓚᐅᕐᓕᑦ.” ᑕᕝᕙ ᔫᓯᐱ ᐊᑕᐅᓯᕐᒧᓪᓘᓐᓃᑦ ᓇᔪᕐᑕᐅᔪᓃᓚᐅᕐᐳᖅ ᐃᒻᒥᓂᒃ ᖃᐅᔨᔭᐅᑎᓕᕐᑎᓪᓗᒍ ᐊᖓᔪᒥᓄᑦ.

² ᓂᐱᖅᑯᕐᑐᓪᓗᓂᓗ ᕿᐊᓕᕐᐳᖅ, ᐄᑦᔨᑉᑎᒥᐅᓂᑦ ᐊᒡᓛᑦ ᑐᓵᔭᐅᓪᓗᓂ, ᐰᕉᑉ ᐃᒡᓗᒥᐅᖃᑎᖏᓐᓂᓪᓗ ᑐᓵᔭᐅᒋᓪᓗᓂ.

³ ᔫᓯᐱᓗ ᐅᖃᓕᕐᐳᖅ ᐊᖓᔪᒥᓄᑦ, “ᔫᓯᐱᐅᕗᖓ; ᐊᑖᑕᒐ ᓱᓕ ᐃᓅᕚ?” ᐊᖓᔪᖏᑕᓕ ᑭᐅᔪᓐᓇᓐᖏᓛᑦ, ᖃᓂᓐᖎᓗᐊᕐᓂᑯᒥᖕᓄᑦ ᖁᐊᕐᓵᖓᓕᕋᒥᒃ.

⁴ ᑕᕝᕙ ᔫᓯᐱᐅᑉ ᐊᖓᔪᓂ ᐅᖃᐅᑎᕔᑦ, “ᒪᐅᖓ ᖃᒡᓕᒋᐊᓚᐅᕆᑦᓯ.” ᑖᒃᑯᐊᓗ ᕾᖕᒪᑕ. ᐅᖃᕐᐳᖅ, “ᔫᓯᐱᐅᕗᖓ ᖃᑕᓐᖑᑎᓯ, ᑖᓐᓇᐅᕗᖓ ᓂᐅᕐᕈᑎᒋᓚᐅᕐᑕᓯ ᐄᑦᔨᑉᑎᒧᑦ.

⁵ ᒫᓐᓇᓕ ᑲᑉᐱᐊᓱᒃᑍᓕᒋᑦᓯ, ᐃᓕᑦᓯᓐᓂᒡᓘᓐᓃᑦ ᓂᓐᖓᐅᑎᓂᐊᕋᓯ, ᑕᒪᐅᖓ ᐅᕙᓐᓂᒃ ᓂᐅᕐᕈᑎᖃᓚᐅᕐᓂᓯ ᐱᑦᔪᑎᒋᓗᒍ; ᒎᑎᐅᓪᓕ ᓯᕗᓂᑦᓯᓐᓂ ᑎᓕᓚᐅᕐᐹᖓ ᐃᓄᓕᒫᓂᒃ ᐱᐅᓕᓯᔪᒪᓪᓗᓂ.

⁶ ᑳᖕᓇᕐᑐᕐᔪᐊᖃᓕᕐᒪᑦ ᐊᕐᕌᒍᖕᓂᒃ ᒪᕐᕉᖕᓂᒃ ᓄᓇᒥ; ᓱᓕᓕ ᐊᕐᕌᒍᓂᒃ ᑕᓪᓕᒪᓂᒃ ᐱᕈᕐᓰᕕᖕᒥ ᑲᓐᖓᕐᓱᐃᕕᒃᓴᐅᓂᐊᖏᒻᒪᑦ ᐱᕈᕐᑐᕕᓂᕐᓂᒡᓗ ᑲᑎᕐᓱᐃᕕᒃᓴᐅᓂᐊᕋᓂ.

⁷ ᒎᑎᐅᓪᓕ ᓯᕗᓂᑦᓯᓐᓂ ᑕᒪᐅᖓ ᑎᓕᓚᐅᕐᐹᖓ ᓄᓇᒥ ᑕᒫᓂ ᐊᓐᓇᖁᓪᓗᓯ, ᐃᓅᔪᓐᓇᖁᓪᓗᓯᓗ ᐊᖏᔪᕐᔪᐊᒥᒡᓗ ᓴᐳᑎᔭᐅᖁᓪᓗᓯ.

⁸ ᑕᕝᕙ ᐃᓕᑦᓯᓐᓂᐅᖏᑦᑐᖅ ᑕᒪᐅᖓ ᑎᓕᔭᐅᓚᐅᕐᐳᖓ, ᒎᑎᐅᓪᓕ; ᑖᑦᓱᒪᓗ ᐊᑖᑕᒋᔭᐅᑎᓕᓚᐅᕐᐹᖓ ᐰᕉᒧᑦ, ᐃᒡᓗᒥᓄᓪᓗ ᐊᖓᔪᖅᑳᓐᖑᕐᑎᓪᓗᓂᖓ ᐄᑦᔨᑉᑎᐅᓪᓗ ᓄᓇᓕᒫᖓᓄᑦ ᑕᒤᓐᓄᑦ ᐊᐅᓚᑦᓯᔨᓐᖑᕐᑎᓪᓗᓂᖓ.

⁹ “ᐊᑍ ᑐᐊᕕᕐᓗᓯ ᐊᑖᑕᒐ ᐅᐸᓕᕐᓯᐅᒃ ᐅᖃᐅᑎᓗᒍᓗ, ‘ᔫᓯᐱ ᐃᕐᓃᑦ ᐅᖃᕐᐳᖅ, ᒎᑎᐅᑉ ᐊᖓᔪᖅᑳᓐᖑᕐᑎᓯᒪᕚᖓ ᐄᑦᔨᑉᑎᐅᑉ ᓄᓇᓕᒫᖓᓄᑦ ᑕᒤᓐᓄᑦ; ᑕᒪᐅᖓ ᐅᕙᓐᓄᑦ ᕾᓚᐅᕆᑦ, ᐊᑯᓂᓕᑦᑍᓕᓗᑎᑦ;

¹⁰ ᓄᓇᒥ ᒎᓯᓂᒥ ᓄᓇᖃᕐᓂᐊᕐᐳᑎᑦ ᖃᓂᒋᔭᓐᓃᓐᓂᐊᕋᕕᑦ, ᕿᑐᕐᖓᑎᓪᓗ, ᐃᕐᖑᑕᑎᓪᓗ, ᓰᐱᖁᑎᑎᑦ, ᐆᒪᔪᖁᑎᑎᓪᓗ, ᐱᖁᑎᑎᓪᓗ ᑕᒪᕐᒥᒃ;

¹¹ ᑕᕝᕙᓂ ᓂᕿᒃᓴᖃᕐᑎᓐᓂᐊᕐᐸᒋᑦ, ᓱᓕ ᐊᕐᕌᒍᑦ ᑳᖕᓇᕐᑐᕐᔪᐊᖑᓂᐊᕐᑐᑦ ᑕᓪᓕᒪᐅᖕᒪᑕ; ᐃᕝᕕᑦ ᐃᒡᓗᒥᐅᖃᑎᑎᓪᓗ, ᓇᔪᕐᑎᓕᒫᑎᓪᓗ ᐊᔪᕐᓴᓕᖁᓇᓯ.’

¹² “ᐃᓕᑦᓯ ᓇᖕᒥᓂᖅ ᑕᑯᒐᑦᓯᓐᖓ, ᐱᓐᔭᒥᓂᐅᓪᓗ ᓄᑲᕐᒪ ᓇᖕᒥᓂᖅ ᑕᑯᓪᓗᓂᖓ, ᑕᕝᕙ ᐅᕙᖓ ᓇᖕᒥᓂᖅ ᖃᓂᓐᓄᖅ ᐅᖃᓪᓚᒃᐳᖓ ᐃᓕᑦᓯᓐᓄᑦ.

¹³ ᐊᑖᑕᒐ ᐅᖃᐅᑎᔭᒃᓴᕆᕙᓯ ᑕᒫᓂ ᐄᑦᔨᑉᑎᒥ ᐊᖏᔪᒥᒃ ᐅᐱᒋᔭᐅᓂᓐᓂᒃ, ᑕᒤᓐᓂᒡᓗ ᑕᑯᓯᒪᔭᑦᓯᓐᓂᒃ; ᑐᐊᕕᕐᓗᓯ ᐊᑖᑕᒐ ᑕᒪᐅᓐᖓᐅᑎᓂᐊᓕᕐᐸᓯ.”

¹⁴ ᑕᕝᕙ ᓄᑲᓂ ᐱᓐᔭᒥᓂ ᖁᖓᓯᖓᒍᑦ ᐃᕿᑉᐹ ᕿᐊᓕᕐᓗᓂᓗ; ᐱᓐᔭᒥᓂᑦᑕᐅᖅ ᕿᐊᒋᕗᖅ ᖁᖓᓯᕐᒥᒍᑦ ᐃᕿᒻᒥᐅᑎᓪᓗᑎᒃ.

¹⁵ ᑕᕝᕙ ᐊᖓᔪᓕᒫᓂ ᑯᓂᒃᓗᒋᑦ ᕿᐊᖃᑎᒋᖃᑦᑕᓕᕐᐰᑦ; ᑭᖑᓂᖓᒍᓪᓗ ᐊᖓᔪᖏᑕ ᐅᖃᖃᑎᒋᓕᕐᐹᑦ.

¹⁶ ᐰᕉᓪᓕ ᐃᒡᓗᖓᓂᑦ ᑐᓴᐅᒪᓕᕐᐳᑦ ᐅᖃᕐᑐᖃᕐᒪᑦ, “ᔫᓯᐱᐅᑉ ᐊᖓᔪᖏᑦ ᑎᑭᑉᐳᑦ,” ᑕᕝᕙ ᐰᕉᑉ ᐱᔨᓕᒫᖏᓪᓗ ᑕᒪᕐᒥᒃ ᖁᕕᐊᓲᑎᖃᓕᕐᐳᑦ ᑕᒪᑐᒥᖓ.

¹⁷ ᐰᕉᓪᓗ ᔫᓯᐱ ᐅᖃᐅᑎᕚ, “ᐊᖓᔪᑎᑦ ᐅᖃᐅᑎᒃᑭᑦ, ‘ᐃᒤᓕᐅᕐᑐᒃᓴᐅᕗᓯ: ᐆᒪᔪᖁᑎᓯ ᓇᖕᒥᕐᑐᕐᓗᒋᑦ ᓄᓇᒧᑦ ᑬᓇᓂᒧᑦ ᐅᑎᓕᕆᑦᓯ;

¹⁸ ᐊᑖᑕᓯ ᐃᒡᓗᒥᐅᖃᑎᓕᒫᓯᓗ, ᑕᒪᐅᖓ ᐅᕙᓐᓄᑦ ᕾᓕᕆᑦᓯ, ᑕᕝᕙ ᐄᑦᔨᑉᑎᐅᑉ ᓄᓇᖓᑕ ᐱᐅᓂᕐᐹᖓᓂ ᓄᓇᑖᕐᑎᓐᓂᐊᕐᐸᑦᓯ, ᓂᕆᖃᑦᑕᕐᓂᐊᕋᑦᓯ ᓄᓇᐅᑉ ᐱᕈᕐᑎᑕᕕᓂᖏᓐᓂᒃ ᐱᐅᔪᓂᒃ.’

¹⁹ ᐱᖁᔨᔪᒃᓴᐅᒋᕗᑎᑦ ᐃᒫᒃ, ‘ᐃᒤᓕᐅᕐᑐᒃᓴᐅᕗᓯ: ᐊᒃᓴᓗᐊᓕᖕᓂᒃ ᑲᓕᒐᕐᓂᒃ ᓇᒃᓴᕐᓂᐊᕐᐳᓯ ᑕᒫᓐᖓᑦ ᐄᑦᔨᑉᑎᐅᑉ ᓄᓇᖓᓂᑦ ᕿᑐᕐᖓᑦᓯᓐᓄᑦ ᓄᓕᐊᑦᓯᓐᓄᓪᓗ ᐃᓂᒃᓴᐅᓂᐊᕐᑐᓂᒃ, ᐊᑖᑕᓯᓗ ᓇᒃᓴᕐᓗᒍ, ᑕᒪᐅᖓ ᕾᔪᒃᓴᐅᕗᓯ.

²⁰ ᐱᖁᑎᓯ ᐊᓐᓂᕆᑦᑍᓕᓯᐅᒃ ᐃᓱᒪᒋᖏᒻᒪᕆᒡᓗᒋᑦ, ᐄᑦᔨᑉᑎᐅᑉ ᓄᓇᖓᓂ ᐱᐅᓂᕐᐹᖑᔪᑦ ᑕᒪᕐᒥᒃ ᐱᒋᓛᕋᑦᓯᐅᒃ.’”

²¹ ᑕᕝᕙ ᐃᓴᕆᐊᓕᐅᑉ ᐃᕐᓂᖏᑦ ᑍᒤᓕᐅᓚᐅᕐᐳᑦ; ᔫᓯᐱᐅᓪᓗ ᑐᓂᓯᕕᒋᕔᑦ ᑲᓕᒐᕐᓂᒃ ᐊᒃᓴᓗᐊᓕᖕᓂᒃ, ᐰᕉᑉ ᐱᖁᔨᓯᒪᓂᖓ ᒪᓕᒡᓗᒍ, ᐃᖏᕐᕋᑎᓪᓗᒋᓪᓗ ᑕᖁᐊᒃᓴᖏᓐᓂᒃ ᑐᓂᓯᕕᒋᕔᑦ.

²² ᐊᑐᓂᓪᓗ ᑕᒪᕐᒥᒃ ᐊᓐᓄᕌᒃᓴᖏᓐᓂᒃ ᑐᓂᓯᕕᒋᕔᑦ; ᐱᓐᔭᒥᓂᓕ ᑐᓂᓯᕕᒋᕚ ᓯᐅᓪᕕᕆᓂᒃ 300ᓂᒃ ᑮᓇᐅᔭᓂᒃ ᐊᓐᓄᕌᓂᒡᓗ ᑕᓪᓕᒤᕐᑐᕐᓗᒋᑦ ᐊᑎᔭᒃᓴᖏᓐᓂᒃ.

²³ ᐊᑖᑕᒥᓄᓪᓕ ᒪᑯᓂᖓ ᓇᒃᓯᐅᑦᔨᓚᐅᕐᐳᖅ: ᓯᐅᑎᖅᑯᕐᑐᔪᓂᒃ ᖁᓕᓂᒃ ᓇᖕᒪᒃᑐᓂᒃ ᐄᑦᔨᑉᑎᐅᑉ ᐱᖁᑎᖏᓐᓂᒃ ᐱᐅᔪᓂᒃ, ᓯᐅᑎᖅᑯᕐᑐᔪᓪᓗ ᐊᕐᓇᓪᓗᖏᓐᓂᒃ ᓂᐊᖂᔭᒃᓴᓂᒃ ᓇᖕᒪᒃᑐᓂᒃ ᖁᓕᓂᒃ, ᓂᐊᖂᔭᓂᒡᓗ, ᐊᑖᑕᖓᑕᓗ ᐃᖏᕐᕋᓕᕈᓂ ᑕᖁᐊᒃᓴᖏᓐᓂᒃ.

²⁴ ᑕᕝᕙ ᐊᖓᔪᓂ ᐊᐅᓪᓚᕐᑎᓚᐅᕐᐰᑦ, ᐊᐅᓪᓚᓕᕐᒪᑕᓗ ᐅᖃᐅᑎᕔᑦ, “ᐊᖅᑯᑎᑦᓯᓐᓂ ᐂᕙᐅᑎᑦᑍᓕᒋᑦᓯ.”

²⁵ ᑕᕝᕙ ᐄᑦᔨᑉᑎᒥᑦ ᒪᔪᐊᓚᐅᕐᐳᑦ, ᑎᑭᓪᓗᑎᒡᓗ ᓄᓇᒧᑦ ᑬᓇᓂᒧᑦ ᐊᑖᑕᒥᖕᓄᑦ ᔧᑯᒧᑦ.

²⁶ ᐅᖃᐅᑎᕚᓪᓗ, “ᔫᓯᐱ ᓱᓕ ᐃᓅᕗᖅ, ᐊᖓᔪᖅᑳᖑᓕᕐᓗᓂᓗ ᐄᑦᔨᑉᑎᐅᑉ ᓄᓇᖓᓄᑦ ᑕᒤᓐᓄᑦ.” ᑖᑦᓱᒪᓕ ᐆᒻᒪᑎᖓ ᐊᐅᓚᑦᔭᒃᑕᐅᓐᖏᓚᖅ, ᐅᒃᐱᕆᖏᓐᓇᒥᒋᑦ.

²⁷ ᔫᓯᐱᐅᓪᓕ ᐅᖃᐅᓯᕕᓂᓕᒫᖏᓐᓂᒃ ᐅᖃᐅᑎᖕᒪᑦᔪᒃ, ᐅᖃᐅᓯᕆᓚᐅᕐᑕᖏᓐᓂᒃ ᑖᒃᑯᓄᖓ, ᐊᒃᓴᓗᐊᓖᓪᓗ ᑲᓕᒊᑦ ᑕᑯᒐᒥᒋᑦ ᔫᓯᐱᐅᑉ ᑐᔫᑎᒋᓚᐅᕐᑕᖏᑦ ᑖᑦᓱᒧᖓ ᐃᖏᕐᕋᓕᕈᓂ ᐊᑐᒐᒃᓴᕆᓛᕐᑕᖏᑦ, ᑕᕝᕙ ᐊᑖᑕᖓᑦᑕ ᔧᑰᑉ ᐊᓂᕐᓂᖓ ᐆᒻᒪᓕᕐᐳᖅ;

²⁸ ᐃᓴᕆᐊᓕᓗ ᐅᖃᕐᐳᖅ, “ᓈᒻᒪᒃᓯᕗᖓ; ᐃᕐᓂᕋ ᔫᓯᐱ ᓱᓕ ᐆᒪᕗᖅ; ᐊᐅᓪᓚᕐᓗᖓ ᑕᑯᔭᕐᑐᕐᓂᐊᕐᐸᕋ ᑐᖁᓚᐅᖅᑳᕐᓇᖓ.”